FILIPENSES 4 - Chatino Tataltepec

Lcaa tsa̱ caca chaa ti' na xqui'ya ycui' nu Xu'na na

¹ Cu'ma̱ tya'a ngusñi na cha' ji'i̱ Jesús, tyaca'a tsa cu'ma̱ 'na; ñati̱ nu cua nda ycui' Ndyosi jna' laca cu'ma̱, xqui'ya cha' ndyu'ni na' cña ji'i̱ Ni. Tso'o tsa ntsu'u tyiquee na' xqui'ya cu'ma̱, lo'o jua'a̱ xñi'i̱ xi ti' na' lo'o ná ndi'i̱ na' ca slo cu'ma̱. Nga'a̱ cha' cua'ni ma̱ cha' tyanu tso'o cha' ji'i̱ ycui' nu Xu'na na ne' cresiya ji'i̱ ma̱.

² Lo'o cu'ma̱ ma' Evodia lo'o ma' Síntique ni, cui'ya ma̱ cha' clyu ti' 'na, cua'ni ma̱ cha' stu'ba ti tyu'u tyiquee ma̱ lo'o tya'a ma̱. Ngu' tya'a na laca ma̱ xqui'ya nu Xu'na na, bi' cha' cua'ni ma̱ cha' cati̱ cha' cusu̱u̱ nu ntsu'u ji'i̱ ma̱ lo'o tya'a ma̱.

³ Lo'o nu'u̱ nu tso'o tsa tya'a ndya'a̱ na cña, cua nti' na' cha' xtyucua nu'u̱ ji'i̱ tyucuaa ma' cusu' bi', cha' taca ca tso'o tyiquee ngu' bi' lo'o tya'a ngu'. Tyucuaa ma' cusu' bi' cua ngua'ni tsa ngu' cña cha' cañi la cha' tso'o ji'i̱ Jesús nquicha'; stu'ba ti ngua'ni ngu' bi' cña lo'o na', lo'o Clemente, lo'o xa' la ngu' tya'a ndya'a̱ ya cña. Cua nscua xtañi lcaa ngu' bi' lo quityi ji'i̱ ycui' Ndyosi, nu nscua xtañi ñati̱ nu caja chalyuu nu ná nga'a̱ cha' tye ji'i̱.

⁴ Nti' na' cha' lcaa tsa̱ caca chaa ti' ma̱ xqui'ya ycui' nu Xu'na na; masi tucua quiya' chcui' na' cha' bi' lo'o ma̱: Nti' na' cha' caca chaa ti' ma̱.

⁵ Xcui' cua'ni tya'na tsa ti' ma̱ lo'o lcaa ñati̱, cha' ca cuayá' ti' ñati̱ cha' jua'a̱ ndu'ni ma̱. Cua ngulala ti ca̱a̱ ycui' nu Xu'na na chaca quiya'.

⁶ Ni sca cha' ná culacua tsa ti' ma̱ ji'i̱, pana jña ma̱ cha' ji'i̱ ycui' Ndyosi cuentya ji'i̱ cua ña'a̱ ca cha' nu tyacua xi ji'i̱ ma̱. Lo'o jua'a̱ ta ma̱ xlya'be ji'i̱ ycui' Ndyosi cha' jua'a̱ ndyaca cha' ji'i̱ ma̱, nu lo'o chcui' ma̱ lo'o ycui' Ni.

⁷ Lo'o li' cua'ni Ni cha' ti̱ ti tyi'i̱ tyiquee ma̱, masi ná caca cuayá' ti' ñati̱ chalyuu ni cha' laca ma̱ jua'a̱. Nga'aa ca'ya cha' cuxi hique ma̱ li', nga'aa caca cuxi cresiya ji'i̱ ma̱ li', xqui'ya cha' cua ngua stu'ba cha' ji'i̱ ma̱ lo'o Jesucristo.

Tyu'u tyiquee na ji'i̱ cua ña'a̱ ca cha' nu tso'o laca

⁸ Cu'ma̱ tya'a ngusñi na cha' ji'i̱ Cristo, ndi'ya̱ ti culacua ti' ma̱ tyucui tyempo nu ndi'i̱ ma̱ chalyuu: Cua ña'a̱ ca cha' nu chañi tsa cha' jua'a̱ laca, bi' laca nu nga'a̱ cha' tyu'u tyiquee ma̱ ji'i̱; jua'a̱ lcaa cha' nu cua'ni chi̱ ngu' loo, lcaa cha' nu liñi ca, lcaa cha' su lubii ntsu'u tyiquee na, lcaa cha' nu tso'o tsa ña'a̱, lcaa cha' nu tso'o tsa nti' ngu' ña'a̱ ngu' ji'i̱, masi lcaa cha' tso'o bi', nu jua'a̱ tso'o tsa nchcui' ngu' ji'i̱, bi' laca nu nga'a̱ cha' tyu'u tyiquee ma̱ ji'i̱.

⁹ Cua'ni ma̱ cha' tyi'u ti' ma̱ ji'i̱ lcaa cha' nu cua ngua tsa'a̱ ma̱ 'na, masi sca cha' nu cua ndyuna ma̱ tya lo'o nda na' cha' lo'o ma̱, masi sca cha' nu cua na'a̱ ma̱ cha' ndyu'ni na'; bi' laca cha' nu nga'a̱ cha' cua'ni ma̱, lo'o li' cua'ni ycui' Ndyosi cha' ti̱ ti tyi'i̱ tyiquee ma̱.

