GÁLATAS 2 - Chatino Tataltepec

Nu xa' la tya'a ñati̱ nde Jerusalén ntucuá ngu' cha' nu nchcui' Pablo

¹ Cua ndya'a tii jlyacua yija̱, li' xa' ndya'a̱ nde Jerusalén chaca quiya'; lo'o Bernabé ndya'a̱, lo'o jua'a̱ ndyaa lo'o ya ji'i̱ Tito.

² Ndyaa ya Jerusalén, xqui'ya cha' cua ngua'ni ycui' Ndyosi cha' ngua'ya sca cha' hique na' cha' tyaa ya; bi' cha' lo'o cua ndyalaa ya quichi̱ bi', li' ndya'a̱ ca su ntucua ngu' ycui' ti ngu', nchcui' na' lo'o ngu' nu laca loo la ji'i̱ taju tya'a ñati̱ ji'i̱ Cristo quichi̱ bi'. Li' ndacha' na' ji'i̱ ngu' bi', nchcui' na' ni cha' nu nda na' lo'o ngu' xa' tsu' cuentya ji'i̱ Cristo, cha' ngua'ni lyaá Cristo ji'na ji'i̱ nu cuxi. Jua'a̱ nchcui' na' lo'o ngu' bi', xqui'ya cha' ná nti' na' cha' culacua cuxi ti' ngu' bi' ña'a̱ ngu' jna'; ná nti' na' cha' chcui' ngu' cha' ná tso'o laca cha' nu nda na' lo'o cu'ma̱ ngu' xa' tsu' tya tsubi' la, masi chcui' ngu' cha' ná tso'o ndu'ni na' juani.

³ Lo'o jua'a̱ yu Tito tya'a ndya'a̱ na' ni, ná nchcui' ngu' lo'o yu cha' si'yu quiji̱ yu cha' culacua̱ yu ñi'ya̱ ndu'ni ngu' judío, masi ngu' xa' tsu' laca yu.

⁴ Pana ngulaa xi xa' la ñati̱ slo ya li', ngu' nu cuiñi ti nchcui' cha' ntsu'u cha' ji'i̱ ngu' lo'o Cristo; na ndu'ni ti ngu' cha' tya'a na laca ngu' bi'. Cuaana ti nguti'i̱ ngu' bi' laja lcaa tya'a na cha' ña'a̱ cuayá' ngu' bi' ji'i̱ ya, si culacua̱ ngu' nu ndya'a̱ lo'o ya, si ná culacua̱ ngu'. Ngua ti' ngu' bi' tacu̱' cha' tso'o ji'i̱ Jesús lo'o na, cha' ná ndiya ti' ngu' cha' tso'o ndi'i̱ tyiquee na chalyuu xqui'ya Jesús; ngua ti' ngu' bi' tatsaa ngu' ji'na cha' cua'ni na lcaa lo cña nu ngulo jyo'o cusu' ji'i̱ ngu' judío tya'a ya.

⁵ Pana ná ndaquiya' ya ji'i̱ cha' nu nchcui' ngu' bi' tsiya' ti. Ngua ti' ya cha' ná chcuna' tsiya' ti ni sca cha' liñi nu cua nda Cristo lo'o na, nu lo'o cua ngua'ni lyaá yu ji'na; ngua ti' ya cha' tyanu tso'o lcaa cha' bi' ne' cresiya ji'i̱ ma̱.

⁶ Ná ndube ti' na' masi nacui̱ ngu' cha' tlyu tsa ñati̱ laca nu ngu' nu laca loo ji'na bi'; jlo ti' na' cha' sca ti cuayá' laca lcaa na cuentya ji'i̱ ycui' Ndyosi. Pana masi loo laca ngu' bi', ná ngulo ngu' bi' cña jna' cha' culu'u na' xa' la cha' ji'i̱ cu'ma̱ ngu' xa' tsu'.

⁷ Ndi'ya̱ ngua: ngutucuá ngu' bi' ji'i̱ cha' nu nchcui' na' lo'o ngu'; cua ngüiñi cha' ji'i̱ ngu' bi' lo'o na' li'; cua ngua cuayá' ti' ngu' cha' cua nda ycui' Ndyosi cña 'na cha' tsa'a̱ ta na' cha' ji'i̱ Ni lo'o cu'ma̱ ngu' xa' tsu', ñi'ya̱ taca clyaá ma̱ ji'i̱ nu cuxi. Lo'o jua'a̱ nacui̱ ngu' cha' cua nda Ni la cui' cña ji'i̱ nu Pedro bi', cha' chcui' yu cha' tso'o bi' lo'o ngu' judío.

