HEBREOS 7 - Chatino Tataltepec

Ñi'ya̱ ngua Melquisedec sti jo'ó, jua'a̱ laca Jesús cuentya ji'na juani

¹ Nu jyo'o Melquisedec bi' ni, xu'na quichi̱ Salem ngua nu cusu' bi'; cuentya ji'i̱ ycui' Ndyosi nu laca loo la ngua'ni yu cña cha' ngua yu sti jo'ó. Nu ngua tyempo bi' cua ndyaa lca'a̱ jyo'o Abraham ji'i̱ tyu̱u̱ tya'a rey xña'a̱, cha' ngusu̱u̱ tya'a yu lo'o ngu' bi', ndyujuii yu ji'i̱ nu ngu' xña'a̱ bi' li'. Tyucui̱i̱ lo'o ñaa yu, li' ngutu'u nu Melquisedec bi' ndyaa to' tyucui̱i̱ cha' tyacua tya'a lo'o nu Abraham bi'; ngulacua̱ ji'i̱ yu chacuayá' ji'i̱ ycui' Ndyosi li'.

² Bi' cha' ngusa'be Abraham lcaa yu'ba nu nquije ji'i̱ yu chaca quiya', nu nguaana nu ngu' xña'a̱ bi'; tii tya'a yu'be ngusa'be yu lcaa cha' bi', lo'o li' nda yu ña'a̱ tsaca yu'be ji'i̱ nu cusu' Melquisedec bi'. Ndi'ya̱ ndyu'u xtañi nu cusu' bi': “xu'na quichi̱ nu liñi ca ndu'ni”, jua'a̱ ndyu'u cha' bi' cha'cña ji'na; lo'o jua'a̱ cha' xu'na quichi̱ Salem ngua nu cusu' bi', bi' cha' taca chcui' na: “ti̱ ti ndi'i̱ cresiya ji'i̱ ngu' xqui'ya nu xu'na ngu'”, cha' jua'a̱ ndyu'u xquicha' Salem cha'cña ji'na.

³ Ná nchcui' quityi ñi'ya̱ naa sti xtya'a̱ nu Melquisedec bi', jua'a̱ ni sca cha' ná nscua lo quityi cuentya ji'i̱ jyo'o cusu' ji'i̱ nu cusu' bi'; ná nchcui' ni jacua' ngula, ni jacua' ngujuii. Ñi'ya̱ ngua Melquisedec, jua'a̱ laca Jesús, cha' lcaa tyempo laca yu sti jo'ó cuentya ji'na; pana Jesús ni, laca yu nu sca ti Sñi' ycui' Ndyosi.

⁴ Culacua xi ti' ma̱ lacua, ni cha' ngua nu cusu' bi' tlyu la que Abraham. Ji'i̱ nu cusu' Melquisedec bi' cua nda jyo'o cusu' ji'na ña'a̱ tsaca yu'be yu'ba, la cui' yu'ba nu cua nquije ji'i̱ yu chaca quiya', nu nguaana nu ngu' xña'a̱ bi'.

⁵ Chalyuu nu ngua sa'ni bi', sca ti nu ñati̱ tya'a ji'i̱ jyo'o Leví laca sti jo'ó; bi' ti ngu' nu nda ycui' Ndyosi chacuayá' ji'i̱ cha' xñi ngu' msta̱ nu nda cua ña'a̱ ca ngu' Israel ji'i̱ ycui' Ndyosi. Msta̱ bi' laca sa yu'be lcaa cha' tso'o nu ntsu'u ji'i̱ ngu'. Lo'o jua'a̱ laca sti jo'ó bi' la cui' tya'a ñati̱ lo'o tya'a quichi̱ tyi ngu' nu cuentya ji'i̱ Abraham.

