HEBREOS 11 - Chatino Tataltepec

Ñati̱ nu tyucui tyiquee ngu' jlya ti' ngu' cha' ji'i̱ ycui' Ndyosi

¹ Na jlya ti' na ji'i̱ sca cha' lo'o ndu̱ ti' na cha' caca cha' bi', nu lo'o jlo ti' na cha' caca cha' bi' ji'na, masi bilya ña'a̱ na ji'i̱.

² Jlya ti' jyo'o cusu' ji'na nu ngua'ni tlyu ji'i̱ ycui' Ndyosi nu ngua sa'ni la, bi' cha' ñati̱ tso'o ngua ngu', lo'o jua'a̱ ntucuá Ni cha' ji'i̱ ngu' bi'.

³ Jlya ti' na ji'i̱ ycui' Ndyosi, bi' cha' cua ngua cuayá' ti' na cha' clyo nda ycui' Ndyosi cha', lo'o li' ndya' chalyuu nu ña'a̱ na juani; ná na'a̱ na ñi'ya̱ ngua cha' ndya' bi', tsa bi' ti cha' jlya ti' na cha' ngüiñá Ni lcaa cha' nu ña'a̱ na lo yuu chalyuu juani.

⁴ Jlya ti' jyo'o Abel ji'i̱ ycui' Ndyosi, bi' cha' tso'o la ngua'ni yu que jyo'o Caín tya'a yu, nu lo'o ngusta ngu' msta̱ slo ycui' Ndyosi. Ntucuá Ni cha' nu nchcui' nu Abel bi', xqui'ya cha' jlya ti' yu; lubii tsa cresiya ji'i̱ yu ngua ti' ycui' Ndyosi, nu lo'o na'a̱ Ni ji'i̱ yu lo'o ngusta yu msta̱. Lo'o jua'a̱ juani tya nchca cuayá' ti' na cha' ngusñi jyo'o Abel cha' ji'i̱ ycui' Ndyosi, masi sa'ni tsa ngujuii yu.

⁵ Jlya ti' jyo'o Enoc ji'i̱ ycui' Ndyosi, bi' cha' ná ngujuii yu. Jua'a̱ ti ndyalo'o ycui' Ndyosi ji'i̱ yu ca slo ycui' Ni; ná nquije yu ji'i̱ ñati̱ li', xqui'ya cha' cua ya̱a̱ Ni ya̱qui'ya Ni ji'i̱ yu. Pana nchcui' quityi cha' cua ndiya ti' Ni ñi'ya̱ nu ngua'ni nu Enoc bi' laja lo'o nguti'i̱ yu chalyuu.

⁶ Ni sca na, ná taca cua'ni na cha' caca tyaala' ti' tyiquee ycui' Ndyosi, si ná chañi cha' jlya ti' na ji'i̱ Ni. Si nti' na cha' jyacua na ji'i̱ Ni cha' chcui' na lo'o Ni, li' nga'a̱ cha' jlya ti' na cha' lu'ú ycui' Ndyosi; nga'a̱ cha' jlya ti' na cha' taca xtyucua Ni ji'na lo'o jña na sca cha' ji'i̱ Ni.

⁷ Jlya ti' jyo'o Noé ji'i̱ ycui' Ndyosi, bi' cha' ndyuna yu cha' nu nchcui' Ni lo'o yu, nu lo'o nacui̱ Ni ñi'ya̱ ña'a̱ cha' cuxi nu lijya̱ caca nde loo la, masi ycui' yu ná ngua tii yu ñi'ya̱ caca cha' bi'. Ngusñi yu cha' ji'i̱ ycui' Ndyosi, li' ngüiñá yu sca yaca ni'i̱ su tyi'i̱ yu lo'o lcaa tya'a ndi'i̱ yu; jua'a̱ ngua cha' ngulaá ngu' ji'i̱ tyo clyaa bi'. Jlo ti' na juani cha' cuxi tsa ngua chalyuu cusu' bi', cha' sca ti Noé jlya ti' yu cha' nu nchcui' Ni lo'o; ngua'ni ycui' Ndyosi cha' ngua tso'o cresiya ji'i̱ yu li'.

