SAN JUAN 10 - Chatino Tataltepec

Cui̱i̱ ji'i̱ lo'o su ndyi'i̱ xlya' talya

¹ ’Ta na' sca cha' liñi lo'o ma̱ juani ―nacui̱ Jesús ji'i̱ ngu' judío li'―. Tachaa tsa ndya' lo'o su ndyi'i̱ xlya' talya. Lo'o ndya'a̱ ngu' ne' lo'o bi', sca ti to' lo'o nga'a̱ cha' tyatí̱ ngu'. Nu cuaana laca nu ndyacuí̱ que lo'o, ndyatí̱ chaca se'i̱ li' ―nacui̱ Jesús―.

² Nde to' lo'o ndyatí̱ nu laca xu'na xlya' bi'.

³ Nslo nu ntsu'u cua̱ to' lo'o ji'i̱ xu'na xlya', bi' cha' nda chacuayá' ndyatí̱ yu bi' ne' lo'o ―nacui̱ Jesús―. Nslo xlya' xtyi'i xu'na ni'; lo'o nxi'ya yu ji'i̱ xlya' ji'i̱ ycui' ca, lijya̱ ni' slo yu, ndya'a̱ lo'o yu ji'i̱ xlya' bi' li'.

⁴ Lo'o cua ngutu'u lcaa xlya' nde liya', li' nde loo la ntyucua nu laca xu'na ni', nde chu̱' la lca'a̱ xlya' ji'i̱ yu, cha' nduna ni' lo'o nxi'ya xu'na ni' ji'i̱ ni'.

⁵ Ná ndyu'u lca'a̱ ni' ji'i̱ xa' ñati̱; lo'o nduna ni' cha' nu nchcui' xa' ñati̱ lo'o ni', xna ni' li', cha' ná nslo ni' xtyi'i xa' ñati̱.

⁶ Bi' ngua sca cha' nu nchcui' ne' ti Jesús lo'o ngu', pana ná ngua cuayá' ti' ngu' tsiya' ti ñi'ya̱ ndyu'u cha' nu nchcui' Jesús lo'o ngu' li'.

Ña'a̱si̱i̱ tso'o Jesús ji'i̱ xlya' ji'i̱ yu

⁷ Lo'o li' nchcui' Jesús lo'o ngu' chaca quiya': ―Liñi tsa cha' nu nda na' lo'o ma̱ ―nacui̱ Jesús―. Ycui' ti na' laca̱ to' lo'o bi', cha' nchca'a̱ na' to' lo'o su ndyatí̱ ni'.

⁸ Ná ndaquiya' xlya' bi' ji'i̱ ñati̱ nu ya̱a̱ yala la, cha' xcui' nu cuaana laca ngu' bi'; tsa cu' ti ntyucuaana ngu' na nu ntsu'u ji'i̱ tya'a ñati̱ ngu' ―nacui̱―.

⁹ Nu nga'a̱ to' lo'o, tso'o tsa ña'a̱si̱i̱ ji'i̱ xlya' ji'i̱; lo'o jua'a̱ na', tso'o tsa ña'a̱si̱i̱ na' ji'i̱ ñati̱ 'na ―nacui̱ Jesús―. Taca tyeje tacui ngu' cha' tyatí̱ ngu' ne' lo'o su nga'a̱ na', cha' ná caca cuxi ji'i̱ ngu' bi' li'. Tso'o ti tyatí̱ ngu' ne' lo'o su nga'a̱ na', tso'o ti tyu'u ngu' chaca quiya', ñi'ya̱ nu ndu'ni xlya'. Caja ñi'ya̱ tyiji̱ yu'u ji'i̱ ngu' bi' li', ñi'ya̱ laca lo'o ndyiji na ndacu xlya'.

