HEBREOS 13 - Chatino Tataltepec

Cña nu ndiya ti' ycui' Ndyosi cha' cua'ni na nde chalyuu

¹ Ña'a̱ ti tyu'u tso'o tyiquee ma̱ ña'a̱ ma̱ ji'i̱ ngu' tya'a ngusñi ma̱ cha' ji'i̱ Cristo, cua'ni ma̱ cha' tso'o lo'o ngu' bi'.

² Tyi'u ti' ma̱ cha' chcui' tso'o ma̱ lo'o cua ña'a̱ ca ngu' xta, ngu' xa' quichi̱, si tyalaa ngu' toni'i̱ ji'i̱ ma̱; ta ma̱ su tyi'i̱ ngu' bi', cha' jua'a̱ ngua'ni xi jyo'o cusu' ji'i̱ ma̱ nu ngua sa'ni la, lo'o tiya' la li' nquijeloo ji'i̱ ngu' cha' xca̱ ji'i̱ ycui' Ndyosi nu ntsu'u nde cua̱ laca ñati̱ nu ngulaa toni'i̱ ji'i̱ ngu' bi'.

³ Culacua ti' ma̱ ñi'ya̱ caca xtyucua ma̱ ji'i̱ ngu' tya'a ngusñi na cha' ji'i̱ ycui' Ndyosi, nu lo'o cua ngusu'ba ngu' ji'i̱ tya'a na bi' ne' chcua̱. Lo'o jua'a̱ xtyucua ma̱ ji'i̱ ngu' tya'a na nu quicha ti', xqui'ya cha' lya' ti' ngu' ji'i̱ ngu' bi'. Tyi'u ti' ma̱ cha' xtyucua ma̱ ji'i̱ ngu' bi', ñi'ya̱ si ycui' ca ma̱ nchcube' ma̱ lo'o ngu'.

⁴ Lcaa ma̱ lo'o tya'a ma̱ nga'a̱ cha' cua'ni tyaca'a ma̱ ji'i̱ clyo'o ma̱; ná cua'ni cuxi ma̱ lo'o clyo'o ma̱, ñi'ya̱ nti' si tyu'u cha' ji'i̱ ma̱ lo'o xa' ñati̱ laja ti. Xcube' ycui' Ndyosi ji'i̱ cua ña'a̱ ca ñati̱ nu cua'ni cha' suba' jua'a̱, jua'a̱ xcube' Ni ji'i̱ ñati̱ nu tyatí̱ yu'u lo'o clyo'o xa' ñati̱.

⁵ Ná tyu'u tyiquee ma̱ xcui' cha' ji'i̱ cñi, pana tso'o si tyaala' ji'i̱ ma̱ lo'o tsa ña'a̱ nu ndyiji ti xi ji'i̱ ma̱. Na cua nchcui' Ni lo'o na ndi'ya̱: “Ná culati'i̱ na' ji'i̱ ma̱”, nacui̱ Ni, “ná xtyanu na' ji'i̱ ma̱ jua'a̱ ti”.

⁶ Bi' cha' ndi'ya̱ culacua ti' na cha' nguula ti' tyiquee na: Ycui' nu Xu'na na laca nu nxtyucua 'na. Ná ntsu'u cha' cutsi̱i̱ na' lacua, cha' ná caca cua'ni cuxi ñati̱ lo'o na'.

⁷ Tyi'u ti' ma̱ ji'i̱ ngu' jyo'o tya'a ma̱ nu ngua loo ji'i̱ ma̱ chacuayá' ji'i̱ Jesucristo; ngu' bi' laca nu cua nchcui' cha' ji'i̱ ycui' Ndyosi lo'o ma̱ tya clyo, bi' cha' culacua tso'o ti' ma̱ ji'i̱ cña tso'o nu ngua'ni ngu' bi' nde chalyuu. Cua'ni ma̱ ñi'ya̱ nu ngua'ni ngu' bi' lo'o ngusñi ngu' cha' ji'i̱ ycui' Ndyosi.

⁸ Ná ncha'a̱ Jesucristo: ñi'ya̱ ngua Ni tyempo sa'ni, la cui' jua'a̱ laca Ni juani, lo'o la cui' jua'a̱ caca Ni tyempo nde loo la.

