GÁLATAS 6 - Chatino Tataltepec

Xtyucua na ji'i̱ ñati̱ tya'a ntsu'u cha' ji'na lo'o Cristo

¹ Cu'ma̱ ngu' tya'a na, ndi'ya̱ nga'a̱ cha' cua'ni ma̱ lo'o ña'a̱ ma̱ cha' ngua cuxi cresiya ji'i̱ sca ngu' tya'a ngusñi ma̱ cha' ji'i̱ ycui' Ndyosi, xqui'ya cha' ngua'ni yu sca cha' cuxi: nga'a̱ cha' xtyucua ma̱ xi ji'i̱ yu bi', cha' cati̱ qui'ya nu ntsu'u ji'i̱ yu, cha' tucuá yu cña ji'i̱ Cristo chaca quiya', cha' tya'a ntsu'u cha' ji'i̱ ma̱ lo'o Xtyi'i ycui' Ndyosi laca yu. Tsa tso'o ti chcui' ma̱ lo'o yu bi'. Lo'o jua'a̱ tii ti ti' ma̱ tyi'i̱ ycui' ca ma̱ cha' ná cua'ni ma̱ la cui' cha' cuxi ñi'ya̱ nu ngua'ni yu bi'.

² Cua'ni ma̱ cha' stu'ba ti caca tyiquee ma̱ lo'o tya'a ma̱, cha' caca xtyucua ma̱ ji'i̱ ngu' lo'o sca cha' nu ntsu'u ji'i̱ ngu', cha' ná cua'ni ngu' sca cha' cuxi. Jua'a̱ taca taquiya' tso'o na lcaa cña nu nda Cristo cha' cua'ni na.

³ Na ñilo'o ti na ji'i̱ ycui' ca na si culacua ti' na cha' tso'o tsa laca na cuentya ji'i̱ ycui' Ndyosi; tso'o la si ta na cuentya cha' ná sca na laca na cuentya ji'i̱ ycui' Ni.

⁴ Ntsu'u cha' cui'ya na cuentya ñi'ya̱ nu ndi'i̱ scaa na chalyuu. Si chañi cha' tso'o tsa ndu'ni na, cha' ji'i̱ ycui' na laca cha' bi'; ná ntsu'u cha' cua'ni tyucuaa ti' na lo'o xa' la ñati̱.

⁵ Nga'a̱ cha' talo na ji'i̱ cña ji'na, lcaa cha' nu ndyacua ji'na chalyuu.

⁶ Lcaa tya'a na nu ndyaca tsa'a̱ na cha' tso'o nu cua nda Cristo bi', ntsu'u cha' ta na xi cha' tso'o nu ntsu'u ji'na cha' caja cua ña'a̱ ca na nu tyiji̱ yu'u ji'i̱ mstru nu ngulu'u cha' tso'o bi' ji'na.

⁷ Ná culacua ti' ma̱ cha' caca cñilo'o na ji'i̱ ycui' Ndyosi. Ná tucui caca ji'i̱ cua'ni jua'a̱, cha' ñi'ya̱ nu ndyu'ni sa scaa na chalyuu, jua'a̱ tyacua cha' ji'na tiya' la nde slo ycui' Ndyosi. Ñi'ya̱ nti' lo'o cataa na sca si'yu ni, cha' la cui' si'yu nu ndyataa na, nde loo la la cui' bi' tyu'u lo na nu ndyataa na, si'i xa' lo si'yu;

⁸ jua'a̱ laca ñati̱ na lo'o ndi'i̱ na chalyuu, cha' lo'o cua'ni na cua ña'a̱ ca cha' cuxi nu ndiya ti' na cha' cua'ni na, ná sca cha' tso'o tyacua ji'na nu lo'o cua ndye chalyuu. Tsa lo cua ti cha', ntsu'u cha' cajaa na, lo'o jua'a̱ ti culiji yu'u ti lcaa cha' tso'o nu ntsu'u ji'na. Pana si cua'ni na lcaa ña'a̱ cña nu nti' Xtyi'i ycui' Ndyosi cha' cua'ni na, tso'o tsa tyu'u cha' ji'na li'; caja chalyuu nu ná nga'a̱ cha' tye ji'na. Talo ycui' ca na li', ná tye cña ji'na jua'a̱ ti.

⁹ Bi' cha' ná tso'o si ca taja ti' na cha' cua'ni na cha' tso'o laja lo'o ndi'i̱ na chalyuu. Lo'o tyalaa hora bi', li' tyu'u tucua cha' tso'o nu nacui̱ Ni cha' tyacua ji'na nde loo la, la cui' cha' nu tyiquee' tsa ngujuatya na ji'i̱; pana ntsu'u cha' talo na, cha' ná ca taja ti' na ndu'ni na cña tso'o.

