HEBREOS 1 - Chatino Tataltepec

Xqui'ya Cristo, bi' cha' cua nchcui' ycui' Ndyosi lo'o ñati̱ chalyuu

¹ Nu ngua tya sa'ni la, tyu̱u̱ tsa quiya' cua nchcui' ycui' Ndyosi lo'o jyo'o cusu' ji'na, quiña'a̱ xi cha' nda Ni lo'o jyo'o bi'; cua nda ycui' Ndyosi cha' lo'o jyo'o bi', cha' chcui' ngu' lo'o lcaa tya'a quichi̱ tyi ngu'.

² Pana nu juani lo'o cua tye ti chalyuu, cua nchcui' Ni lo'o na, xqui'ya cha' cua ñaa Jesús nde chalyuu ca su ndi'i̱ na, la cui' Jesús nu laca sca ti Sñi' ycui' Ni. Cua nguti'i̱ nu Jesús bi' lo'o ycui' Ndyosi Sti yu nu lo'o ngüiñá Ni chalyuu tya clyo; tya lo'o ngüiñá Ni lcaa lo na nu ntsu'u nde cua̱ lo'o lcaa lo na nu ntsu'u lo yuu chalyuu, cua laca ndu̱ Jesús lo'o ycui' Ndyosi Sti Jesús li'. Lo'o jua'a̱ cua nda Ni chacuayá' ji'i̱ cha' caca ycui' Jesús loo ji'i̱ lcaa na bi'.

³ Lcaa xee lubii nu ntsu'u ca slo ycui' Ndyosi, cua ndyanu xee bi' lo Jesús Sñi' Ni lo'o ñaa Jesús nguti'i̱ yu chalyuu. Ñi'ya̱ nu laca ycui' Ndyosi, la cui' jua'a̱ laca nu Jesús bi'; liñi tsa nclyo Jesús cña ji'i̱ lcaa na nu ntsu'u chalyuu tsiya' ti, bi' cha' laca ndi'i̱ tso'o ti lcaa na bi'. Nu lo'o ndye ngua'ni Jesús cña nu ntsu'u ji'i̱ yu nde chalyuu, cha' ngüityi̱ yu yabe' nu ntsu'u ji'i̱ ñati̱, li' nguxtyu̱u̱ yu ndyaa yu ca slo ycui' Ndyosi Sti yu, ndyaa tucua yu nde la'a tsu' cui̱ su tlyu ca su ntucua ycui' Ni.

Ná caca stu'ba cha' ji'i̱ xca̱ ji'i̱ ycui' Ni lo'o Jesús

⁴ Tlyu la chacuayá' ntsu'u ji'i̱ Jesús nu sca ti Sñi' ycui' Ndyosi que xca̱ ji'i̱ ycui' Ni nu ntsu'u nde cua̱, xqui'ya cña nu cua ngua'ni yu cuentya ji'i̱ Sti yu; quiña'a̱ tsa chacuayá' nguxtyanu Ni ji'i̱ Jesús, xqui'ya cha' stu'ba cha' ji'i̱ yu lo'o ycui' Ndyosi Sti yu.

⁵ Nde laca sca cha' nu cua nchcui' ycui' Ndyosi cuentya ji'i̱ Jesús nu laca Sñi' ycui' ca Ni: Sñi' na' laca nu'u̱; cua nda na' chalyuu jinu'u̱ cha' laca nu'u̱ Sñi' na'. Lo'o jua'a̱ cua nchcui' ycui' Ndyosi chaca cha' cuentya ji'i̱ Jesús: Na' caca̱ Sti yu; caca yu Sñi' na' lacua. Si'i cha' ji'i̱ sca xca̱ nu ntsu'u nde cua̱ nchcui' Ni cha' bi', cuentya ji'i̱ Jesús nda Ni cha' bi'.

⁶ Tya clyo lo'o cua ta ti ycui' Ndyosi ji'i̱ Sñi' ycui' ca Ni cha' ca̱a̱ yu chalyuu, li' nacui̱ Ni: Lcaa xca̱ nu ntsu'u cuentya jna' nde cua̱, nga'a̱ cha' cua'ni tlyu ngu' xca̱ bi' ji'i̱ Sñi' na'.

