HEBREOS 9 - Chatino Tataltepec

Cristo laca nu cua ngusaala tyucui̱i̱ ji'na cha' ca̱a̱ na slo ycui' Ndyosi

¹ Nu cha' cusu' nu cua nda Ni lo'o ngu' Israel nu ngua li', nchcui' bi' ñi'ya̱ cua'ni ngu' lo'o ngua'ni tlyu ngu' ji'i̱ ycui' Ndyosi. Lo'o jua'a̱ cua ntsu'u sca ni'i̱ nu tacati ji'i̱ ngu', su ngua'ni tlyu ngu' bi' ji'i̱ Ni, masi ñati̱ ti ngua ngu' nu ngüiñá ni'i̱ bi';

² sca chcua'ya late' ngüiñá ngu' bi' nu nscua cla'be ne' lo'o su ndya'a̱ sti jo'ó ti. Nde ne' chcua'ya bi' cua ntucua candyeru chcua̱ su ndyaqui̱ quii' lcaa hora; jua'a̱ ntucua sca mesa su nscua xlyá lo, nu caca msta̱ ji'i̱ ycui' Ndyosi. Lcaa tsa̱ ngusta sti jo'ó msta̱ bi'.

³ Ca ne' tasá nu ndacui cla'be ne' chcua'ya bi', ca bi' ntsu'u chaca cuarto nu tacati tsa ji'i̱ ngu'.

⁴ Nde ne' cuarto bi' ntucua mesa oro su ndaqui̱ sti jo'ó yana jo'ó lo; la cui' ca bi' ntucua cñá' tacati, nu ngüixi̱i̱ tyi'i̱ ca chu̱' yaca lo'o chcua̱ oro. Ne' cñá' bi' cua ntsu'u co'o tsa yu'be ti na nu ñi'ya̱ ña'a̱ scua̱ ña'a̱, nu nda ycui' Ndyosi cha' ndyacu ngu' Israel ca lo nati̱' btyi su nguta'a̱ yu'u ngu' nu ngua sa'ni; ne' sca caatya̱ oro ntsu'u co'o na nu ndyacu ngu' bi'. Lo'o jua'a̱ ca ne' cñá' bi' ntsu'u co'o yaca xca̱ ji'i̱ jyo'o Aarón, yaca nu ntyucua sati̱ chu̱' jua'a̱ ti; jua'a̱ ntsu'u tyucuaa quee cuaja', nu nscua nu tii tya'a cha' bi' lo, nu ndacha' ni cña nu cua ngulo ycui' Ndyosi ji'i̱ ngu' cha' cua'ni ngu'. Ca ta'a na bi' ntsu'u co'o ne' cñá' tacati bi'.

⁵ Chu̱' cñá' bi' ntucua lcui̱ ji'i̱ tucua tya'a xca̱ ji'i̱ ycui' Ndyosi nu ndubi tsa ña'a̱; ngatya'a ti lo lu'be xca̱ ndubi bi' chu̱' cñá', cha' tyi'u ti' ñati̱ cha' ca bi' lijya̱ ycui' Ndyosi cha' cati̱ qui'ya nu ntsu'u ji'i̱ ngu'. Xca̱ ndubi bi' cua ntucua cha' ca cuayá' ti' ngu' Israel cha' lcaa tsa̱ nga'a̱ ycui' Ndyosi laja su ndi'i̱ ngu'. Pana ná caja tyempo chcui' na ji'i̱ lcaa cha' bi' juani.

⁶ Jua'a̱ ngua cha' ntucua lcaa yaca bi' ne' chcua'ya late' bi' su ngua'ni tlyu ngu' ji'i̱ ycui' Ndyosi, cha' lcaa tsa̱ ndyatí̱ sti jo'ó ndyaa ne' chcua'ya bi', ngua'ni cña ji'i̱ ycui' Ndyosi ca jua;