⁸ La cui' ycui' Ndyosi nu nda ji'i̱ Pedro ndyaa nclyu'u yu cha' ji'i̱ Ni ji'i̱ ngu' judío, la cui' ycui' Ndyosi bi' laca nu cua nda Ni 'na ndya'a na' nclyu'u na' cha' tso'o bi' ji'i̱ ngu' xa' tsu'.

⁹ Bi' cha' ngutucuá ngu' cña 'na, nu Jacobo lo'o Pedro lo'o Juan bi', la cui' ngu' nu laca loo ji'i̱ ngu' tya'a ngusñi na cha' ji'i̱ Cristo. Stu'ba ti nchcui' ngu' bi', cha' tso'o tsa ngua'ni ycui' Ndyosi lo'o na' nu lo'o nda Ni cña bi' 'na. Li' ngusñi ya' tya'a ya lo'o ngu' bi', na' lo'o Bernabé, cha' caca cuayá' ti' ya cha' tso'o ti nti' ngu' ña'a̱ ngu' ji'i̱ ya, cha' stu'ba ntsu'u cha' ji'i̱ ngu' lo'o ya, cha' tya tsaa la ya quichi̱ tyi ngu' xa' tsu'. Tyanu ycui' ngu' bi' ca su ndi'i̱ tya'a ya, nu ngu' judío bi' li'.

¹⁰ Tsa bi' ti cha' nchcui' ngu' lo'o ya, nu ngüijña ngu' ji'i̱ ya cha' lcaa tyempo tyi'u ti' na na laca nu lyiji ji'i̱ nu ngu' ti'i tya'a na nu ndyanu nde Judea. Bi' laca nu ndyu'ni cña ti' na' cha' cua'ni na'.

Lye xi nchcui' Pablo lo'o Pedro nde quichi̱ Antioquía

¹¹ Lo'o li' ndyalaa Pedro nde quichi̱ Antioquía, ca su ndi'i̱ na'. Tiya' la li' ndya'a̱ na' slo yu, ngua'a na' ji'i̱ yu xqui'ya cha' cua ntsu'u sca cha' cuxi nu ndyu'ni yu.

¹² Ndi'ya̱ ngua cha' bi': Nu lo'o ndyalaa ca ti yu, ná ngua tyuju'u ti' yu; ndyacu yu lo'o ngu' tya'a na ca bi', masi ngu' xa' tsu' laca ngu'. Pana nu lo'o ndyalaa xi xa' la tya'a ngu' judío nu nda Jacobo ji'i̱ lijya̱, li' nguta'a̱chu̱' yu; nga'aa ntaja'a̱ cacu yu lo'o ngu' xa' tsu' bi' li'. Cua ndyutsi̱i̱ yu si ña'a̱ ngu' judío tya'a yu ji'i̱ yu cha' ndyacu yu lo'o ngu' xa' tsu' bi', cha' ná ntsu'u chacuayá' ji'i̱ ngu' judío cha' cacu ngu' lo'o ngu' xa' tsu', xqui'ya cha' ná lubii ngu' xa' tsu' tsiya' ti ngua ti' ngu' judío.

¹³ Lo'o li' la cui' jua'a̱ ngua'ni xa' la ngu' judío tya'a ntsu'u cha' ji'na lo'o Cristo, sca ti cuayá' siya' tyiquee ngu' lo'o Pedro; lo'o ycui' Bernabé ngua ti' yu cua'ni yu ñi'ya̱ nu ngua'ni ngu' bi', cha' siya' tsa tyiquee ngu'.

¹⁴ Pana nu lo'o ngua cuayá' ti' na' cha' ná ndyu'ni ngu' ñi'ya̱ nu ndyu'u cha' tso'o nu ngulu'u Cristo ji'na cha' clyaá na ji'i̱ nu cuxi, li' nchcui' na' lo'o Pedro slo lcaa ngu' nu ngusñi cha' ji'i̱ Cristo quichi̱ bi'. Ndi'ya̱ ni na' ji'i̱ yu li': “Ngu' judío laca nu'u̱”, nacui̱ na' ji'i̱ Pedro bi'. “Tya lo'o ndyalaa nu'u̱ ca nde, cua ngua'ni nu'u̱ ñi'ya̱ nu ndu'ni ngu' xa' tsu' re, cha' tya'a na laca ngu' cuentya ji'i̱ Cristo; ná ngua'ni nu'u̱ ñi'ya̱ nu ndu'ni ngu' judío tya'a quichi̱ tyi na. Bi' cha' lacua, ná tso'o si juani nti' nu'u̱ cha' tatsaa nu'u̱ ji'i̱ ngu' xa' tsu' re, cha' cua'ni ngu' ñi'ya̱ nu ndu'ni ngu' judío.” Jua'a̱ nacui̱ na' ji'i̱ yu.