Tso'o tsa ntsu'u tyiquee Pablo cha' cua ya̱a̱ lo'o ngu' msta̱ cha' xtyucua ji'i̱

¹⁰ Tso'o tsa ntsu'u tyiquee na' lo'o na'a̱ na' cha' cua ndyalaa msta̱ nu nda cu'ma̱ lijya̱ slo na'. Tso'o nti' na' cha' cua ndyi'u ti' ma̱ 'na chaca quiya', lo'o jua'a̱ tso'o tsa nti' na' cha' cua nda ma̱ msta̱ bi' 'na xqui'ya ycui' nu Xu'na na. Jlo ti' na' cha' si'i na ngujlyaa ti' ma̱ 'na, laca cha' nga'aa ngujui ñi'ya̱ nu xtyucua ma̱ 'na tya tsubi' la.

¹¹ Ná nacui̱ na' cha' lyiji tsa cha' tso'o 'na, cha' tso'o tsa ndyaala' ti' na' lo'o na laca nu ndyiji ti xi 'na.

¹² Ntsu'u quiya' lyiji tsa cha' 'na, lo'o jua'a̱ ntsu'u quiya' quiña'a̱ tsa cha' tso'o ndyiji 'na; jua'a̱ ti ngui'i̱ na', cha' cua ngui'i̱ na' cha' tyaala' ti' na' lcaa su tya'a̱ na' lo cña re. Ná ndu'ni cha' masi tso'o tsa ndyiji na cacu̱, masi ntyute' ti na'; masi quiña'a̱ tsa na ntsu'u 'na, masi xti ti cha', ná ndulo cha' bi' 'na.

¹³ Cua nda ycui' Cristo juersa 'na cha' talo na' ji'i̱ cua ña'a̱ ca cha', na laca nu tyacua ti xi 'na.

¹⁴ Masi jua'a̱, tso'o tsa nti' na' cha' cua nguxtyucua ma̱ 'na laja lo'o ndyacua cha' cuxi 'na ca nde.

¹⁵ Cu'ma̱ ngu' Filipos, cua jlo ti' ma̱ ñi'ya̱ ngua lo'o ngutu'u na' nde loyuu su cuentya Macedonia, ndya'a̱ na' nchcui' na' cha' ji'i̱ Jesús lo'o ngu' bi'; li' sca ti taju cu'ma̱ nu ndyu'ni tlyu ma̱ ji'i̱ ycui' Ndyosi ca jua, cua ndya ma̱ msta̱ cha' caca sca xlya'be 'na, xqui'ya cha' tso'o tsa ngua tsa'a̱ ma̱ cha' ji'i̱ Jesús laja lo'o nguti'i̱ na' lo'o ma̱.

¹⁶ Lo'o jua'a̱ tyu̱u̱ quiya' cua nda ma̱ sca xlya'be 'na nu lo'o nguliji xi cha' tyiji̱ yu'u 'na ca quichi̱ Tesalónica.

¹⁷ Ni si'i cha' caja sca cha' xlya'be ti 'na nclyacua ti' na', tso'o la nti' na' si tyanu tso'o cha' ji'i̱ ycui' Ndyosi ne' cresiya ji'i̱ ma̱.

¹⁸ Ndi'ya̱ xacui̱ na' cha' ji'i̱ ma̱ juani: Cua quiña'a̱ tsa na nda ma̱ 'na, bi' cha' cua nti' tsa na' tya na' tsa xlya'be ji'i̱ ma̱; nga'aa ntsu'u chaca na nu lyiji 'na tsiya' ti juani, tya lo'o ya̱a̱ yu Epafrodito, ya̱lo'o yu lcaa cha' tso'o nu cua nda ma̱ 'na. Ñi'ya̱ laca sca msta̱ nu ndiya tsa ti' ycui' Ndyosi ji'i̱, cha' tyixi tsa xtyi'i nda bi' nu ndacui lcua ti se'i̱, jua'a̱ laca cha' tso'o nu nda ma̱ 'na cuentya ji'i̱ ycui' Ndyosi.

¹⁹ Tlyu tsa cha' tso'o ntsu'u ji'i̱ ycui' Ni, bi' cha' ta Ni lcaa na nu lyiji cha' tyiji̱ yu'u ji'i̱ ma̱ chalyuu; cua jlo ti' na' cha' jua'a̱ ndu'ni ycui' nu Xu'na na' lo'o ñati̱ xqui'ya Jesucristo.

²⁰ Tso'o si tyucui tyempo cua'ni tlyu na ji'i̱ ycui' Ndyosi Sti na lacua. Jua'a̱ caca tu'ni.

Ngusalya' yu lo'o ngu'

²¹ Chacuayá' ji'i̱ Jesucristo nda na' xlyo ni'i̱ ji'i̱ lcaa tya'a ma̱, ñati̱ ji'i̱ ycui' Ndyosi cajua; la cui' jua'a̱ nti' lcaa ngu' tya'a ndya'a̱ ya ca nde.

²² Lo'o lcaa ngu' nu ngusñi cha' ji'i̱ ycui' Ndyosi ca quichi̱ re, jua'a̱ ngu' nu ndi'i̱ ndyu'ni cña ca ni'i̱ tlyu cuentya ji'i̱ nu xu'na tlyu nu laca emperador, cua nti' tsa ngu' chcuicha' ngu' ji'i̱ ma̱.

²³ Cua nti' tsa na' cha' ña'a̱ ti tya cua'ni la Jesucristo nu Xu'na na cha' tso'o lo'o ma̱ tyucui tyempo nu lijya̱ nde loo la. Jua'a̱ caca tu'ni.