GÁLATAS 3 - Chatino Tataltepec

Sca ti lo'o xñi na cha' ji'i̱ Cristo, li' caca quiñi tso'o cha' ji'na lo'o ycui' Ndyosi

¹ Na tonto tsa ma̱, cu'ma̱ ngu' gálatas, cha' nduna ma̱ cha' nu nda nu ngu' cuiñi bi'; laca ma̱ ñi'ya̱ si ntsu'u nu ngua'ni cucha'a̱ ji'i̱ ma̱. Bi' cha' juani nga'aa nti' ma̱ xñi la ma̱ cha' liñi nu cua nda Cristo lo'o na. Pana lo'o nda ya cha' ji'i̱ Cristo lo'o ma̱ tya clyo, li' ngulu'u tsa ya ji'i̱ ma̱ ñi'ya̱ ngua lo'o ngujuii Jesucristo lo crusi xqui'ya na; jua'a̱ ngulu'u ya ji'i̱ ma̱ ña'a̱ cuayá' nu ngua cuayá' tso'o ti' ma̱ cha' bi'.

² Xacui̱ ma̱ cha' 'na lacua: ¿Ha cua ndyanu Xtyi'i ycui' Ndyosi ne' cresiya ji'i̱ ma̱ juani? ¿Ñi'ya̱ ngua ji'i̱ ma̱ cha' ngujui Xtyi'i ycui' Ndyosi ji'i̱ ma̱ lacua? ¿Ha ngujui Xtyi'i Ni ji'i̱ ma̱ xqui'ya cha' cua ngua'ni ma̱ cña nu nscua lo cha' cusu' bi' cha' cua'ni ma̱? Si'i. Cua jlo ti' ma̱ cha' ngujui Xtyi'i ycui' Ni ji'i̱ ma̱ lo'o ngusñi ma̱ cha' liñi nu cua nda ya lo'o ma̱, cha' ji'i̱ ycui' Cristo.

³ ¿Ni cha' laca tonto tsa nclyacua ti' ma̱ juani? Xqui'ya cña nu ndyu'ni Xtyi'i ycui' Ndyosi lo'o ma̱, bi' cha' nguxana ca ti ma̱ cha' ntsu'u cha' ji'i̱ ma̱ lo'o ycui' Ndyosi nquicha'; pana nu juani ni, xqui'ya cha' lye tsa cua'ni cña ti' ycui' ca ma̱, jua'a̱ nti' ma̱ cha' caca ji'i̱ ycui' ca ma̱ quiñi tso'o cha' ji'i̱ ma̱ lo'o ycui' Ni.

⁴ Masi ngua'ni Ni quiña'a̱ cha' tlyu ca slo ma̱ tya tsubi' la, ntsu'u quiya' nclyacua ti' na' cha' ná ngua tso'o cresiya ji'i̱ ma̱ tsiya' ti, nu lo'o ña'a̱ na' ñi'ya̱ nu ndyu'ni ma̱. Pana jlo ti' na' cha' ngua tso'o la xi cresiya ji'i̱ ma̱ xqui'ya cha' tlyu bi'.

⁵ Na cua nda ycui' Ndyosi Xtyi'i ycui' Ni cha' tyanu ne' cresiya ji'i̱ ma̱, lo'o xqui'ya nu bi' cua ngujui ñi'ya̱ caca tyu̱u̱ lo cha' tlyu nu ndyu'ni ycui' Ndyosi nde su ndi'i̱ cu'ma̱. Lo'o ndu'ni Ni jua'a̱, si'i xqui'ya cha' ndaquiya' ma̱ ji'i̱ cha' cusu' bi'; pana ndu'ni Ni jua'a̱, xqui'ya cha' jlya ti' ma̱ lo'o ndyuna ma̱ cha' tso'o ji'i̱ cña nu cua ngua'ni Jesús cuentya ji'na.

⁶ Nu jyo'o cusu' ji'i̱ ya, nu Abraham bi' ni, cua jlya tsa ti' nu cusu' bi' lcaa cha' nu cua nda ycui' Ndyosi lo'o yu. Xqui'ya cha' cua jlya ti' yu cha' bi', li' ntucuá Ni cha' ji'i̱ yu ñi'ya̱ si ngua yu sca ñati̱ nu ndu'ni xcui' cha' tso'o.

⁷ Lo'o jua'a̱ nga'a̱ cha' ca cuayá' ti' ma̱ cha' cua ña'a̱ ca ñati̱ nu ngusñi cha' ji'i̱ Cristo, chañi cha' laca ñati̱ bi' ñi'ya laca ngu' judío, cha' ndyu'ni ngu' bi' la cui' ñi'ya̱ nu ngua'ni jyo'o Abraham, masi tyempo juani.

