COLOSENSES 3 - Chatino Tataltepec

¹ Pana cu'ma̱ ni, cua ngujui chaca chalyuu cucui ji'i̱ ma̱ xqui'ya cha' cua ngua stu'ba cha' ji'i̱ ma̱ lo'o Cristo; bi' cha' lacua, xcui' na tyu'u tyiquee ma̱ ji'i̱ cua ña'a̱ ca cha' tso'o nu ndyu'u ji'i̱ Cristo lijya̱, cha' ntucua Cristo nde la'a tsu' cui̱ su tlyu su ntucua ycui' Ndyosi.

² Cua'ni cha' tyanu tachaa cha' bi' tyiquee ma̱, nga'aa tyaala' ti' ma̱ lo'o cua ña'a̱ ca cha' cuxi nu ntsu'u nde chalyuu.

³ Nu juani ni, nga'aa ntsu'u cha' ji'i̱ ma̱ lo'o cha' cuxi nu ndyaca nde chalyuu; cua ndyanu tso'o cha' ji'i̱ ma̱ lo'o ycui' Ndyosi xqui'ya Cristo.

⁴ Nu chaca chalyuu cucui nu ngujui ji'i̱ ma̱ xqui'ya Cristo, bi' laca cha' nu ndulo la cha' ji'i̱ ma̱ juani. Stu'ba ti tyatu̱ na lo'o Cristo tsa̱ bi', nu lo'o tyu'u tucua yu lijya̱ yu chaca quiya'; li' taca caca stu'ba cha' ji'i̱ ma̱ lo'o nu Cristo bi' ca su caca tlyu la ycui' yu, ca su ntucua ycui' Ndyosi.

Cua nguxtyanu ngu' chalyuu cusu' ji'i̱ ngu' cha' jua'a̱ ngujui chaca chalyuu cucui ji'i̱ ngu'

⁵ Cua'ni tye ma̱ lcaa cha' cuxi nu ndiya tsa ti' ma̱ ji'i̱ lacua: nga'aa cua'ni cuxi ma̱ lo'o clyo'o xa' ñati̱, nga'aa cua'ni ma̱ cha' suba' lo'o tya'a ñati̱ ma̱, nga'aa tyacui' ti' ma̱ ña'a̱ ma̱ ji'i̱ tya'a ñati̱ ma̱, cua'ni tye ma̱ ji'i̱ lcaa lo cha' cuxi nu ndijña tsa ti' tyiquee ma̱ cha' cua'ni ma̱ ji'i̱, nga'aa tyacui ti' ma̱ ji'i̱ scaa cha' tso'o nu ntsu'u chalyuu. Sca na nu ndacui ti' na ji'i̱ ni, stu'ba ti cuxi laca cha' bi' ñi'ya̱ nti' si cua'ni tlyu na ji'i̱ sca lcui̱ jo'ó ti;

⁶ nchca ñasi̱' tsa ycui' Ndyosi lo'o ñati̱ nu ndu'ni cha' cuxi jua'a̱.

⁷ La cui' tya'a cha' cuxi bi' cua ngua'ni ma̱ lcaa su ndya'a̱ ma̱ nu ngua cua tsubi' la,

⁸ pana juani nga'a̱ cha' xtyanu ma̱ ji'i̱ lcaa cha' cuxi bi'; masi nchca ñasi̱' tsa ma̱ cua sa'ni la, masi lu'ba ti nxu'ba ñasi̱' ma̱ ji'i̱ ycui' ca ma̱ tya li', masi liye' ti' ma̱ ji'i̱ tya'a ñati̱ ma̱ tya tsubi' la, pana nga'aa cua'ni ma̱ jua'a̱ juani. La cui' jua'a̱ nga'aa chcui' ma̱ cuentyu ji'i̱ tya'a ñati̱ ma̱, nga'aa chcui' suba' ma̱ lo'o ngu',

⁹ nga'aa ta ma̱ cha' cuiñi lo'o tya'a ma̱; na cua nguxtyanu ma̱ ji'i̱ chalyuu cusu' ji'i̱ ma̱, jua'a̱ cua nguxtyanu ma̱ ji'i̱ lcaa cha' cuxi nu ngua'ni ma̱ tya tsubi' la,

¹⁰ cha' juani cua ngujui chaca chalyuu cucui ji'i̱ ma̱. Chaca lo ñati̱ cua laca ma̱ juani; cua nguxcutsa'a̱ ycui' Ndyosi lcaa cha' nu ntsu'u ne' cresiya ji'i̱ ma̱ juani, cha' jua'a̱ caca ma̱ ñi'ya̱ nu laca ycui' Ni, nu lo'o ndyaca tsa'a̱ lyiji ma̱ lcaa cha' nu ntsu'u ji'i̱ ycui' Ni.

