EFESIOS 5 - Chatino Tataltepec

Nga'a̱ cha' cua'ni na cha' tso'o lo'o ndi'i̱ na chalyuu, si laca na sñi' ycui' Ndyosi

¹ Ntsu'u tsa tyiquee ycui' Ndyosi ña'a̱ Ni ji'i̱ ma̱, xqui'ya cha' laca ma̱ sñi' ycui' Ni; bi' cha' cua'ni ma̱ cha' caca ma̱ ñi'ya̱ nu laca ycui' Ndyosi tsiya' ti.

² Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

³ Nu juani cha' laca ma̱ ñati̱ ji'i̱ ycui' Ndyosi, ná tso'o si xcui' cha' ji'i̱ nu cuna'a̱ ntsu'u tyiquee ma̱; ná cua'ni ma̱ cha' suba' lo'o ñati̱, ni ná chcui' ma̱ tsiya' ti ji'i̱ lcaa cha' bi' lo'o tya'a ñati̱ ma̱; ná tyacui ti' ma̱ ji'i̱ cha' tso'o nu ntsu'u ji'i̱ ñati̱.

⁴ Nga'aa ntsu'u cha' tyu'u cha' suba' tu'ba ma̱. La cui' ti ná chcui' ma̱ cha' tonto, ná chcui' ma̱ sca cha' nguna' ti lo'o tya'a ñati̱ ma̱. Tso'o la si tya ma̱ xlya'be ji'i̱ ycui' Ndyosi.

⁵ Sca cha' chañi tsa laca re: Ñati̱ nu jua'a̱ xcui' cha' cuxi ndu'ni ni, ná caja chacuayá' tyaa ngu' bi' ca su ntucua ycui' Ndyosi lo'o Cristo ca tiya' la, nu lo'o caca Ni loo; ñati̱ nu xcui' cha' ji'i̱ nu cuna'a̱ ntsu'u tyiquee ngu', ñati̱ nu ndu'ni suba', ñati̱ nu ndacui ti', ná caja chacuayá' tyaa ngu' bi' ca su ntucua Ni. Nu ndacui ti' na ji'i̱ sca cha' ni, laca cha' ntsu'u tsa tyiquee na ji'i̱ cha' bi', ñi'ya̱ lo'o ntsu'u tyiquee na ña'a̱ na ji'i̱ sca jo'ó.

⁶ Ná ta ma̱ chacuayá' cha' ñilo'o ngu' ji'i̱ ma̱ lo'o sca cha' tonto ti. Xqui'ya cha' cuxi bi' ñasi̱' tsa ycui' Ndyosi ji'i̱ ñati̱ chalyuu nu ná ndaquiya' ji'i̱ cha' nu nchcui' Ni; xcube' tsa Ni ji'i̱ ngu' bi' lo'o tye chalyuu.

⁷ Bi' cha' nchcui' na' lo'o ma̱, cha' ná tyu'u cha' ji'i̱ ma̱ lo'o ñati̱ nu ndu'ni jua'a̱.

⁸ Nu ngua sa'ni la, talya tsiya' ti chalyuu ji'i̱ ma̱; pana juani cua ngua xee chalyuu ji'i̱ ma̱, tya lo'o ngusñi ma̱ cha' ji'i̱ ycui' nu Xu'na na. Ñi'ya̱ ndu'ni ñati̱ nu cua ntsu'u lo xee ji'i̱ Cristo, jua'a̱ nga'a̱ cha' cua'ni ma̱ su ndi'i̱ ma̱ chalyuu juani.

⁹ Na cua ntsu'u nu xee lubii ji'i̱ ycui' Ndyosi ne' cresiya ji'i̱ ma̱, bi' laca nu ndu'ni lo'o ma̱ cha' cua'ni ma̱ cha' tso'o; ndu'ni bi' cha' tso'o ti tyu'u tyiquee ma̱ ña'a̱ ma̱ ji'i̱ xa' ñati̱, cha' xcui' cha' liñi chcui' ma̱.

¹⁰ Clyana ma̱ cua ña'a̱ ca cha' tso'o nu nti' ycui' nu Xu'na na cha' cua'ni ma̱, lo'o li' cua'ni cha'a̱ ma̱ cha' tso'o bi'.

¹¹ Ná tyu'u cha' ji'i̱ ma̱ lo'o ñati̱ nu xcui' cha' cuijya ti, nu xcui' cha' tonto ti ndu'ni ngu', xqui'ya cha' talya chalyuu nu ntsu'u ji'i̱ ngu'; ta ma̱ sca cui̱i̱ lo'o ngu' bi', cha' ca cuayá' ti' ngu' cha' cuxi ti ndyu'ni ngu'.

¹² Pana ntsu'u cha' cuxi nu ndu'ni ngu' cuaana ti, nu tyuju'u tsa ti' na si chcui' na ji'i̱ cha' bi'.