Stu'ba cha' laca ji'i̱ ngu' judío lo'o lcaa ñati̱ chalyuu

¹⁵ Nu cuare ni, ngu' judío laca ya tya lo'o ngula ya chalyuu nu ndaquiya' ji'i̱ lcaa cha' nu nda ycui' Ndyosi lo'o ya; si'i na ndaquiya' ya ji'i̱ cua ña'a̱ ca cha' cuxi ñi'ya̱ ndu'ni ngu' xa' tsu'.

¹⁶ Pana jlo ti' ya cha' ná taca ca tso'o cresiya ji'i̱ ya cuentya ji'i̱ ycui' Ndyosi, masi ndu'ni ti ya cua ña'a̱ ca cña nu nda jyo'o Moisés cha' cua'ni ya; sca ti si jlya ti' ya ji'i̱ cña nu ngua'ni Jesucristo cuentya ji'na, li' taca ca tso'o cresiya ji'i̱ ya. Bi' cha' lo'o cuare cua ngusñi ya cha' ji'i̱ Jesucristo, cha' taca ca tso'o cresiya ji'i̱ ya cuentya ji'i̱ ycui' Ni, cha' nu jlya ti ti' ya ji'i̱ Jesús, nga'aa si'i xqui'ya cña nu ndyu'ni ya nu nda jyo'o Moisés ji'i̱ ya. Ni sca na ná taca ji'na ca tso'o cresiya ji'na cuentya ji'i̱ ycui' Ndyosi xqui'ya cha' ndaquiya' ti na sca cha' nu nda jyo'o cusu' lo'o na.

¹⁷ Tso'o lacua. Masi ngu' judío laca ya, cua jlo ti' ya cha' xqui'ya cña nu cua ngua'ni Cristo cuentya ji'na, bi' cha' taca caca lubii cresiya ji'i̱ ya cuentya ji'i̱ ycui' Ndyosi. La cui' ti cha', nga'a̱ cha' chcui' ya ji'i̱ ycui' ca ya cha' lo'o lcaa ngu' judío tya'a ya ntsu'u qui'ya ji'i̱ ya, ñi'ya̱ lo'o nacui̱ ya cha' ntsu'u qui'ya ji'i̱ ngu' xa' tsu'. Pana si'i Cristo laca nu ngua'ni cha' laca ya ñati̱ cuxi.

¹⁸ Bi' cha' nga'aa ndaquiya' ya ji'i̱ cha' cusu' nu jlya tsa ti' ya ji'i̱ nquicha'; lo'o juani si xa' taquiya' ya ji'i̱ cha' cusu' nu ntsu'u ji'i̱ ya, li' ntsu'u qui'ya ji'i̱ ya lo'o ycui' Ndyosi chaca quiya' xqui'ya cha' si'i na tyucui tyiquee ya ngusñi ya cha' ji'i̱ Jesucristo.

¹⁹ Lo'o na' ni, ná nchca cua'ni na' lcaa cha' cusu' bi', bi' cha' cua ndye cha' jna' lo'o cha' bi'; juani xcui' ndi'i̱ na' chalyuu cha' cua'ni na' lcaa ña'a̱ cña nu nti' ycui' Ndyosi cha' cua'ni na'.

²⁰ Cuentya ji'i̱ cha' cusu' bi' laca na' ñi'ya̱ laca si cua ngujuii na', ñi'ya̱ laca si stu'ba ti nga'a̱ na' lo crusi lo'o Jesús; juani nga'aa si'i ycui' ca ti na' laca na' loo ne' cresiya 'na, cha' Cristo laca nu laca loo ne' cresiya 'na juani. Ndi'i̱ tso'o ti na' chalyuu juani sca ti xqui'ya cha' jlya ti' na' ji'i̱ cña nu cua ngua'ni ycui' Jesús, nu sca ti Sñi' ycui' Ndyosi; bi' laca nu ntsu'u tsa tyiquee ña'a̱ jna', bi' laca nu cua nda chacuayá' ji'i̱ ngu' cha' cujuii ngu' ji'i̱ ycui' yu cuentya jna'.

²¹ Si'i cha' ná ndube ti' na' ji'i̱ lcaa cha' tso'o nu ngua'ni ycui' Ndyosi lo'o ngu' judío tya'a ya; laca cha' ndube tsa ti' na' cha' ná taca ca tso'o cresiya ji'na cuentya ji'i̱ ycui' Ndyosi, masi tso'o tsa ndaquiya' na ji'i̱ cña nu nclyo cha' cusu' bi' ji'na. Ndube tsa ti' na' cha' ná ngujuii Jesús jua'a̱ ti; ntsu'u cña nu ngua'ni yu lo'o ngujuii yu lo crusi bi', na cua ngua'ni tso'o yu ji'i̱ cresiya ji'na cuentya ji'i̱ ycui' Ndyosi nu ngua li'.