SAN MARCOS 15 - Chatino Tataltepec

Ndu̱ Jesús nde loo Pilato nu laca loo

¹ Lo'o nguxee chaca tsa̱ tya ndi'i̱ sti jo'ó nu laca loo, lo'o ngu' cusu', lo'o mstru cha' jo'ó, ndi'i̱ lcaa ngu' tisiya cha' chcui' ngu' lo'o tya'a ngu' ji'i̱ cha' bi'. Li' ngusca̱' ngu' ji'i̱ Jesús, ndyaa lo'o ngu' ji'i̱ slo Pilato nu ngua gobernador romano cha' caca cuayá' ji'i̱. Nchcuane Pilato ji'i̱ Jesús li':

² ―¿Ha nu'u̱ laca rey ji'i̱ ngu' judío? ―La cui' ñi'ya̱ nu nacui̱ nu'u̱, la cui' laca na' ―nacui̱ Jesús ji'i̱ gobernador bi'.

³ Lo'o li' ngusta sti jo'ó nu laca loo quiña'a̱ qui'ya ji'i̱ Jesús slo nu Pilato bi'.

⁴ Li' xa' nchcui' Pilato lo'o Jesús: ―¿Ha ná nchca xacui̱ nu'u̱ cha' ji'i̱ ngu' jua? ―nacui̱ Pilato ji'i̱―. Na cua quiña'a̱ qui'ya ngusta ngu' jinu'u̱.

⁵ Nga'aa nchcui' Jesús lo'o ngu' tsiya' ti, lo'o ndube tsa ti' Pilato li'.

Ngulo Pilato cña cha' cujuii ngu' ji'i̱ Jesús

⁶ Lcaa yija̱ lo'o ndyaca tsa̱ ta'a bi' ndu'ni lyaá nu laca gobernador ji'i̱ sca ti preso, cua ña'a̱ ca preso nu ndijña ngu' judío ji'i̱.

⁷ Ntsu'u tyu̱u̱ tya'a ngu' ne' chcua̱, ngu' nu cua ndyujuii ji'i̱ ñati̱ laja lo'o ngusu̱u̱ tya'a ngu' lo'o nu ngu' xa' tsu' nu laca loo. Sca preso bi' laca Barrabás.

⁸ Li' ndyu'u ti'i̱ quiña'a̱ ñati̱ slo Pilato, ndijña ngu' ji'i̱ cha' cua'ni lyaá ji'i̱ sca preso ñi'ya̱ nu ndu'ni nu laca loo lcaa yija̱.

⁹ ―¿Ha cua nti' ma̱ cha' cua'ni lyaá na' ji'i̱ yu cua nu laca rey ji'i̱ cu'ma̱ ngu' judío? ―nacui̱ Pilato ji'i̱ nu ngu' quiña'a̱ bi'.

¹⁰ Cua nchcui' Pilato jua'a̱ xqui'ya cha' ngua tii cha' liye' tsa ti' sti jo'ó nu laca loo ji'i̱ Jesús, bi' cha' ndya'a̱ lo'o ngu' ji'i̱ yu slo ycui' Pilato.

¹¹ Pana ndijña ngu' quiña'a̱ ji'i̱ Pilato cha' cua'ni lyaá ji'i̱ Barrabás, si'i ji'i̱ Jesús. Na cua nchcui' nu ngu' quiña'a̱ bi' lo'o Pilato cha' clyaá ji'i̱ Barrabás, xqui'ya cha' la cui' sti jo'ó nu laca loo cua nchcui' tsa lo'o ngu' cha' jua'a̱ jña ngu' cha' ji'i̱ Pilato.

¹² Xa' nchcuane Pilato ji'i̱ ngu' li': ―¿Ñi'ya̱ cua'ni na' lo'o yu re, nu nchcui' ma̱ ji'i̱ cha' laca yu rey ji'i̱ ngu' judío lacua? ―nacui̱ Pilato ji'i̱ nu ngu' quiña'a̱ bi'.

¹³ Cui̱i̱ ngusi'ya ngu' ji'i̱ Pilato li': ―Cujuii clya ji'i̱ yu lo crusi ―nacui̱ ngu' ji'i̱.