⁷ pana sca ti sti jo'ó nu laca loo nguta'a̱ ca ne' cuarto nu tacati tsa bi' ji'i̱ ngu', sca ti quiya' nguta'a̱ nu cusu' bi' sca yija̱. Lo'o tañi na'ni ndyaa nu cusu' bi' li', cha' scui̱ ji'i̱ slo ycui' Ndyosi ca ne' cuarto tacati bi', cha' jua'a̱ cuityi̱ Ni qui'ya nu ntsu'u ji'i̱ ycui' nu cusu' bi', lo'o jua'a̱ cuityi̱ Ni lcaa qui'ya nu ntsu'u ji'i̱ lcaa ngu' quichi̱, masi qui'ya nu ná nda ngu' cuentya si cha' cuxi ngua'ni ngu' nquicha', cha' cuentya ji'i̱ ycui' Ndyosi ngua'ni nu cusu' cña bi'.

⁸ Laja lo'o nchcui' na ji'i̱ chcua'ya late' bi' ndu'ni Xtyi'i ycui' Ndyosi cha' ca cuayá' ti' na, cha' tya lyiji xñi tso'o na tyucui̱i̱ cha' ca̱a̱ na slo ycui' Ndyosi si ña'a̱ ti tya ndu̱ ni'i̱ cusu' bi', si tya ndu'ni tlyu na ji'i̱ ycui' Ndyosi ñi'ya̱ nu ngua'ni ngu' tya sa'ni bi'; tya lyiji caja ñi'ya̱ nu ca̱a̱ na slo ycui' Ndyosi nu lubii tsiya' ti cha' ji'i̱ Ni li', si jua'a̱.

⁹ Xqui'ya lcaa cha' bi' tso'o la ca cuayá' ti' na cha' nu ndyaca juani; ná caja ñi'ya̱ nu ca tso'o cresiya ji'na cuentya ji'i̱ ycui' Ndyosi laja lo'o ndyu'ni tlyu ti na ji'i̱ Ni ñi'ya̱ nu ngua'ni ngu' bi', masi quiña'a̱ tsa msta̱ ta na ji'i̱ Ni, masi taqui̱ tsa na na'ni lo mesa cha' cati̱ qui'ya nu ntsu'u ji'na.

¹⁰ Xcui' cha' nu nchcui' ñati̱ chalyuu ti laca, masi ñacui̱ ngu' cha' ná tso'o cacu na co'o na sca lo na, masi ñacui̱ ngu' ñi'ya̱ cua'ni na cha' caca lubii cresiya ji'na; cña nu ndatsaa ti ñati̱ chalyuu ji'na cha' cua'ni na, jua'a̱ laca cha' bi'. Xti ti tyempo talo cha' bi' ña'a̱ cuayá' xcutsa'a̱ ycui' Ndyosi lcaa cha'.

¹¹ Lo'o juani cua ya̱a̱ Cristo, nu laca chaca lo sti jo'ó nu laca loo; cua laca nguxana ndyaca tso'o chalyuu xqui'ya Ni. Ná ndyaa Ni ngua'ni Ni cña ne' sca ni'i̱ tlyu nu ngüiñá ñati̱ ti, cha' ná ndu'ni cha' tyu'u cha' ji'i̱ Ni lo'o sca cha' nu ntsu'u nde chalyuu.

¹² Ndi'ya̱ ña'a̱ cña nu ngua'ni Cristo cuentya ji'na, nu lo'o ndyaa Ni la cui' ca su tacati tsa ca su ntucua ycui' Ndyosi: ná nguta'a̱ Ni lo'o tañi chivo lo'o tañi chqueru, cha' scui̱ Ni tañi bi' nde slo ycui' Ndyosi cha' cati̱ qui'ya nu ntsu'u ji'na; pana ngujuii Cristo lo crusi, ndye tañi ycui' yu ndyalú cuentya ji'i̱ qui'ya nu ntsu'u ji'na. Bi' cha' sca ti quiya' tsiya' ti ngua'ni lyaá Cristo ji'na, lo'o jua'a̱ ná nga'a̱ cha' tye cha' ngulaá na ji'i̱ nu cuxi, xqui'ya cña nu ngua'ni Ni cuentya ji'na.