¹⁰ ’Tsa cu' ti cña cuaana ndu'ni nu ngu' cuaana bi' ―nacui̱ Jesús―. Ndya'a̱ ngu' bi' cha' cua'ni ñu'u̱ ngu' ji'i̱ ñati̱, cha' chcuna' cresiya ji'i̱ ñati̱ bi'; na cua lijya̱ na' cha' ta na' chalyuu tso'o ji'i̱ ñati̱, su caca tyi'i̱ ngu' tyucui tyiquee ngu' li' ―nacui̱―.

¹¹ Tso'o tsa ña'a̱si̱i̱ na' ji'i̱ xlya' 'na. Ycui' ca na' tyaja'a̱ Na' caja̱a̱ cha' ná cajaa xlya' jna', cha' ntsu'u tsa tyiquee na' ña'a̱ na' ji'i̱ ngu' ―nacui̱―.

¹² Sca msu ti ni, ná ña'a̱si̱i̱ tso'o ji'i̱ xlya', xna yu lo'o ña'a̱ yu cha' lijya̱ bo'o. Si'i ycui' yu nu laca loo ji'i̱ xlya', si'i ycui' yu nu ca ji'i̱ ni', nti' yu. Bi' cha' caca lya' ti' bo'o ji'i̱ taju xlya' bi', li' tyijyu' cañi xlya' xna ni' ―nacui̱ Jesús―.

¹³ Nxna msu tyijyu' cha' ne' xña ti ji'i̱ ngu' ndya'a̱ yu, si'i na ji'i̱ yu laca xlya' bi'.

¹⁴ ’Tso'o tsa ña'a̱si̱i̱ na' ji'i̱ xlya' 'na. Nslo na' ji'i̱ ñati̱ jna', lo'o jua'a̱ cua ngui'i̱ ñati̱ bi' jna'.

¹⁵ Ñi'ya̱ nslo Sti na' jna', jua'a̱ nslo na' ji'i̱ Sti na'; ñi'ya̱ ntsu'u cha' ji'i̱ Sti na' lo'o na', jua'a̱ ntsu'u cha' jna' lo'o ñati̱ jna'. Ycui' ca na' tyaja'a̱ na' caja̱a̱ cha' ná tye cresiya ji'i̱ ñati̱ 'na ―nacui̱ Jesús ji'i̱ ngu'―.

¹⁶ Tya ntsu'u la xa' ñati̱ 'na nu ndi'i̱ xa' quichi̱, nu ná stu'ba nga'a̱ lo'o taju ñati̱ re; nga'a̱ cha' tsa'a na' tsaqui'ya na' ji'i̱ ngu' bi', cha' lo'o ngu' bi' tya̱a̱ ngu' ca ne' lo'o re. Lo'o li' cuna ngu' cha' nu chcui' na' lo'o ngu'; caca ngu' sca ti taju ñati̱ 'na, lo'o jua'a̱ caca na' nu sca ti Xu'na ngu' ―nacui̱ Jesús―.

¹⁷ ’Tye chalyuu 'na, cajaa na' cha' tyu'ú na' chaca quiya' ca tiya' la, bi' cha' ntsu'u tsa tyiquee Sti na' ña'a̱ 'na.

¹⁸ Ná tucui xlyaá cresiya 'na, ycui' ca ti na' ntaja'a̱ na' caja̱a̱ ―nacui̱ Jesús―. Taca cua'ni na' jua'a̱, cha' cua nda ycui' Ndyosi Sti na' chacuayá' cajaa na', lo'o jua'a̱ cua nda Ni chacuayá' cha' tyu'ú na' chaca quiya'.

¹⁹ Tya chaca quiya' ná stu'ba cha' ji'i̱ ngu' judío lo'o tya'a ngu' cha' nchcui' Jesús jua'a̱.

²⁰ Ntsu'u tsa ngu' nu nacui̱ ndi'ya̱: ―Ñi'ya̱ nti' sca nu xña'a̱, jua'a̱ nti' yu cua. Na tonto yu. Ná ntsu'u cha' cuna na cha' nu nchcui' yu cua.

