COLOSENSES 4 - Chatino Tataltepec

¹ Cu'ma̱ ngu' xu'na msu, lcaa cha' nu ndyaca ji'i̱ ma̱ lo'o ngu' msu ji'i̱ ma̱, cua'ni liñi ma̱ cha' bi'; tso'o ti cua'ni ma̱ lo'o ngu' bi'. Tyi'u ti' ma̱ cha' lo'o cu'ma̱, ntsu'u nu laca loo la ji'i̱ ma̱, ntucua nu bi' ca su tlyu ca su ntucua ycui' Ndyosi.

² Lcaa cu'ma̱, ná ca taja ti' ma̱, lcaa tsa̱ chcui' ma̱ lo'o ycui' Ndyosi. Lo'o jua'a̱ tii ti ma̱ tyi'i̱ ma̱ lo'o chcui' ma̱ lo'o Ni, jua'a̱ ta ma̱ xlya'be ji'i̱ Ni lo'o chcui' ma̱ lo'o Ni.

³ La cui' tyempo bi' jña ma̱ cha' clyu ti' ji'i̱ ycui' Ndyosi cuentya ji'i̱ ya cha' caja la juersa ji'i̱ ya, cha' chcui' ya cha' tso'o ji'i̱ Cristo lo'o xa' la ñati̱, cha' cuna ngu' cha' bi' masi bilya caja ñi'ya̱ nu cuna ngu' cha' bi' yala la; xqui'ya cha' cua nchcui' tsa na' lo'o ngu' jua'a̱, bi' cha' ntsu'u na' ne' chcua̱ juani.

⁴ Pana chcui' ma̱ lo'o ycui' Ndyosi lacua, cha' xtyucua Ni 'na cha' tya chcui' liñi na' ji'i̱ lcaa cha' bi', ñi'ya̱ nu nga'a̱ cha' chcui' na' ji'i̱.

⁵ Tii ti ti' ma̱ tyi'i̱ ma̱ slo xa' ñati̱ nu bilya xñi cha' ji'i̱ Jesucristo; ná cua'ni ma̱ cha' tonto slo ngu' bi', cha' jua'a̱ lcaa quiya' lo'o ta ngu' tyempo cha' chcui' ma̱ lo'o ngu', li' tso'o tsa ta ma̱ cha' ji'i̱ Jesús lo'o ngu'.

⁶ Laja lo'o nchcui' ma̱ lo'o ngu' ni, tso'o ti chcui' ma̱ ña'a̱ cuayá' nu cua'a̱ jyaca̱ ngu' ji'i̱ cha' nu nchcui' ma̱; tso'o si caja ñi'ya̱ nu xacui̱ ma̱ cha' ji'i̱ lcaa ngu'.

Cha' nu nchcui' Pablo su cua tye ti quityi re

⁷ Yu Tíquico tya'a na ni, ta yu cha' lo'o ma̱, lcaa cha' ñi'ya̱ nu ndyaca jna' ca nde. Ntsu'u tsa tyiquee na ña'a̱ na ji'i̱ yu bi', lo'o la cui' jua'a̱ tya'a ndyu'ni ya cña ji'i̱ nu Xu'na na laca yu; lcaa tsa̱ ndyu'ni yu cña bi', ná nchca taja ti' yu ji'i̱.

⁸ Bi' cha' nda na' ji'i̱ yu cha' ca̱a̱ yu ca su ndi'i̱ ma̱, cha' ca chaa ti' ma̱ chaca quiya' lo'o ña'a̱ ma̱ ji'i̱ yu; nti' na' cha' cacha' yu ji'i̱ ma̱ ñi'ya̱ nu ndyaca ji'i̱ lcaa tya'a ya su ndi'i̱ ya ca nde.

⁹ Stu'ba ti ca̱a̱ yu lo'o Onésimo tya'a quichi̱ tyi ma̱; na tyaca'a tsa nu Onésimo bi' ji'i̱ ya, xqui'ya cha' ná nchca taja ti' yu nchcui' yu cha' ji'i̱ nu Xu'na na. Tyucuaa ngu' bi', ta ngu' cha' lo'o ma̱ ñi'ya̱ nu ndyaca lcaa cha' ca su ndi'i̱ ya ca nde.