⁸ Jlya ti' jyo'o Abraham ji'i̱ ycui' Ndyosi, bi' cha' ngusñi yu cha' ji'i̱ Ni, nu lo'o nguane Ni ji'i̱ yu cha' tsaa yu sca loyuu tyijyu' tsa, su nacui̱ Ni ji'i̱ yu cha' cajua caca quichi̱ tyi yu. Ngutu'u yu loyuu su nguti'i̱ yu tya clyo, ndyaa yu li', masi ná jlo ti' yu macala su tsaa yu.

⁹ Xqui'ya cha' jlya ti' yu ji'i̱ Ni, bi' cha' ndyanu yu ca loyuu su nacui̱ Ni ji'i̱ yu cha' cajua caca quichi̱ tyi yu. Ca bi' nguti'i̱ yu ñi'ya̱ ndu'ni ñati̱ nu ndya'a̱ xtyi'i ti; chcua'ya late' ti ngüiñá yu cha' nguti'i̱ yu, lo'o la cui' jua'a̱ ngua'ni jyo'o Isaac sñi' yu lo'o jyo'o Jacob sñi' ste' yu nde loo la. Tyucuaa jyo'o cusu' bi' jlya ti' ji'i̱ la cui' tya'a cha' nu cua nacui̱ Ni ji'i̱ jyo'o Abraham sti ngu' bi'.

¹⁰ Jlya ti' Abraham cha' nde loo la cua'ni cho'o ycui' Ndyosi chaca se'i̱ su tso'o la tyi'i̱ yu, nu ná culiji tsiya' ti; cuiñá ycui' Ndyosi ña'a̱ tsaca quichi̱ bi'.

¹¹ Lo'o ycui' Sara clyo'o yu ni, jlya ti' ma' ji'i̱ ycui' Ndyosi, bi' cha' ngua tana ma', masi cusu' tsa ma', masi bilya caja sñi' ma' tsiya' ti. Ngujui sñi' ma' lacua, xqui'ya cha' jlya ti' ma' ji'i̱ ycui' Ndyosi, cha' chañi cua'ni Ni lcaa ña'a̱ cha' nu cua nacui̱ Ni ji'i̱ ma'.

¹² Lo'o jua'a̱ ngua cha' quiña'a̱ tsa ñati̱ ndyatu̱ ji'i̱ sca ti nu cusu' Abraham nde loo la, masi cua tye ti cha' ji'i̱ yu cha' cusu' tsa yu; tsa ña'a̱ cuii nu ntsu'u nde cua̱, tsa lo cua tya'a ñati̱ ndyatu̱ ji'i̱ nde loo la. Lo'o juani ná caca culacua na ji'i̱ ngu' bi', ñi'ya̱ laca cha' ná caca culacua na ni tsa lo tya'a satya yusi̱ ndi'i̱ to' tyujo'o.

¹³ Ña'a̱ ti jlya ti' lcaa jyo'o bi' ji'i̱ ycui' Ndyosi lo'o ngujuii ngu', masi nga'aa na'a̱ ngu' lo'o ndyu'u tucua lcaa cha' nu nacui̱ Ni cha' caca; pana tso'o tsa ngua tyiquee ngu' bi', cha' nu jlo ti' ngu' cha' cua ngulala ti caca cha' bi', ñi'ya̱ si tsa lyiji ti na'a̱ ngu' ji'i̱. Jlo ti' ngu' cha' tyijyu' ngutu'u ycui' ca ngu' lijya̱ ngu', lo'o ná ntsu'u tyi ngu' lo yuu bi'.

¹⁴ Jlya ti' ngu' cha' ntsu'u sca se'i̱ tso'o la su tyalaa ngu' ca nde loo la, bi' cha' ngua ti' ngu' jua'a̱.

