HEBREOS 3 - Chatino Tataltepec

Ná stu'ba Moisés lo'o Jesús

¹ Cu'ma̱ tya'a ngusñi na cha' ji'i̱ Cristo, cu'ma̱ nu cua ngusubi ycui' Ndyosi ji'i̱ ma̱, culacua tso'o ti' ma̱ tilaca laca Jesucristo. Cua nda ycui' Ndyosi Sti yu ji'i̱ yu cha' ya̱a̱ yu nde chalyuu, lo'o nu juani laca yu ñi'ya̱ laca sti jo'ó nu laca loo la cuentya ji'na, cha' ngusñi na cha' ji'i̱ ycui'.

² Ndaquiya' Jesús lcaa cña nu ngulo ycui' Ndyosi Sti yu ji'i̱ yu, ndyi'u ti' yu ji'i̱ ycui' Ni nu nguane ji'i̱ yu cha' ca̱a̱ yu nde chalyuu tya clyo. La cui' jua'a̱ ndaquiya' jyo'o Moisés ji'i̱ cña nu ngulo ycui' Ndyosi ji'i̱ nu ngua sa'ni bi'.

³ Pana juani lye la ndu'ni tlyu na ji'i̱ Jesús, cha' ná stu'ba jyo'o Moisés lo'o yu bi'. Ñi'ya̱ laca lo'o ndye ndya' sca ni'i̱ ni, tso'o tsa nchcui' ngu' cha' ji'i̱ cuityi nu ngüiñá ji'i̱ ni'i̱ bi', masi ná nchcui' lye ngu' cha' ji'i̱ ycui' ni'i̱; la cui' jua'a̱ laca lo'o Jesús ni, lye la ndyi'u ti' ngu' ji'i̱ ycui' Jesús, masi nga'aa lye ndyi'u ti' ngu' ji'i̱ nu Moisés bi'.

⁴ Cua ña'a̱ ca ni'i̱ nu ndiñá ñati̱ ni, cua ntsu'u xu'na ni'i̱ bi'; pana ycui' Ndyosi ngüiñá lcaa ca na, lo'o lcaa ca chalyuu, lo'o lcaa ñati̱ nu ndi'i̱ chalyuu.

⁵ Tso'o tsa cña nu ngua'ni nu Moisés bi' lo'o ngua yu cña sa'ni, cha' cuentya ji'i̱ ñati̱ ji'i̱ ycui' Ndyosi nde chalyuu ngua yu cña; nchcui' tsa jyo'o bi' lcaa cha' nu ngua ti' ycui' Ndyosi cha' chcui' Ni lo'o ngu' bi'.

⁶ Pana nu Cristo bi' ni, tso'o la cña ndu'ni yu, xqui'ya cha' laca yu Sñi' ycui' Ndyosi, lo'o jua'a̱ laca yu loo ji'i̱ lcaa ñati̱ nu ntsu'u cuentya ji'i̱ Ni. La cui' ñati̱ ji'i̱ ycui' Ni laca na, si ña'a̱ ti ná ntsi̱i̱ na ña'a̱ cuayá' tye chalyuu ji'na, si ña'a̱ ti tya tso'o ntsu'u tyiquee na laja lo'o ndu̱ ti' na ji'i̱ Cristo cha' cua'ni lyaá lyiji yu ji'na.

Caja ñi'ya̱ nu tso'o ti tyi'i̱ tyiquee na, si taquiya' na ji'i̱ cha' nu nchcui' ycui' Ndyosi

⁷ Lo quityi cua nscua sca cha' nu nda Xtyi'i ycui' Ndyosi lo'o ñati̱ sa'ni. Ndi'ya̱ nchcui' Ni lo'o ngu' tya li': Juani ti cua'a̱ jyaca̱ ma̱ ji'i̱ cha' nu nda na' lo'o ma̱:

⁸ Nga'aa tyu'u cha' cuxi tyiquee ma̱ ña'a̱ ma̱ 'na chaca quiya', ni nga'aa cua'ni ma̱ ñi'ya̱ nu ngua'ni jyo'o cusu' ji'i̱ ma̱ tsaca quiya' nu ngua sa'ni la. Nu ngua li' lye tsa ngusu̱u̱ tya'a ngu' lo'o na' ca ne' quixi̱' su nguta'a̱ yu'u ti ngu', nacui̱ Ni. Nu ngua li' ngua ti' ngu' cua'ni cuayá' ngu' 'na, si cua'ni tyaala na' ji'i̱ ngu'.

