EFESIOS 3 - Chatino Tataltepec

Tyijyu' ndya'a̱ Pablo, cha' nchcui' yu cha' ji'i̱ Cristo lo'o ngu' xa' tsu'

¹ Xqui'ya cha' nu cua nchcui' ca na', bi' cha' nchcui' tsa na' lo'o Cristo cuentya ji'i̱ cu'ma̱. La cui' Pablo laca na'; ntsu'u na' ne' chcua̱ juani xqui'ya cha' cua nchcui' na' cha' ji'i̱ Jesucristo lo'o ñati̱, cha' nguxtyucua na' ji'i̱ cu'ma̱ nu si'i ngu' judío laca ma̱.

² Cua ngua cuayá' ti' ma̱ cha' ycui' Ndyosi laca nu nda cña bi' 'na, cha' xtyucua na' ji'i̱ ma̱, xqui'ya cha' ntsu'u tsa tyiquee Ni ña'a̱ Ni ji'na.

³ Cua ndacha' Ni jna' ñi'ya̱ nu nti' Ni cua'ni Ni nde chalyuu. Masi ná ndacha' Ni ji'i̱ ñati̱ sa'ni la ñi'ya̱ cua'ni Ni nde chalyuu, hasta juani ndacha' Ni cha' bi' jna', la cui' ti cha' nu cua nscua tya sa'ni nu caca tyempo juani; cua laca nscua na' xi' cha' bi' lo quityi re nu cua ca̱a̱ ti slo cu'ma̱.

⁴ Lo'o chcui' ma̱ lo quityi re, li' caca cuayá' ti' ma̱ cha' nu nda na' lo'o ma̱ cuentya ji'i̱ cña nu nti' Cristo cua'ni nde chalyuu;

⁵ ni sca ñati̱ ná ngujui ñi'ya̱ caca cuayá' ti' ngu' cha' bi' tyempo nu cua nteje tacui. Pana juani xqui'ya Xtyi'i ycui' Ni cua ngulu'u Ni cha' bi' ji'i̱ ngu' nu laca cña ji'i̱ ycui' Ndyosi, nu ngu' nu ngua tsa'a̱ ji'i̱ Jesús tya clyo bi'. La cui' jua'a̱ ngulu'u Ni cha' bi' ji'i̱ ngu' nu tya nda la cha' ji'i̱ ycui' Ndyosi lo'o ñati̱ juani.

⁶ Bilya cuna ñati̱ chalyuu cha' nu ndacha' Ni 'na. Pana ndi'ya̱ ndyu'u cha' bi': Ngu' nu si'i ngu' judío laca ngu' ni, caca ngu' bi' la cui' ñi'ya̱ laca ngu' judío nu ntsu'u cha' ji'i̱ lo'o ycui' Ndyosi, nu lo'o ca cuayá' ti' ngu' cha' ji'i̱ Cristo; si xñi ngu' bi' cha' ji'i̱ Jesucristo, lo'o ngu' bi' caca tso'o cresiya ji'i̱ ngu' cuentya ji'i̱ ycui' Ndyosi li'. Caca stu'ba cha' ji'i̱ tyucuaa lo ngu' li', cha' tsa tlyu ti tya'a ngusñi ngu' cha' ji'i̱ Cristo caca ngu'. Lo'o ji'i̱ ngu' nu si'i ngu' judío laca ngu' bi', tyacua lcaa cha' nu cua nacui̱ Ni cha' tyacua ji'i̱ ngu' xqui'ya Jesucristo.

⁷ Cua nda ycui' Ndyosi cña bi' jna' cha' tsa'a̱ chcui' na' lo'o ñati̱, masi tyijyu' ntsu'u ngu', xqui'ya cha' tso'o ti nti' ycui' Ndyosi ña'a̱ Ni 'na. Tlyu tsa cña ngua'ni Ni lo'o na' cha' caca na' cña bi'.

⁸ Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

⁹ Cua nchcui' Ni lo'o na' lacua. Ycui' Ndyosi nu ngüiñá Ni lcaa na nu ntsu'u chalyuu, nti' Ni cha' culu'u na' cha' bi' ji'i̱ lcaa ñati̱, cha' li' caca cuayá' ti' ngu' ñi'ya̱ laca cña nu nti' Ni cha' cua'ni ngu'. Nu ngua tya sa'ni la, bilya cuna ñati̱ cha' nu ngua ti' ycui' Ndyosi cua'ni Ni xqui'ya Cristo;

¹⁰ pana juani caca cuayá' ti' lcaa cui'i̱ nu laca loo nde cua̱, nu lo'o ña'a̱ cui'i̱ bi' ji'i̱ ñati̱ chalyuu nu tsa tlyu ti ndyu'ni tlyu ji'i̱ Cristo. Lo'o jua'a̱ cui'i̱ nu ngua ti' tyiji̱loo ji'i̱ ycui' Ndyosi sa'ni la ni, caca cuayá' ti' cui'i̱ bi' cha' nchca la ji'i̱ ycui' Ndyosi que cua ña'a̱ ca na nu ngüiñá ycui' Ni.

