HEBREOS 5 - Chatino Tataltepec

¹ Xa' la xu'na sti jo'ó nu ndi'i̱ nde chalyuu ni, nsubi ngu' ji'i̱ tya'a ngu' tilaca caca xu'na sti jo'ó, cha' caca yu bi' cña ji'i̱ ycui' Ndyosi cuentya ji'i̱ ñati̱. Nsta sti jo'ó bi' msta̱ nu lijya̱ lo'o xa' ñati̱ ji'i̱ lo mesa ji'i̱ ycui' Ndyosi, jua'a̱ ndijña tsa yu cha' clyu ti' ji'i̱ Ni xqui'ya qui'ya nu ntsu'u ji'i̱ ñati̱ bi' li'.

² Ñati̱ chalyuu ti laca sti jo'ó bi'; lo'o ycui' yu ntsu'u cha' cuxi nu ndyu'ni yu, bi' cha' tso'o ti nchcui' yu lo'o ñati̱ nu ná nduna tsiya' ti, nu ndyu'ni tsa cha' cuxi.

³ La cui' tyempo lo'o ndyu'ni yu bi' cña cuentya ji'i̱ xa' ñati̱, la cui' jua'a̱ cuentya ji'i̱ ycui' ca yu nga'a̱ cha' jña yu cha' clyu ti' ji'i̱ ycui' Ndyosi, xqui'ya qui'ya nu ntsu'u ji'i̱ ycui' yu.

⁴ Ni sca ñati̱ ná ntsu'u chacuayá' cha' caca yu xu'na sti jo'ó hora nu nti' ti yu cha' caca yu cña bi'; ycui' Ndyosi laca nu nsubi tilaca nu tso'o cha' caca xu'na sti jo'ó cuentya ji'i̱ Ni, ñi'ya̱ ngusubi Ni ji'i̱ jyo'o Aarón cha' ngua yu xu'na sti jo'ó.

⁵ Lo'o Cristo ni, laca Ni sti jo'ó nu laca loo la cuentya ji'na; si'i cha' ji'i̱ ycui' ti Ni ndu'ni Ni jua'a̱, cha' ná ngüijña Ni cha' ji'i̱ ycui' Ndyosi Sti Ni cha' caca tlyu la Ni. Ycui' Ndyosi laca nu cua nchcui' lo'o Sñi' Ni tya clyo: Sñi' na' laca nu'u̱; ycui' na' cua nda na' chalyuu jinu'u̱, cha' laca nu'u̱ Sñi' na'. Jua'a̱ cha' nda Ni lo'o Cristo.

⁶ Lo'o li' cua nchcui' ycui' Ni chaca cha' ndi'ya̱: Lcaa ca tyempo caca nu'u̱ sti jo'ó; la cui' ñi'ya̱ nu ngua'ni jyo'o Melquisedec nu ngua cua sa'ni la, jua'a̱ cua'ni nu'u̱ cuentya ji'i̱ ñati̱ juani.

⁷ Nu lo'o tya ndi'i̱ Jesús lo yuu chalyuu, tyu̱u̱ tsa quiya' ngusi'ya tsa yu lo'o nchcui' yu lo'o ycui' Ndyosi Sti yu; lye tsa ngua ti' cresiya ji'i̱ yu lo'o ngüijña yu cha' ji'i̱ Ni, cha' nchca tsa ji'i̱ ycui' Ndyosi. Ngua ji'i̱ Ni cua'a ji'i̱ ñati̱ cha' ná cujuii ngu' ji'i̱ Jesús nquicha'; pana ndyuna Ni cha' nu nchcui' Jesús lo'o Ni, cha' ntaja'a̱ yu cua'ni yu lcaa cña nu nti' ycui' Ndyosi Sti yu.

⁸ Bi' cha' ndaquiya' Jesús lcaa cña nu nti' ycui' Ni cha' cua'ni yu. Nchcube' tsa yu lo'o nguti'i̱ yu nde chalyuu; masi nu sca ti Sñi' ycui' Ndyosi laca yu, pana tya ngua tsa'a̱ la yu cua ña'a̱ ca cña nu cua'ni yu cuentya ji'i̱ Ni.

⁹ Tiya' la li', lo'o cua ngua lcaa cha' ji'i̱ Jesús cha' cua ngua'ni yu cña nu cua nda ycui' Ndyosi ji'i̱ yu cha' cua'ni yu, tya li' ntucua quiya' cha' cua'ni lyaá Jesús ji'i̱ cua ña'a̱ ca ñati̱ chalyuu nu tyaja'a̱ cua'a̱ jyaca̱ ji'i̱ cha' nu cua nchcui' yu lo'o; ná tye tsiya' ti cha' cua'ni lyaá Ni ji'na ji'i̱ cha' cuxi nu ntsu'u ji'na.

¹⁰ Bi' cha' cua nacui̱ Ni cha' laca Jesús sti jo'ó nu laca loo la; la cui' ñi'ya̱ nu ngua'ni jyo'o Melquisedec nu ngua cua sa'ni la, jua'a̱ cua'ni Jesús cuentya ji'na juani.

Caca cuxi cha' ji'na si tya'a̱chu̱' na ji'i̱ Jesús

¹¹ Cua quiña'a̱ tsa cha' nti' ya chcui' ya lo'o ma̱ cha' ji'i̱ Cristo, cha' quiña'a̱ tsa cha' tya lyiji ca cuayá' ti' ma̱. Pana ná nchca culu'u tso'o ya lcaa cha' bi' ji'i̱ ma̱; tlyu tsa cña caca, xqui'ya cha' ycui' cu'ma̱ ná ndyu'ni yala ma̱ cha' ca cuayá' ti' ma̱ cha' bi'.

¹² Tya sa'ni tsa ngua lo'o ndyuna ma̱ cha' ji'i̱ Cristo tya clyo; cua nteje tacui tyu̱u̱ tsa tyempo, ña'a̱ cuayá' taca caca ma̱ mstru cuentya ji'i̱ Cristo nquicha', pana ña'a̱ ti ndi'i̱ ma̱ juani. Tya nti' cha' culu'u la ngu' ji'i̱ ma̱ tya chaca quiya' ñi'ya̱ ntucua quiya' cha' ji'i̱ ycui' Ndyosi, la cui' cha' nu ngua ti' Ni cha' cacha' Ni ji'i̱ ñati̱ chalyuu. Ñi'ya̱ ndu'ni sca cubi' nu tya ntyi', cha' bilya cacu bi' tyaja, jua'a̱ ndyu'ni ma̱, cha' ná nchca ca cuayá' ti' ma̱ cha' ji'i̱ ycui' Ndyosi bi'.

¹³ Tya cuañi' tsa ngu' nu tya ntyi'; la cui' jua'a̱ laca cu'ma̱, cha' ná jlo ti' ma̱ tsiya' ti ñi'ya̱ nga'a̱ cha' cua'ni ma̱ lo'o ngua tso'o cresiya ji'i̱ ma̱ cuentya ji'i̱ Jesús, masi ntsu'u cha' tso'o nu nga'a̱ cha' cua'ni ma̱ juani.

¹⁴ Ñati̱ nu cua nguluu xi laca nu ndacu tyaja; lo'o cu'ma̱ caca jua'a̱, si qui'i̱ ma̱ cha' culacua tso'o ti' ma̱ ñi'ya̱ laca sca cha', si cha' tso'o laca, si cha' cuxi laca.