⁷ Jua'a̱ nchcui' ycui' Ndyosi ji'i̱ Sñi' Ni; pana nu laca xca̱ ji'i̱ ycui' Ndyosi bi' ni, ndi'ya̱ nchcui' Ni cuentya ji'i̱ xca̱ bi': Laca bi' ñi'ya̱ laca cui'i̱ ti, masi cui'i̱ nu tso'o tsa ndu'ni. Ñi'ya̱ ndyatu̱ sca quii' tlyu, cha' tyijyu' tsa ntyiji'i̱ xee, jua'a̱ laca xca̱ bi' ji'i̱ ycui' Ndyosi lo'o ndu'ni bi' cña.

⁸ Xa' ña'a̱ nchcui' ycui' Ndyosi cuentya ji'i̱ Jesús nu laca Sñi' ycui' ca: Ná nga'a̱ cha' tye cha' caca nu'u̱ loo, cha' ycui' Ndyosi laca nu'u̱, nacui̱ Ni, liñi ti ndu'ni nu'u̱ lo'o ñati̱ ca su laca nu'u̱ loo.

⁹ Ndiya tsa ti' nu'u̱ lcaa cha' liñi nu ndu'ni ñati̱; ñasi̱' tsa nu'u̱ lo'o ndyu'ni ñati̱ cha' cuxi lo'o ycui' Ndyosi Sti nu'u̱. Bi' cha' ngusubi na' jinu'u̱ cha' tya'a̱ nu'u̱ lo cña jna', nacui̱ ycui' Ndyosi. Jua'a̱ tso'o tsa nti' nu'u̱ juani, cha' tlyu la chacuayá' cua nda na' jinu'u̱ que ji'i̱ xa' la ñati̱, nacui̱ ycui' Ndyosi.

¹⁰ Tya chaca cha' cua nchcui' ycui' Ndyosi lo'o Jesús nu laca Sñi' ycui' ca Ni: Nu'u̱ laca Xu'na tyucui ña'a̱ chalyuu, nacui̱ ycui' Ndyosi. Tya clyo ngüiñá nu'u̱ lcaa na nu ntsu'u chalyuu, lo'o jua'a̱ ngüiñá nu'u̱ lcaa na nu ntsu'u nde cua̱.

¹¹ Tiya' la li' culiji lcaa cha' bi' jua'a̱ ti; pana ná sca caca jinu'u̱ tsiya' ti, masi casu̱ chalyuu, masi casu̱ lcaa na nu ntsu'u nde cua̱ ñi'ya̱ laca lo'o ndyasu̱ sca ste' na.

¹² Xco'o nu'u̱ cha' bi', ñi'ya̱ laca lo'o nchco'o na sca late' nu nga'aa cua'nijo'o ji'na; nchcutsa'a̱ na ji'i̱ cha' caja xa' nu cucui. Pana ña'a̱ ti tya ndi'i̱ ycui' nu'u̱; ná ntsu'u cha' casu' nu'u̱ tsiya' ti, nacui̱ ycui' Ndyosi ji'i̱ Jesús Sñi' ycui' ca Ni.

¹³ Nde ntsu'u chaca cha' nu nscua lo quityi cusu' cuentya ji'i̱ Jesús: Cua̱a̱ clya nu'u̱ ca nde, tyucua nu'u̱ ca su ntucua na' re; ña'a̱ cuayá' tyiji̱loo na' ji'i̱ lcaa tya'a cusu̱u̱ nu'u̱ tyucua nu'u̱, cha' caca nu'u̱ loo ji'i̱ ngu' bi' tsiya' ti. Ni sca quiya' bilya chcui' ycui' Ndyosi jua'a̱ cuentya ji'i̱ xca̱ ji'i̱ Ni nde cua̱, sca ti lo'o Jesús cua nchcui' Ni jua'a̱.

¹⁴ Lcaa nu laca xca̱ ji'i̱ ycui' Ndyosi nde cua̱ ni, lcaa tsa̱ ndu'ni bi' cña nu nclyo ycui' Ndyosi ji'i̱; cui'i̱ nu tso'o tsa laca nu ngu' xca̱ bi'. Nda Ni ji'i̱ ngu' xca̱ bi' ca̱a̱ nde chalyuu, cha' xtyucua ngu' ji'i̱ ca ta'a ñati̱ nu cua clyaá ti ji'i̱ nu cuxi xqui'ya Jesús, cha' cua ngulala ti tye chalyuu.