SANTIAGO 2 - Chatino Tataltepec

Sca ti cuayá' cua'ni tso'o na lo'o cua ña'a̱ ca ñati̱ nu lijya̱ slo na

¹ Cu'ma̱ tya'a ngusñi na cha' ji'i̱ Jesucristo nu Xu'na na, nu ntucua Ni ca su tso'o tsa ña'a̱ nde cua̱, ná tso'o si xa' ña'a̱ ntsu'u tyiquee ma̱ ña'a̱ ma̱ ji'i̱ xi scaa ñati̱; stu'ba ti cua'ni ma̱ lo'o cua ña'a̱ ca ñati̱, tso'o la.

² Ná tyiquee' ca̱a̱ tyu̱u̱ lo ñati̱ ca su ndyu'u ti'i̱ ma̱, masi ngu' culiya' nu ntsu'u cui' oro sne ya' ngu', cuati tso'o tsa ña'a̱ ste' ngu', masi ngu' ti'i nu ngusu̱ tsa ste' ngu'.

³ Ná tso'o si lye tsa cua'ni chi̱ ma̱ loo sca ñati̱ nu nchcu' late' nu tso'o tsa ña'a̱. Ná tso'o ñacui̱ ma̱ ji'i̱ nu culiya' bi': “Tyucua xi lo yaca xlya tso'o re, cusu'”, si ñacui̱ ma̱ ji'i̱ sca ngu' ti'i ndi'ya̱: “Ndacua ti tyu̱ nu'u̱. Cua'a̱ xi, masi lo yuu ti cua”.

⁴ Ntsu'u qui'ya ji'i̱ ma̱ li', xqui'ya cha' xa' ña'a̱ ntsu'u tyiquee ma̱ ña'a̱ ma̱ ji'i̱ xi scaa ñati̱, lo'o jua'a̱ cuxi ti ntsu'u tyiquee ma̱ ña'a̱ ma̱ ji'i̱ nu xa' ñati̱ bi' li'.

⁵ Cu'ma̱ ngu' tya'a na nu tyaca'a tsa ma̱ 'na, cui'ya ma̱ cuentya ji'i̱ cha' re: Cua ngusubi ycui' Ndyosi ji'i̱ ñati̱ ti'i cha' taca xñi tso'o ngu' cha' ji'i̱ ycui' Ni; ta Ni chalyuu tso'o ji'i̱ ngu' bi' li', la cui' chalyuu nu nacui̱ Ni cha' caja ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. Masi ti'i tsa ñati̱ bi' nde chalyuu, pana culiya' ngu' cuentya ji'i̱ ycui' Ndyosi.

⁶ Ná tso'o ndyu'ni cu'ma̱, cha' ti'í ti' ma̱ ña'a̱ ma̱ ji'i̱ ngu' ti'i. Xcuane na' sca cha' ji'i̱ ma̱ lacua: ¿Ha si'i nu culiya' laca nu ti'í ti' ji'i̱ ma? ¿Ha si'i nu culiya' laca nu ndya'a̱lo'o ji'i̱ ma̱ ca slo ngu' tisiya?

⁷ La cui' ngu' bi' laca nu nchcui' tsa cha' cuxi ji'i̱ ycui' Jesús nu ntsu'u tsa cha' ji'na lo'o.

⁸ Tso'o tsa si chañi cha' ndaquiya' ma̱ cha' cusu' nu nscua tya clyo la; ndi'ya̱ nchcui' cha' bi': “Ntsu'u cha' cua'ni tya'na ti' na ji'i̱ tya'a ñati̱ na, ñi'ya̱ laca si ndu'ni tya'na ti' na ji'i̱ ycui' ca na”, nacui̱ quityi.

⁹ Si xa' ca ña'a̱ ndu'ni ma̱ lo'o xi scaa ñati̱, cuxi ndu'ni ma̱ li', ntsu'u qui'ya ji'i̱ ma̱ cuentya ji'i̱ ycui' Ndyosi li'; la cui' jua'a̱ ndyu'u cha' nu nscua lo quityi cusu' bi'.

