SANTIAGO 3 - Chatino Tataltepec

Cua'a na xi ji'i̱ cha' nu chcui' na

¹ Cu'ma̱ tya'a ngusñi na cha' ji'i̱ Cristo, ná tso'o si tyu̱u̱ tsa tya'a ma̱ culu'u ma̱ ji'i̱ tya'a ñati̱ ma̱; cuayá' xti ti na caca na mstru nu culu'u cha' ji'i̱ ycui' Ndyosi ji'i̱ ngu' tya'a na. Cua jlo ti' ma̱ cha' lye tsa ndi'i̱ loo ngu' ña'a̱ ngu' ji'na, bi' cha' yala tsa chcui' ngu' ji'na si xñi na cña cha' culu'u na ji'i̱ ngu' tya'a na.

² Chañi laca cha' ntsu'u quiya' lcaa na ndyu'u tsaa tu'ba na lo'o nchcui' na lo'o tya'a ñati̱ na; ná ntsu'u ni sca ñati̱ nu bilya tyu'u tsaa tu'ba tsiya' ti, nu lo'o nchcui' ngu' lo'o tya'a ñati̱ ngu'. Si ntsu'u ñati̱ nu nchca ji'i̱ cua'a ji'i̱ cha' nu nchcui' ycui' ca ngu', ñati̱ nu tyucui tyiquee tsiya' ti laca ngu' bi'. Ná tyiquee' taca cua'a ngu' bi' ji'i̱ ña'a̱ tsaca ngu', si jua'a̱; pana tucui tsa laca cha' cua'a na ji'i̱ ycui' ca na, cha' ná chcui' na cha' cuxi.

³ Ndi'ya̱ ndu'ni na lo'o sca cuayu: nsta na chcua̱ tyu tu'ba ni', cha' li' taca culo na cña ji'i̱ ni', cha' tsaa ni' lo'o na macala su nti' na cha' tsaa na.

⁴ Xa' ña'a̱ ndu'ni ngu' lo'o nclya' ngu' sca yaca ni'i̱: nu ñati̱ nu laca loo ji'i̱ yaca ni'i̱ ni, lo'o cala' ngu' sca ya' piti nu ntucua nde siyu' yaca ni'i̱ bi', taca ji'i̱ ngu' tsalo'o ngu' ji'i̱ macala su nti' ngu' cha' tsaa ngu' lo'o. Masi tonu tsa yaca ni'i̱ bi', masi lye tsa ndyaca cui'i̱ nu ndyalo'o ji'i̱, taca ji'i̱ ngu' tsalo'o ngu' ji'i̱ macala su nti' ngu' tsaa ngu'.

⁵ La cui' jua'a̱ laca lo'o sca cha' nu nchcui' na; masi xca ti cha' laca bi' nti' na, pana quiña'a̱ tsa cha' tlyu nchcui' na ntsu'u quiya'. Tucui tsa laca cha' cua'a na ji'i̱ tu'ba na, cha' ná chcui' na cha' cuxi jua'a̱. Lo'o jua'a̱ quiña'a̱ tsa cha' cuxi taca cua'ni sca cha' nu chcui' na; ñi'ya̱ laca cha' xti ti quii' nti' cha' chca'a̱ quii' ji'i̱ quixi̱' tonu, quiña'a̱ tsa su tyaqui̱ quixi̱' li'.

⁶ Ñi'ya̱ laca sca quii', jua'a̱ laca sca cha' nu chcui' na; xqui'ya bi' taca xana chaca chalyuu nu cuxi tsa ji'na, nu lo'o cua ndyatí̱ nu cha' cuxi bi' ndyaa nde ne' cresiya ji'na. Xana cañi cha' cuxi bi' tyucui ña'a̱ na li'. Xqui'ya sca cha' nu chcui' ti na, ndyaca'a̱ quii' li'; lo'o nu quii' bi' ni, nde ca bilyaa tsiya' ti ndyu'u bi' lijya̱ cañi lcaa su ndi'i̱ na.

⁷ Taca ji'i̱ ñati̱ chalyuu cua'ni masu ji'i̱ lcaa lo na'ni tyaala, masi na'ni nu ndya'a̱ quiya' ti, masi na'ni nu ndyacui cua̱, masi na'ni nu sube' ne' ni' lo yuu, masi na'ni nu ntsu'u lo tyujo'o; na cua ndyu'ni masu ñati̱ ji'i̱ lcaa lo na'ni bi'.

⁸ Pana cha' nu nchcui' na ni, ná caja ñi'ya̱ nu cua'ni masu na ji'i̱, cha' nga'aa chcui' na cha' cuxi lo'o ñati̱. Cuxi tsa laca tu'ba na, ná nchca ji'na cua'a na ji'i̱ ycui' ca na. Ñi'ya̱ laca hitya tyaala nu ntsu'u tu'ba cuaña tyaala, jua'a̱ nti' tu'ba na, cha' ntsu'u tsa cha' cuxi nu nchcui' na.

