HEBREOS 12 - Chatino Tataltepec

Culacua ti' na ñi'ya̱ nu ngua'ni Jesús cha' ntiji̱loo yu ji'i̱ tya'a cusu̱u̱ yu

¹ Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

² Xcui' culacua ti' na ñi'ya̱ ngua'ni Jesús; lcaa cha' nu jlya ti' na ni, Jesús laca su̱u̱ lcaa cha' bi'; si jua'a̱, taca jlya ti' na ji'i̱ Ni ña'a̱ cuayá' nu tye chalyuu. Nu ycui' Jesús ni, ná nguta'a̱chu̱' yu ji'i̱ cña nu nga'a̱ cha' cua'ni yu, masi cua jlo ti' yu cha' cua cajaa ti yu lo crusi. Pana tiya' la li', nu lo'o cua ntiji̱loo yu ji'i̱ nu cuxi, tso'o tsa ntsu'u tyiquee yu li'; bi' cha' ná ngua tyuju'u ti' yu tsiya' ti, masi nguxcube' ngu' ji'i̱ yu lo crusi. Lo'o juani cua ndyaa tucua Jesús nde la'a tsu' cui̱ su tlyu ca su ntucua ycui' Ndyosi Sti na.

³ Culacua tso'o ti' ma̱ ji'i̱ lcaa cha' cuxi nu ngua ji'i̱ Jesús tyempo bi'. Ndalo tsa tyiquee yu ji'i̱ cha' cuxi bi' li', masi liye' tsa ti' ngu' cuxi ña'a̱ ngu' ji'i̱ yu. Bi' cha' lo'o cu'ma̱ ni, ná ntsu'u cha' ca ñu'u̱ ti' ma̱ xqui'ya Jesús, ná ntsu'u cha' ca taja ti' ma̱ ji'i̱ Ni.

⁴ Masi lye tsa nxu̱u̱ tya'a ma̱ lo'o lcaa cha' cuxi, ni tsaca ma̱ bilya cujuii ngu' ji'i̱ ma̱ xqui'ya Jesús.

⁵ Ná nga'a̱ cha' cjlyaa ti' ma̱ cha' bi', cha' tso'o tsa nchcui' ycui' Ndyosi lo'o ma̱ ñi'ya̱ si laca ma̱ sñi' ycui' Ni. Ndi'ya̱ nacui̱ Ni: Sñi', nacui̱ ycui' Ndyosi, taquiya' tso'o ma̱ 'na, masi xcube' na' ji'i̱ ma̱; ná ca taja ti' ma̱ 'na, masi cua'a na' ji'i̱ ma̱ cha' ná cua'ni ma̱ sca cha' cuxi.

⁶ Cha' na' laca̱ nu Xu'na ma̱, cha' ntsu'u tsa tyiquee na' ña'a̱ na' ji'i̱ cu'ma̱, bi' cha' xcube' na' xi ji'i̱ ma̱, nacui̱ ycui' Ndyosi. Ntsu'u quiya' nda na' xi cha' ti'í ji'i̱ ñati̱ 'na, cha' sñi' na' laca ngu'. Jua'a̱ nchcui' ycui' Ndyosi lo'o na,

⁷ bi' cha' talo ma̱ tyiquee' lo'o chcube' ma̱ chacuayá' ji'i̱ ycui' Ndyosi Sti ma̱ lacua. Cua nchcube' ma̱ xi juani, bi' cha' caca cuayá' ti' ma̱ cha' laca ma̱ sñi' ycui' Ni, si jua'a̱ ndu'ni ycui' Ni lo'o ma̱. Lcaa ñati̱ nu ntsu'u sñi', ntsu'u quiya' ndyu'ni tyaala ji'i̱ sñi'; lo'o ná ndaquiya' nu sube bi' ji'i̱ cha' nu nchcui' sti ngu', nchcube' sti ji'i̱ sñi' li'. La cui' jua'a̱ ndu'ni Ni lo'o na.

