GÁLATAS 4 - Chatino Tataltepec

¹ Ndi'ya̱ cha' nti' na' ta na' lo'o ma̱: Sca nu sube ni, masi nguxtyanu jyo'o sti lcaa cha' tso'o ji'i̱ lo'o ngujuii sti, cha' tya cuañi' nu sube bi', stu'ba nti' lo'o msu nu ngüi'ya ti sti; na ji'i̱ nu sube bi' laca lcaa cha' tso'o bi', pana tya lyiji casu' yu.

² Ni jacua' tyalaa tsa̱ nu caja cha' nu nguxtyanu jyo'o sti nu sube bi' ji'i̱, xa' ñati̱ laca loo ji'i̱ nu sube bi', xa' ñati̱ laca nu ndyi'ya loo cña ji'i̱ nu sube bi'.

³ La cui' jua'a̱ laca ji'na lo'o Jesús. Lo'o tya lyiji cuna na cha' ji'i̱ Jesús, caca ñacui̱ na cha' tya sube na, xqui'ya cha' tya ndu'ni na cña nu ndatsaa cua ña'a̱ ca jo'ó ji'na, ñi'ya̱ nu ndu'ni ti xa' ñati̱.

⁴ Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.

⁵ Jua'a̱ ñaa Jesús nde chalyuu cha' cua'ni lyaá yu ji'na ji'i̱ yabe' nu ntsu'u ji'na xqui'ya cha' cusu' bi'. Lo'o jua'a̱ ta Ni chacuayá' juani cha' cua cusu' la na, cha' tyanu cha' ji'na ñi'ya̱ nu nscua cha' tyacua ji'na, xqui'ya cha' laca na sñi' ycui' Ni.

⁶ Bi' cha' laca cua nda ycui' Ndyosi Xtyi'i ycui' Ni nu tyanu ne' cresiya ji'i̱ ma̱, cha' culu'u Ni ji'i̱ ma̱ cha' cua laca ma̱ sñi' ycui' Ni. Xtyi'i ycui' Ni ndu'ni cha' taca chcui' na lo'o ycui' Ndyosi chañi ca: “¡Papá! ¡Sti na'!” ñacui̱ na.

⁷ Nga'aa laca ma̱ ñi'ya̱ laca sca msu nu ngüi'ya ti ñati̱, na cua laca ma̱ sñi' ycui' Ndyosi; bi' cha' juani ta Ni lcaa cha' nu ndyanu cha' tyacua ji'i̱ ma̱ chacuayá' ji'i̱ Cristo, cha' laca ma̱ sñi' ycui' Ni.

Ndube tsa ti' Pablo ñi'ya̱ nu nguñilo'o ngu' ji'i̱ ngu' gálatas

⁸ Sa'ni la lo'o tya lyiji caca cuayá' tso'o ti' ma̱ cha' ji'i̱ ycui' Ndyosi, xa' la jo'ó ndatsaa ji'i̱ ma̱ cha' cua'ni ma̱ cña ji'i̱, jo'ó nu si'i jo'ó nu chañi ca.

⁹ Lo'o juani cua nslo ma̱ ji'i̱ ycui' Ndyosi; hasta tso'o la ñacui̱ na, cua ndyuloo ycui' Ni ji'i̱ ma̱. ¿Ni cha' laca nti' ma̱ tya'a̱chu̱' ma̱ ji'i̱ cha' ji'i̱ ycui' Ndyosi lacua? Xa' cua'ni ma̱ cña nu ndatsaa cua ña'a̱ ca jo'ó nu cuxi ti bi' ji'i̱ ma̱ li', jo'ó nu ntsu'u ji'i̱ ñati̱ ti; pana ná ndyu'u tso'o cha' bi' tsiya' ti, ná caca cua'ni lyaá jo'ó bi' ji'na.

¹⁰ Lo'o juani caca tso'o cresiya ji'i̱ ma̱ cuentya ji'i̱ ycui' Ndyosi si taquiya' ma̱ ji'i̱ tsa̱ tacati ji'i̱ ngu' judío, nti' ma̱, masi ta'a nu ndacui snu' tsa̱, masi ta'a lo'o cuañi' co', masi ta'a nu ndu'ni ngu' ndacui sca yija̱;

¹¹ bi' cha' quiña'a̱ tsa cha' nclyacua ti' na' si ná ngua'nijo'o tsiya' ti lcaa cha' nu ngulu'u na' ji'i̱ ma̱, si xlya'be ti ngulu'u na' cha' bi' ji'i̱ ma̱.

¹² Cu'ma̱ tya'a ntsu'u cha' ji'na lo'o Jesucristo, tya'na chcui' na' lo'o ma̱ juani, cha' cua nti' na' cha' caca ma̱ ñi'ya̱ nu laca na' tsiya' ti. Nga'aa nchca tatsaa ngu' 'na juani lo'o cha' cusu' bi', masi ngu' judío laca na'; stu'ba ti laca na' lo'o cu'ma̱ juani, cha' cua ngulaá na' ji'i̱ nu cha' cusu' nu ndatsaa tsa 'na. Tya lo'o ñaa na' ca slo ma̱ tya clyo, ná sca cha' cuxi ngua'ni ma̱ lo'o na'.

