HEBREOS 2 - Chatino Tataltepec

Tlyu tsa cha' laca cha' cua ngulaá na ji'i̱ nu cuxi

¹ Tlyu tsa cha' laca ji'i̱ Jesús juani lacua, bi' cha' nga'a̱ cha' xñi tso'o na lcaa cha' nu cua nchcui' Jesús lo'o na, cha' ná tyu'utsu' na ji'i̱ tyucui̱i̱ liñi nu ngusñi na.

² Tyempo sa'ni la nchcui' xca̱ bi' lo'o ñati̱ cuentya ji'i̱ ycui' Ndyosi. Liñi tsa nchcui' xca̱ bi' lo'o ngu', cha' tyempo bi' lye tsa nguxcube' Ni ji'i̱ lcaa ñati̱ nu ngua'ni cha' cuxi; la cui' jua'a̱ nguxcube' Ni ji'i̱ ñati̱ nu nga'aa ndaquiya' ji'i̱ cha' nu nchcui' Ni.

³ La cui' ti cha' caca ji'na juani, si ná taquiya' na ji'i̱ cha' nu cua ndyuna na bi', cha' clyaá na ji'i̱ nu cuxi; ná caja ñi'ya̱ clyaá na ji'i̱ ycui' Ndyosi lo'o cua ndye chalyuu, nu lo'o cua'ni cuayá' Ni ji'i̱ lcaa ñati̱. Clyo ndacha' ycui' Jesús nu Xu'na na cha' bi' ji'i̱ ñati̱ nu ngua tsa'a̱ ji'i̱ yu, jua'a̱ ndyuna ngu' bi' cha' nu nchcui' yu; tiya' la li', lo'o ji'na ndacha' ngu' bi' cha' bi'. Bi' cha' jlo ti' na cha' chañi laca cha' bi'.

⁴ Lo'o jua'a̱ ngua'ni ycui' Ndyosi cña cha' ca cuayá' ti' na cha' chañi tsa laca cha' nu nchcui' ngu', ngua'ni Ni quiña'a̱ tsa cha' tlyu slo na cha' ña'a̱ na ji'i̱. Tyu̱u̱ tsa cha' nu ná nchca cua'ni ñati̱ chalyuu ngua'ni Ni, cha' cube tsa ti' na ji'i̱ ycui' Ni lo'o ña'a̱ na cha' tlyu bi'. Lo'o li' cua nda Ni Xtyi'i ycui' Ni cha' tyanu ne' cresiya ji'i̱ ñati̱ chalyuu, tsa ña'a̱ nu ntsu'u tyiquee ycui' Ni nda Ni ji'i̱ ngu'; bi' cha' nchca ji'na cua'ni na tyu̱u̱ lo cña cuentya ji'i̱ ycui' Ndyosi, nu ná nchca ji'i̱ ñati̱ cua'ni ycui' ca ngu'.

Tya'a na laca Jesús xqui'ya cha' ngua Ni ñati̱

⁵ Cha' ji'i̱ chalyuu cucui bi' nchcui' na juani, pana si'i nu ngu' xca̱ ji'i̱ ycui' Ndyosi laca nu cua ngujui chacuayá' ji'i̱ cha' caca ngu' loo ji'i̱ chalyuu cucui; sca ti ycui' Ndyosi culo cña li'.

⁶ Ntsu'u sca cha' nu nscua lo quityi cusu'; ndi'ya̱ nchcui' cha' bi': Ndyosi Xu'na ya, ná sca na tsiya' ti laca ñati̱ chalyuu, ná nga'a̱ cha' cube ti' nu'u̱ ji'i̱ ngu'; ná nga'a̱ cha' cua'ni tya'na ti' nu'u̱ ji'i̱ ngu', cha' laca ngu' ñati̱ ti, nacui̱ jyo'o cusu'.

⁷ Masi sube tsa ñati̱ laca ngu' cuentya jinu'u̱, pana cua nda nu'u̱ sca ñati̱ nu lijya̱ chalyuu; jua'a̱ cua laca ti tyempo nda nu'u̱ chacuayá' cha' caca xca̱ jinu'u̱ loo ji'i̱ yu bi'. Ca tiya' la, li' ta nu'u̱ sca su tso'o tsa su tyucua yu lo'o nu'u̱, ñi'ya̱ laca su ntucua tlyu sca xu'na ñati̱, sca se'i̱ su caca chi̱ loo.

⁸ Lo'o jua'a̱ cua nda nu'u̱ chacuayá' cha' caca yu loo ji'i̱ lcaa na. Jua'a̱ nacui̱ quityi bi'. Cuentya ji'i̱ lcaa ca na tsiya' ti nchcui' quityi bi', nu lo'o nacui̱ quityi cha' cua nda Ni chacuayá' cha' caca yu loo ji'i̱ lcaa na, masi juani ti bilya ña'a̱ na cha' laca yu loo ji'i̱ lcaa na bi'.