²¹ Li' nacui̱ xa' la ñati̱: ―Ná taca chcui' ngu' ñi'ya̱ nu nchcui' yu cua juani si ntsu'u cui'i̱ xña'a̱ ji'i̱ ngu'. ¿Ha caca ji'i̱ nu xña'a̱ cua'ni cha' tyaca tso'o cloo nu cuityi̱'? Ná taca ji'i̱.

Nxu̱u̱ tya'a ngu' judío lo'o Jesús

²² Tyempo tlya' ngua li', nu lo'o sube tsa tsa̱. Nde quichi̱ Jerusalén ndyu'ni tlyu ngu' ji'i̱ ta'a su ngulacua̱ ji'i̱ laa tonu ca bi'.

²³ Ndyaa Jesús to' laa ca su nchcui' ngu' ji'i̱: “Corredor ji'i̱ Salomón”.

²⁴ Li' ndyu'u ti'i̱ tyu̱u̱ tya'a ngu' judío slo Jesús, nchcuane ngu' ji'i̱ yu: ―¿Ni jacua' chcui' liñi nu'u̱ lo'o cua, cha' caca cuayá' ti' ya si nu'u̱ laca nu ñati̱ tlyu nu ta ycui' Ndyosi ji'i̱ ca̱a̱? ―nacui̱ ngu' ji'i̱ Jesús―. Ná talo ya si ná cacha' nu'u̱ lcaa cha' ji'i̱ cua. Tso'o si chcui' liñi nu'u̱ juani.

²⁵ ―Jua'a̱ ni na' tsaca quiya' ji'i̱ ma̱ ―nacui̱ Jesús ji'i̱ ngu' bi' li'―, lo'o ná jlya ti' ma̱ cha' nu nchcui' na' lo'o ma̱ tsiya' ti ―nacui̱―. Lo'o ña'a̱ ma̱ cha' ndu'ni na' cña tonu bi' chacuayá' ji'i̱ Sti na', ndyiji cha' liñi ji'i̱ ma̱ li';

²⁶ pana ná jlya ti' ma̱ ji'i̱ cña bi', cha' si'i taju ñati̱ 'na laca ma̱. Nacui̱ na' jua'a̱ ji'i̱ ma̱ tsubi' ―nacui̱ Jesús ji'i̱ ngu'―.

²⁷ Ñi'ya̱ ndu'ni xlya', jua'a̱ nduna ñati̱ 'na jna' lo'o nchcui' na' lo'o ngu'. Cua nslo na' ji'i̱ ngu', cua ndya'a̱ ngu' lo'o na'.

²⁸ Ná nga'a̱ cha' tye chalyuu nu ta na' ji'i̱ ngu' bi', ná chcuna' cresiya ji'i̱ ngu' li'. Ná tucui caca ji'i̱ xlyaá ji'i̱ ñati̱ bi' 'na, cha' tso'o tsa ña'a̱si̱i̱ na' ji'i̱ ñati̱ bi' ―nacui̱ Jesús―.

²⁹ Na cua nda Sti na' ñati̱ bi' jna', lo'o jua'a̱ nga'aa ntsu'u chaca nu stu'ba tlyu lo'o ycui' Ni; bi' cha' ná tucui caca ji'i̱ xlyaá ji'i̱ ngu' bi', nu lo'o ña'a̱si̱i̱ Sti na' ji'i̱ ngu'.

³⁰ Lo'o jua'a̱ stu'ba ntsu'u cha' ji'i̱ ycui' Ndyosi Sti na' lo'o na' ―nacui̱ Jesús.

³¹ Chaca quiya' ngusñi nu ngu' judío bi' quee cha' cu̱ ngu' ji'i̱ Jesús, cujuii ngu' ji'i̱.

³² Li' nchcui' yu lo'o ngu' bi': ―Cua quiña'a̱ tsa cña tso'o ngua'ni na' chacuayá' ji'i̱ Sti na' slo cu'ma̱, lo'o jua'a̱ cua na'a̱ ma̱ cña nu ngua'ni na'. ¿Ha xqui'ya sca cña tso'o nu ngua'ni na', bi' cha' nti' ma̱ cuta ma̱ quee 'na?