¹⁵ Nga'aa ndyi'u tsa ti' Abraham lo'o tya'a yu ji'i̱ quichi̱ tyi ngu' ca loyuu tyijyu' su ngutu'u ngu'; cua nguxtyu̱u̱ ngu' ca bi' hora ti, si jua'a̱ ngulacua ti' ngu'.

¹⁶ Pana si'i jua'a̱ ngua ti' ngu', xqui'ya cha' jlya ti' ngu' cha' ta ycui' Ndyosi sca se'i̱ su tso'o la tsiya' ti su tyi'i̱ ngu'; ngua ti' ngu' tyalaa ngu' la cui' ca su ntucua ycui' Ni. Bi' cha' ná tyuju'u ti' Ni lo'o nacui̱ ngu' cha' ycui' Ndyosi nu Xu'na ngu' laca Ni; na cua ngua'ni cho'o Ni sca se'i̱ su tyi'i̱ ngu' ca slo ycui' Ni.

^17-18 Jlya ti' jyo'o Abraham cha' nu cua nda ycui' Ndyosi lo'o, bi' cha' ndyalo'o yu ji'i̱ Isaac sñi' yu, cha' ycui' nu piti caca msta̱ cha' xcua lo mesa quee ji'i̱ ycui' Ndyosi li'; jua'a̱ ngua cha' ngua'ni cuayá' Ni ji'i̱ yu. Na cua ngüiñi cha' ji'i̱ ycui' Ni lo'o nu Abraham bi' tya sa'ni la cha' cala sñi' clyo'o yu; tya li' cua nacui̱ Ni ji'i̱ yu: “Xqui'ya Isaac catu̱ quiña'a̱ tsa ñati̱ jinu'u̱ nde loo la”. Pana ña'a̱ ti ntaja'a̱ Abraham ndyalo'o yu ji'i̱ nu piti Isaac bi', nu sca ti sñi' yu lo'o clyo'o yu, cha' caca nu piti bi' msta̱.

¹⁹ Taca ji'i̱ ycui' Ndyosi cua'ni cha' tyu'ú Isaac chaca quiya' si cua ngujuii, ngua ti' Abraham; bi' cha' ntaja'a̱ yu ngua'ni yu jua'a̱ lo'o sñi' yu. Pana nu lo'o cua nscua Isaac lo mesa cha' cajaa, li' xa' ndya Ni ji'i̱ nu piti bi' ji'i̱ Abraham sti yu chaca quiya'; ná ngujuii nu piti bi'.

²⁰ Jlya ti' jyo'o Isaac cha' nu nda ycui' Ndyosi lo'o, bi' cha' nchcui' nu cusu' bi' lo'o tyucuaa sñi' yu, nu Jacob lo'o Esaú bi', cha' tso'o tsa caca ji'i̱ ñati̱ nu catu̱ ji'i̱ ngu' tyempo nde loo la.

²¹ Jlya ti' jyo'o Jacob cha' nu nda ycui' Ndyosi lo'o, bi' cha' ngusta ya' nu cusu' bi' hique tyucuaa sñi' ste' yu nu ngua sñi' José bi', nu lo'o cua cajaa ti nu cusu' bi'; nchcuicha' nu cusu' ji'i̱ nu ngu' cuañi' bi' li'. Lo'o li' ngua'ni tlyu yu ji'i̱ ycui' Ndyosi, laja lo'o ndu̱ yu nguatu̱ yu yaca xca̱ ji'i̱ yu lyuu.

²² Jlya ti' jyo'o José ji'i̱ ycui' Ndyosi, bi' cha' lo'o cua cajaa ti yu, li' nda yu sca cha' lo'o ngu' tya'a yu, cha' chañi cha' tyu'u lcaa tya'a ngu' Israel loyuu Egipto bi' ca tiya' la, tyaa ngu' laja ti li'. Lo'o jua'a̱ nacui̱ nu cusu' macala tyatsi' jyo'o ycui' yu chaca quiya' ca tiya' la, nu lo'o cua ngutu'u ngu' ndyaa ngu'.