¹¹ Ngua'ni Ni cha' tlyu bi', nu lo'o nda Ni ji'i̱ Jesucristo nu Xu'na na ñaa chalyuu, ñi'ya̱ nu ngua ti' Ni cua'ni Ni tya lo'o bilya tya' chalyuu.

¹² Lo'o juani cua ntsu'u chacuayá' ji'na cha' tyu'u cha' ji'na lo'o ycui' Ndyosi xqui'ya la cui' Jesucristo bi'; tyucui tyiquee na taca chcui' na lo'o ycui' Ndyosi xqui'ya cha' ngusñi na cha' ji'i̱ Jesucristo Sñi' ycui' Ni. Lo'o jua'a̱ nga'aa ntsu'u cha' cutsi̱i̱ na lo'o chcui' na lo'o ycui' Ndyosi.

¹³ Bi' cha' juani chcui' na' lo'o ma̱ cha' ná ca taja ti' ma̱, cha' ná tya'a̱chu̱' ma̱ ji'i̱ ycui' Ndyosi, masi nchcube' na' xi ca su ndi'i̱ na' re cuentya ji'i̱ cu'ma̱; sca cha' tso'o cuentya ji'i̱ cu'ma̱ laca cha' bi'.

Ntsu'u tsa tyiquee Cristo ña'a̱ yu ji'i̱ ñati̱

¹⁴ Ndyu̱ sti̱' na' lo'o nchcui' na' lo'o ycui' Ndyosi Sti Jesucristo nu Xu'na na lacua.

¹⁵ Lcaa na lo'o tya'a na ndyu'u tsa na ji'i̱ ycui' Ndyosi ni, cha' ngüiñá Ni lcaa lo ñati̱, masi nde cua̱, masi nde loyuu chalyuu. Lo'o jua'a̱ nda Ni xtañi lcaa na.

¹⁶ Juani chcui' na' lo'o ycui' Ndyosi Sti na cuentya ji'i̱ cu'ma̱; quiña'a̱ tsa cha' tso'o ntsu'u ji'i̱ Ni, bi' cha' taca xtyucua Ni ji'i̱ ma̱. Ndijña na' ji'i̱ Ni cha' ta Ni juersa nu tyanu ne' cresiya ji'i̱ ma̱, cha' caca tlyu tyiquee ma̱ nu lo'o ta Ni Xtyi'i ycui' Ni cha' tyi'i̱ bi' lo'o ma̱;

¹⁷ ndijña na' ji'i̱ Ni cha' ca cuayá' ti' ma̱ cha' ngua'ni Ni cha' cua ndyanu Xtyi'i ycui' Jesús ne' cresiya ji'i̱ ma̱, nu lo'o ngusñi tso'o ma̱ cha' ji'i̱ ycui' Ndyosi; ndijña na' ji'i̱ Ni cha' tsa cu' ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱, xqui'ya cha' tso'o tsa ngusñi su̱u̱ cha' bi' ne' cresiya ji'i̱ ma̱;

¹⁸ ndijña na' ji'i̱ Ni cha' taca ca cuayá' ti' ma̱ ñi'ya̱ nu ndu'ni ycui' Cristo lo'o na, cha' ntsu'u tsa tyiquee Ni ña'a̱ Ni ji'na. Nu ntsu'u tyiquee Cristo ña'a̱ Ni ji'i̱ ñati̱ ni, jyacua Ni ji'i̱ cua ña'a̱ ca ñati̱, ta Ni cha' bi' lo'o ngu', masi ñati̱ tlyu laca ngu', masi laca ngu' ñati̱ jua'a̱ ti.

¹⁹ Bi' cha' nti' tsa na' cha' ca cuayá' tso'o ti' ma̱ cha' ntsu'u tsa tyiquee Cristo ña'a̱ Ni ji'na, masi sca cha' tlyu tsa nu ná nchca ca cuayá' tso'o ti' na ji'i̱ laca cha' bi'. Lo'o jua'a̱ nti' na' cha' tyi'i̱ ycui' Ndyosi lo'o lcaa ma̱, cha' ná tyu'u tyiquee ma̱ ji'i̱ xa' la cha' tsiya' ti.

²⁰ Tso'o lacua. Chcui' na cha' tlyu tsa laca ycui' Ndyosi. Nchca tsa ji'i̱ Ni, hasta nde loo la ndu'ni Ni cuentya ji'i̱ lcaa cha' nu ndijña na ji'i̱ Ni; ná nchca ca cuayá' ti' na ñi'ya̱ ndu'ni Ni lcaa cha' bi'. La cui' ycui' Ndyosi ndu'ni cña laja na, hasta nde ne' cresiya ji'na, cha' cua'ni Ni cña nu nti' Ni cua'ni Ni lo'o na.

²¹ Cua'ni tlyu na ji'i̱ ycui' Ndyosi, lcaa na nu tsa tlyu ti ndyu'ni tlyu na ji'i̱ Ni; la cui' ti tlyu tsa laca Ni cuentya ji'i̱ Jesucristo. Jua'a̱ caca ji'i̱ Ni tyucui tyempo nde chalyuu, la cui' ti ná ntsu'u tsa̱ nu tye cha' ji'i̱ Ni tsiya' ti. Jua'a̱ caca cha' tu'ni.