⁶ Pana nu cusu' Melquisedec bi' ni, si'i tya'a ngu' Leví ngua Melquisedec bi' tsiya' ti, masi ngusñi yu msta̱ nu cua nda Abraham ji'i̱ ycui' Ndyosi; li' ngulacua̱ nu cusu' bi' ji'i̱ Abraham, xqui'ya cha' cua ngüiñi cha' ji'i̱ ycui' Ndyosi lo'o Abraham tya clyo la.

⁷ Bi' cha' cua jlo ti' na cha' tlyu la ngua jyo'o Melquisedec bi' que jyo'o Abraham; na cua ngulacua̱ nu cusu' bi' ji'i̱ jyo'o Abraham nu ngua li', bi' cha' tlyu la chacuayá' ntsu'u ji'i̱ ycui' nu cusu' bi' que Abraham.

⁸ Xcui' na ndyijii sti jo'ó nu nxñi msta̱ nu nda ñati̱ chalyuu ti ji'i̱ ycui' Ndyosi, tsa yu'be ti cha' tso'o nu ntsu'u ji'i̱ scaa ngu' nda ngu' bi'; pana ná nscua lo quityi cusu' ni jacua' ngujuii nu Melquisedec bi', la cui' nu cusu' nu cua ngusñi msta̱ nu nda Abraham nu ngua li'.

⁹ Taca ñacui̱ na cha' lo'o ycui' jyo'o Leví cua nda msta̱ ji'i̱ nu Melquisedec bi' nu ngua tsa̱ bi', masi tiya' la ya̱a̱ nu Leví bi' chalyuu; la cui' jyo'o Leví nu ngua jyo'o cusu' ji'i̱ lcaa tya'a ngu' Leví nu ngua'ni ngu' cña sti jo'ó, cha' ngusñi ngu' msta̱ nu nda ñati̱ chalyuu ji'i̱ ycui' Ndyosi.

¹⁰ Nu lo'o ndyacua tya'a Melquisedec lo'o Abraham, ñi'ya̱ laca si lo'o Leví nda msta̱, jua'a̱ ngua li', masi tya lyiji cala Leví chalyuu, xqui'ya cha' Abraham ngua jyo'o cusu' ji'i̱ yu, cha' sñi' ste' Abraham ngua sti Leví bi'.

¹¹ Nu sti jo'ó nu ya̱a̱ chalyuu tiya' la bi', la cui' jua'a̱ tya'a ñati̱ ji'i̱ jyo'o Leví, nclyu'u qui'i̱ ngu' bi' ji'i̱ ngu' Israel cha' cua'ni ngu' lcaa cña nu ngulo ycui' Ndyosi ji'i̱ ngu'. Pana ná ndalo sti jo'ó bi' cua'ni tyucui cña bi', bi' cha' juani ngutu'u tucua chaca nu laca sti jo'ó nu cuentya ji'na. Ná laca yu sti jo'ó ñi'ya̱ ngua Aarón lo'o tya'a Aarón sti jo'ó, masi laca yu sca sti jo'ó nu ñi'ya̱ ngua'ni jyo'o Melquisedec nu ngua sa'ni la, la cui' jua'a̱ cua'ni yu cuentya ji'na juani.

¹² Nu lo'o ncha'a̱ cha' ji'i̱ sti jo'ó ni, la cui' jua'a̱ ncha'a̱ cña nu nga'a̱ cha' cua'ni na cuentya ji'i̱ ycui' Ndyosi.

¹³ Cha' ji'i̱ Jesús nu Xu'na na nchcui' cha' nu nscua lo quityi cusu' bi'; pana ycui' Jesús ni, xa' ñati̱ laca bi', si'i tya'a ñati̱ ji'i̱ Leví laca yu. Ni sca ñati̱ tya'a xtañi Jesús ná ngua ngu' sti jo'ó nde chu̱' la.

¹⁴ Cua jlo ti' ngu' cha' Judá ngua xtañi Jesús tya lo'o ngula yu; pana nu lo'o nchcui' jyo'o Moisés tilaca nu caca sti jo'ó, ná nchcui' tsiya' ti ji'i̱ ngu' tya'a xtañi Judá bi'.