⁸ Cua nscua lo quityi cusu' cha' ndi'ya̱ nchcui' ycui' Ndyosi lo'o nu Abraham bi' nu ngua sa'ni: “Caca tso'o cresiya ji'i̱ lcaa ñati̱ nu ndi'i̱ xa' tsu' xqui'ya nu'u̱”, nacui̱ Ni ji'i̱ Abraham. Ycui' Ndyosi laca nu cua nda cha' bi' lo'o jyo'o bi' yala la, cha' jua'a̱ lo'o cu'ma̱ ngu' xa' tsu' caca tso'o cresiya ji'i̱ ma̱ cuentya ji'i̱ ycui' Ndyosi nde loo la, nu lo'o xñi ma̱ cha' ji'i̱ ycui' Ni.

⁹ Tso'o ti nti' Ni ña'a̱ Ni ji'i̱ Abraham nu ngua sa'ni, xqui'ya cha' ngusñi nu cusu' bi' cha' nu nchcui' ycui' Ni lo'o yu; bi' cha' caca cuayá' ti' na cha' tso'o nti' Ni ña'a̱ Ni ji'na, cua ña'a̱ ca na nu xñi na cha' ji'i̱ Cristo.

¹⁰ Pana cua ña'a̱ ca ñati̱ nu tsa bi' ti cña nti' cha' taquiya' ji'i̱ cha' cusu' nu nguscua jyo'o Moisés, tyanu yabe' hichu̱' ñati̱ bi', cha' ndi'ya̱ nchcui' quityi ji'i̱ ycui' Ndyosi: “Tyanu yabe' hichu̱' lcaa ñati̱ si ná taquiya' ngu' ji'i̱ lcaa ca cha' nu nscua lo quityi bi'”.

¹¹ Bi' cha' caca jlo ti' na cha' ná nchca ca lubii cresiya ji'na cuentya ji'i̱ ycui' Ndyosi lo'o ndaquiya' ti na ji'i̱ cña nu nda cha' cusu' bi', cha' ná nchca tyi'u ti' na lcaa ca cha' bi'. Chaca cha' nchcui' quityi bi': “Caca tso'o cresiya ji'na cuentya ji'i̱ ycui' Ndyosi xqui'ya cha' ngusñi na cha' ji'i̱ ycui' Ni; li' taca caja sca chalyuu nu ná nga'a̱ cha' tye tsiya' ti ji'na”.

¹² Pana lo'o xcui' ndaquiya' na ji'i̱ cha' cusu' bi', li' ná ntsu'u sca cha' ji'i̱ Cristo nu nga'a̱ cha' xñi na hasta ca ne' cresiya ji'na, cha' ndi'ya̱ nchcui' cha' cusu' bi' lo'o na: “Sca ti si cua'ni na lcaa ca cña nu culo ycui' Ndyosi ji'na, caca tyi'i̱ tso'o ti na chalyuu li'”, nacui̱ quityi bi'.

¹³ Cua ngulo Cristo ji'na ji'i̱ yabe' nu ngusta ycui' Ndyosi hichu̱' na xqui'ya cha' ná ndaquiya' na ji'i̱ lcaa cha' tsiya' ti nu nda Ni lo'o na; yabe' nu ntsu'u ji'na bi' cua ndyanu hichu̱' ycui' Jesús li'. Ndi'ya̱ nscua cha' lo quityi ji'i̱ ycui' Ndyosi: “Si tlyu tsa yabe' ntsu'u ji'i̱ sca ñati̱, ntsu'u cha' cujui'i̱ ca'a̱ ngu' ji'i̱ ña'a̱ lu'ú ti lo sca yaca ndu̱ cha' cajaa yu”.

¹⁴ Jua'a̱ ngua cha' lo'o ngu' xa' tsu' caja cha' tso'o ji'i̱ ngu' xqui'ya Jesucristo, cha' tso'o nu cua ngüiñi ji'i̱ ycui' Ndyosi lo'o nu jyo'o Abraham bi' nu ngua sa'ni. Li' caca ji'i̱ ngu' xa' tsu' ñi'ya̱ nu nchcui' ycui' Ndyosi lo'o Abraham, cha' caja Xtyi'i ycui' Ni ji'i̱ lcaa na nu lo'o xñi na cha' ji'i̱ Cristo.

