SAN LUCAS 2 - Chatino Tataltepec

Lo'o ngula Jesús

¹ Tyempo bi', ñati̱ nu laca loo la tyucui ña'a̱ chalyuu bi' ngua nu emperador; Augusto naa yu, lo'o li' ngulo yu cña cha' xcua xtañi ngu' lcaa quichi̱ lo quityi.

² Bilya xcua xtañi ngu' jua'a̱ nquicha', clyo juani cua'ni ngu' cha' xcua xtañi ngu'. La cui' tyempo laca Cirenio gobernador nde loyuu su cuentya Siria, cña ji'i̱ nu emperador bi'.

³ Li' ndyaa lcaa ñati̱ quichi̱ tyi jyo'o cusu' ji'i̱ ngu', cha' ca bi' nscua xtañi ngu' li'.

^4-5 Cua ndi'i̱ sca quichi̱ nu naa Belén nde loyuu su cuentya Judea bi'; quichi̱ bi' laca quichi̱ tyi jyo'o David nu ngua jyo'o cusu' ji'i̱ José, bi' cha' ndu'u José quichi̱ Nazaret su laca quichi̱ tyi yu, ndyaa yu nde quichi̱ Belén. Stu'ba ti ndyaa yu lo'o María nu caca clyo'o yu, cha' xcua xtañi ngu', masi ngua tana nu cuna'a̱ bi'.

⁶ Li' cua ndyalaa hora cala sñi' nu cuna'a̱ bi', laja lo'o ndi'i̱ ngu' quichi̱ Belén bi'.

⁷ Qui'yu cubi' nu ngula ji'i̱ María bi', sñi' clyo nu cuna'a̱ bi' laca cubi' bi'. Tso'o ngüixi̱i̱ xtya'a̱ late' hichu̱' cubi' bi', lo'o li' ngusta ji'i̱ cubi' ne' canoa su ndacu cuayu, cha' ná ngujui ni'i̱ su tyi'i̱ ngu' tsiya' ti.

Ngu' nu ntsu'u cua̱ ji'i̱ xlya' talya bi' ndyuna cha' nu nchcui' ycui' Ndyosi lo'o

⁸ Cacua ti to' quichi̱ bi' ndya'a̱ ngu' nu ña'a̱si̱i̱ ji'i̱ xlya' ji'i̱ ngu'. Talya bi' ntsu'u ngu' cua̱ ji'i̱ taju xlya' bi'.

⁹ Tsiya' ca ndu'u tucua sca xca̱ ji'i̱ ycui' Ndyosi su ndi'i̱ ngu' ca bi'; jua'a̱ ngujui'i̱ sca xee tlyu su ndi'i̱ ngu' bi', xee ji'i̱ ycui' Ndyosi laca bi'. Ndyutsi̱i̱ tsa ngu' li'.

¹⁰ Pana nchcui' xca̱ bi' lo'o ngu': ―Ná cutsi̱i̱ ma̱ tsiya' ti ―nacui̱―. Cua lijya̱ na' re cha' ta na' sca cha' tso'o lo'o ma̱ ―nacui̱―. Tso'o tsa caca tyiquee lcaa ñati̱ xqui'ya cha' nu ta na' lo'o ma̱ juani ―nacui̱ xca̱ ji'i̱ ngu' bi'―.

¹¹ Cua lijya̱ na' cacha' na' ji'i̱ ma̱ cha' juani cua ngula sca cubi' ca quichi̱ tyi ma̱, cha' la cui' quichi̱ tyi jyo'o David laca bi'; cubi' bi' laca nu cuityi̱ qui'ya nu ntsu'u ji'i̱ ma̱. Bi' laca nu Cristo nu laca ycui' nu Xu'na na, nu cua nda ycui' Ndyosi ji'i̱ cha' lijya̱ lo yuu chalyuu ―nacui̱―.

¹² Si quije ji'i̱ ma̱ su ntsiya sca cubi' nu tso'o tsa ngüixi̱i̱ late' chu̱', nu ntsiya ne' canoa su ndacu cuayu, li' caca cuayá' ti' ma̱ cha' bi' laca nu naa Cristo.