¹³ Nu ngua sa'ni la ni, si ntsu'u sca cha' nu ngua'ni cha' nga'aa lubii sca ñati̱, li' nguscui̱ sti jo'ó tañi chivo tañi toro lo ngu', cha' caca lubii ngu' hichu̱' ti ngu' cuentya ji'i̱ ycui' Ndyosi; jua'a̱ nguscui̱ sti jo'ó jii lo ngu', jii ji'i̱ chqueru msta̱ nu cua ndyaqui̱ cuentya ji'i̱ ngu'.

¹⁴ Masi jua'a̱ ngua'ni ngu' cña nu ngua li', pana tlyu la cña nu ngua'ni Cristo juani, cha' ndyalú tañi ycui' yu lo'o ngujuii yu lo crusi cuentya ji'na. Xqui'ya Xtyi'i ycui' Ni, bi' cha' ngua ji'i̱ Cristo ta yu tyucui ña'a̱ ycui' ca yu, cha' sca ti quiya' cati̱ qui'ya nu ntsu'u ji'na lo'o ycui' Ndyosi; nu ycui' Cristo ni, ná ntsu'u qui'ya ji'i̱ yu tsiya' ti, bi' cha' taca cua'ni lubii Ni cresiya ji'na, nu lo'o tyi'u ti' na ñi'ya̱ nu ngua'ni Ni lo'o ndyalú tañi ycui' Ni. Li' cuityi̱ Ni lcaa cha' cuxi nu ndyu'ni ñu'u̱ tsa ji'na, jua'a̱ taca ji'na cua'ni na cña ji'i̱ ycui' Ndyosi nu lu'ú ca nde chalyuu li'.

¹⁵ Bi' cha' lacua, Cristo laca nu ngüiñi sca cha' cucui ji'i̱ ycui' Ndyosi lo'o ñati̱ chalyuu, masi lo'o cua ña'a̱ ca ñati̱ nu cua ngusubi ycui' Ndyosi ji'i̱. Jua'a̱ ngua'ni Cristo, nu lo'o ngujuii yu, cha' jua'a̱ ngulaá na ji'i̱ lcaa cha' cuxi nu ngua'ni na lo'o tya ndaquiya' tsa na ji'i̱ cha' cusu' bi'. Nu juani taca tyacua lcaa cha' nu cua nacui̱ ycui' Ndyosi Sti na ji'na cha' tyacua ji'i̱ lcaa ngu' nu ngusubi Ni ji'i̱; ná nga'a̱ cha' culiji yu'u cha' bi' ji'na tsiya' ti.

¹⁶ Sca quityi nu nclyo ñati̱ cha' tyanu xi cha' tso'o ji'i̱ tya'a ngu' lo'o cua ngujuii ngu' ni, ndi'ya̱ ndyaca cha' ji'i̱ quityi bi': ná caja cha' tso'o bi' ji'i̱ tya'a ngu', si bilya cajaa nu ca ji'i̱ cha' tso'o bi';

¹⁷ ná cua'nijo'o quityi bi', si tya lu'ú nu ca ji'i̱ cha' tso'o bi'. Sca ti si cua ngujuii yu bi', li' cua'nijo'o quityi bi' ji'i̱ ngu'.

¹⁸ Lo'o jua'a̱ nu cha' cusu' nu ngua clyo bi' ni, ngua'ni cha' bi' cña cuentya ji'i̱ ngu', xqui'ya cha' ndyujuii ngu' sca na'ni nu ngua msta̱ cha' cati̱ qui'ya nu ntsu'u ji'i̱ ngu'.

¹⁹ Nu ngua tya clyo ndacha' jyo'o Moisés lcaa cha' cusu' bi' ji'i̱ lcaa ngu' quichi̱, ndacha' yu lcaa cña nu cua ngulo ycui' Ndyosi ji'i̱ ngu' cha' cua'ni ngu'. Li' ngusñi yu xi tañi chqueru lo'o tañi chivo nu ndyujuii ca ngu', nguxiya' yu tañi bi' lo'o xi hitya lubii. Li' ntejeya' yu ji'i̱ sca sta̱' yaca nu ntsu'u quicha̱' xlya' nu nga'a ña'a̱ chu̱'; lo'o quicha̱' xlya' bi' nguscui̱ yu tañi bi' lo ngu' quichi̱ bi', jua'a̱ lo cha' cusu' bi' nu nscua lo quee cuaja'.