⁸ Nga'a̱ cha' xcube' Ni ji'i̱ ma̱ ñi'ya̱ nchcube' Ni ji'i̱ cua ña'a̱ ca sñi' Ni, cha' taca ca cuayá' ti' ma̱ cha' chañi cha' cua laca ma̱ sñi' ycui' Ndyosi li'; ná laca ma̱ sñi' nu ngujui ji'i̱ ñati̱ nde calle ti.

⁹ Nde chalyuu nchcube' sti na ji'na, bi' cha' ndaquiya' na ji'i̱ cha' nu nchcui' ngu' cusu' ji'na lo'o na. ¿Ha ná tso'o si ta na chacuayá' cha' xcube' ycui' Ndyosi Sti na ji'na, cha' tso'o la tyi'i̱ tyiquee na nde loo la lacua?

¹⁰ Cua laca ti tyempo nu nchcube' sti na ji'na nde chalyuu, tsa ña'a̱ nu tso'o cuentya ji'na ndu'ni ngu', cha' ca tsa'a̱ na nti' ngu'; la cui' ti cha' nti' ycui' Ndyosi cha' caca tso'o ji'na, bi' cha' nchcube' Ni ji'na jua'a̱. Nu lo'o cati̱ qui'ya nu ntsu'u ji'na, li' taca ca stu'ba cha' ji'na lo'o ycui' Ndyosi Sti na, nu ná ntsu'u cha' cuxi ji'i̱ Ni tsiya' ti.

¹¹ Ca xñi'i̱ ti' na hora bi' lo'o nchcube' na, si'i na chaa ti' na li'; pana tiya' la li' taca cua'ni la na cha' tso'o, cha' ti̱ ti taca tyi'i̱ tyiquee na nde chalyuu li', xqui'ya cha' cua ngusñi tso'o la na cha' ji'i̱ ycui' Ndyosi nu lo'o cua nchcube' na.

Tlyu tsa cha' laca si tya'a̱chu̱' na ji'i̱ ycui' Ndyosi

¹² Xa' ta ma̱ juersa ji'i̱ tyucui ña'a̱ ma̱ lacua, masi ngua cña' tsa ma̱; xa' cua'ni cha' nguula ti' tyiquee ma̱, masi ngua taja ti' ma̱ tsubi'.

¹³ Clyana la ma̱ tyucui̱i̱ liñi su tsaa ma̱, cha' ná quiñu'u̱ la tyucui̱i̱ ji'i̱ xa' la ñati̱ tya'a ma̱ nu siya' la tyiquee ngu'; cua'ni ma̱ cha' tyatí̱ la ti' tyiquee ñati̱ bi', cha' si'i na caca ñu'u̱ la ti' ngu'.

¹⁴ Cua'ni cña ti' ma̱ cha' tso'o ti tyi'i̱ ma̱ lo'o lcaa ñati̱, cua'ni ma̱ cha' caca lubii cresiya ji'i̱ ma̱; ni tsaca na, ná caca ña'a̱ na ji'i̱ ycui' Ndyosi si tya lyiji caca lubii cresiya ji'na.

¹⁵ Cui'ya ma̱ cuentya cha' ni tsaca ngu' tya'a ma̱ ná xtyanu jua'a̱ ti lcaa cha' tso'o nu ndu'ni ycui' Ndyosi lo'o na. Lo'o jua'a̱ cui'ya ma̱ cuentya cha' ná cua'ni ñu'u̱ ma̱ ji'i̱ tyiquee xa' la ngu' tya'a ngusñi na cha' ji'i̱ Jesús. Ñi'ya̱ laca sca quixi̱' tyaala nu cua'ni ñu'u̱ ji'i̱ ñati̱ lo'o co'o ngu' hitya bi', jua'a̱ caca na ji'i̱ tya'a na lo'o ntsu'u sca cha' cuxi ji'na.