¹³ Lo'o ndye nchcui' xca̱ bi' lo'o ngu', li' nde cua̱ ndu'u tucua chaca taju xca̱ nu quiña'a̱ la nu ndu'u nde slo ycui' Ndyosi; tso'o tsa ndyu'ni tlyu xca̱ bi' ji'i̱ ycui' Ndyosi. Ndi'ya̱ nchcui' ngu' xca̱ bi' lo'o ngu':

¹⁴ Cua'ni tlyu na ji'i̱ ycui' Ndyosi, masi ca bi' ca su tlyu su ntucua Ni, masi nde lo yuu chalyuu, cha' tlyu tsa laca ycui' Ni, nacui̱ ngu' xca̱ bi' li'. Cua'ni Ni cha' ti̱ ti tyi'i̱ tyiquee ñati̱ chalyuu lo'o ca cuayá' ti' ngu' cha' ntsu'u tsa tyiquee Ni ña'a̱ Ni ji'i̱ ngu', nacui̱ ngu' xca̱ li'.

¹⁵ Nguxtyu̱u̱ xca̱ bi' ndyaa ngu' nde cua̱ ca slo ycui' Ndyosi. Lo'o nu ngu' nu ndi'i̱ cua̱ ji'i̱ xlya' bi' ni, nguxana nchcui' ngu' lo'o tya'a ngu' li': ―Tyaa clya na nde Belén ―nacui̱ ngu' ji'i̱ tya'a ngu' li'―. Tsaa na'a̱ na, na laca nu ndyaca jua, ni cha' laca nu nchcui' ycui' Ndyosi lo'o na.

¹⁶ Yala ti ndyaa ngu' li'; nquije María lo'o José ji'i̱ ngu', ndi'i̱ ngu' lo'o sca cubi' nu ntsiya ti ne' canoa su ndacu cuayu.

¹⁷ Lo'o cua na'a̱ ngu' ji'i̱ cubi' bi', li' ndacha' ngu' cha' bi' ji'i̱ xa' ñati̱, lcaa ña'a̱ cha' nu nchcui' xca̱ bi' lo'o ngu' cuentya ji'i̱ cubi' bi'.

¹⁸ Pana lo'o nchcui' ngu' nu ndya'a̱ cua̱ ji'i̱ xlya' cha' bi' li', ngulacua tsa ti' nu xa' la ngu' bi'.

¹⁹ Tyiquee ti María ndyanu cha' bi', quiña'a̱ tsa ngulacua ti' cha' ngua jua'a̱.

²⁰ Li' ngutu'u ngu' nu ndya'a̱ cua̱ ji'i̱ xlya', ndyaa ngu'; tso'o tsa ndyu'ni tlyu ngu' ji'i̱ ycui' Ndyosi cuentya ji'i̱ lcaa cha' nu cua ndyuna ngu', cuentya ji'i̱ lcaa cha' nu cua na'a̱ ngu'. Chañi cha' cua nteje tacui cha' bi', lcaa cha' nu cua nchcui' xca̱ lo'o ngu' bi'.

Ngusta ngu' xtañi cubi', lo'o jua'a̱ ngulacua̱ ngu' ji'i̱

²¹ Cua ndu'u scua snu' tsa̱, li' ngulacua̱ ngu' ji'i̱ nu cubi' cuañi' bi' cuentya ji'i̱ ngu' judío. Li' ngusta ngu' xtañi cha' Jesús caca naa yu, nacui̱ ngu', cha' la cui' jua'a̱ cua ndacha' xca̱ ji'i̱ ycui' Ndyosi ji'i̱ María lo'o tya lyiji caca tana.

²² Tiya' la li', lo'o ndye nguxco'o ngu' tsa̱ cuentya ji'i̱ lcaa cha' nu nguscua jyo'o Moisés lo quityi sa'ni cha' cua ngula cubi', li' ndyaa lo'o ngu' ji'i̱ nu piti Jesús bi' ca quichi̱ Jerusalén cha' tya ngu' xlya'be ji'i̱ ycui' Ndyosi cuentya ji'i̱ cubi' bi'.

²³ Jua'a̱ ngua'ni ngu', cha' ndi'ya̱ nscua lo quityi ji'i̱ ycui' Ndyosi nu Xu'na na: “Cubi' qui'yu nu ngula clyo ji'i̱ ma̱ ni, ta ma̱ ji'i̱ cha' caca yu cña ji'i̱ ycui' Ndyosi”, nacui̱ quityi.