¹⁰ Ñati̱ nu ndaquiya' lcaa cña nu ngulo ycui' Ndyosi ji'na cha' cua'ni na, lo'o li' ntsu'u masi sca ti cha' cuxi nu ndyu'ni ngu' bi', sca ti cuayá' ntsu'u qui'ya ji'i̱ ngu', ñi'ya̱ laca si ná ndaquiya' ngu' tsiya' ti ji'i̱ lcaa cña nu cua ngulo ycui' Ni ji'na.

¹¹ Ycui' Ndyosi laca nu cua nacui̱ tyucuaa lo cha' ndi'ya̱: “Ná tyu'u cha' ji'i̱ ma̱ lo'o clyo'o xa' ñati̱”, nacui̱ Ni; lo'o jua'a̱: “Ná cujuii ma̱ ji'i̱ tya'a ñati̱ ma̱”, nacui̱ Ni. Si cujuii ma̱ ji'i̱ tya'a ñati̱ ma̱, ntsu'u qui'ya ji'i̱ ma̱ lacua, masi ná ntsu'u cha' ji'i̱ ma̱ lo'o clyo'o xa' ñati̱; sca ti cuayá' cua ndya'a̱chu̱' ma̱ ji'i̱ cha' nu cua nchcui' ycui' Ndyosi lo'o na li'.

¹² Cua nda Jesús sca cha' tso'o cha' tyanu ne' cresiya ji'na, cha' xtyucua ji'na cha' taca tyi'i̱ tyiquee na tso'o ti. Nga'a̱ cha' chcui' tso'o na, jua'a̱ ntsu'u cha' cua'ni na cha' tso'o lo'o ndi'i̱ na chalyuu, cha' cua tyalaa ti tsa̱ nu lo'o cua'ni cuayá' Ni ji'i̱ lcaa ñati̱ chalyuu.

¹³ Lo'o li' si ná ngua'ni tya'na ti' na ji'i̱ tya'a ñati̱ na, ná taca cua'ni tya'na ti' Ni ji'na lo'o cua'ni cuayá' Ni ji'na; pana ñati̱ nu ngua'ni tya'na ti' ji'i̱ tya'a ñati̱ ni, bi' ñati̱ laca nu tso'o la caca cha' ji'i̱ hora lo'o cua'ni cuayá' Ni ji'i̱ ñati̱.

Ntsu'u cña tso'o cha' cua'ni na lo'o ngusñi na cha' ji'i̱ ycui' Ni

¹⁴ Cu'ma̱ tya'a ngusñi na cha' ji'i̱ Jesús, ná taca ñacui̱ na cha' ntsu'u cha' ji'na lo'o Jesús, si ná lo'o ndu'ni na cha' tso'o nu xtyucua ji'i̱ tya'a ñati̱ na. Sca ti ngusñi tso'o na cha' ji'i̱ Jesús, si cua'ni na cha' tso'o jua'a̱; li' tyaja'a̱ Ni cua'ni lyaá Ni ji'na.

¹⁵ Ná tyiquee' ntsu'u ngu' tya'a ndyu'u ti'i̱ ma̱ nu lyiji tsa ste' ngu', nu lyiji tsa na cacu ngu', masi qui'yu, masi cuna'a̱.

¹⁶ Si chcui' ma̱ lo'o ngu' bi' ndi'ya̱: “Xtyucua Ni ji'i̱ ma̱”, ñacui̱ ma̱ ji'i̱ ngu', “cacu' ma̱ ste' ma̱ cha' caca chcatsu̱ ma̱, cacu tso'o ma̱ tyaja”, ñacui̱ ma̱ ji'i̱ ngu', pana ná nda ma̱ na nu lyiji ji'i̱ ngu' bi' li', ¿ha tso'o nti' ma̱ cha' nchcui' ma̱ lo'o ngu' jua'a̱? Ná tso'o chcui' ma̱ jua'a̱, cha' cua ngujlyaa ti' ma̱ cha' ji'i̱ ycui' Ndyosi si chcui' ma̱ jua'a̱;

¹⁷ ná taca ñacui̱ na ji'i̱ ngu' cha' cua ngusñi na cha' ji'i̱ ycui' Ndyosi, si ná lo'o cua'ni na cha' tso'o nu xtyucua ji'i̱ tya'a ñati̱ na.