²³ Jlya ti' sti xtya'a̱ jyo'o Moisés ji'i̱ ycui' Ndyosi, bi' cha' lo'o ngula sñi' ngu', ngusu'ba cuatsi' ngu' ji'i̱ yu ni'i̱ sna co', cha' na'a̱ ngu' cha' tso'o tsa ña'a̱ cubi' cuañi' bi'. Nga'aa ndyutsi̱i̱ ngu' bi' ji'i̱ rey xña'a̱, masi ná ndaquiya' ngu' ji'i̱ cña cuxi nu ngulo rey bi'.

²⁴ Lo'o ngua tlyu la nu Moisés bi' li', ná ndiya ti' yu cha' ñacui̱ ngu' ji'i̱ cha' laca yu sñi' nu cuna'a̱ sñi' rey nu laca loo ji'i̱ ngu' Egipto, xqui'ya cha' jlya ti' yu ji'i̱ ycui' Ndyosi nu Xu'na ngu' Israel;

²⁵ tso'o la cha' stu'ba ti caja cha' ti'í ji'i̱ yu lo'o lcaa tya'a ñati̱ ji'i̱ ycui' Ndyosi, ngua ti' yu. Ná ngua ti' yu tya'a̱ yu xcui' cha' paseya ti, ni ná ngua ti' yu cua'ni yu xi cha' cuxi cha' sca hora ti ca chaa ti' ycui' ti yu;

²⁶ tso'o la stu'ba ti tyi'i̱ yu lo'o ngu' tya'a yu, masi chi̱i̱ nti' xa' ñati̱ ña'a̱ ji'i̱ yu, ngua ti' yu. Ñi'ya̱ nchcube' ycui' Cristo nde loo la, jua'a̱ nchcube' Moisés nu ngua li'; pana ná ndube ti' yu cha' culiya' ngu', nguxtyanu yu lcaa cha' tso'o nu ntsu'u ji'i̱ ngu' Egipto, cha' jlya ti' yu cha' tso'o la caca ji'i̱ ñati̱ ji'i̱ yu nde loo la xqui'ya ycui' Ndyosi.

²⁷ Jlya ti' jyo'o Moisés bi' ji'i̱ ycui' Ndyosi, bi' cha' ngutu'u yu loyuu Egipto bi'; ná ndyutsi̱i̱ yu masi ngunasi̱' tsa rey xña'a̱ bi' li', ni ná nguta'a̱chu̱' Moisés tsiya' ti. Ndyalo'o yu ji'i̱ ngu' Israel tyucui̱i̱ tyijyu', ñi'ya̱ si ndyaa lca'a̱ yu ji'i̱ ycui' Ndyosi, masi ná nchca ña'a̱ na ji'i̱ ycui' Ni.

²⁸ Xqui'ya cha' jlya ti' Moisés cha' nu nda ycui' Ndyosi lo'o, bi' cha' nacui̱ yu cha' clyo cua'ni ngu' ta'a pascua la cui' talya lo'o cua tyeje tacui ti sca xca̱ tyaala su ndi'i̱ ngu'; cuentya ji'i̱ ycui' Ndyosi ca̱a̱ xca̱ tyaala bi', cha' xcube' ji'i̱ ngu' Egipto. Li' ngulo Moisés cña cha' ta'a̱ ngu' tañi na'ni chu̱' yaca nu ndu̱ to' tyuu ni'i̱ ji'i̱ lcaa ngu', cha' nu lo'o ña'a̱ xca̱ tyaala bi' tañi, ná cujuii ji'i̱ sñi' ngu' Israel li'; pana cua ndyujuii xca̱ bi' ji'i̱ sñi' nu ngula clyo ji'i̱ lcaa ngu' ca tyi.