²⁴ Bi' cha' ndyalaa ngu' bi', cha' sta ngu' msta̱ nu nscua lo quityi cusu' bi'. Nu msta̱ bi' laca tucua tya'a cru, masi tucua tya'a tyupe' sube ti.

²⁵ Tyempo bi' nde quichi̱ Jerusalén ndi'i̱ sca nu cusu' nu naa Simeón; ñati̱ tso'o laca yu, nu ndaquiya' tsa cña ji'i̱ ycui' Ndyosi, nu ndalo tsa tyiquee nchcui' lo'o ycui' Ndyosi. Ntajatya tsa yu ji'i̱ sca ñati̱ tlyu nu ta ycui' Ndyosi ji'i̱ cha' ca̱a̱ nde chalyuu, bi' laca Cristo nu ca̱a̱ cha' cua'ni lyaá ji'i̱ ngu' Israel ji'i̱ nu cuxi. Lo'o jua'a̱ cua ndi'i̱ Xtyi'i ycui' Ndyosi lo'o nu Simeón bi';

²⁶ ngua'ni Ni cha' ca cuayá' ti' yu cha' ná cajaa chca yu ña'a̱ cuayá' tyalaa tsa̱ nu ña'a̱ yu ji'i̱ nu Cristo, nu ta ycui' Ndyosi ji'i̱ cha' ca̱a̱ nde chalyuu.

²⁷ Tsa̱ bi' ngua'ni Xtyi'i ycui' Ndyosi cha' ndyaa nu cusu' bi' ca ne' laa tlyu, bi' cha' ndyaa clya nu cusu' bi' li'. Ndi'i̱ yu lo'o ndyalaa sti xtya'a̱ Jesús, ñaa lo'o ngu' ji'i̱ cubi' cha' cua'ni ngu' lo'o cua ña'a̱ ca cha' cusu' nu nscua cha' cua'ni ngu' ne' laa.

²⁸ Li' ndaya' Simeón ji'i̱ nu cubi' bi', nguxana ndyu'ni tlyu yu ji'i̱ ycui' Ndyosi xqui'ya cubi' bi' li'. Ndi'ya̱ nacui̱ yu ji'i̱ Ni:

²⁹ Ndyosi Xu'na ya, cua nda nu'u̱ chacuayá' cha' cajaa na' tso'o ti, nacui̱ yu ji'i̱ ycui' Ndyosi. Cua ndye ngua'ni nu'u̱ cña nu nacui̱ nu'u̱ cha' caca jna', cha' ndyu'ni na' cña cuentya jinu'u̱, nacui̱ nu cusu' bi'.

³⁰ Lo'o si'yu cloo ycui' ca na' cua na'a̱ na' ji'i̱ ycui' nu culo ji'i̱ ñati̱ laja cha' cuxi nu ntsu'u ji'i̱ ngu';

³¹ lo'o jua'a̱ ñati̱ tyucui ña'a̱ chalyuu, ña'a̱ ngu' cha' bi'.

³² Caca ycui' nu bi' sca xee tlyu nu tyu'u ne' cresiya ji'i̱ ñati̱ tyucui ña'a̱ chalyuu; tlyu tsa cha' tso'o caca ycui' nu bi' cuentya ji'i̱ ñati̱ jinu'u̱, nu ngu' Israel bi'. Jua'a̱ cha' nda nu cusu' Simeón bi' lo'o ycui' Ndyosi.

³³ Li' ndube tsa ti' José lo'o xtya'a̱ Jesús, nu lo'o ndyuna ngu' cha' nu nchcui' Simeón lo'o ycui' Ndyosi, ñi'ya̱ nu caca ji'i̱ nu cubi' bi'.