Sa'ni la cua ngüiñi cha' ji'i̱ ycui' Ndyosi lo'o Abraham

¹⁵ Cu'ma̱ tya'a ntsu'u cha' ji'na lo'o Cristo, ta na' sca cui̱i̱ lo'o ma̱ juani cuentya ji'i̱ sca ñati̱ nu nti' quiñi sca cha' ji'i̱ yu lo'o tya'a yu. Clyo culo ngu' sca quityi. Lo'o cua ndye ngua stu'ba cha' bi' ji'i̱ ngu', li' nga'aa caca ji'i̱ xa' ñati̱ tacu̱' ngu' ji'i̱ cha' bi'; nga'aa caca xcutsa'a̱ la ngu' cha' bi'.

¹⁶ Jua'a̱ ngua'ni ycui' Ndyosi lo'o nu Abraham bi'; cua ngüiñi cha' ji'i̱ Ni lo'o jyo'o cusu' bi', jua'a̱ lo'o sca ñati̱ nu tyu'u ji'i̱ jyo'o cusu' bi' tyempo nde loo la. Ná nacui̱ quityi ji'i̱ ycui' Ndyosi cha' quiñi cha' ji'i̱ Ni lo'o tyu̱u̱ tya'a ñati̱ bi'. “Na cua ngüiñi cha' ji'i̱ ycui' Ndyosi lo'o sca ti ñati̱ nu tyu'u ji'i̱ Abraham nde loo la”, nacui̱ quityi. Lo'o nu sca ti ñati̱ bi' ni, Cristo laca bi'.

¹⁷ Ndi'ya̱ cha' nti' na' chcui' na' lo'o ma̱: Cua ngua stu'ba cha' ji'i̱ ycui' Ndyosi lo'o Abraham nu ngua li'; cua ndya'a jacua siyento ntucua calaa tyii yija̱ tya lo'o cua ngüiñi cha' ji'i̱ ycui' Ni lo'o nu cusu' bi', lo'o li' nda ycui' Ndyosi cha' lo'o Moisés cha' culo yu cña ji'i̱ ngu' cuentya ji'i̱ Ni. Bi' cha' ná ngua ji'i̱ cha' nu nda Moisés bi' tacu̱' lo cha' nu cua ngüiñi ji'i̱ ycui' Ndyosi lo'o Abraham nu ngua sa'ni la, cha' ná taca cua'a ngu' ji'i̱ cha' bi' tsiya' ti.

¹⁸ Si ntsu'u cha' taquiya' na ji'i̱ lcaa cña nu ngulo Moisés ji'na, cha' jua'a̱ clyaá na ji'i̱ nu cuxi, li' nga'aa nti' cha' jlya ti' na cha' nu cua ngüiñi ji'i̱ ycui' Ndyosi lo'o na cha' cua'ni lyaá Ni ji'na. Pana cha' liñi laca cha' cua ngüiñi cha' ji'i̱ ycui' Ni lo'o Abraham, cha' cua'ni Ni sca cha' xlya'be lo'o na nu lo'o cua'ni lyaá Ni ji'na.

¹⁹ ¿Ni cha' laca ngulo ycui' Ndyosi cña ji'i̱ nu jyo'o Moisés bi', cha' nguscua yu cña bi' lo quityi cuentya ji'i̱ Ni lacua? Tiya' la ngua cha' nda Ni cha' bi' lo'o Moisés, cha' caca cuayá' ti' na ñi'ya̱ nu nacui̱ ycui' Ndyosi cha' laca scaa cha' cuxi. Pana xti ti tyempo ndalo cha' bi' ña'a̱ cuayá' nu ndyalaa Cristo, la cui' tya'a ñati̱ ji'i̱ jyo'o Abraham; na cua nchcui' ycui' Ndyosi cha' ji'i̱ nu Cristo bi' nu lo'o cua ngüiñi cha' ji'i̱ ycui' Ni lo'o jyo'o cusu' Abraham bi' tya clyo. Nu lo'o nda Ni cha' bi' lo'o nu jyo'o Moisés bi' ni, lo'o xca̱ ji'i̱ ycui' Ni ndu̱ lo xlya ca'ya bi' cuentya ji'i̱ ycui' Ndyosi, cha' chcui' lo'o nu cusu' Moisés bi'. Cla'be la bi' ngutu̱ jyo'o Moisés bi' cha' chcui' yu lo'o ñati̱, cha' tu'ba ji'i̱ ycui' Ndyosi ngua nu cusu' bi'.

²⁰ Pana juani ná ndu'ni cha' caja sca ñati̱ chalyuu nu caca tu'ba ji'i̱ ycui' Ndyosi cha' chcui' Ni lo'o na. Cua ngüiñi cha' ji'i̱ Ni lo'o na nu ngua sa'ni si jlya ti' na ji'i̱ cha' bi', la cui' cha' nu cua ngua'ni Jesús cuentya ji'na juani.