¹³ Cua jlo ti' ma̱ ñi'ya̱ ngua 'na nu lo'o nda na' cha' lo'o ma̱ tya clyo, cha' taca cua'ni lyaá Cristo ji'na; quicha tsa na' nu ngua li', bi' cha' ngua laja 'na cha' ta na' cha' bi' lo'o ma̱.

¹⁴ Lo'o jua'a̱ ná nchcui' cuxi ma̱ 'na li', ná ngulo'o ma̱ 'na, masi tya xi tya ndalo ma̱ 'na cha' quicha tsa na'; xa' ña'a̱ ngua'ni ma̱ lo'o na' li', ntucuá ma̱ cha' jna' ñi'ya̱ si cua laca na' sca xca̱ ji'i̱ ycui' Ndyosi, ñi'ya̱ si cua laca na' ycui' Jesucristo.

¹⁵ Tso'o tsa ntsu'u tyiquee ma̱ ña'a̱ ma̱ 'na nu ngua tyempo bi'; hasta culo ma̱ la cui' ca si'yu cloo ma̱ cha' ta ma̱ 'na ngua ti' ma̱ nquicha', cha' cua nti' tsa ma̱ xtyucua ma̱ jna'. Lo'o juani ni, ¿na laca ngua ji'i̱ ma̱ juani?

¹⁶ ¿Ha nti' ma̱ cha' tya'a cusu̱u̱ ma̱ laca na' xqui'ya cha' liñi nu nda na' lo'o ma̱?

¹⁷ Chañi cha' nti' tsa nu ngu' cuiñi bi', cha' taquiya' ma̱ ji'i̱ cha' nu nchcui' ngu' bi' lo'o ma̱. Pana si'i cha' tso'o tyiquee ngu' ndyu'ni ngu' jua'a̱; na cua nti' ngu' bi', cha' nga'aa taquiya' ma̱ ji'i̱ cha' nu nchcui' ya lo'o ma̱, cha' taquiya' la ma̱ ji'i̱ ycui' ca ngu' bi'.

¹⁸ Tso'o tsa si lo'o xa' la ñati̱ culu'u ngu' la xi cha' liñi ji'i̱ ma̱, si ntsu'u cha' tso'o tyiquee ngu' ña'a̱ ngu' ji'i̱ ma̱. Tso'o si jua'a̱ caca tyucui tyempo, masi ndi'i̱ na' lo'o ma̱, masi ná ndi'i̱ na'.

¹⁹ Chaca quiya' ti'í tsa ntsu'u tyiquee na' ña'a̱ na' ji'i̱ ma̱, cha' ñi'ya̱ laca sñi' na', jua'a̱ laca ma̱; ña'a̱ na' ji'i̱ ma̱ ñi'ya̱ si laca na' sca nu cuna'a̱ nu ti'í tsa nchcube' ji'i̱ cha' cua cala ti sñi'. Talo cha' ti'í bi' 'na ña'a̱ cuayá' nu tyu'u xcui' cha' ji'i̱ Cristo tyiquee ma̱.

²⁰ Pana ná jlo ti' na' tsiya' ti ñi'ya̱ scua na' quityi re nu tsaa slo ma̱ juani; tso'o la si caja ñi'ya̱ nu tsa'a na' slo ma̱ cha' chcui' na' xi lo'o ma̱, cha' ná tyiquee' xa' ña'a̱ cha' chcui' na li'.

Ñi'ya̱ ngua cha' ji'i̱ Agar lo'o ji'i̱ Sara

²¹ Cu'ma̱, cua nti' ma̱ taquiya' ma̱ ji'i̱ cha' cusu' bi' ti. Tso'o lacua. ¿Ha bilya cuna ma̱ cha' re, nu nchcui' cha' ji'i̱ Abraham?

²² Nacui̱ quityi cha' ngula tucua tya'a sñi' jyo'o Abraham bi': nu clyo ngua sñi' nu cuna'a̱ cua', sca nu cuna'a̱ nu cua ngüi'ya yu cha' cua'ni cña ji'i̱ yu; nu chaca bi' ngua sñi' ycui' clyo'o yu, sca nu cuna'a̱ nu ndi'i̱ tso'o ti.

²³ Sñi' nu cuna'a̱ cua' bi' ni, ngula bi' jua'a̱ ti, ñi'ya̱ nu nclya lcaa nu sube chalyuu; pana sñi' ycui' clyo'o yu ni, ngula bi' xqui'ya sca cha' nu cua nda ycui' Ndyosi lo'o sti, xtya'a̱ sa'ni la, nu lo'o nacui̱ Ni cha' cala sñi' ngu'.