⁹ Ná ta ma̱ chacuayá' culu'u ñati̱ xi xa' la cha' ji'i̱ ma̱, sca cha' nu ná stu'ba nchcui' lo'o cha' bi', cha' ná xtyanu ma̱ jua'a̱ ji'i̱ tyucui̱i̱ liñi. Tso'o la si tyanu tso'o lcaa cha' ji'i̱ ycui' Ndyosi ne' cresiya ji'na, si cube ti' na ji'i̱ lcaa cha' tso'o nu ndu'ni Ni lo'o na lcaa hora; pana ná taca tyanu tso'o cha' ji'i̱ ycui' Ndyosi ne' cresiya ji'na lo'o taquiya' na ji'i̱ cua ña'a̱ ca cña nu tatsaa ngu' ji'na, ñi'ya̱ nti' si nacui̱ ngu' cha' ná tso'o cacu na sca lo na nu ndacu ngu'. Masi cua ndaquiya' tsa na ji'i̱ cña bi' tya tsubi' la, si'i na tso'o la ngua ti' na lo'o ngua'ni na jua'a̱.

¹⁰ Xa' ña'a̱ cña ngua'ni Cristo lo'o ndyaa yu lo crusi, cha' ngua yu msta̱ cha' cati̱ qui'ya nu ntsu'u ji'na lo'o ycui' Ndyosi. Pana lcaa ñati̱ nu tya ndyi'u tsa ti' ji'i̱ msta̱ nu nsta sti jo'ó cuentya ji'i̱ ngu', ná caca tyi'i̱ tso'o tyiquee ngu' bi' lo'o Cristo.

¹¹ Masi xu'na sti jo'ó nu cuentya ji'i̱ ngu' judío ni, xcui' lo'o tañi na'ni ti ñalo'o sti jo'ó bi' nde cuarto su tacati tsa ne' laa bi', cha' cati̱ qui'ya nu ntsu'u ji'i̱ ngu' lo'o bi'. Nu lo'o ndye ngua cña bi', li' ndyalo'o ngu' ji'i̱ ña'a̱ tsaca cuaña' na'ni nu laca msta̱ bi' ca to' quichi̱; ca bi' ndaqui̱ ngu' cuaña' bi'.

¹² La cui' ti ca to' quichi̱ nchcube' Jesús, cha' caja ñi'ya̱ nu cati̱ cha' cuxi nu ntsu'u ji'i̱ ñati̱, nu lo'o ndyalú tañi ycui' ca yu lo'o ngujuii yu lo crusi ca bi'.

¹³ Lo'o jua'a̱ na, tso'o si ná cutsi̱i̱ na, masi tsalo'o ngu' ji'na cha' xcube' ngu' ji'na cuentya ji'i̱ Jesús; stu'ba ti caca ji'na nde chalyuu, ñi'ya̱ nu ngua ji'i̱ Jesús lo'o lya' tsa ti' ngu' ji'i̱ yu.

¹⁴ Nde lo yuu chalyuu ná ntsu'u se'i̱ tso'o su tyanu na; xcui' na ndu̱ ti' na cha' tyalaa na chaca se'i̱ su tso'o la tsiya' ti, su tsaa na lo'o cua ndye chalyuu re.

¹⁵ Bi' cha' lcaa tsa̱ cua'ni chi̱ na loo ycui' Ndyosi xqui'ya Jesús, cha' ñi'ya̱ laca si ta na msta̱ ji'i̱ Ni, jua'a̱ laca nu lo'o tyucui tyiquee na cua'ni tlyu na ji'i̱ Ni. Lo'o jua'a̱ tso'o tsa si lcaa tsa̱ chcui' na cha' tlyu tsa cha' nu ntsu'u ji'i̱ ycui' Ni.

¹⁶ La cui' jua'a̱ ná ca taja ti' ma̱ cua'ni ma̱ lcaa cha' tso'o, jua'a̱ xtyucua ma̱ ji'i̱ tya'a ñati̱ ma̱; bi' laca cña nu ndiya ti' Ni cha' cua'ni na cuentya ji'i̱ ycui' Ni.

¹⁷ Taquiya' ma̱ ji'i̱ ñati̱ nu laca cña cuentya ji'i̱ ña'a̱ taju ngu' tya'a ma̱; cua'ni ma̱ lcaa cña nu ndijña ngu' bi' ji'i̱ ma̱ cha' cua'ni ma̱. Tlyu tsa cña nu ntsu'u ji'i̱ ngu' bi', cha' xcui' ndube ti' ngu' ñi'ya̱ nu ndyu'ni sa scaa ma̱; nga'a̱ cha' xacui̱ ngu' cha' ji'i̱ ycui' Ndyosi si chañi cha' ña'a̱ ti tya tso'o ndyu'ni ma̱, xqui'ya cha' ngusñi ma̱ cha' ji'i̱ Ni. Pana tso'o la nti' ngu' bi', si ña'a̱ ti tso'o ntsu'u tyiquee ma̱ cua'ni ma̱ ñi'ya̱ nu nacui̱ ngu' ji'i̱ ma̱ cha' cua'ni ma̱. Si ná cua'ni ma̱ jua'a̱, caca xñi'i̱ ti' ngu' bi' li', cha' nga'aa caca xtyucua ngu' ji'i̱ ma̱ li'.