²⁹ Xqui'ya cha' jlya ti' Moisés ji'i̱ ycui' Ndyosi, bi' cha' ndyaala sca tyucui̱i̱ btyi ti cla'be laja Tyujo'o Nga'a, cha' tyu'u ngu' chaca tsu'. Pana nu lo'o ngua ti' ngu' Egipto tyu'u lca'a̱ ji'i̱ ngu' Israel, nga'aa ngua ji'i̱ ngu' li', cha' ndyanu ngu' ne' hitya bi'; ndye ngu' Egipto, ngujuii ngu' bi' li'.

³⁰ Jlya ti' ngu' Israel cha' ji'i̱ ycui' Ndyosi, bi' cha' nguta'a̱ ngu' nguxtyi'i̱ ngu' tyi'i̱ ca chu̱' lo'o quee nu ndu̱ to' quichi̱ Jericó. Cati tsa̱ nguta'a̱ ngu' tsa cu' ti, lo'o li' ndye lo'o bi' nguti̱.

³¹ Pana jyo'o Rahab, sca nu cuna'a̱ calle nu nguti'i̱ ca quichi̱ bi', jlya ti' cho' ji'i̱ ycui' Ndyosi; bi' cha' nchcui' tso'o cho' lo'o nu tucua tya'a ngu' Israel nu cuaana ti ndyaa, ndyaa na'a̱ ngu' lo quichi̱ bi' clyo. Nda cho' su tyi'i̱ ngu', bi' cha' ná ngujuii cho' lo'o ngujuii xa' la ñati̱ tya'a quichi̱ tyi cho' nu ná ndaquiya' ji'i̱ ycui' Ndyosi tsiya' ti.

³² Tya ntsu'u quiña'a̱ tsa cha' nu taca chcui' na' lo'o ma̱ cuentya ji'i̱ cha' tlyu nu ngua'ni jyo'o cusu' ji'na, ngu' nu chañi cha' jlya ti' ji'i̱ ycui' Ndyosi: taca chcui' na' ji'i̱ Gedeón, lo'o ji'i̱ Barac, lo'o ji'i̱ Sansón, lo'o ji'i̱ Jefté, lo'o ji'i̱ David, lo'o ji'i̱ Samuel, lo'o ji'i̱ ca ta'a jyo'o cusu' nu ngua tu'ba ji'i̱ ycui' Ndyosi tya sa'ni la.

³³ Jlya ti' lcaa ngu' bi' ji'i̱ ycui' Ndyosi, bi' cha' ngusu̱u̱ tya'a ngu' lo'o ñati̱ cuxi nde xa' chalyuu, ntiji̱loo ngu' ji'i̱ lcaa ñati̱ nu nguti'i̱ ca bi' li'; tso'o tsa cña ngua'ni ngu' bi', bi' cha' ngua'ni Ni cua ña'a̱ ca cha' nu nacui̱ Ni cha' cua'ni Ni cuentya ji'i̱ ngu' bi'. Ngua ji'i̱ ngu' bi' cua'a ji'i̱ cuichi tyaala cha' ná ndyacu ji'i̱ ngu';

³⁴ jua'a̱ cua ndalo ngu' bi', masi ngusu'ba ngu' xña'a̱ ji'i̱ ngu' lo quii' tonu cha' tyaqui̱ ngu'; ná sca ngua ji'i̱ ngu' bi', masi ngulo ñati̱ chcua̱ cha' cujuii ji'i̱ ngu'. Ná ndalo ngu' bi' tsiya' ti tya clyo, cha' xti ti juersa ntsu'u ji'i̱ ngu'; pana ca tiya' la, li' nguula tsa ti' ngu' bi', cha' tlyu tsa juersa ngujui ji'i̱ ngu', nu lo'o nxu̱u̱ tya'a ngu' lo'o ñati̱ xa' chalyuu nu tsa tlyu ti ñaa cha' tyiji̱loo ji'i̱ ngu'.