^34-35 Lo'o li' ngulacua̱ nu cusu' Simeón ji'i̱ ngu' bi'. Nde laca cha' nu nda nu cusu' lo'o María xtya'a̱ Jesús li': ―Quiña'a̱ tsa cha' tso'o caca ji'i̱ ngu' Israel xqui'ya cubi' re ―nacui̱ nu cusu' bi'―, masi ntsu'u ñati̱ nu chi̱i̱ ntsu'u tyiquee ngu' ña'a̱ ngu' ji'i̱, pana ntsu'u ñati̱ nu caja chalyuu cucui ji'i̱ xqui'ya cubi' re. Culo tu̱ cubi' re lcaa cha' nu ntsu'u yacu̱' ne' cresiya ji'i̱ ñati̱; caca cubi' re sca cha' tlyu nu cua nda ycui' Ndyosi ji'i̱ ñati̱, masi ná tyaja'a̱ lcaa ñati̱ tucuá cha' ji'i̱ ―nacui̱ Simeón ji'i̱ María xtya'a̱ cubi' bi'―. Lo'o jua'a̱ jinu'u̱ ―nacui̱ nu cusu' bi'―, tyacua sca cha' xñi'i̱ ti' jinu'u̱ xqui'ya cha' ná taquiya' ngu' ji'i̱ sñi' nu'u̱.

³⁶ Ntsu'u sca nu cuna'a̱ nu laca tu'ba ji'i̱ ycui' Ndyosi, nu ndi'i̱ ne' laa bi'; Ana naa nu cuna'a̱ bi', sñi' Fanuel laca, lo'o la cui' ñati̱ tya'a ji'i̱ ngu' Aser laca nu cuna'a̱ bi'. Cusu' tsa ma' bi' juani. Tya cuañi' ma' lo'o ngujui clyo'o ma'; pana cati ti yija̱ nguti'i̱ ma' lo'o clyo'o ma', lo'o li' ngujuii nu qui'yu bi'.

³⁷ Ndyanu ti'i ma' tyucui tyempo lo'o ndi'i̱ ma' chalyuu, lo'o nu juani ntsu'u jacuayala ntucua jacua yija̱ ma'. Tyucui tyempo ndi'i̱ ma' ca ne' laa tlyu bi', nde tsa̱ lo'o jua'a̱ nde talya ndyu'ni tlyu ma' ji'i̱ ycui' Ndyosi; ná ndacu ma' tyaja hora lo'o nchcui' ma' lo'o ycui' Ndyosi.

³⁸ Lo'o ndye nchcui' Simeón lo'o xtya'a̱ Jesús, la cui' hora bi' ndyalaa ma' Ana bi' ca su nga'a̱ ngu' lo'o Jesús ca ne' laa, la cui' cubi' bi' ni. Ndya tsa ma' xlya'be ji'i̱ ycui' Ndyosi xqui'ya cha' cua na'a̱ ma' ji'i̱ nu cubi' bi'. Li' nchcui' tsa ma' lo'o tyu̱u̱ tya'a ngu' quichi̱ tyi ma', jua'a̱ lo'o lcaa ngu' nu ndu̱ ti' ji'i̱ Cristo ña'a̱ cuayá' tyalaa tsa̱ nu ca̱a̱ yu cha' cua'ni lyaá yu ji'i̱ ngu' Jerusalén ya' ngu' xa' tsu'. Nacui̱ ma' ji'i̱ ngu' bi', cha' nu cubi' bi' laca nu culo lyiji ji'i̱ ngu' ji'i̱ yabe' nu cua nxtyanu ycui' Ndyosi ji'i̱ ngu'.

Nguxtyu̱u̱ ngu' ndyaa ngu' nde quichi̱ Nazaret

³⁹ Lo'o cua ndye ngua'ni ngu' lcaa cña nu nga'a̱ cha' cua'ni ngu', cña nu ngulo ycui' nu Xu'na na ji'i̱ ngu' judío cua sa'ni la cha' cua'ni ngu', li' nguxtyu̱u̱ ngu' ndyaa ngu' ca nde loyuu su cuentya Galilea; ndyalaa ngu' ca quichi̱ Nazaret nu laca quichi̱ tyi ngu' li'.

⁴⁰ Ca Nazaret bi' nguluu nu piti bi'; ngua lye la juersa ji'i̱ yu, cua nchca cuayá' la ti' yu. Lo'o jua'a̱ ycui' Ndyosi, tso'o tsa nti' Ni ña'a̱ Ni ji'i̱ yu.

Nquije nu piti ji'i̱ ngu' cusu' ca su nga'a̱ yu ne' laa

⁴¹ Lcaa yija̱ ndya'a̱ ngu' cusu' ji'i̱ nu piti bi' ta'a nde quichi̱ Jerusalén, cha' ca bi' ndyu'ni tlyu ngu' ta'a pascua.