⁹ Pana cua jlo ti' na ñi'ya̱ ngua ji'i̱ Jesús nu ngua li', cha' xti ti tyempo ngua lcaa xca̱ ji'i̱ ycui' Ndyosi loo la ji'i̱ ycui' Jesús. Ngujuii yu lo crusi cuentya ji'i̱ lcaa ñati̱ chalyuu, xqui'ya cha' xcui' tso'o tsa ndu'ni ycui' Ndyosi lo'o na. Lo'o jua'a̱ ndube tsa ti' na ñi'ya̱ ndyaca ji'i̱ yu juani, cha' tso'o tsa ndyu'ni chi̱ ngu' loo yu; ndyu'ni tlyu ngu' ji'i̱ yu xqui'ya cha' cua ngujuii yu, xqui'ya cha' ti'í tsa ngua ti' yu cuentya ji'na.

¹⁰ Clyo ngüiñá ycui' Ndyosi lcaa ca na nu ntsu'u chalyuu, jua'a̱ tya ña'a̱si̱i̱ Ni lcaa na; lo'o jua'a̱ nti' Ni cha' tyalaa ca ta'a na nu laca na sñi' Ni ca su tso'o tsa ca su ntucua ycui' Ni. Bi' cha' clyo ndulo tsa cha' ji'i̱ Ni cha' tye lcaa cña nu ngua'ni Jesucristo; lo'o nu juani cua ngulaá na ji'i̱ nu cuxi xqui'ya Jesús, masi ti'í tsa ngua ti' yu lo'o ngua'ni yu cña bi'.

¹¹ Na cua ngua'ni lubii Jesús ji'i̱ cresiya ji'i̱ ñati̱ chalyuu, bi' cha' juani laca ycui' Ndyosi Sti na; lcaa na nu cua ngua lubii cresiya ji'na xqui'ya Jesús ni, ntsu'u sca ti Sti na lo'o ycui' Jesús, cha' laca ycui' Ndyosi Sti na juani. Lo'o jua'a̱ ná ndube ti' Jesús, nchcui' yu cha' tya'a ycui' yu laca na.

¹² Cua nscua tsaca cha' nu cua nacui̱ yu ndi'ya̱: Ndyosi Sti na', tso'o ti chcui' na' cha' jinu'u̱ su ndi'i̱ na' lo'o ngu' tya'a na'; cula tu'ba na' ji̱i̱ lo'o cua'ni tlyu na' jinu'u̱ ca su ndyu'u ti'i̱ lcaa ñati̱.

¹³ Lo'o jua'a̱ chaca cha' nacui̱ yu ndi'ya̱: Lo'o na' xñi na' cha' ji'i̱ ycui' Ndyosi Sti na', nacui̱. Lo'o li' nchcui' yu chaca quiya' ndi'ya̱: Nde ti ndi'i̱ ya, cha' stu'ba ti ndi'i̱ na' lo'o sñi' na' nu cua nda ycui' Ndyosi 'na. Jua'a̱ nchcui' cha' nu cua nscua lo quityi cusu' bi'.

¹⁴ Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

¹⁵ Lo'o jua'a̱ ngua'ni lyaá yu ji'i̱ ñati̱ nu ntsi̱i̱ tsa cha' cajaa ngu'; lcaa tsa̱ lo'o ñaa ngu' bi' chalyuu, cuxi ti ndi'i̱ ngu' bi', ti'í tsa cña nti' ngu', xqui'ya cha' xcui' na ntsi̱i̱ tsa ngu' si cajaa ngu'. Ngua'ni tye Jesús cha' ntsi̱i̱ ngu' jua'a̱, ndu'ni yu cha' tso'o ti tyi'i̱ ngu' bi' juani.

¹⁶ Ná ya̱a̱ Jesús chalyuu cha' xtyucua yu ji'i̱ ngu' xca̱ ji'i̱ Ni nde cua̱; cuentya ji'na ñati̱ chalyuu na ya̱a̱ Jesús, cha' xtyucua yu ji'na ngua ti' yu, cha' ca ta'a na laca na tya'a ñati̱ ji'i̱ jyo'o Abraham, masi cua lijya̱ na chalyuu tiya' la xi.

¹⁷ Bi' cha' lacua, stu'ba ti ntsu'u cha' ji'i̱ Jesús lo'o ñati̱ ji'i̱ ycui' nde chalyuu. Ngujuii yu lo crusi cuentya ji'na, lo'o juani ntucua yu ca slo ycui' Ndyosi cha' chcui' yu lo'o Ni, cha' cuityi̱ Ni qui'ya nu ntsu'u ji'na. Juani laca Jesús ñi'ya̱ laca sca sti jo'ó nu laca loo la nu ndyi'u tsa ti' ji'na, nu jua'a̱ tso'o tsa ndu'ni tya'na ti' ji'na.

¹⁸ Juani taca cua'ni lyaá Jesús ji'i̱ ñati̱ lo'o ndyojolaqui nu cuxi ji'i̱; nchca ji'i̱ yu cua'ni jua'a̱, xqui'ya cha' lo'o ji'i̱ ycui' yu ngua ti' nu cuxi cua'ni ngana ji'i̱, cha' lo'o ycui' yu ngua tii yu ji'i̱ cha' ti'í lo'o ya̱a̱ yu nde chalyuu.