Nde laca cña nu ngua'ni cha' cusu' bi'

²¹ Tso'o si cua'ni na cña nu nscua lo quityi cusu' cha' cua'ni na lacua. Lo'o jua'a̱ ndu'ni tsa cha' xñi na lcaa cha' nu nda ycui' Ndyosi lo'o ñati̱. Pana masi taquiya' na ji'i̱ lcaa cha' cusu' bi', ná taca caja chalyuu cucui bi' ji'na jua'a̱ ti; ná taca ca tso'o cresiya ji'na cuentya ji'i̱ ycui' Ni xqui'ya cha' ndyu'ni ti na lcaa cña nu nscua lo quityi cusu' bi' cha' cua'ni na; ná caca jua'a̱ tsiya' ti.

²² Cua nchcui' quityi ji'i̱ ycui' Ndyosi cha' nu cuxi laca loo la ji'i̱ lcaa ñati̱ chalyuu, ñi'ya̱ si na cua laca na preso ji'i̱. Si jlo ti' na cha' nu cuxi laca loo ji'na, li' taca ji'i̱ Ni cua'ni lyaá Ni ji'na; ta Ni chalyuu cucui ji'na li', nu lo'o xñi na cha' ji'i̱ ycui' Jesucristo. Bi' laca nu cha' tso'o nu cua ngüiñi ji'i̱ ycui' Ni lo'o na.

²³ Lo'o tya lyiji ca̱a̱ Jesucristo ni, tya lyiji caja ñi'ya̱ jlya tso'o ti' na cha' ji'i̱ ycui' Ni; bi' cha' ngua cha' cusu' bi' loo ji'na, ña'a̱ cuayá' caca jlya tso'o ti' na ji'i̱ Ni xqui'ya Cristo.

²⁴ Laca cha' cusu' bi' loo ji'na ñi'ya̱ nti' si laca na sca nu sube; ngulu'u cha' cusu' bi' xi cha' liñi ji'na ña'a̱ cuayá' nu ñaa ycui' Cristo. Pana juani cua'ni Cristo cha' caca tso'o cresiya ji'na cuentya ji'i̱ ycui' Ndyosi, ñi'ya̱ nu nti' ycui' Ni cha' caca na nu lo'o jlya ti' na ji'i̱ nu Cristo bi'.

²⁵ Lo'o juani taca jlya tso'o ti' na ji'i̱ ycui' Ndyosi xqui'ya Jesucristo, nga'aa si'i cha' cusu' nu laca loo ji'na.

²⁶ Sñi' ycui' Ndyosi laca lcaa cu'ma̱ juani lo'o ngusñi ma̱ cha' ji'i̱ Jesucristo, xqui'ya cha' cua ntsu'u cha' ji'i̱ ma̱ lo'o Ni.

²⁷ Lo'o ngua stu'ba cha' ji'na lo'o Ni, li' cua ntyucuatya ngu' ji'i̱ lcaa na chacuayá' ji'i̱ Cristo, cha' jua'a̱ cua ndyanu lcaa cha' ji'i̱ Cristo ne' cresiya ji'na, ñi'ya̱ nti' si cua laca cha' bi' sca late' nu quixi̱i̱ chu̱' na.

²⁸ Nu lo'o cua ngua stu'ba cha' ji'na lo'o Jesucristo, la cui' tyempo bi' ngua stu'ba cha' ji'na lo'o tya'a ñati̱ na; bi' cha' nga'aa chcui' na cha' ngu' judío laca ya, cha' ngu' xa' tsu' laca ma̱; nga'aa chcui' na cha' msu nu ngüi'ya ñati̱ laca ma̱, cha' ñati̱ nu ndi'i̱ tso'o ti laca na; nga'aa chcui' na cha' qui'yu laca na, cha' cuna'a̱ laca ma̱. Lcaa na, stu'ba cha' ji'na lo'o tya'a na juani.

²⁹ Nu lo'o ngusñi na cha' ji'i̱ ycui' Cristo, li' la cui' jua'a̱ laca na ñati̱ nu ndyu'u ji'i̱ jyo'o Abraham, masi tiya' la ñaa na chalyuu. Su cua ndye, li' tyanu cha' ji'na, lcaa ña'a̱ cha' nu cua ngüiñi ji'i̱ ycui' Ndyosi lo'o nu Abraham bi' cua sa'ni la cha' tyacua ji'na.