HEBREOS 4 - Chatino Tataltepec

¹ Cha' nu laca juani, cua nguxtyanu Ni sca cha' lo'o na, cha' taca tyalaa na ca slo Ni, cha' tyi'i̱ tso'o ti na ca bi'. Tso'o si cube ti' na ji'i̱ lcaa ngu' tya'a na, cha' ná tyu'utsu' ni tsaca ngu' ji'i̱ tyucui̱i̱ liñi nu tsaa ca su tyi'i̱ na lo'o ycui' Ndyosi.

² Ñi'ya̱ lo'o ndyuna jyo'o cusu' bi' cha' tso'o nu nchcui' ycui' Ndyosi lo'o ngu' cha' clyaá ngu', la cui' jua'a̱ cua ndyuna na cha' tso'o nu nchcui' Jesús. Pana nu jyo'o bi' ni, ná ngua tso'o cresiya ji'i̱ ngu', masi cua ndyuna ngu' cha' bi', xqui'ya cha' ná jlya ti' ngu' cha' bi', ná ngusñi tso'o ngu' cha' bi'.

³ Nu lo'o ngusñi na cha' ji'i̱ Ni, li' taca tyalaa na slo ycui' Ndyosi cha' tyi'i̱ tso'o ti na ca bi'. Pana ñi'ya̱ nu nscua lo quityi re, jua'a̱ ngua cha' ji'i̱ jyo'o bi', cha' nchcui' ycui' Ndyosi ndi'ya̱: Ngua ñasi̱' na' li', nacui̱ Ni. Lye nchcui' na' ji'i̱ ngu' bi', cha' ná tyalaa ngu' bi' ca slo na', cha' ná tyi'i̱ tso'o ti ngu' ca nde. Nacui̱ ycui' Ndyosi jua'a̱, masi cua ndye lcaa cña ji'i̱ ycui' Ni tya lo'o ndya' chalyuu.

⁴ Cua nscua sca cha' lo quityi cusu' nu nchcui' cha' ji'i̱ tsa̱ nchca cati, tsa̱ ndi'i̱ cña' ti na. Ndi'ya̱ nacui̱ quityi: Nguti'i̱ cña' ycui' Ni tsa̱ nu nchca cati li', cha' ná ngua'ni Ni cña tsa̱ bi' li'.

⁵ Pana ndi'ya̱ nchcui' lo quityi nu nscua jyo'o bi': Nga'aa tyalaa ngu' bi' ca slo na' cha' tyi'i̱ tso'o ti ngu' ca nde.

⁶ Bi' ñati̱ laca nu clyo ndyuna cha' tso'o nu cua nchcui' Ni lo'o ngu', cha' clyaá ngu' ji'i̱ nu cuxi, lo'o li' ná ngua tyalaa ngu' bi' ca slo ycui' Ndyosi, ná ngua tyi'i̱ tso'o ti ngu' ca su nacui̱ Ni cha' tyi'i̱ ngu', xqui'ya cha' ná ntaja'a̱ ngu' bi' taquiya' ngu' cha' bi'. Pana tya lyiji xi cha' tyu'u ti'i̱ lcaa ñati̱ nu nscua cha' tyi'i̱ tso'o ti ca slo ycui' Ndyosi;

⁷ tya nda la Ni xi tyempo ji'na, cha' juani ti tya taca cuna na cha' bi'. Cua ngua tyu̱u̱ yija̱ tya lo'o ngujuii jyo'o Moisés bi', nu lo'o nchcui' ycui' Ndyosi lo'o David. Ndi'ya̱ nacui̱ Ni: Juani ti cua'a̱ jyaca̱ ma̱ ji'i̱ cha' nu nda na' lo'o ma̱, ná tyu'u cha' cuxi tyiquee ma̱ ña'a̱ ma̱ jna'.

⁸ Nu ngua cua sa'ni bi', ná ngua ji'i̱ jyo'o Josué tyalo'o yu ji'i̱ ñati̱ bi' sca ti quiya' ca su ndi'i̱ ycui' Ndyosi; bi' cha' tiya' la tya nda la Ni xi tyempo cha' cuna na cha' bi'.

⁹ Lo'o juani ni, si ña'a̱ ti tya xñi tso'o na cha' ji'i̱ ycui' Ndyosi, tya taca tyi'i̱ tso'o ti na lo'o Ni li', ñi'ya̱ lo'o ngua'a̱ cña' ycui' Ni tsa̱ nchca cati bi'.

¹⁰ Masi tye cña ji'na nde chalyuu, tsaa na ca slo ycui' Ndyosi, li' taca tyi'i̱ tso'o ti na lo'o Ni ca bi', ñi'ya̱ nu nguti'i̱ ycui' Ndyosi lo'o ngua'ni tye Ni cña ji'i̱ Ni lo'o ngua tsa̱ nchca cati bi'.