¹⁸ Ña'a̱ ti chcui' ma̱ lo'o ycui' Ndyosi cuentya ji'i̱ cuare. Tyucui tyiquee ya jlo ti' ya cha' ni sca cha' cuxi ná ntsu'u ji'i̱ ya nu caca tyuju'u ti' ya ji'i̱. Lcaa tyempo nti' ya cua'ni ya cua ña'a̱ ca cha' nu tso'o la cuentya ji'i̱ ycui' Ndyosi.

¹⁹ Bi' cha' xa' ndijña tsa na' ji'i̱ ma̱, cha' lu'ba ti chcui' ma̱ lo'o ycui' Ndyosi cuentya jna'. Ná tyiquee' cua'ni Ni cha' xtyu̱u̱ na' ca̱a̱ na' yala la ca su ndi'i̱ ma̱.

Ngusalya' yu lo'o ngu'

²⁰ Ycui' Ndyosi laca nu ngua'ni cña cha' ndyu'ú Jesucristo nu Xu'na na chaca quiya' lo'o ngujuii. Lo'o juani laca Jesús loo, cha' ña'a̱si̱i̱ Ni ji'na nu laca na ñati̱ ji'i̱ Ni, xqui'ya cha' ngujuii Ni cuentya ji'na. Nu lo'o ngujuii Jesús, li' ngüiñi cha' ji'i̱ Ni lo'o lcaa ñati̱ ji'i̱ Ni, sca cha' cucui nu ná nga'a̱ cha' tye tsiya' ti.

²¹ Ycui' Ndyosi ndu'ni cha' ti̱ ti tyi'i̱ tyiquee na, lo'o juani nti' na' cha' xtyucua Ni ji'i̱ ma̱ lo'o cua ña'a̱ ca cha' nu lyiji ji'i̱ ma̱, cha' taca cua'ni ma̱ lcaa cña, ñi'ya̱ nu nti' Ni cha' cua'ni ma̱; nti' na' cha' cuentya ji'i̱ ma̱ cua'ni Ni na laca nu tso'o la nti' Ni, chacuayá' ji'i̱ Jesucristo. Lo'o jua'a̱ ná nga'a̱ cha' tye cha' cua'ni tlyu Ni ji'i̱ Cristo. ¡Jua'a̱ caca cha' lacua!

²² Cu'ma̱ tya'a ngusñi na cha' ji'i̱ Cristo, cua'ni clyu ti' ma̱ 'na, talo tyiquee ma̱ xi 'na cha' cuna ma̱ cha' nu nchcui' na' re. Ná quiña'a̱ tsa cha' nscua na' lo quityi re, pana cua nti' na' cha' tyanu tachaa la cha' bi' ne' cresiya ji'i̱ ma̱.

²³ Chaca cha' nti' na' chcui̱' lo'o ma̱: Cua ngulaá ngu' ji'i̱ Timoteo, tya'a ndya'a̱ na cña, ca su ngutu'ú yu ne' chcua̱; nu lo'o ca̱a̱ na', ca̱lo'o na' ji'i̱ yu li', si yala ti tyalaa yu slo na'.

²⁴ Chcuicha' na' ji'i̱ lcaa ngu' nu laca loo cuentya ji'i̱ ma̱, jua'a̱ chcuicha' na' ji'i̱ lcua ti tya'a ma̱ nu ngusñi ma̱ cha' ji'i̱ ycui' Ndyosi. Ca ta'a ngu' nu ntsu'u cha' ji'i̱ lo'o ycui' Ndyosi, nu ndi'i̱ nde Italia re, lo'o lcaa ngu' bi' nti' ngu' chcuicha' ngu' ji'i̱ ma̱.

²⁵ Cua nti' na' cha' tyi'u ti' ma̱ lcaa tyempo cha' xcui' tso'o ti ndu'ni ycui' Ndyosi lo'o lcaa na.