HEBREOS 8 - Chatino Tataltepec

Jesús laca nu ndi'i̱ ca slo ycui' Ndyosi, cha' chcui' lo'o Ni cuentya ji'na

¹ Ndi'ya̱ ndyu'u cha' nu nti' na' chcui̱' lo'o ma̱ juani: Ca cua̱ ntucua Jesús, nde la'a tsu' cui̱ ca su ntucua ycui' Ndyosi, cha' nclyo Ni cña tyucui ña'a̱ chalyuu; ca bi' ntucua Jesús cha' laca Ni sti jo'ó nu laca loo la cuentya ji'na.

² Ndu'ni Ni cña ca sca se'i̱ su tacati tsa nu ngüiñá ycui' Ndyosi; si'i ñati̱ chalyuu ti nu ngüiñá ji'i̱, cha' laca bi' ñi'ya̱ nu ngua ti' ycui' Ndyosi cha' caca.

³ Lcaa xu'na sti jo'ó nde chalyuu ni, ntsu'u cha' sta ngu' msta̱ ca slo ycui' Ndyosi, ntsu'u cha' taqui̱ ngu' xa' la msta̱ lo mesa quii', cha' bi' laca cña ji'i̱ ngu'; lo'o jua'a̱ Jesús ni, ntsu'u msta̱ nu nda Ni ca slo ycui' Ndyosi cuentya ji'na,

⁴ masi ná ngua Jesús sti jo'ó lo'o nguti'i̱ yu nde chalyuu. Ná nda ngu' cña bi' ji'i̱, cha' cua laca ndi'i̱ xa' la sti jo'ó nu nsta msta̱ nu ntsu'u cha' ta ngu' quichi̱ chacuayá' ji'i̱ jyo'o Moisés.

⁵ Pana nu xa' la sti jo'ó bi' ni, ñati̱ nu cajaa ti laca ngu' bi'; cua laca ti cña ndu'ni ngu'. Xqui'ya ngu' bi' nchca cuayá' ti' na cha' tso'o la tsiya' ti sti jo'ó laca Jesús, nu ntucua ca slo ycui' Ndyosi. Lo'o jua'a̱ nu chcua'ya late' nu ngüiñá jyo'o Moisés su ngua'ni tlyu jyo'o cusu' ji'na ji'i̱ ycui' Ndyosi nu ngua li', ndi'ya̱ nchcui' Ni lo'o nu cusu' bi' cuentya ji'i̱ chcua'ya bi': “Cui'ya nu'u̱ cuentya cha' cuiñá ma̱ ni'i̱ bi' ñi'ya̱ nu ngulu'u na' ji'i̱ ma̱ cha' cuiñá ma̱ ji'i̱, nu lo'o ngutu̱ nu'u̱ nchcui' nu'u̱ lo'o na' lo xlya ca'ya cua̱ bi'”, nacui̱ Ni. Pana sca na nu culiji yu'u ti ngua bi', tso'o la tsiya' ti su ntucua Ni nde cua̱.

⁶ Bi' cha' cua nchca cuayá' ti' na cha' tso'o la tsiya' ti cña nu ndu'ni Jesús cuentya ji'na, siya' la cña nu ndyu'ni nu xa' la sti jo'ó nde chalyuu. Lo'o juani ndulo tsa cha' ji'na, la cui' cha' nu cua ngüiñi ji'i̱ ycui' Ndyosi lo'o na xqui'ya Jesús, cha' xcui' cha' liñi tsiya' ti nchcui' ycui' Ndyosi lo'o na.

⁷ Ntsu'u tsa cha' nu lyiji ji'i̱ cha' cusu' nu ngua tya clyo, nu cua ngüiñi ji'i̱ Ni lo'o ñati̱ tyempo bi', bi' cha' nda ycui' Ndyosi chaca cha' lo'o ñati̱. Ná ndyu'u scua cha' cusu' bi', cha' taca ca tso'o cresiya ji'i̱ ñati̱ cuentya ji'i̱ ycui' Ndyosi,

⁸ cha' ná tso'o ngua'ni ñati̱ bi' li'. Ndi'ya̱ nscua lo quityi ji'i̱ ycui' Ndyosi cuentya ji'i̱ cha' bi': Cua ngulala ti tyalaa tsa̱ cha' quiñi cha' 'na lo'o tya'a ngu' Israel chaca quiya', la cui' jua'a̱ lo'o tya'a ngu' Judá, nacui̱ ycui' Ndyosi nu Xu'na na.

⁹ Si'i la cui' cha' ñi'ya̱ nu cua ngüiñi 'na lo'o jyo'o cusu' ji'i̱ ngu' bi' nu ngua sa'ni, nacui̱ Ni. Nu ngua li' ntejeya' na' ji'i̱ ngu' cha' ngutu'u ngu' ca quichi̱ tyi ngu' Egipto, ndyaa ngu'. Pana ná ndaquiya' ngu' ji'i̱ cha' nu cua ngüiñi 'na lo'o ngu'; ña'a̱ ti ngua'ni tsa ngu' cha' cuxi, bi' cha' nga'aa ntucuá na' cha' ji'i̱ ngu', nacui̱ ycui' Ndyosi nu Xu'na na.

¹⁰ Lo'o juani nde laca cha' cucui nu cua quiñi ti 'na lo'o ngu' Israel juani, nacui̱ Ni. Nu lo'o tyalaa tyempo, li' cua'ni na' cha' tyanu tso'o lcaa cha' ne' cresiya ji'i̱ ngu', ñi'ya̱ nu chcui' na' lo'o ngu' li'. Tyucui ti' tyiquee ngu' cua'ni ngu' cña 'na li'; caca na' ycui' Ndyosi nu Xu'na ngu' li', lo'o jua'a̱ caca ngu' bi' ñati̱ jna'.

¹¹ Taca jlo ti' ngu' tilaca laca na' li', lcaa ngu' lo'o tya'a ngu', masi nu sube, masi ñati̱ cusu'. Lo'o li' nga'aa ntsu'u cha' cacha' ngu' ji'i̱ tya'a ngu' tilaca laca na'; nga'aa nti' cha' culu'u ngu' ji'i̱ tya'a quichi̱ tyi ngu' cha' laca na' ycui' Ndyosi nu Xu'na ngu' li'.

¹² Cua'ni clyu ti' na' ji'i̱ ngu' ji'i̱ qui'ya nu ntsu'u ji'i̱ ngu' li'; nga'aa culotu̱ na' qui'ya ji'i̱ ngu' li'. Jua'a̱ nchcui' quityi ji'i̱ ycui' Ndyosi bi'.

¹³ Na cua culiji yu'u ti cha' cusu' nu ngua tya clyo; jua'a̱ ndyu'u cha' bi' li', nu lo'o nchcui' ycui' Ndyosi ji'i̱ chaca cha' cucui nu cua quiñi ti ji'i̱ Ni lo'o na. Sa'ni tsa nguxana cha' cusu' bi'; cua jyo'o ti cha' bi' juani, cua culiji ti cha' jua'a̱ ti.