⁹ Tucua lo cha' nchcui' na, cha' ndyu'ni tlyu na ji'i̱ ycui' nu Xu'na na, la cui' Ndyosi Sti na; lo'o jua'a̱ nsta na qui'ya ji'i̱ tya'a ñati̱ na, masi ngüiñá ycui' Ndyosi ji'i̱ lcaa ñati̱ chalyuu na cha' laca na ñi'ya̱ ña'a̱ ycui' Ni.

¹⁰ La cui' tyuu tu'ba na ndyu'u lcaa cha' nu nchcui' na, masi cha' tso'o nu nchcui' na lo'o ycui' Ndyosi, masi cha' cuxi nu nchcui' na lo'o tya'a ñati̱ na. Cu'ma̱ tya'a ngusñi na cha' ji'i̱ Cristo, ná tso'o cha' ndyaca jua'a̱.

¹¹ Si'i sca ti tyuu pilya ntyucua hitya tso'o stu'ba ti lo'o ntyucua hitya cñi'.

¹² Jua'a̱ lo'o yaca si'yu ni; ná taca tyu'u ntsati̱ ji'i̱ yaca quixuu, ni ná taca tyu'u quixuu ji'i̱ yaca ja'ba, cha' ná ca quixa' cha'. Ná caja hitya nu tso'o co'o na ca su ntyucua hitya cñi'.

Nu lo'o chañi cha' tso'o tsa nchca cuayá' ti' na scaa cha'

¹³ Nu lo'o nti' ma̱ cha' tso'o tsa nchca ji'i̱ ma̱ nchcui' ma̱, cha' tso'o tsa nduna ma̱ scaa cha' nu nda ñati̱ lo'o ma̱, li' xcui' cha' tso'o ti cua'ni ma̱ laja lo'o ndi'i̱ ma̱ chalyuu, cha' taca cui'ya xa' la ñati̱ cuentya ji'i̱ ma̱ cha' ñati̱ tso'o laca ma̱. Ná quiña'a̱ cha' tyu'u tyiquee ma̱ ña'a̱ ma̱ ji'i̱ ngu', pana tso'o ti chcui' ma̱ lo'o ngu'.

¹⁴ Ná taca ña'a̱ ngu' cha' ñati̱ tso'o laca ma̱ si liye' ti' ma̱, si chiya'a̱ tsa ntsu'u tyiquee ma̱ ña'a̱ ma̱ ji'i̱ ñati̱, si xcui' cña ji'i̱ ycui' ca ma̱ ntsu'u tyiquee ma̱; na nñilo'o ma̱ ji'i̱ tya'a ma̱ si jua'a̱ ndu'ni ma̱, hasta ndacu̱' ma̱ cha' liñi nu cua nda ycui' Ndyosi lijya̱ chalyuu.

¹⁵ Si'i nde su ntucua ycui' Ndyosi ndyu'u cha' cuxi nu nchcui' ma̱, sca cha' cuxi nu ntsu'u chalyuu laca bi'; sca cha' nu cua nda ycui' nu xña'a̱ laca cha' nu nchcui' ma̱ bi'.

¹⁶ Si liye' ti' na ji'i̱ tya'a na, si xcui' cña ji'i̱ ycui' ca na ntsu'u tyiquee na, ná caca stu'ba cha' ji'na lo'o tya'a na li'; lcaa lo cha' cuxi caca cua'ni na li'.

¹⁷ Pana lcaa cha' nu nda ycui' Ndyosi cha' chcui' na lo'o ñati̱, xcui' cha' tso'o laca bi'; ná nguxa' cha' tso'o bi' lo'o cha' cuxi, ná ntsu'u cha' xu̱u̱ tya'a na lo'o tya'a ñati̱ na. Cha' tso'o ti laca nu nda Ni cha' chcui' na lo'o ñati̱, cha' xcui' na tso'o ti cua'ni na lo'o ñati̱ li'. Lo'o jua'a̱ ndu'ni cha' bi', cha' cua'ni tya'na ti' na ji'i̱ ñati̱, ña'a̱ cuayá' nu cua'ni na cha' tso'o cha' xtyucua na ji'i̱ ngu'; ndu'ni cha' sca ti cha' liñi chcui' na lo'o ñati̱, si'i cha' cuiñi chcui' na lo'o ngu'.

¹⁸ Tso'o tsa ndyu'ni ñati̱ nu ná nclyana cha' cusu̱u̱ lo'o tya'a ñati̱, ñati̱ nu tso'o tsa ntsu'u tyiquee nchcui' lo'o tya'a ñati̱. Tiya' la li' tyu'u tucua quiña'a̱ la cha' tso'o nu cua nti' ycui' Ndyosi cha' caca nde chalyuu, xqui'ya cha' nclyacua tso'o ti' ngu' bi'.