¹¹ Lcaa tsa̱ cua'ni cña ti' na lacua, cha' ña'a̱ ti tyu'u cha' ji'na lo'o ycui' Ni, cha' taca tyi'i̱ tso'o ti na. Ná cua'ni na ñi'ya̱ nu ngua'ni jyo'o cusu' bi', nu ná ndaquiya' tsiya' ti ji'i̱ ycui' Ndyosi, cha' li' ná ngua tyalaa ngu' bi' ca su nacui̱ Ni cha' tsaa ngu'.

¹² Lcaa cha' nu nchcui' ycui' Ndyosi lo'o ñati̱ ni, ñi'ya̱ nti' sca na lu'ú, jua'a̱ laca cha' bi'. Lcaa tyempo ndu'ni bi' cña ne' cresiya ji'i̱ ñati̱ nu cuna cha' bi'. Laca cha' bi' ñi'ya̱ si laca sca xlyu nu cha tsa tu'ba tyucuaa chu̱'; ndu'ni bi' cha' saala cuaña' na ña'a̱ cuayá' nu tyalaa ca su ntsu'u tyijya̱ na, ña'a̱ cuayá' tyaca̱' ycua nu ntsu'u ne' tyijya̱ na. La cui' jua'a̱ laca lo'o cuna na cha' ji'i̱ ycui' Ndyosi bi', na nchcui' ca'a̱ ti cha' bi' ji'i̱ tyucui ña'a̱ na, jua'a̱ lo'o cresiya ji'na. Lo'o nduna na sca cha' nu nchcui' ycui' Ndyosi lo'o ñati̱, liñi tsa quijeloo cha' ji'i̱ Ni, lcaa cha' nu ntsu'u tyiquee na cha' caja ji'na, lcaa cha' nu nclyacua ti' scaa na.

¹³ Ná taca tyu'u cuaana ti cha' tyiquee na, ni tsaca cha' nu ntsu'u ji'na, cha' ná ca cuayá' ti' ycui' Ndyosi ji'i̱ cha' bi'. Ná taca. Ña'a̱ Ni ji'i̱ lcaa ñati̱ nu cua ngüiñá Ni, nu cua ngusta Ni chalyuu; nchca tii Ni lcaa cha' nu ntsu'u ji'na. Ná taca cua'ni na ni sca cña ca slo ycui' Ndyosi cha' tyu'u cuatsi' ti sca cha', cha' nga'a̱ cha' xacui̱ na cha' ji'i̱ ycui' Ni cuentya ji'i̱ lcaa cña nu ngua'ni scaa na nde chalyuu, nu lo'o tye chalyuu ji'na.

Sti jo'ó cuentya ji'na ca slo ycui' Ndyosi laca Jesús

¹⁴ Lo'o cua ngusñi na cha' ji'i̱ Jesús, li' nga'a̱ cha' cua'ni na cha' tso'o ti tyanu cha' bi' ne' cresiya ji'na. Cua laca ntsu'u sca sti jo'ó nu laca loo la nu ndu̱ cuentya ji'na; Jesús laca bi', nu sca ti Sñi' ycui' Ndyosi laca yu. Cua ndyaa Jesús ca su ndi'i̱ ycui' Ndyosi Sti yu; juani ndu̱ Jesús slo Ni, nchcui' cha' ji'na lo'o Ni.

¹⁵ Laca Jesús sti jo'ó nu laca loo la cuentya ji'na, lo'o jua'a̱ tya'na tsa ti' Jesús ña'a̱ yu ji'na. Cua jlo ti' yu cha' ntsu'u tsa quiya' lo'o cua cua'ni ti nu cuxi ngana ji'na, cha' nu lo'o tya ndi'i̱ Jesús lo yuu chalyuu, la cui' jua'a̱ lye tsa ngua'ni cuayá' nu xña'a̱ ji'i̱ yu, si cua'ni yu cha' cuxi. Pana nu Jesús bi' ni, ni sca cha' cuxi ná ngua'ni yu, bi' cha' taca caca yu sti jo'ó nu laca loo la cuentya ji'na, cha' jlo ti' Jesús ñi'ya̱ nñilo'o tsa nu xña'a̱ ji'na.

¹⁶ Ná cutsi̱i̱ na tsiya' ti lacua, tyucui tyiquee na jña na sca cha' ji'i̱ ycui' Ndyosi ca su tlyu ca su laca Ni loo; chcui' na lo'o ycui' Ndyosi nu xcui' tso'o tsa ndu'ni lo'o ñati̱, cha' cui'ya Ni cha' clyu ti' ji'na, cha' xtyucua Ni ji'na, masi la cui' ca hora nu lyiji tsa cha' ji'na.