¹³ Nu lo'o quijeloo cha' ji'i̱ tya'a quichi̱ tyi ngu' ñi'ya̱ ngua cha' cuxi bi', li' ca cuayá' liñi ti' lcaa ngu' cua ña'a̱ ca cha' cuxi nu ngua'ni ngu'. Liñi tsa sca cha' nu cua ndu'u lubii.

¹⁴ Bi' cha' ndi'ya̱ nchcui' quityi cusu': Quee ti' cu'ma̱, cha' ñi'ya̱ laca si na laja' ma̱, si na ngujuii ma̱, jua'a̱ laca ma̱ xqui'ya qui'ya nu ntsu'u ji'i̱ ma̱. Nga'aa tyu'u cha' ji'i̱ ma̱ lo'o cha' cuxi, cha' li' taca ta Cristo xee nu tyu'ú ne' cresiya ji'i̱ ma̱. Jua'a̱ nscua lo quityi.

¹⁵ Tso'o lacua, culacua tso'o ti' ma̱ ñi'ya̱ nu cua'ni ma̱ laja lo'o ndi'i̱ ma̱ chalyuu; ná cua'ni ma̱ ñi'ya̱ nu ndu'ni ñati̱ nu ná nduna tsiya' ti, cua'ni ma̱ ñi'ya̱ nu ndu'ni ñati̱ nu nclyacua tso'o ti'.

¹⁶ Clyana ma̱ cha' tso'o nu cua'ni ma̱ laja lo'o ndi'i̱ ma̱ chalyuu, cha' ná tyu'u cha' ji'i̱ ma̱ lo'o cha' cuxi nu ndyu'ni xa' ñati̱ tyempo juani;

¹⁷ ná caca ma̱ tonto lacua, cua'ni cha'a̱ ma̱ lcaa ña'a̱ cha' nu nti' ycui' nu Xu'na na cha' cua'ni ma̱ chalyuu.

¹⁸ Ná ca cu'bi ma̱; ndu'ni ñu'u̱ tsa nu xña'a̱ ji'i̱ ñati̱ cha' chcuna' chalyuu ji'i̱ ngu', xqui'ya cha' cu'bi ngu'. Xa' ña'a̱ cua'ni ma̱, cha' xtyucua Xtyi'i ycui' Ndyosi ji'i̱ ma̱ lo'o cua ña'a̱ ca cña nu cua'ni ma̱ chalyuu.

¹⁹ Cula tu'ba ma̱ lcaa lo ji̱i̱ ji'i̱ ycui' Ndyosi nu lo'o tyu'u ti'i̱ ma̱ lo'o tya'a ma̱ cha' cua'ni tlyu ma̱ ji'i̱ Ni, masi ji̱i̱ salmo nu nscua lo quityi tya sa'ni, masi cua ña'a̱ ca ji̱i̱ nu nchcui' cha' ji'i̱ ycui' Ndyosi nu ca'ya hique ma̱; tyucui tyiquee ma̱ cua'ni tlyu ma̱ ji'i̱ ycui' Ndyosi lo'o ji̱i̱ bi'.

²⁰ Lo'o jua'a̱ cua ña'a̱ ca hora tso'o tya ma̱ xlya'be ji'i̱ ycui' Ndyosi Sti na chacuayá' ji'i̱ Jesucristo nu Xu'na na; tya ma̱ xlya'be ji'i̱ Ni cuentya ji'i̱ lcaa cha' nu ndyaca ji'i̱ ma̱, masi tso'o cha' bi', masi ná tso'o cha' bi'.

Nu lo'o tyucuaa ngu' lo'o clyo'o ngu' ngusñi ngu' cha' ji'i̱ ycui' Ndyosi

²¹ Taquiya' tso'o ma̱ ji'i̱ clyo'o ma̱ xqui'ya ycui' Ndyosi.

²² Cu'ma̱ ngu' cuna'a̱ ni, taquiya' ma̱ cha' nu nchcui' clyo'o ma̱ ñi'ya̱ lo'o ndaquiya' na cha' nu nchcui' ycui' nu Xu'na na.

²³ Loo laca sca nu qui'yu ji'i̱ clyo'o yu. La cui' jua'a̱ Cristo laca loo ji'i̱ lcaa ñati̱ nu tsa tlyu ti ndyu'ni tlyu ji'i̱ ycui' Ni; Cristo laca nu ndaca'a ji'i̱ lcaa ñati̱ ji'i̱ yu, cha' ná cua'ni ñu'u̱ nu cuxi ji'i̱ ngu' lo'o tya'a ngu'.