¹¹ Bi' cha' juani nga'aa ndulo tsa cha' ji'na lo'o tya'a na, masi la cui' ngu' judío laca na, masi si'i ngu' judío laca ma̱; nga'aa ndu'ni cha' masi cua ngulacua̱ na, masi ná ngulacua̱ na; nga'aa ndu'ni cha' si ngu' xa' tsu' laca na, masi ngu' tyaala laca na, masi ngu' nu ndi'i̱ tso'o ti laca na, masi msu nu ngüi'ya ti ñati̱ laca ma̱ cha' cua'ni ma̱ cña ji'i̱ ñati̱ laja ti. Nga'aa ndulo tsa cha' bi' ji'na juani, cha' sca ti Cristo laca nu ndulo tsa cha' ji'i̱ cuentya ji'na. Ndi'i̱ Cristo lo'o lcaa ñati̱ ji'i̱ Ni, ñi'ya̱ nu laca ngu', macala su ndi'i̱ ngu'.

¹² Ñati̱ ji'i̱ ycui' Ndyosi laca cu'ma̱ lacua; na cua ngusubi Ni ji'i̱ ma̱, xqui'ya cha' ntsu'u tsa tyiquee Ni ña'a̱ Ni ji'i̱ ma̱. Bi' cha' ntsu'u cha' cua'ni tya'na ti' ma̱ ji'i̱ xa' ñati̱; tso'o ti cua'ni ma̱ lo'o ngu', ni ná cua'ni tyucuaa ti' ma̱ lo'o ngu', masi tiya' ti chcui' ma̱ lo'o ngu', jua'a̱ talo tsa tyiquee ma̱ ji'i̱ ngu'.

¹³ Talo tyiquee ma̱ ji'i̱ xa' la tya'a ñati̱ ma̱ lacua, ña'a̱ cuayá' nu cui'ya ma̱ cha' clyu ti' ji'i̱ ngu' lo'o ntsu'u qui'ya ji'i̱ ngu' lo'o ma̱. Tsa ña'a̱ nu ndyi'ya nu Xu'na na cha' clyu ti' ji'i̱ ma̱, jua'a̱ nga'a̱ cha' cua'ni clyu ti' ma̱ ji'i̱ tya'a ñati̱ ma̱.

¹⁴ La cui' jua'a̱ tso'o tsa caca tyiquee ma̱ ña'a̱ ma̱ ji'i̱ xa' la tya'a ñati̱ ma̱, cha' jua'a̱ stu'ba tsa caca cha' ji'i̱ ma̱ lo'o ngu' li'.

¹⁵ Ti̱ ti tyi'i̱ tyiquee ma̱ lacua, xqui'ya cha' ycui' Ndyosi laca loo ji'i̱ ma̱; cua ngusubi Ni ji'i̱ ma̱, jua'a̱ ji'i̱ xa' la tya'a ñati̱ ma̱, cha' caca ma̱ sca ti taju ñati̱ cuentya ji'i̱ ycui' Ni. Tso'o si lcaa hora tya ma̱ xlya'be ji'i̱ ycui' Ni xqui'ya lcaa lo cha'.