³⁵ Lo'o jua'a̱ nu ngu' cuna'a̱ ni, xa' ndyalaa nu qui'yu ji'i̱ ngu' ña'a̱ lu'ú ti ngu', xqui'ya cha' jlya ti' ngu' cha' caca ji'i̱ ycui' Ndyosi cua'ni lyaá Ni ji'i̱ ngu', masi cua ngujuii ngu' tsaca quiya'. Ti'í tsa ngujui'i̱ ngu' cuxi ji'i̱ xa' la tya'a ngu' bi'. Si cua nguta'a̱chu̱' ngu' bi' ji'i̱ ycui' Ndyosi, cua ngulaá ngu' ji'i̱ ngu' cuxi bi' li', cha' nga'aa ngujui'i̱ ngu' cuxi ji'i̱ ngu' bi'; pana ná ntaja'a̱ ngu' bi' tya'a̱chu̱' ngu' ji'i̱ Ni, cha' tyu'u laja ti ngu' jua'a̱. Ndu̱ ti' ngu' bi' ni jacua' ca̱a̱ Ni ca̱qui'ya Ni ji'i̱ ngu', cha' ta chaca chalyuu tso'o la ji'i̱ ngu'.

³⁶ Xa' la tya'a ngu' bi' ni, ti'í tsa nchcui' ngu' ji'i̱ ngu' bi' laja lo'o ngujui'i̱ ngu' cuxi ji'i̱ ngu' bi', masi ngusca̱' ngu' cuxi ji'i̱ ngu' bi' lo'o carena, masi ngusu'ba ngu' ji'i̱ ngu' bi' ne' chcua̱.

³⁷ Ntsu'u ngu' bi' nu ngujuii li', cha' ti'í tsa ngujui'i̱ quee hichu̱' ngu' lo'o ngu̱ ngu' quee ji'i̱ ngu' bi', hasta ngusa'be ngu' ji'i̱ xa' la ngu' bi' lo'o chcua̱; jua'a̱ xa' la ngu' bi' ngujuii xqui'ya maxtyi ji'i̱ ngu' cuxi. Lo'o jua'a̱ ntsu'u ngu' bi' nu ná ngujui late' ji'i̱, bi' cha' lacu' ngu' quiji̱ xlya' ti li', masi quiji̱ chivo; ntsu'u ngu' ti'i, ntsu'u ngu' quicha, cha' lya' tsa ti' ngu' cuxi ji'i̱ ngu' bi', cha' ti'í ti' ngu' cuxi ña'a̱ ngu' ji'i̱ ngu' bi'.

³⁸ Cuxi tsa chalyuu re lo'o ngua jua'a̱. Ná jlo ti' ñati̱ chalyuu cha' tso'o la nu ngu' bi' que ycui' ngu', masi xcui' nguta'a̱ yu'u ti ngu' bi', masi ndyu'u cuatsi' ngu' ca ne' quixi̱', ca nde sii' ca'ya, xqui'ya cha' lya' tsa ti' ñati̱ chalyuu ji'i̱ ngu'; nguti'i̱ ngu' bi' tyuquee, lo'o jua'a̱ hasta ngulu ngu' tyuu su nguti'i̱ ngu'.

³⁹ Lo'o nu juani tya ndyi'u ti' na ji'i̱ ngu' bi', ñati̱ nu jua'a̱ jlya tsa ti' ji'i̱ ycui' Ndyosi nu ngua sa'ni; pana ná na'a̱ ngu' bi' lcaa cha' nu cua nacui̱ Ni cha' caca nde loo la,

⁴⁰ xqui'ya cha' tso'o la cha' nu ngua'ya hique ycui' Ni ñi'ya̱ cua'ni Ni lo'o lcaa tya'a na juani, cha' lo'o cuentya ji'na ngulacua ti' Ni. Ngua ti' Ni cha' caca na ñati̱ nu tyucui tyiquee na stu'ba ti lo'o ngu' bi', lcaa na lo'o jyo'o cusu' bi' caca na ñi'ya̱ nu ngua ti' Ni cha' caca na li'.