¹⁴ ―¿Ni cha' laca cha' nti' ma̱ cha' cujuii na' ji'i̱ yu re? ―nacui̱ Pilato ji'i̱ ngu'―. ¿Ni qui'ya ntsu'u ji'i̱ yu? Lye la nxi'ya lo'o ngu' ji'i̱ Pilato li': ―Cujuii clya ji'i̱ yu lo crusi.

¹⁵ Lo'o li' ngua'ni lyaá Pilato ji'i̱ Barrabás cha' tyaala' tyiquee nu ngu' quiña'a̱ bi'. Lo'o lye ngujui'i̱ sendaru ji'i̱ Jesús lo'o reta, li' ngulo Pilato cña ji'i̱ sendaru cha' tyaa lo'o ngu' ji'i̱ Jesús cha' cujui'i̱ ca'a̱ ngu' ji'i̱ lo crusi.

¹⁶ Ndyaa lo'o sendaru ji'i̱ Jesús nde ne' ni'i̱ su ntucua ngu' nu laca loo bi', lo'o jua'a̱ ndyu'u ti'i̱ ña'a̱ lcaa sendaru nu ntsu'u cajua.

¹⁷ Li' nguxacu' ngu' ji'i̱ Jesús lo'o sca late' cuaa ña'a̱. Ngüixi̱i̱ ngu' lti quiche' chu̱' tya'a cha' caca sca sne', ngusta ngu' sne' bi' hique Jesús.

¹⁸ Li' ngua'ni tlyu ngu' ji'i̱ yu cha' cuiñi ti: ―Tso'o ti tyi'i̱ nu'u̱, rey ji'i̱ ngu' judío ―nacui̱ sendaru ji'i̱.

¹⁹ Nguxana ngu' ngujui'i̱ ngu' yaca quii hique Jesús li'. Lye ngutu'u hitya sañi' ngu' loo yu. Li' ndyatu̱ sti̱' ngu' slo yu, ñi'ya̱ si cua'ni tlyu ngu' ji'i̱ yu, masi cha' cuiñi ti.

²⁰ Nu lo'o ndye ngustí lo'o ngu' ji'i̱ Jesús, li' ngulo ngu' late' cuaa ña'a̱ bi' ji'i̱; xa' nguxacu' ngu' ste' ycui' ca yu li', cha' tsaa lo'o ngu' ji'i̱ yu ca su cujui'i̱ ca'a̱ ngu' ji'i̱ lo crusi. Ndu'u ngu' ndyaa lo'o ngu' ji'i̱ yu li'.

Ngujui'i̱ ca'a̱ ngu' ji'i̱ Jesús lo crusi

²¹ Tyucui̱i̱ lo'o ndya'a̱ ngu', li' na'a̱ ngu' sendaru ji'i̱ Simón ngu' Cirene; sti Alejandro lo'o Rufo laca nu Simón bi'. Cua ñaa Simón ca su ndyaa cña ne' quixi̱', lo'o li' ngulo sendaru cña ji'i̱ cha' qui'ya crusi bi' cuentya ji'i̱ Jesús.

²² Li' ndyalaa lo'o ngu' ji'i̱ Jesús ca su naa Gólgota. (Nu Gólgota ni, ca'ya su nscua tyijya̱ hique jyo'o, jua'a̱ nti' ñacui̱ cha' bi' cha'cña ji'na.)

²³ Li' nda ngu' vino nguxa' lo'o taná mirra cha' co'o Jesús, pana ná ntaja'a̱ yu co'o yu vino bi'.

²⁴ Li' ngujui'i̱ ca'a̱ ngu' ji'i̱ yu lo crusi. Lo'o li' ngüijya ngu' sendaru lo'o tya'a ngu', cha' clyana ngu' cha' lo'o tya'a ngu' tilaca nu caja ste' Jesús ji'i̱. Jua'a̱ ngua cha' ndye ndacha ngu' ste' Jesús ji'i̱ tya'a ngu'.