¹⁶ Cui'ya ma̱ cuentya cha' ni tsaca ma̱ ná caca ma̱ ñi'ya̱ ngua jyo'o Esaú; ngua'ni lya' ti' yu bi' ji'i̱ ñati̱ ji'i̱ yu, lo'o jua'a̱ ná ndube ti' yu ji'i̱ ycui' Ndyosi. Sñi' clyo ngua yu, pana ndye ndyujui' yu lcaa chacuayá' nu caja ji'i̱ yu nquicha', xqui'ya cha' ngua ti' yu cacu yu masi sca ti ca'ña scuaa; nguñilo'o tya'a ngula yu ji'i̱ yu li'.

¹⁷ Cua jlo ti' ma̱ ñi'ya̱ ngua ca tiya' la: nu lo'o ngua ti' yu cha' culacua̱ sti yu ji'i̱ yu, li' nga'aa ndaquiya' sti yu ji'i̱ cha' nu nda yu lo'o; nga'aa ngujui ñi'ya̱ nu tya'a̱chu̱' yu ji'i̱ cha' nu cua ngua'ni yu, masi ngusi'ya tsa yu lo'o ngüijña yu cha' bi' ji'i̱ sti yu.

¹⁸ Lo'o ndyuna ma̱ cha' ji'i̱ ycui' Ndyosi juani, ná ndyaca ji'i̱ ma̱ ñi'ya̱ nu ngua ji'i̱ ngu' Israel nu ngua sa'ni la, nu lo'o ngutu̱ ngu' bi' quiya' ca'ya Sinaí. Ná nchca tii ma̱ juani, ñi'ya̱ nu ngua ti' ngu' bi' lo'o lye tsa ndyaqui̱ sii' ca'ya Sinaí bi' nu ngua li'; talya tsa ña'a̱ ngua li', ná ngua ña'a̱ ngu' tsiya' ti, jua'a̱ lye tsa ngua cui'i̱.

¹⁹ La cui' jua'a̱ ná ndyuna ma̱ lo'o cui̱i̱ tsa nguañi ngula'á cui'chcua̱ ji'i̱ ycui' Ndyosi li', nguañi nchcui' Ni lo'o ñati̱ bi' li'. Nu lo'o ndyuna ngu' nchcui' ycui' Ndyosi lo'o ngu', li' lye tsa ngüijña ngu' ji'i̱ Ni, cha' nga'aa chcui' ycui' Ni lo'o ngu' bi' tsiya' ti.

²⁰ Ndyutsi̱i̱ tsa ngu' li', cha' nga'aa ndalo jyaca̱ ngu' cuna ngu' cha' nu nda jyo'o Moisés lo'o ngu' cuentya ji'i̱ ycui' Ndyosi; ndi'ya̱ nacui̱ Ni: “Ná ca̱a̱ ma̱ nde sii' ca'ya re tsiya' ti; masi ca̱a̱ sca na'ni ji'i̱ ma̱ nde sii' ca'ya re, nga'a̱ cha' cujuii clya ma̱ ji'i̱ lo'o quee”.

²¹ Lye tsa ña'a̱ ngua cha' bi', hasta ycui' Moisés nacui̱ ndi'ya̱: “Lye tsa nchcua̱ na' cha' ndyutsi̱i̱ na'”.

²² Pana nga'aa si'i jua'a̱ ndyaca ji'i̱ ma̱ juani, cha' chaca chalyuu tsaa ma̱ juani; la cui' ca su ntucua tyi ycui' Ndyosi ca nde cua̱, ndacua tsaa ma̱ juani. Ca bi' ndi'i̱ ycui' Ndyosi lo'o tyu̱u̱ tsa mil tya'a xca̱ ji'i̱ Ni. Tso'o tsa ña'a̱ ca bi'; ñi'ya̱ si cua nscua chaca ca'ya Sión nde cua̱, ñi'ya̱ si ca bi' ntucua chaca quichi̱ Jerusalén nu tso'o la ña'a̱, jua'a̱ laca bi'.