¹⁵ Lo'o nu juani laca Jesús sti jo'ó nu xa' ña'a̱ cua'ni; ñi'ya̱ ngua'ni jyo'o Melquisedec, jua'a̱ cua'ni Ni cña ji'i̱ sti jo'ó. Bi' cha' tso'o la nchca cuayá' ti' na juani cha' cua ntyeje tacui cha' ji'i̱ cha' cusu' bi', cha' cua ngutu'u tucua Jesús nu sti jo'ó cucui ji'na.

¹⁶ Cua nda ycui' Ndyosi cña ji'i̱ Jesús cha' caca Ni sti jo'ó, xqui'ya cha' ná ngua ji'i̱ ñati̱ chalyuu cujuii ngu' ji'i̱ yu sca ti quiya'; cua ndyu'ú Jesús chaca quiya' lo'o cua ngujuii yu. Juani ná nga'a̱ cha' tye chalyuu ji'i̱ Ni; bi' cha' laca Jesús sti jo'ó cuentya ji'na juani, si'i cha' cua'ni Ni lcaa cña nu ndyu'ni ngu' tya'a Leví nu laca ñati̱ chalyuu ti.

¹⁷ Cua nscua lo quityi cusu' cha' ndi'ya̱ nchcui' ycui' Ndyosi lo'o Ni: Lcaa ca tyempo caca nu'u̱ sti jo'ó; ñi'ya̱ nu ngua'ni jyo'o Melquisedec nu ngua sa'ni, la cui' jua'a̱ cua'ni nu'u̱ cuentya ji'i̱ ñati̱ juani.

¹⁸ Bi' cha' cua ngulotsu' ycui' Ndyosi ji'i̱ cha' cusu' nu lye tsa ngulo cña ji'na, cha' ná caca xtyucua cha' cusu' bi' ji'na; ná nchca cati̱ qui'ya nu ntsu'u ji'na lo'o ycui' Ndyosi jua'a̱.

¹⁹ Tya lyiji tsa cha' ca tso'o cresiya ji'na cuentya ji'i̱ ycui' Ndyosi, masi cua ngua'ni na lcaa cña nu ngulo jyo'o Moisés ji'i̱ ngu' tya'a na nu ngua li', cha' ná ngua cua'ni lyaá cha' cusu' bi' ji'na ji'i̱ nu cuxi; pana juani taca xñi na cha' ji'i̱ ycui' Ndyosi. Cacua tsa laca ycui' Ni ji'na juani xqui'ya Jesús, cha' tso'o la tsiya' ti laca cha' nu ya̱lo'o Jesús cha' chcui' Ni lo'o na.

²⁰ Tso'o la laca Jesús, xqui'ya cha' cua ngüiñi tso'o cha' ji'i̱ ycui' Ndyosi lo'o Sñi' ndi'ya̱: “Chacuayá' ji'i̱ ycui' ca na' caca nu'u̱ sti jo'ó”, nacui̱ ycui' Ndyosi ji'i̱ Jesús.

²¹ Ná nchcui' Ni jua'a̱ lo'o sti jo'ó tya'a ngu' Leví. Pana ndi'ya̱ nchcui' ycui' Ni lo'o Jesús tya lo'o nguxana cha' caca Jesús sti jo'ó: Liñi tsa nda na' cha' cuentya jinu'u̱, nacui̱ ycui' Ndyosi, nga'aa tya'a̱chu̱' na' tsiya' ti ji'i̱ cha' nu cua nacui̱ na' bi': “Lcaa ca tyempo caca nu'u̱ sti jo'ó. Ñi'ya̱ nu ngua'ni jyo'o Melquisedec nu ngua sa'ni, la cui' jua'a̱ cua'ni nu'u̱ cuentya ji'i̱ ñati̱ juani.”

²² Bi' cha' cua tso'o la ngüiñi cha' ji'i̱ ycui' Ni lo'o na juani, xqui'ya cña nu ngua'ni Jesús cuentya ji'na.