¹⁸ Ná tyiquee' ñacui̱ sca ñati̱ ji'na: “Tso'o tsa ngusñi ma̱ cha' ji'i̱ ycui' Ndyosi tu'ni. Pana nu na' ni, nti' na' cha' cuayá' tsa cuentya ji'i̱ ycui' Ndyosi masi cua'ni na' xi cha' tso'o lo'o ñati̱”, ñacui̱ ngu'. Tso'o lacua. Ndi'ya̱ chcui' na' lo'o ngu' bi' li': “Cacha' ma̱ 'na lacua cha' cua ngusñi ma̱ cha' ji'i̱ ycui' Ni, masi ndyu'ni ma̱ cha' tso'o lo'o ñati̱; pana laja lo'o ndyu'ni tso'o na' lo'o ñati̱, li' ca cuayá' ti' ma̱ cha' chañi cha' ngusñi na' cha' ji'i̱ ycui' Ni”, ñacui̱ na' ji'i̱ ngu' bi'.

¹⁹ Jlya ti' ma̱ cha' sca ti ycui' Ndyosi ntsu'u chalyuu. Tso'o tsa, pana cua ña'a̱ ca cui'i̱ xña'a̱ jlya ti' cha' bi'; lo'o jua'a̱ lye tsa nchcua̱ cui'i̱ xña'a̱ bi', cha' ntsi̱i̱ cui'i̱ ji'i̱ ycui' Ni.

²⁰ Nga'a̱ cha' ca cuayá' ti' ma̱, cha' ná chañi cha' ngusñi na cha' ji'i̱ ycui' Ndyosi si ná lo'o cua'ni na cha' tso'o cha' xtyucua na ji'i̱ tya'a ñati̱ na.

²¹ Ndi'ya̱ ngua cha' ngua cuayá' ti' ycui' Ndyosi cha' ngua tso'o cresiya ji'i̱ Abraham, jyo'o cusu' ji'na: na'a̱ Ni cha' ntaja'a̱ nu cusu' ta ji'i̱ sñi' ycui' ca, nu Isaac bi', cha' caca yu sca msta̱.

²² Ntsu'u sca cña nu ngua'ni Abraham lacua. Xqui'ya bi' ngua cuayá' ti' ycui' Ndyosi cha' cua ngusñi Abraham cha' nu nchcui' Ni lo'o; jlya tsa ti' nu cusu' cha' bi', bi' cha' ntaja'a̱ yu ngua'ni yu cña bi'.

²³ Bi' laca cha' nu nscua lo quityi cusu' ndi'ya̱: “Ngusñi Abraham cha' ji'i̱ ycui' Ndyosi, bi' cha' ntucuá Ni cha' ji'i̱ Abraham cha' caca yu sca ñati̱ nu lubii tsa cresiya ji'i̱”. Tya'a tso'o ycui' Ndyosi ngua Abraham li', nacui̱ quityi.

²⁴ Jua'a̱ ca cuayá' ti' cu'ma̱ lacua, cha' ntaja'a̱ ycui' Ndyosi tucuá Ni cha' ji'i̱ ñati̱ lo'o ndyu'ni ngu' cha' tso'o, si'i xqui'ya cha' nacui̱ ti ngu' cha' jlya ti' ngu' ji'i̱ Ni.

²⁵ La cui' jua'a̱ ntucuá Ni cha' ji'i̱ nu cuna'a̱ calle nu ngua naa Rahab; ntucuá Ni cha' nu nchcui' ma' bi', ñi'ya̱ laca si ngua ma' sca ñati̱ tso'o, xqui'ya cha' tso'o tsa cña nu ngua'ni ma' cuentya ji'i̱ ycui' Ndyosi. Cua nda ma' su nguti'i̱ ngu' nu ndyaa na'a̱ ji'i̱ quichi̱ tyi ma' cuaana ti; li' ngulu'u ma' chaca tyucui̱i̱ ji'i̱ ngu' su tyaa tso'o ti ngu' bi', cha' xna ngu' ji'i̱ ngu' xña'a̱ li'.

²⁶ Lo'o jua'a̱ nu na ni, si ñacui̱ na cha' cua ngusñi na cha' ji'i̱ ycui' Ndyosi, pana ná ndu'ni na cha' tso'o nu xtyucua ji'i̱ tya'a ñati̱ na, li' laca na ñi'ya̱ laca ñati̱ nu ndyaa cresiya ji'i̱ cha' cua ngujuii ngu'.