²³ Lo'o jua'a̱ ntsu'u cha' tsaa ma̱ slo lcaa tya'a sñi' ycui' Ndyosi nu cua ndyalo'o Ni ji'i̱ ndejua tya sa'ni la, cha' cua nscua xtañi jyo'o bi' lo quityi ji'i̱ ycui' Ndyosi nde cua̱. Tso'o tsa ntsu'u tyiquee ngu' bi' ca su ndyu'u ti'i̱ ngu'. Na cua tsaa ti ma̱ la cui' slo ycui' Ndyosi nu ndu'ni cuayá' ji'i̱ lcaa ñati̱, ca su ndi'i̱ lcaa ñati̱ jyo'o nu lubii cresiya ji'i̱ xqui'ya Jesús, cha' cua ndyaca cucui tyucui ña'a̱ ngu'.

²⁴ Lo'o jua'a̱ ca bi' ndi'i̱ Jesús, nu ngüiñi chaca cha' nu tso'o la ji'i̱ ycui' Ni lo'o na; tso'o tsa ngua cha' ndyalú tañi ycui' Jesús, cha' xqui'ya nu Jesús bi' ni, bi' cha' cua nguti̱ cha' cuxi nu ntsu'u ji'na. Pana nu lo'o ndyalú tañi jyo'o Abel nu ngua sa'ni, li' ntsu'u cha' cajaa chaca yu nu cua ndyujuii ji'i̱ tya'a; xcui' cha' cuxi ndyu'u ji'i̱ cha' bi' li'.

²⁵ Cui'ya ma̱ cuentya lacua, cha' cua'a̱ jyaca̱ ma̱ ji'i̱ lcaa cha' nu cua nda Cristo lo'o ma̱. Nguxcube' tsa ycui' Ndyosi ji'i̱ jyo'o cusu' ji'na, nu lo'o ná ntaja'a̱ ngu' cua'a̱ jyaca̱ ngu' ji'i̱ cha' nu nchcui' jyo'o Moisés lo'o ngu' nde chalyuu chacuayá' ji'i̱ ycui' Ndyosi; ná ngua xna ngu' bi' ji'i̱ ycui' Ndyosi. La cui' jua'a̱ tlyu la cha' caca ji'na juani, si ná taquiya' na ji'i̱ Cristo nu ngutu'u ca slo ycui' Ndyosi ya̱a̱ nde lo yuu chalyuu, lo'o jua'a̱ cua xa' ndyaa tucua Ni ca slo ycui' Ndyosi chaca quiya' juani.

²⁶ Laja lo'o nchcui' ycui' Ndyosi lo'o ñati̱ sa'ni, la cui' hora bi' ngulacui̱ chalyuu; pana juani cua nchcui' Ni chaca quiya' ndi'ya̱: “Chaca tya quiya' cua'ni na' cha' quiña lcaa lo yuu chalyuu, la cui' hora nu quiña lcaa chalyuu nu ntsu'u nde cua̱”, nacui̱ Ni.

²⁷ Lo'o nacui̱ Ni: “chaca tya quiya'”, jua'a̱ ca cuayá' ti' na cha' ntsu'u cha' xquiña Ni tyucui ña'a̱ lcaa chalyuu nu cua ngüiñá Ni, culotsu' Ni ji'i̱ cha' bi' li'. Tsa ña'a̱ ti na nu ntsu'u ji'i̱ ycui' Ndyosi, bi' ti na nu tyanu li', xqui'ya cha' ná nchca clyiji na bi' tsiya' ti.

²⁸ Lo'o jua'a̱ ná taca cha'a̱ chalyuu cucui nu ngujui ji'na xqui'ya Cristo, ná clyiji tsiya' ti bi'; bi' cha' tso'o tyu'u tyiquee na ña'a̱ na ji'i̱ ycui' Ndyosi lacua. Cua'ni chi̱ na loo ycui' Ndyosi, cha' jua'a̱ nti' Ni cha' cua'ni na; tyi'u ti' na cha' lcaa tsa̱ cua'ni tlyu na ji'i̱ ycui' Ni, cha' cube tsa ti' na ji'i̱ Ni.

²⁹ La cui' Ndyosi nu ndu'ni tlyu na ji'i̱ Ni, chañi cha' taca ji'i̱ Ni cuityi̱ Ni ji'na tsi tsiya' ca lo'o sca quii' tlyu, si jua'a̱ nti' Ni.