⁹ Ngua ti' jyo'o cusu' ji'i̱ ma̱ cha' cua'ni cuxi ngu' lo'o na' nu ngua li'; cua nxtyí lo'o ti ngu' 'na tyucui tu'ba yija̱, masi na'a̱ ngu' lcaa cha' tlyu nu cua ngua'ni na' cuentya ji'i̱ ngu' lcaa yija̱ bi', nacui̱ Ni.

¹⁰ Bi' cha' ngua ñasi̱' tsa na' ji'i̱ ngu' bi' li'. Ni na' li': “Xcui' cuxi ti nclyacua ti' ngu' bi', ná ntaja'a̱ ngu' tsiya' ti cha' tyanu cha' jna' ne' cresiya ji'i̱ ngu'; ná ntaja'a̱ ngu' cua'ni ngu' ñi'ya̱ nu ni na' ji'i̱ ngu' cha' cua'ni ngu'”, nacui̱ na' li'.

¹¹ Ngua ñasi̱' tsa na' ji'i̱ ngu' bi' li', ña'a̱ cuayá' lye tsa nchcui' na' lo'o ngu' bi' li': “Nga'aa tyalaa ma̱ ca slo na' cha' tyi'i̱ tso'o ti ma̱ lo'o na'”. Jua'a̱ ntsu'u cha' nu nda ycui' Ndyosi lo'o ngu' tya li'.

¹² Cu'ma̱ tya'a ngusñi na cha' ji'i̱ Jesús, ña'a̱si̱i̱ ma̱ ji'i̱ ycui' ca ma̱, cha' ni tsaca ma̱ ná tya'a̱chu̱' ma̱ ji'i̱ cha' ji'i̱ ycui' Ndyosi nu lu'ú ca, cha' ná caca cuxi cresiya ji'i̱ ma̱, ñi'ya̱ si nga'aa taquiya' ma̱ cha' ji'i̱ Ni.

¹³ Ná tso'o si cñilo'o nu cuxi ji'i̱ ma̱, lo'o li' xana caca cuxi cresiya ji'i̱ ma̱. Bi' cha' lcaa tsa̱ nga'a̱ cha' xtyucua ma̱ ji'i̱ tya'a ma̱, cha' tyanu tachaa la cha' ji'i̱ Jesús ne' cresiya ji'i̱ ngu' tya'a ma̱, cha' ná cñilo'o nu cuxi ji'i̱ ma̱ tyucui lo'o tya ndi'i̱ ti ma̱ chalyuu.

¹⁴ Lcaa na lo'o tya'a na, tya ntsu'u cha' ji'na lo'o Cristo si ña'a̱ ti xñi na cha' ji'i̱ Ni ña'a̱ cuayá' nu tye chalyuu ji'na, la cui' ñi'ya̱ lo'o jlya ti' na ji'i̱ yu nu ngua tya clyo.

¹⁵ Ndi'ya̱ nchcui' ycui' Ndyosi cha' nu nscua lo quityi bi': Juani ti cua'a̱ jyaca̱ ma̱ ji'i̱ cha' nu ta na' lo'o ma̱: Nga'aa tyu'u cha' cuxi tyiquee ma̱ ña'a̱ ma̱ 'na chaca quiya', nga'aa cua'ni ma̱ ñi'ya̱ ngua'ni jyo'o cusu' ji'i̱ ma̱ tsaca quiya' tya sa'ni la; nu ngua li' lye tsa ngusu̱u̱ tya'a ngu' lo'o na'.

¹⁶ Lcaa ñati̱ nu cua ndyalo'o Moisés ji'i̱ nu lo'o ngutu'u ngu' ca loyuu Egipto ni, bi' ñati̱ ngua nu cua ndyuna cha' nu nchcui' ycui' Ndyosi lo'o ngu' nu ngua li', pana lye tsa ngusu̱u̱ tya'a ngu' lo'o Ni li';

¹⁷ bi' cha' ngua ñasi̱' tsa ycui' Ndyosi ji'i̱ ñati̱ bi' tyucui tyempo lo'o ngutu'u scua tu'ba yija̱, bi' cha' ndyanu tyijya̱ jyo'o bi' jua'a̱ ti to' tyucui̱i̱ ca ne' quixi̱' ca su nguta'a̱ yu'u ti ngu'.

¹⁸ Cua lye tsa nchcui' Ni cha' ji'i̱ ngu' nu ngusu̱u̱ tya'a lo'o Ni: “Nga'aa tyalaa ngu' bi' ca slo na', cha' tyi'i̱ tso'o ti ngu' ca nde”, nacui̱ Ni li'.

¹⁹ Nchca cuayá' ti' na lacua, cha' nga'aa ndyalaa ngu' bi' ca su nacui̱ Ni ji'i̱ ngu' cha' tsaa ngu', xqui'ya cha' nga'aa ndaquiya' ngu' cha' ji'i̱ ycui' Ndyosi.