²⁵ Hora cua caa nde tlya ngua lo'o ngujui'i̱ ca'a̱ sendaru ji'i̱ Jesús lo crusi.

²⁶ Nde hique crusi bi' cua nscua letra nu nchcui' ni qui'ya nu ngusta ngu' ji'i̱ Jesús: “Nu nde laca rey ji'i̱ ngu' judío”, nacui̱ letra bi'.

²⁷ La cui' tsa̱ bi', ngujui'i̱ ca'a̱ ngu' ji'i̱ tucua tya'a ngu' cuaana lo crusi se'i̱ ti lo'o Jesús. Crusi ji'i̱ tsaca ngu' cuaana bi' ndu̱ la'a tsu' cui̱ ji'i̱ Jesús, crusi ji'i̱ chaca ndu̱ la'a tsu' coca bi'.

²⁸ Jua'a̱ ngua cha' nu nguscua jyo'o cusu' sa'ni lo quityi ji'i̱ ycui' Ndyosi, nu nchcui' ndi'ya̱: “Ngua ti' ngu' cha' tya'a ngu' cuxi laca yu”. Jua'a̱ cha' nscua lo quityi bi'.

²⁹ Ngustí lo'o tsa ngu' ji'i̱ Jesús lo'o nteje tacui ngu' tyucui̱i̱, nchcui' tsa ngu' cha' suba' ji'i̱ yu. ―Ja̱a̱, nu'u̱ laca nu nchcui' cha' cuityi̱ ji'i̱ laa tonu jua ―nacui̱ ngu' bi'―, lo'o li' nacui̱ nu'u̱ cha' xa' cuiñá nu'u̱ ji'i̱ chaca quiya' chu̱' sna tsa̱ ti, ngua ti' nu'u̱.

³⁰ Cua'ni lyaá nu'u̱ ji'i̱ ycui' ca lacua; cua'ya clya nu'u̱ lo crusi cua juani, si caca jinu'u̱ ―nacui̱ ngu'.

³¹ Lo'o sti jo'ó nu laca loo, lo'o jua'a̱ mstru cha' jo'ó, ngustí lo'o ngu' ji'i̱ Jesús. ―Ngua'ni lyaá yu ji'i̱ xa' ñati̱ ―nacui̱ nu ngu' tlyu bi' ji'i̱ tya'a ngu'―, pana ná nchca clyaá ycui' ca yu.

³² Cristo laca yu, nu rey ji'i̱ ngu' Israel tya'a na laca yu, nacui̱ yu. Tso'o la si ca'ya yu lo crusi ycui' ti yu, cha' ña'a̱ na si caca ji'i̱ yu. Jlya ti' na ji'i̱ yu li' ―nacui̱ ngu' ji'i̱ tya'a ngu'. Lo'o jua'a̱ nu ngu' cuaana tya'a ngujui'i̱ ca'a̱ ngu' ji'i̱ lo crusi, lo'o ngu' bi' nchcui' ngu' cha' suba' ji'i̱ Jesús.

Ngujuii Jesús

³³ Lo'o ndyalaa nde hora ngua talya xee tyucui ña'a̱ loyuu. Sna hora ndalo cha' talya xee.

³⁴ Pana lo'o ngua hora cua sna nde ngusi̱i̱, li' cui̱i̱ ngusi'ya Jesús: ―Eloi, Eloi, ¿lama sabactani? ―nacui̱. (Ndi'ya̱ nti' ñacui̱ cha' bi' cha'cña ji'na: Ndyosi 'na, Ndyosi 'na, ¿ni cha' laca ngulaya' nu'u̱ 'na?)

³⁵ Ndyuna xi ngu' nu ndu̱ cacua ti, pana ná ngua cuayá' ti' ngu' ni cha' nchcui' yu: ―Cua'a̱ jyaca̱ ma̱, nxi'ya yu ji'i̱ jyo'o Elías ―nacui̱ ngu' bi'.

