SAN LUCAS 21 - Chatino Tataltepec

Cha' tso'o ji'i̱ nu cuna'a̱ ti'i

¹ Lo'o li' na'a̱ Jesús ji'i̱ ngu' culiya' nu ndya'a̱ ne' laa, cha' nsu'ba ngu' cñi ne' cñá' su tyu'u msta̱.

² Lo'o jua'a̱ na'a̱ yu ji'i̱ sca nu cuna'a̱ ti'i nu ngusu'ba tucua tya'a ti cñi sube ne' cñá' bi'.

³ Li' nchcui' Jesús lo'o tya'a ndya'a̱ yu: ―Chañi cha' nu nda na' lo'o ma̱, cha' quiña'a̱ la cñi nda nu cuna'a̱ ti'i jua que lcaa xa' ñati̱.

⁴ Nu ngu' culiya' jua ni, nda ngu' xi cñi nu cua ntyucua ti ji'i̱ ngu'; lo'o nu cuna'a̱ ti'i jua ni, ti'i tsa, pana cua nda ma' lcaa nu ntsu'u ti xi ji'i̱ ma' cha' tyiji̱ yu'u ji'i̱ ma' chalyuu re.

Ngulala ti cati̱ nu laa tonu bi'

⁵ La cui' hora ndu̱ xi ñati̱ nchcui' ngu' cha' ji'i̱ laa tonu bi', lo'o jua'a̱ nchcui' ngu' cha' ji'i̱ quee nu tso'o tsa ña'a̱ nu ntsu'u ji'i̱ laa bi'; nchcui' ngu' cha' ji'i̱ na nu tso'o tsa ña'a̱, na nu cua nda ngu' ña'a̱ msta̱ ti ji'i̱ cha' caca tso'o la ña'a̱ ne' laa bi'. Li' nchcui' Jesús cha' ji'i̱ laa bi':

⁶ ―Tyalaa tsa̱ nu tye cha' ji'i̱ lcaa na nu ña'a̱ cu'ma̱ re juani cati̱, ña'a̱ cuayá' nu nga'aa tyanu ni sca quee nu xñi ca'a̱ chu̱' tya'a.

Cha' ti'í nu caca lo'o cua tye ti chalyuu

⁷ Li' nchcuane ngu' ji'i̱ Jesús: ―Mstru, ¿ni jacua' caca cha' bi'? ―nacui̱ ngu' ji'i̱ Jesús―. ¿Ñi'ya̱ caca ca cuayá' ti' ya lo'o cua caca ti cha' cuxi bi'?

⁸ ―Cui'ya ma̱ cuentya ―nacui̱ Jesús li'―, cha' ná tucui cñilo'o ji'i̱ ma̱. Quiña'a̱ tsa ngu' ca̱a̱ ngu' nu ñacui̱ cha' Cristo laca ycui' ca ngu': “Juani ndyalaa tyempo bi'”, ñacui̱ ngu' bi'. Pana ná xñi ma̱ cha' ji'i̱ ngu' bi'.

⁹ Nu lo'o caja cha' ji'i̱ ma̱ cha' cua lijya̱ tyempo cusu̱u̱, masi nde quichi̱ tyi ma̱, masi tyijyu', ná cutsi̱i̱ ma̱ li'. Nga'a̱ cha' caca lcaa cha' bi' clyo la, pana tya lyiji tyalaa hora tye chalyuu.

¹⁰ Li' tya nda la Jesús cha' lo'o ngu': ―Xu̱u̱ tya'a ñati̱ sca tsu' lo'o ngu' chaca tsu', jua'a̱ xu̱u̱ tya'a ñati̱ sca quichi̱ tlyu lo'o ñati̱ chaca quichi̱ tonu.

¹¹ Lye tsa clyacui̱ chalyuu li', lye tsa caca jbi'ña ji'i̱ ngu'; cua ña'a̱ ca quichi̱ ca̱a̱ quicha tyaala nu xñi ji'i̱ lcaa ngu' li'. Lye tsa ña'a̱ caca nde cua̱, tyi'i̱ yutsi̱i̱ tya chalyuu lo'o ña'a̱ ngu' sca na tlyu nu tyaca nde cua̱.

¹² ’Lo'o cu'ma̱ ni, nu lo'o tya lyiji caca cha' bi', li' xñi ngu' ji'i̱ ma̱ cha' sca̱' ngu' ji'i̱ ma̱, ta ngu' cha' ti'í ji'i̱ ma̱, sta ngu' qui'ya ji'i̱ ma̱ su ndyu'u ti'i̱ ngu' ne' laa; lo'o jua'a̱ su'ba ngu' ji'i̱ ma̱ ne' chcua̱, tsaa lo'o ngu' ji'i̱ ma̱ slo rey, jua'a̱ slo xa' ngu' nu laca loo, xqui'ya cha' ngusñi ma̱ cha' 'na.