²⁴ Cu'ma̱ ngu' cuna'a̱ tya'a ngusñi na cha' ji'i̱ Cristo, nga'a̱ cha' cua'ni chi̱ ma̱ loo clyo'o ma̱; tucuá ma̱ lcaa cña nu culo clyo'o ma̱ ji'i̱ ma̱, ñi'ya̱ nu ndyaca lo'o lcaa ngu' tya'a ma̱ nu tsa tlyu ti ndyu'ni tlyu ma̱ ji'i̱ Cristo, ntucuá ma̱ cña ji'i̱ Cristo.

²⁵ Nu cu'ma̱ ngu' qui'yu ni, tyu'u tso'o tyiquee ma̱ ña'a̱ ma̱ ji'i̱ clyo'o ma̱, cha' la cui' jua'a̱ tso'o tsa ntsu'u tyiquee Cristo ña'a̱ yu ji'i̱ ñati̱ ji'i̱ yu nde chalyuu; bi' cha' ntaja'a̱ yu ngua'a̱ yu lo crusi xqui'ya ñati̱ nu xñi cha' ji'i̱ yu ca tiya' la.

²⁶ Ngujuii yu cha' caja ñi'ya̱ cua'ni lubii yu ji'i̱ ñati̱ nu xñi cha' ji'i̱ yu; ngua ti' Jesús cha' cuna ngu' lcaa cha' ji'i̱ ycui' yu, cha' taca cuityi̱ Ni qui'ya nu ntsu'u ji'i̱ ngu', cha' ta Ni chalyuu cucui ji'i̱ ngu'. Jua'a̱ ngua'ni Ni cha' sca ti quiya' laca ngu' bi' ñati̱ ji'i̱ Ni. Lo'o li' taca tyucuatya ngu' ji'i̱ ngu' bi' cuentya ji'i̱ Jesús.

²⁷ Ngua ti' Cristo cha' tyi'i̱ ñati̱ ji'i̱ yu ca slo ycui' Ndyosi lo'o tye chalyuu; tlyu tsa cha' tso'o caca nu lo'o tyi'i̱ na ñati̱ ji'i̱ Ni ca slo Ni tsa tlyu ti, nu lo'o lubii tyiquee na, nu lo'o nga'aa ntsu'u qui'ya ji'na, nu ná lo'o yabe' ji'na, nu ná lo'o chaca cha' cuxi, cha' ná talo ycui' Ndyosi ña'a̱ Ni ji'i̱ ni sca cha' cuxi.

²⁸ Cu'ma̱ ngu' qui'yu nu ntsu'u clyo'o ma̱ ni, nga'a̱ cha' cua'ni tyaca'a ma̱ ji'i̱ clyo'o ma̱, ñi'ya̱ ndu'ni tyaca'a ma̱ ji'i̱ ycui' ca ma̱. Si tyaca'a clyo'o na ji'na, laca cha' ndu'ni na sca cha' tso'o ji'i̱ ycui' ca na,

²⁹ cha' ni sca na, ni sca quiya' ná nchca cuxi tyiquee na ña'a̱ na ji'i̱ ycui' ca na. Na ndacu tso'o na, na ña'a̱si̱i̱ tso'o na ji'i̱ ycui' ca na; la cui' jua'a̱ ndu'ni tyaca'a Cristo ji'i̱ ñati̱ ji'i̱,

³⁰ cha' sca ti taju laca ca ta'a na cuentya ji'i̱ Cristo, cha' ntsu'u cña nu ndu'ni scaa na cuentya ji'i̱ Ni.

³¹ Ndi'ya̱ laca cha' nu nscua lo quityi cusu': “Xtyanu sca nu qui'yu ji'i̱ sti yu ji'i̱ xtya'a̱ yu su ndi'i̱ ngu', cha' tsaa tyi'i̱ yu lo'o clyo'o yu; lo'o li' nu tyucuaa ngu' bi' caca ngu' sca ti ñati̱ tsiya' ti cuentya ji'i̱ ycui' Ndyosi”, nacui̱ quityi bi'.

³² Tlyu tsa cha' nu nscua lo quityi cusu' bi'. Nti' na' cha' cuentya ji'i̱ Cristo nchcui' quityi bi', lo'o jua'a̱ cuentya ji'i̱ ca ta'a na nu ndu'ni tlyu na ji'i̱ Ni tsa tlyu ti, bi' laca cha' nu nchcui' ycui' Ndyosi lo quityi bi'.

³³ Pana la cui' jua'a̱ nchcui' quityi bi' cuentya ji'i̱ lcaa cu'ma̱, cha' cua'ni tyaca'a cu'ma̱ ngu' qui'yu ma̱ ji'i̱ clyo'o ma̱ ñi'ya̱ nu ndu'ni tyaca'a ma̱ ji'i̱ ycui' ca ma̱. La cui' jua'a̱ nga'a̱ cha' cua'ni chi̱ ngu' cuna'a̱ ma̱ loo clyo'o ma̱.