²⁰ Lo'o li' nchcui' yu lo'o ngu' bi': “Lo'o tañi re ndatsaa ycui' Ndyosi ji'i̱ ma̱, cha' cua'ni ma̱ lcaa lo cña nu cua ngulo Ni ji'i̱ ma̱ cha' cua'ni ma̱, nu lo'o ngüiñi cha' ji'i̱ Ni lo'o ma̱”, nacui̱ Moisés ji'i̱ ngu' bi' li'.

²¹ La cui' jua'a̱ nguscui̱ Moisés tañi lo chcua'ya bi', jua'a̱ lo lcaa na nu ntucua ca su ndu'ni tlyu ngu' ji'i̱ ycui' Ndyosi.

²² Cuentya ji'i̱ cha' cusu' bi', xcui' lo'o tañi sca na'ni nu cua ndyujuii ngu', jua'a̱ ngua lubii lcaa na; lo'o jua'a̱ juani, sca ti ndyiji cha' clyu ti' ji'na lo'o ycui' Ndyosi, cha' nu cua ngujuii Cristo cuentya ji'na.

Ngüityi̱ Cristo qui'ya nu ntsu'u ji'i̱ ñati̱ nu lo'o ngujuii yu lo crusi

²³ Ngua'ni jyo'o cusu' ji'na jua'a̱ lo'o ngua'ni tlyu ngu' ji'i̱ ycui' Ndyosi ne' laa nu ngua li', cha' caca lubii lcaa na nu cua'nijo'o ji'i̱ ngu'; nde chalyuu ti ntucua lcaa na bi', masi ndi'i̱ bi' cuentya ji'i̱ ycui' Ndyosi. Pana tlyu la cña laca cati̱ qui'ya nu ntsu'u ji'i̱ ñati̱ chalyuu ca slo ycui' Ndyosi, tso'o la cña laca nu cua'ni lyaá Ni ji'i̱ ñati̱ ji'i̱ cha' cuxi bi'.

²⁴ Bi' cha' nga'aa ndyaa Cristo nde ne' laa nu ngüiñá ñati̱ nde chalyuu ti, masi ntucua bi' cuentya ji'i̱ ycui' Ndyosi; na cua ndyaa liñi Ni ca slo ycui' Ndyosi ca nde cua̱. Ca bi' ntucua Ni juani, cha' chcui' lo'o ycui' Ndyosi cuentya ji'na.

²⁵ Cuentya ji'i̱ cha' cusu' ni, sca ti quiya' sca yija̱ ndya'a̱ sti jo'ó nu laca loo ji'i̱ tya'a ngu' judío ne' cuarto nu tacati tsa cuentya ji'i̱ ngu' bi'; ndya'a̱ lo'o nu cusu' ji'i̱ tañi na'ni nu cua ndyujuii ca ti ngu' ji'i̱ cha' caca msta̱, cha' cuityi̱ qui'ya nu ntsu'u ji'i̱ ngu' quichi̱. Pana si'i tyu̱u̱ quiya' ndyaa Cristo ca slo ycui' Ndyosi nde cua̱.

²⁶ Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.

²⁷ Cua ña'a̱ ca na ndyijii na sca ti quiya', lo'o li' ndu'ni cuayá' ycui' Ndyosi ji'na;

²⁸ lo'o jua'a̱ Cristo, sca ti quiya' ngujuii yu lo crusi, cha' jua'a̱ ngüityi̱ yu qui'ya nu ntsu'u ji'i̱ quiña'a̱ tsa ñati̱. Tya ca̱a̱ Cristo chaca quiya' ca tiya' la; pana nga'aa si'i cha' cuityi̱ Ni qui'ya nu ntsu'u ji'i̱ ñati̱ ca̱a̱ Ni li', cha' cua ndye ngua'ni Ni cña bi'. Li' cua'ni lyaá lyiji Ni ji'i̱ lcaa ñati̱ nu ntajatya tsa ji'i̱ Ni, ña'a̱ cuayá' nu ca̱a̱ Ni chaca quiya'.