¹³ Masi cuxi tsa caca cha', pana caja tyempo ji'i̱ ma̱ cha' chcui' ma̱ cha' jna' lo'o ngu' li'.

¹⁴ Ná quiña'a̱ tsa cha' clyacua ti' ma̱ yala la, ñi'ya̱ nu chcui' ma̱ lo'o ngu' nu laca cña cha' cua'ni lyaá ycui' ca ti ma̱ ji'i̱ ma̱.

¹⁵ La cui' hora bi' cua'ni na' cha' ca'ya cha' hique ma̱ cha' ca jlo ti' ma̱ ñi'ya̱ nu chcui' ma̱ lo'o ngu' bi', cha' ná caja cha' nu xtyacui tya'a cusu̱u̱ ma̱ lo'o ma̱, cha' ná caja ñi'ya̱ nu chcui' loo ngu' ji'i̱ ma̱.

¹⁶ La cui' sti ma̱, la cui' ngu' tya'a ngula ma̱, masi tya'a tyijyu' ti ma̱, masi tya'a tso'o ma̱, la cui' ca ngu' bi' tsaa lo'o ngu' ji'i̱ ma̱ slo ngu' tisiya. Lo'o ntsu'u cu'ma̱ nu cujuii ngu' ji'i̱ ma̱ li',

¹⁷ cha' tyucui ña'a̱ chalyuu ntsu'u quiña'a̱ tsa ngu' nu ti'í ti' ngu' ña'a̱ ngu' ji'i̱ ma̱ xqui'ya na'.

¹⁸ Pana ná chcuna' ni sca quicha̱' hique cu'ma̱ cuentya ji'i̱ ycui' Ndyosi.

¹⁹ Nu lo'o cua ndalo ma̱ ji'i̱ lcaa cha' cuxi bi', li' tya caja chalyuu ji'i̱ ma̱ lo'o cua ndye cha'.

²⁰ ’Pana nu lo'o ña'a̱ ma̱ cha' nsu'ba lo'o ngu' cusu̱u̱ tyi'i̱ ca to' quichi̱ Jerusalén re, li' ca cuayá' ti' ma̱ cha' cua tye ti cha' ji'i̱ quichi̱ tyi ma̱ re.

²¹ Lo'o li' lcaa cu'ma̱, lo'o lcaa ngu' nu tya ndi'i̱ loyuu su cuentya Judea re, nga'a̱ cha' xna ma̱ tyaa ma̱ tyu'u cuatsi' ma̱ nde ca'ya; jua'a̱ ngu' nu ndi'i̱ quichi̱ Jerusalén re, ntsu'u cha' tyu'utsu' ngu' quichi̱ re; jua'a̱ ngu' nu ndi'i̱ ne' quixi̱', nga'aa caja tyempo cha' tya̱a̱ ngu' nde quichi̱.

²² Tsa̱ chcube' ma̱ caca tsa̱ bi', lo'o li' nga'a̱ cha' tyu'u tucua lcaa cha' nu nscua lo quityi cusu' cha' caca.

²³ Tya'na tsa caca ji'i̱ ngu' cuna'a̱ nu ntsu'u sñi' tsa̱ bi'; jua'a̱ tya'na tsa caca ji'i̱ nu ngu' cuna'a̱ nu ntsu'u cubi' cuañi' nu tya ndyati', cha' lye tsa tyu'u cha' ti'í lo yuu; cuxi tsa cha' ti'í caca ji'i̱ ngu' li'.

²⁴ Ntsu'u ngu' nu cajaa laja cha' cusu̱u̱ bi', lo'o jua'a̱ ntsu'u xa' la ngu' nu tyaa ngu' preso lcaa lo yuu su cuentya ji'i̱ xa' nasiyu̱ tyijyu' la. Satá quiya' ngu' xa' tsu' bi' ji'i̱ quichi̱ Jerusalén re, ña'a̱ cuayá' nu tye tyempo nu ngujui chacuayá' ji'i̱ ngu' bi', cha' caca ngu' loo ca nde.

Ndi'ya̱ caca lo'o chaca quiya' ca̱a̱ ycui' nu cua nda Ni ji'i̱ lijya̱ cha' caca ñati̱

²⁵ ’Tyu'u tucua cuayá' nu tyaca̱' ña'a̱ ngu' lo cuichaa li', jua'a̱ lo co', la cui' jua'a̱ lo cualya nu ntsu'u nde cua̱. Lo'o li' lye tsa quichi̱ cha' hique ñati̱ chalyuu; cutsi̱i̱ tsa ngu' li', xqui'ya cha' lye tsa cañi ntyiji'i̱ clyoo' lo hitya tyujo'o.