²³ Pana nu sti jo'ó tya'a ngu' Leví bi' ni, xcui' na ndyijii ngu' bi', lo'o li' xa' la tya'a ngu' ndyatí̱ lo cña sti jo'ó bi'; bi' cha' ngua quiña'a̱ tsa sti jo'ó chu̱' tyu̱u̱ yija̱ li'.

²⁴ Lo'o nu Jesús bi' ni, ña'a̱ ti lu'ú yu; ná nscua cha' cajaa Ni, bi' cha' ná nga'a̱ cha' tye cha' caca Ni sti jo'ó cuentya ji'na, cha' ná ntsu'u cha' cua'ni xa' ñati̱ cña ji'i̱.

²⁵ Lcaa ca tyempo, masi juani, masi nde loo la, taca ji'i̱ Ni cua'ni lyaá Ni ji'i̱ cua ña'a̱ ca ñati̱ nu xñi cha' ji'i̱ ycui' Ndyosi xqui'ya Jesús. Tyucui tyempo ndi'i̱ Jesús ca slo ycui' Ndyosi, cha' chcui' Ni lo'o ycui' Sti Ni cuentya ji'na.

²⁶ Xñi na cha' ji'i̱ Jesús lacua; bi' laca sti jo'ó nu laca loo la, nu chañi cha' taca xtyucua ji'na. Ñati̱ lubii tsiya' ti laca Ni, cha' ná ntsu'u cha' cuxi, ná ntsu'u qui'ya ji'i̱ Ni. Xa' ña'a̱ laca Jesús, nu ná nda ycui' Ndyosi chacuayá' cha' tyanu yu slo ñati̱ chalyuu nu ndu'ni tsa cha' cuxi; cua nda Sti yu su tyucua yu la cui' su tlyu ca su ntucua ycui' Ndyosi Sti yu.

²⁷ Ndulo la tsiya' ti cha' nu ntsu'u ji'i̱ Jesús que cha' nu ntsu'u ji'i̱ xa' la sti jo'ó nu ndi'i̱ chalyuu. Lcaa tsa̱ nsta ngu' bi' msta̱ lo mesa tacati, cha' jua'a̱ cati̱ la qui'ya nu ntsu'u ji'i̱ ngu' lo'o ycui' Ndyosi; clyo ndu'ni ngu' cha' cati̱ qui'ya ji'i̱ ycui' ca ngu', lo'o li' ndu'ni ngu' cha' cati̱ qui'ya nu ntsu'u ji'i̱ lcaa ngu' quichi̱ bi'. Pana nu Jesús bi' ni, sca ti quiya' ngusta yu msta̱ lo'o nguti'i̱ yu chalyuu cha' cati̱ qui'ya nu ntsu'u ji'i̱ ñati̱; tyucui ña'a̱ ycui' yu ngua msta̱ bi', nu lo'o ngujui'i̱ ca'a̱ ngu' ji'i̱ yu lo crusi.

²⁸ Ñati̱ chalyuu ti laca sti jo'ó nu ndu'ni cña nu cua nacui̱ jyo'o Moisés cha' caca, ñati̱ nu tya ntsu'u qui'ya ji'i̱ laca ngu' bi'; pana nu sca ti Sñi' ycui' Ndyosi ni, lubii tsiya' ti cresiya ji'i̱ Ni. Cua tyeje tacui ti tyempo cusu' lo'o ndaquiya' tsa ngu' ji'i̱ cña nu ngulo jyo'o Moisés. Bi' cha' nguane ycui' Ndyosi ji'i̱ Sñi' ycui' ca, nu Jesús bi' ni, cha' caca Ni sti jo'ó cuentya ji'na. Cua nchcui' Sti Ni lo'o Ni: “Chacuayá' ji'i̱ ycui' ca na' caca nu'u̱ sti jo'ó”, nacui̱ ycui' Ndyosi ji'i̱ Jesús.