¹⁶ Nga'a̱ cha' tyanu tyucui cha' ji'i̱ Cristo ca ne' cresiya ji'i̱ ma̱. Tso'o tsa ndyu'u cha' bi', bi' cha' tso'o ti culu'u ma̱ cha' bi' ji'i̱ tya'a ma̱ ña'a̱ cuayá' nu cuna tso'o lcaa ngu'. La cui' jua'a̱ cula tu'ba ma̱ lcaa lo ji̱i̱ nu ntsu'u ji'i̱ ycui' Ndyosi, masi ji̱i̱ salmo nu nscua lo quityi nu ngua sa'ni, masi cua ña'a̱ ca ji̱i̱ nu ca'ya hique ma̱ nu nchcui' cha' ji'i̱ ycui' Ndyosi; cula tu'ba ma̱ ji̱i̱ cha' cuna ycui' Ndyosi, xqui'ya cha' tso'o tsa ntsu'u tyiquee ma̱ ña'a̱ ma̱ ji'i̱ ycui' Ni.

¹⁷ Lcaa ña'a̱ cña nu nti' ma̱ cha' cua'ni ma̱, lcaa ña'a̱ cha' nu nti' ma̱ chcui' ma̱ lo'o ñati̱, chacuayá' ji'i̱ Jesús nu Xu'na na cua'ni ma̱ ji'i̱ lacua. Lo'o jua'a̱ la cui' hora bi' tya ma̱ xlya'be ji'i̱ ycui' Ndyosi Sti na xqui'ya Jesús.

Cha' tso'o nu cua'ni na lo'o laca Cristo loo ji'na

¹⁸ Cu'ma̱ ngu' cuna'a̱ ni, taquiya' ma̱ ji'i̱ clyo'o ma̱. Ndulo tsa cha' ji'i̱ ma̱ cha' cua'ni ma̱ jua'a̱, cha' cua ntsu'u cha' ji'i̱ ma̱ lo'o Cristo nu Xu'na na.

¹⁹ Cu'ma̱ ngu' qui'yu ni, caca tso'o tyiquee ma̱ ña'a̱ ma̱ ji'i̱ clyo'o ma̱; ná cua'ni tyaala ma̱ ji'i̱ clyo'o ma̱.

²⁰ Cu'ma̱ ngu' cuañi' ni, nga'a̱ cha' taquiya' ma̱ cña nu culo ngu' cusu' ji'i̱ ma̱, cha' tso'o tsa nti' nu Xu'na na lo'o ndu'ni ma̱ jua'a̱.

²¹ Cu'ma̱ ngu' cusu' nu ntsu'u sñi' ma̱ ni, ná su'ba ñasi̱' ma̱ ji'i̱ sñi' ma̱, cha' ná tso'o si caca taja ti' ngu' bi' xqui'ya ma̱.

²² Cu'ma̱ ngu' msu nu ndyu'ni cña ji'i̱ ngu' laja ti, taquiya' ma̱ lcaa cña nu culo ñati̱ nu laca loo ji'i̱ ma̱ nde chalyuu. Si'i na cua'ni ti ma̱ jua'a̱ cha' tyanu tso'o cha' ji'i̱ ma̱ lo'o ngu' lo'o ndu̱ ti ngu' slo ma̱, cha' ndyi'ya ngu' cuentya ji'i̱ ma̱ si ndu'ni ma̱ cña; pana tyucui tyiquee ma̱ cua'ni ma̱ cña bi', xqui'ya cha' lcaa hora ndube ti' ma̱ ji'i̱ ycui' nu Xu'na na.

²³ Cua ña'a̱ ca cña nu cua'ni ma̱, lubii tsa cña cua'ni ma̱ li'. Ndi'ya̱ culacua ti' ma̱: ñi'ya̱ laca si cña ji'i̱ ycui' Ndyosi nu Xu'na na laca nu ndyu'ni ma̱, nga'aa si'i cña ji'i̱ ñati̱ chalyuu ti.

²⁴ Cua jlo ti' ma̱ cha' ycui' nu Xu'na na laca nu nguxco'o cha' tso'o nu tyacua ji'i̱ scaa ma̱ lo'o cua tye ti cha'. Cristo laca nu Xu'na ma̱ nu chañi ca; cuentya ji'i̱ ycui' Cristo bi', bi' cha' ndyu'ni ma̱ cña.

²⁵ Pana xcube' ycui' Ndyosi ji'i̱ cua ña'a̱ ca ñati̱ nu ndu'ni cha' cuxi; stu'ba ti ndu'ni cuayá' Ni ji'i̱ lcua ti ña'a̱ ñati̱, masi ñati̱ tonu, masi ñati̱ sube.