²⁴ Sca cui̱i̱ nu nda na' lo'o ma̱ laca cha' bi': tucua tya'a ngu' cuna'a̱ ngua bi', nu jua'a̱ nti' ñacui̱ cha' ntsu'u tucua lo cha' nu nda ycui' Ndyosi lo'o ñati̱ chalyuu. Lo xlya ca'ya Sinaí nu nscua nde Arabia, ca bi' nguxana tsaca cha'; stu'ba nti' cha' bi' lo'o Agar, nu cuna'a̱ nu ngüi'ya ti jyo'o Abraham. Ñati̱ nu jlya tsa ti' ji'i̱ cha' bi', laca ngu' ñi'ya̱ laca sca msu nu ngüi'ya ti ñati̱.

²⁵ Stu'ba ña'a̱ naa Agar bi' lo'o ca'ya Sinaí bi', cha' jua'a̱ ndyu'u cha' bi' cha'cña ji'i̱ ngu' Arabia; la cui' ca'ya bi' laca su nda ycui' Ndyosi cha' lo'o ngu' judío tya clyo. Hasta juani tlyu tsa cña nga'a̱ cha' cua'ni lcaa ngu' judío cuentya ji'i̱ cha' cusu' bi', tsa lo cña ñi'ya̱ nu ngua'ni jyo'o Agar cuentya ji'i̱ jyo'o Abraham nu ngua sa'ni la. Lo'o nu ngu' judío nu ndi'i̱ quichi̱ Jerusalén ni, cua nti' ngu' bi' tatsaa ngu' ji'na juani cha' taquiya' na ji'i̱ lcaa cña bi'.

²⁶ Pana cua ngujui chaca cha' ji'na, xqui'ya chaca nu cuna'a̱ bi' nu ngua clyo'o Abraham, nu cuna'a̱ nu ndi'i̱ tso'o ti bi'. Chaca lo Jerusalén cucui laca loo ji'na, bi' laca ñi'ya̱ si laca quichi̱ tyi lcaa na nu jlya ti' na ji'i̱ Jesucristo; taca tyi'i̱ tso'o ti na ca bi'.

²⁷ Ntsu'u sca cha' nu nscua lo quityi cusu' nu nchcui' ndi'ya̱: Cua'ni chaa ti' nu'u̱, ma' cusu' nu ná ndyiji sñi', masi ná tucui ntsu'u jinu'u̱. Chaa ti' xi'ya nu'u̱, ma' cusu', masi bilya jlo ti' nu'u̱ ñi'ya̱ ndyaa cha' nclya nu sube. Ntsu'u quiña'a̱ la sñi' nu cuna'a̱ nu ná ngujui sñi' tya clyo; ndi'i̱ xti la sñi' nu cuna'a̱ nu ntsu'u qui'yu ji'i̱. Jua'a̱ nscua lo quityi ji'i̱ ycui' Ndyosi.

²⁸ Isaac sñi' ycui' clyo'o Abraham ngula xqui'ya sca cha' nu cua nda ycui' Ndyosi lo'o ngu' cusu' ji'i̱, cha' caca jua'a̱. Lo'o cu'ma̱, tya'a ngusñi na cha' ji'i̱ Jesús ni, lo'o cu'ma̱ lo'o na' laca na sñi' ycui' Ndyosi juani, xqui'ya sca cha' nu cua nda Ni lo'o na.

²⁹ Nu lo'o nguti'i̱ jyo'o Abraham bi' chalyuu, nu sñi' nu ngula jua'a̱ ti ni, bi' laca nu ngua'ni lya' ti' ji'i̱ Isaac, sñi' ycui' clyo'o yu, masi ngula nu Isaac bi' xqui'ya sca cha' nu nda Xtyi'i ycui' Ndyosi lo'o ngu'. La cui' jua'a̱ laca juani, cha' nxu̱u̱ tya'a ngu' bi' lo'o na, cha' si'i sñi' ycui' Ndyosi laca ngu' bi'.

³⁰ Lo'o jua'a̱ ntsu'u chaca cha' nu nchcui' quityi cusu' bi', cha' ndi'ya̱ nacui̱ clyo'o Abraham bi': “Culo'o ji'i̱ nu cuna'a̱ nu ngüi'ya ti nu'u̱ cha' tyaa cho', tyaalo'o ji'i̱ sñi' bi'. Ná taca tyanu cha' tso'o nu ntsu'u jinu'u̱ lo'o tyucuaa sñi' nu'u̱. Ná nchca ca stu'ba cha' ji'i̱ sñi' nu cuna'a̱ cua' bi' lo'o sñi' na', cha' sca nu cuna'a̱ nu ndi'i̱ tso'o ti laca na'”, nacui̱ clyo'o Abraham bi'.

³¹ Lo'o lcaa na tya'a ngusñi na cha' ji'i̱ Cristo ni, si'i sñi' nu cuna'a̱ nu ndi'i̱ ndyu'ni cña msu ti laca na; na ndi'i̱ tso'o ti na ñi'ya̱ nguti'i̱ Isaac, sñi' nu cuna'a̱ nu ndi'i̱ tso'o ti bi'.