³³ Li' nguxtyacui nu ngu' judío bi' cha' lo'o Jesús: ―Ná cujuii ya jinu'u̱ lo'o quee xqui'ya sca cña tso'o nu ngua'ni nu'u̱ ―nacui̱ ngu'―, xqui'ya cha' cuxi nu nchcui' nu'u̱ ji'i̱ ycui' Ndyosi, bi' cha' cu̱ ya quee jinu'u̱. Sñi' ñati̱ chalyuu ti laca nu'u̱, pana ndu'ni nu'u̱ cha' laca nu'u̱ ycui' Ndyosi.

³⁴ Li' nacui̱ Jesús ji'i̱ ngu': ―Lo quityi nscua cha' cusu' nu jlya tsa ti' ma̱, ntsu'u sca cha' nu nchcui' ndi'ya̱: “Ndyosi laca lcaa cu'ma̱ cuentya jna'” ―nacui̱ Jesús―.

³⁵ Jlo ti' na cha' ná caca ji'na tacu̱' na ni sca cha' nu nda ycui' Ndyosi lo'o na. Sca cha' nu nchcui' quityi bi' ni, nacui̱ cha' ñi'ya̱ laca ycui' Ndyosi, jua'a̱ laca ñati̱ nu ndaquiya' cha' nu nda Ni lo'o.

³⁶ ¿Ni cha' laca ngusta cu'ma̱ qui'ya jna' slo ycui' Ndyosi lo'o nacui̱ ma̱ cha' nchcui' na' cha' cuxi ji'i̱ ycui' Ni? ―nacui̱ Jesús―. Cua ngusubi Sti na' jna', nda Ni 'na lijya̱a̱ nde chalyuu. ¿Ni cha' laca ná tso'o nti' ma̱ cha' nacui̱ na' cha' nu sca ti Sñi' ycui' Ndyosi laca na'?

³⁷ Ná ntsu'u cha' jlya ti' ma̱ jna' ―nacui̱ Jesús li'―, si ná ndu'ni na' cua ña'a̱ ca cña nu ndu'ni Sti na' ―nacui̱―.

³⁸ Pana nu lo'o ndu'ni na' cña ji'i̱ ycui' Ndyosi, li' caca jlya ti' ma̱ jna' xqui'ya cña nu ndu'ni na' bi', masi ná jlya ti' ma̱ cha' nu nchcui' na'. Lo'o li' caca cuayá' ti' ma̱, caca jlo ti' ma̱, cha' stu'ba ntsu'u cha' ji'i̱ Sti na' lo'o na', stu'ba ntsu'u cha' jna' lo'o Sti na'.

³⁹ Chaca quiya' ngua'ni cuayá' ngu' si caca taya' ngu' ji'i̱ Jesús. Li' nga'aa ndyanu yu, laja ti ngu' ngutu'u yu ngulaá yu ji'i̱ ngu'.

⁴⁰ Li' ndyaa Jesús chaca quiya', ndyaa chaca tsu' sta'a̱ Jordán ca su ngutu̱ Juan ntyucuatya ji'i̱ ngu' tya clyo. Nde bi' nguti'i̱ yu, lo'o jua'a̱ ndya'a̱ tsa ngu' slo.

⁴¹ Li' nacui̱ ngu' ji'i̱ tya'a ngu': ―Ná ngua'ni Juan ni sca cña tonu cha' cube ti' na ji'i̱. Pana liñi tsa ndyu'u lcaa cha' nu nchcui' nu Juan bi' tya tsubi' la cuentya ji'i̱ nu qui'yu re.

⁴² Lo'o li' cua nguxana tyu̱u̱ tya'a ngu', jlya ti' ngu' ji'i̱ Jesús lo'o nguti'i̱ ngu' nde bi'.