⁴² Cua ntsu'u tii tyucuaa yija̱ Jesús, lo'o ndyaa ngu' ta'a ca Jerusalén ñi'ya̱ nu ndu'ni ti ngu' lcaa yija̱.

⁴³ Nu lo'o cua ndyu'u ta'a, li' nguxtyu̱u̱ ngu' ndyaa ngu' nde quichi̱ tyi ngu'. Ndyanu ycui' ti Jesús ca quichi̱ bi', pana ná ngua cuayá' ti' xtya'a̱ yu, ná jlo ti' ycui' José cha' cua ndyanu yu;

⁴⁴ ngua ti' ngu' cha' ñaa yu laja tsa tlyu ti ñati̱ nu ñaa tyucui̱i̱ bi'. Jua'a̱ cha' ngulacua ti' ngu', bi' cha' tya ndyaa la ngu' tyucui̱i̱ tyucui tsa̱. Chacua' li' ngulana ngu' ji'i̱ yu laja ngu' tya'a tso'o yu, laja ngu' tya'a yu. ¿Ma caja yu li'?

⁴⁵ Ná nquije yu ji'i̱ ngu' tsiya' ti; bi' cha' xa' nguxtyu̱u̱ ngu' chaca quiya' nde Jerusalén, nclyana ngu' ji'i̱ nu piti Jesús bi' li'.

⁴⁶ Lo'o jua'a̱ ngua li', tsa̱ nchca tyuna nquije nu piti bi' ji'i̱ ngu', nga'a̱ yu ca ne' laa. Tyi'i̱ ca chu̱' nu piti bi' ndi'i̱ mstru nu nclyu'u cha' jo'ó ne' laa. Ndyuna nu piti bi' lcaa cha' nu nchcui' ngu', lo'o jua'a̱ tyu̱u̱ tsa cha' nchcuane nu piti ji'i̱ ngu' bi' li'.

⁴⁷ Lcaa ñati̱ nu nga'a̱ cacua ti, ndube tsa ti' ngu' lo'o ndyuna ngu' cua ña'a̱ ca cha' nu nda nu piti bi'; ndube tsa ti' ngu' cha' nchca tsa ji'i̱ yu.

⁴⁸ Lo'o jua'a̱ ngu' cusu' ji'i̱ nu piti bi' ni, ndube tsa ti' ngu' bi' lo'o na'a̱ ngu' ji'i̱ yu cha' stu'ba ti ntucua yu lo'o ngu' tlyu bi'. Li' nchcui' xtya'a̱ yu lo'o yu: ―¿Ni cha' laca ngua'ni nu'u̱ jua'a̱, sñi'? ―nacui̱―. Quiña'a̱ tsa ngulacua ti' na' lo'o sti nu'u̱ macala su ndyanu nu'u̱.

⁴⁹ Li' nchcui' Jesús lo'o xtya'a̱ yu: ―¿Ni cha' ndya'a̱ ma̱ nclyana ma̱ jna'? ¿Ha ná jlo ti' cu'ma̱ cha' ntsu'u cha' cua'ni na' cña ji'i̱ Sti na'? ―nacui̱ Jesús li'.

⁵⁰ Pana, ná ngua cuayá' ti' ngu' tsiya' ti lo'o nchcui' Jesús lo'o ngu' jua'a̱.

⁵¹ Li' ndu'u nu piti bi' ndyaa nde Nazaret chaca quiya' lo'o ngu' cusu' ji'i̱ yu. Ña'a̱ ti tya ndaquiya' tsa yu ji'i̱ cha' nu nchcui' ngu' bi'. Lo'o jua'a̱ xtya'a̱ yu ni, nchco'o ma' lcaa cha' bi' ne' cresiya ji'i̱.

⁵² Ñi'ya̱ nu lijya̱ ndyaluu Jesús, jua'a̱ lijya̱ ndyaca cuayá' la ti' yu. Tso'o tsa nti' ycui' Ndyosi ña'a̱ Ni ji'i̱ yu; lo'o jua'a̱ ñati̱ chalyuu, tso'o nchcui' ngu' lo'o ña'a̱ ngu' ji'i̱ yu.