¹⁰ Bi' cha' tso'o si lcaa quiya' lo'o ña'a̱ na ñi'ya̱ caca xtyucua na ji'i̱ cua ña'a̱ ca ñati̱, li' cua'ni clya na cha' xtyucua na ji'i̱ ngu' bi'. Clyo ndu'ni cha' xtyucua na ji'i̱ tya'a na, nu ngu' nu ntsu'u cha' ji'i̱ lo'o Cristo.

Cha' nu nscua Pablo su cua tye ti quityi

¹¹ Lo'o juani scua ycui' ca ti na' tucua sna tya si'yu cha' lo quityi re. Tyaca̱' cha' tonu letra nscua na'.

¹² Nu ñati̱ nu ndatsaa tsa ji'i̱ ma̱ cha' si'yu quiji̱ ma̱ ñi'ya̱ nu ndu'ni ngu' judío cha' culacua̱ ngu' ni, ndu'ni ngu' jua'a̱ cha' nti' ngu' cha' caca stu'ba cha' ji'i̱ ycui' ngu' lo'o tya'a ngu' judío; li' ná cua'ni lya' ti' tya'a ngu' judío ji'i̱ ngu' bi' si ngusñi ngu' cha' ji'i̱ Jesucristo nu ngujuii lo crusi, nti' ngu'.

¹³ Lo'o ycui' ngu' nu cua ngulacua̱ ngu' jua'a̱ ni, ná ndaquiya' ngu' ji'i̱ lcaa ca cña nu nscua lo cha' cusu' cha' cua'ni na bi'. Tsa bi' ti cha' nti' ngu', cha' caja ñi'ya̱ nu chcui' ngu' cha' tyixi lo'o tya'a ngu': Cua ngulacua̱ ngu' jua xqui'ya ycui' ya, ñacui̱ ngu' ji'i̱ tya'a ngu' li'.

¹⁴ Pana nu na' ni, sca ti cha' tso'o ntsu'u chalyuu nti' na', cha' nu ngujuii ycui' Jesucristo nu Xu'na na lo crusi cuentya ji'na; bi' cha' nga'aa nti' na' ta na' xa' la cha' lo'o ñati̱. Lo'o jua'a̱ xqui'ya cha' ngujuii ycui' Cristo, nga'aa caca tatsaa nu cuxi nu ntsu'u chalyuu jna', cha' nga'aa ntsu'u cha' jna' lo'o cha' cuxi nu ntsu'u chalyuu juani.

¹⁵ Nu lo'o stu'ba ntsu'u cha' ji'na lo'o Jesucristo, ná ndu'ni cha' masi ngulacua̱ na, masi ná ngulacua̱ na, sca ti cuayá' laca na. Sca ti cha' nu ndulo la ji'na juani, cha' xcutsa'a̱ Ni tsiya' ti lcaa cha' nu ndu'ni na lo'o ndi'i̱ na chalyuu, cha' xcui' cha' tso'o cua'ni na li'.

¹⁶ Lcaa ñati̱ nu ndu'ni jua'a̱ xqui'ya Jesús laja lo'o ndi'i̱ ngu' chalyuu, taca tyi'i̱ tyiquee ngu' ti̱ ti li', lo'o jua'a̱ cua'ni tya'na ti' ycui' Ndyosi ji'i̱ ngu' bi' li'; jua'a̱ cua'ni Ni lo'o lcaa na nu chañi cha' laca na ñati̱ ji'i̱ Ni.

¹⁷ Tya tsubi' la, tlyu tsa cña nda ma̱ 'na, cha' ná ndaquiya' ma̱ ji'i̱ cha' nu nchcui' na' lo'o ma̱; bi' cha' juani nga'aa cua'ni ma̱ cha' cusu̱u̱ lo'o na' chaca quiya'. Cua ntsu'u cuayá' nu nscua lo cuaña' na', bi' laca cuayá' su nguxcube' ngu' 'na xqui'ya cha' ndyu'ni na' cña ji'i̱ Jesús.

¹⁸ Cu'ma̱ tya'a ngusñi na cha' ji'i̱ ycui' Ndyosi, lcaa hora tyi'u ti' ma̱ ji'i̱ ycui' Jesucristo nu Xu'na na, cha' xcui' tso'o ti ndu'ni Ni lo'o ma̱. Lo'o jua'a̱ chañi tsa cha' caca cha' bi'.