³⁶ Li' ngusna sca ñati̱ ndyaa ndyiqui'ya sca quiche; ngüicha' ngu' ji'i̱ quiche bi' lo'o vino tiye' li', ngusicua̱ ngu' ji'i̱ lo'o sca yaca quii cha' co'o Jesús. ―Jatya na xi ―nacui̱ nu ñati̱ bi'―, ña'a̱ na si ca̱a̱ jyo'o Elías cha' ta'ya ji'i̱ Jesús lo crusi.

³⁷ Cui̱i̱ ngusi'ya Jesús li', ngujuii li'.

³⁸ Hora ti ngutaa' late' tlyu nu ndacui ndyacu̱' tsa cla'be ne' laa tonu bi', nde cua̱ nguxana ngutaa' late' bi' ña'a̱ cuayá' nu ndyalaa ca lo yuu.

³⁹ Lo'o nu capitán nu laca loo ji'i̱ sendaru nu ndu̱ slo Jesús, na'a̱ capitán bi' ñi'ya̱ ngua'ni Jesús lo'o ngujuii yu. ―Chañi cha' Sñi' ycui' Ndyosi nu laca loo la laca jyo'o re ―nacui̱ capitán bi'.

⁴⁰ Laja li' tyijyu' ti ndu̱ sca taju ngu' cuna'a̱ ña'a̱ cui'ya ngu' ji'i̱ Jesús; lo'o María Magdalena, lo'o chaca María xtya'a̱ Jacobo nu cuañi' la, la cui' xtya'a̱ José laca bi', lo'o Salomé ndu̱.

⁴¹ Nu lo'o tya ndya'a̱ Jesús nde Galilea nu ngua tya tsubi' la, la cui' taju nu cuna'a̱ bi' ndya'a̱ lo'o yu, cha' nguxtyucua ngu' ji'i̱ yu lo'o ndyaque' ngu' na ndyacu ngu'. Lo'o jua'a̱ ndu̱ tyu̱u̱ tya'a xa' la ngu' cuna'a̱ cajua, tya'a ndyalaa ngu' lo'o Jesús nde quichi̱ Jerusalén.

Nguatsi' jyo'o Jesús

⁴² Cua ngusi̱i̱ xi, la cui' tsa̱ ta'a si̱i̱ laca bi', cha' chaca tsa̱ bi' caca tsa̱ nu tyi'i̱ cña' ngu' judío.

⁴³ Lo'o jua'a̱ ndi'i̱ sca ngu' tisiya nu naa José, ngu' Arimatea ngua bi', sca ngu' tlyu. Lo'o José ndu̱ ti' cha' cua tyalaa ti tsa̱ cha' caca ycui' Ndyosi loo; bi' cha' ngua'ni tlyu tyiquee, ndyaa slo Pilato cha' jña ji'i̱ jyo'o Jesús cha' tyatsi'.

⁴⁴ Ndube tsa ti' Pilato si chañi cha' ngujuii Jesús yala ti. Bi' cha' ngusi'ya ji'i̱ nu capitán ji'i̱ sendaru nu ndu̱ cua̱ quiya' crusi cha' ca̱a̱ capitán bi' slo, cha' cacha' ji'i̱ nu laca loo si chañi cha' ngujuii Jesús.

⁴⁵ Li' nacui̱ capitán bi' ji'i̱ Pilato cha' chañi cha' ngujuii jyo'o bi'; bi' cha' nda Pilato chacuayá' ji'i̱ José cha' tsaa lo'o ji'i̱ jyo'o bi', cha' tyatsi'.

⁴⁶ Li' ngüi'ya José sca tasá tso'o tsa ña'a̱; nda'ya nu cusu' ji'i̱ jyo'o bi', ngüixi̱i̱ tasá cucui hichu̱' jyo'o. Li' ndyaa lo'o ji'i̱ ca sca tyuquee nu ngulu ngu' nde sii' cua'a̱, nguxatsi' ji'i̱ jyo'o Jesús ne' tyuquee bi'. Li' nguxasu ngu' sca quee tonu to' tyuquee bi', tachaa ndacu̱' ngu' ji'i̱ li'.

⁴⁷ Lo'o María Magdalena, lo'o María xtya'a̱ José ni, na'a̱ ngu' su nguatsi' jyo'o Jesús.