¹⁰ Aristarco tya'a ntsu'u na' ne' chcua̱, lo'o yu nda yu xlyo ni'i̱ ji'i̱ ma̱; la cui' jua'a̱ cha' nda Marcos tya'a Bernabé. (Tya tsubi' la cua nda na' sca cha' nu ndyaa ca slo cu'ma̱ cuentya ji'i̱ nu Marcos bi', cha' tso'o ti chcui' ma̱ lo'o yu nu lo'o tyalaa yu slo ma̱).

¹¹ Lo'o jua'a̱ Jesús nu laca xtañi Justo, cua nti' yu chcuicha' yu ji'i̱ ma̱. Tyu̱u̱ tya'a ngu' judío cua ngusñi cha' ji'i̱ Cristo nquicha'; pana nu sna tya'a ti ngu' bi' ni, Aristarco lo'o Marcos lo'o Justo, tsa bi' ti ngu' ntaja'a̱ tya'a̱ lo'o na' ca su ndya'a̱ na' nchcui' na' lo'o xa' la ñati̱ ñi'ya̱ caca cha' lo'o caca ycui' Ndyosi loo ne' cresiya ji'i̱ ñati̱. Lo'o jua'a̱ cua nxtyucua tsa ngu' bi' 'na.

¹² Lo'o yu Epafras tya'a quichi̱ tyi ma̱, nda yu xlyo ni'i̱ ji'i̱ ma̱; stu'ba ti ndya'a̱ yu lo cña ji'i̱ Jesucristo lo'o ya. Lcaa tsa̱ ndijña tsa yu cha' clyu ti' ji'i̱ ycui' Ndyosi cuentya ji'i̱ cu'ma̱, ndijña yu chacuayá' ji'i̱ ycui' Ni cha' ná tya'a̱chu̱' ma̱ tsiya' ti cha' ji'i̱ Ni. Ndi'ya̱ nti' yu, cha' tyucui tyiquee ma̱ tsiya' ti cua'ni ma̱ na laca nu nti' Ni cha' cua'ni ma̱ nde lo yuu chalyuu.

¹³ Jlo ti' na' cha' lye tsa ngua'ni yu cña cha' xtyucua yu ji'i̱ cu'ma̱, jua'a̱ ji'i̱ ngu' quichi̱ Laodicea, jua'a̱ ji'i̱ ngu' quichi̱ Hierápolis tya'a ngusñi na cha' ji'i̱ Cristo.

¹⁴ Lo'o Lucas tya'a tso'o na nu ndyu'ni jo'o ji'i̱ ngu', lo'o jua'a̱ Demas, nda ngu' xlyo ni'i̱ ji'i̱ ma̱.

¹⁵ Lo'o jua'a̱ ta ma̱ xlyo ni'i̱ ji'i̱ ngu' tya'a ngusñi na cha' ji'i̱ Cristo nde quichi̱ Laodicea, lo'o jua'a̱ ji'i̱ ma' Ninfas lo'o lcaa ngu' tya'a na nu ndyu'u ti'i̱ ca slo ma' cusu' bi'.

¹⁶ Chcui' ma̱ lo quityi re clyo, lo'o li' tya ta ma̱ quityi re tsaa ca slo ngu' Laodicea tya'a ndu'ni tlyu na ji'i̱ ycui' Ndyosi. La cui' jua'a̱ ndulo tsa cha' ji'i̱ ma̱ cha' chcui' ma̱ lo chaca quityi nu nda na' cha' ndyalaa slo ngu' Laodicea bi'.

¹⁷ Ndi'ya̱ chcui' ma̱ lo'o yu Arquipo tya'a na: “Cua ngua'a̱ lo ycui' nu Xu'na na jinu'u̱ cha' cua'ni nu'u̱ cña bi' cuentya ji'i̱ ycui' Ni”, ñacui̱ ma̱ ji'i̱ yu, “bi' cha' juani cua'ni cña ti' nu'u̱ cha' caca tso'o cña bi'”.

¹⁸ Su cua ndye quityi re, nde laca sca cha' nu cua nscua na' lo'o ya' ycui' ti na': Pablo laca na', nda na' xlyo ni'i̱ ji'i̱ ma̱; tyi'u ti' ma̱ jna' cha' ntsu'u na' ne' chcua̱ juani. Lo'o jua'a̱ tya cua'ni la ycui' Ndyosi cha' xlya'be lo'o ma̱ tyucui tyempo nu lijya̱ nde loo la. Jua'a̱ caca cha' lacua.