²⁶ Hasta tyucua ti ti'i̱ ñati̱, xqui'ya cha' cutsi̱i̱ tsa ngu' laja lo'o ntajatya ngu' si tya caca la cha' cuxi bi'; lye tsa culacua ti' ngu' na ca caca chalyuu. Lo'o jua'a̱ lye tsa quiña lcaa cuii nu ntsu'u nde cua̱.

²⁷ Li' ña'a̱ ngu' ji'i̱ ycui' na' nu cua nda Ni 'na lijya̱a̱ cha' caca na' ñati̱, ña'a̱ ngu' lo'o tya̱a̱ na' laja coo nu ndubi tsa ña'a̱. Tlyu tsa chacuayá' ngujui jna' cha' tya̱a̱ na' li'; jua'a̱ lye tsa quiji'i̱ xee loo na' lo'o ca̱a̱ na' li', nu lo'o caca na' loo.

²⁸ Nu lo'o xana caca cha' bi', li' cua'ni tlyu ma̱ tyiquee ma̱, taca ca chaa ti' ma̱ chaca quiya' cha' cua ngulala tsa clyaá ma̱ li' ―nacui̱ Jesús.

²⁹ Lo'o jua'a̱ nda Jesús chaca cui̱i̱ re lo'o ngu' li': ―Ña'a̱ ma̱ xi ji'i̱ cua ña'a̱ ca yaca quityi, ña'a̱ ma̱ xi ji'i̱ yaca ntsati̱;

³⁰ lo'o ña'a̱ ma̱ cha' cua ntyucua laca', li' nchca cuayá' ti' ma̱ cha' cua ngulala ti caca ni tyo.

³¹ La cui' jua'a̱ caca lo'o caca lcaa cha' nu cua nchcui' na', li' ca cuayá' ti' ma̱ cha' cua ca̱a̱ ti ycui' Ndyosi cha' caca Ni loo.

³² Chañi cha' nu nda na' lo'o ma̱ ―nacui̱ Jesús―, caca lcaa cha' bi' lo'o bilya tye cha' ji'i̱ ñati̱ nu lu'ú chalyuu juani.

³³ Tye cha' ji'i̱ lcaa na nu ntsu'u nde cua̱, tye cha' ji'i̱ lcaa na nu ntsu'u nde lo yuu, pana ná tye cha' ji'i̱ cha' nu cua nchcui' na' lo'o ma̱; nga'a̱ cha' caca cha' bi'.

³⁴ ’Cui'ya ma̱ cuentya, cua'a ma̱ ji'i̱ ycui' ca ma̱ cha' tii ti ti' ma̱ tyi'i̱ ma̱ lo'o tyalaa tsa̱ bi'; si culiji yu'u ti ma̱ chalyuu ji'i̱ ma̱ jua'a̱ ti lo'o ndya'a̱ tsa ma̱ calle, lo'o cu'bi ti ma̱, la cui' jua'a̱ si ntsu'u tyu̱u̱ tya'a cha' nu ndube tsa ti' ma̱ ji'i̱, ná caca tyi'i̱ ma̱ tii ti ti' ma̱ li'. Ñi'ya̱ ndyacu̱' sca lco'o,

³⁵ jua'a̱ caca nu lo'o tyalaa tsa̱ bi' ca su ndi'i̱ lcaa ñati̱ lu'ú tyucui ña'a̱ chalyuu.

³⁶ Tii ti ti' ma̱ tyi'i̱ ma̱ chalyuu lacua. Lcaa tyempo chcui' ma̱ lo'o ycui' Ndyosi cha' xtyucua Ni ji'i̱ ma̱, cha' talo ma̱ lo'o caca cha' cuxi bi' chalyuu. Lo'o li' caja ñi'ya̱ nu tyalaa ma̱ su tyucua ycui' na' nu cua nda Ni 'na lijya̱a̱ cha' caca na' ñati̱, cha' cua'ni cuayá' na' ji'i̱ ma̱ ―nacui̱ Jesús ji'i̱ ngu'.

³⁷ Lcaa tsa̱ ndacua̱ ndya'a̱ Jesús nclyu'u yu ji'i̱ ngu' ne' laa tonu ca quichi̱ Jerusalén bi'; lcaa talya ndyu'u yu ndyaa yu ndi'i̱ yu nde lo ca'ya nu ntucua cacua ti, nu naa ca'ya Olivos.

³⁸ Lcaa tsa̱, tlya tsa ndya'a̱ quiña'a̱ ñati̱ ne' laa tonu bi', cha' cuna ngu' ni cha' nda Jesús.