COLOSENSES 2 - Chatino Tataltepec

¹ Ta na' sca cha' lo'o ma̱, cha' caca cuayá' ti' ma̱ cha' lye tsa ngua'ni na' cña cuentya ji'i̱ ma̱, lo'o jua'a̱ cuentya ji'i̱ ngu' quichi̱ Laodicea, lo'o jua'a̱ cuentya ji'i̱ tyu̱u̱ tya'a ngu', masi tya lyiji tyuloo ngu' 'na.

² Jua'a̱ ndyu'ni na' cña, cha' caca tyucui ti' tyiquee ngu', cha' stu'ba ti caca tyiquee ngu' lo'o xa' la tya'a ngu'. Nga'aa cutsi̱i̱ ngu' nu lo'o chcui' ngu' cha' ji'i̱ Cristo li', xqui'ya cha' tso'o tsa nchca cuayá' ti' ngu' ji'i̱ cha' bi'. Jua'a̱ li' quijeloo cha' ji'i̱ ngu', cha' ycui' Cristo laca cha' bi', la cui' cha' ji'i̱ ycui' Ndyosi nu bilya caca cuayá' ti' ngu' ji'i̱ cua sa'ni la.

³ Xqui'ya cha' ngusñi na cha' ji'i̱ Cristo, bi' cha' taca quijeloo cha' ji'na macala su ntucua quiya' lcaa cha' nu ntsu'u tyiquee ycui' Ndyosi, masi lcaa cha' nu nda'ya hique Ni cha' cua'ni Ni nde chalyuu.

⁴ Cua nti' tsa na' cha' ná tucui cñilo'o ji'i̱ ma̱, masi nti' ma̱ cha' tso'o tsa nchcui' ngu' bi'; bi' cha' laca nchcui' na' lo'o cu'ma̱ jua'a̱.

⁵ Masi juani ti ná ndi'i̱ na' ca su ndi'i̱ ma̱, pana lu'ba ti ndyi'u ti' na' ji'i̱ cu'ma̱. Tso'o tsa nti' na' lo'o ndyuna na' cha' tso'o tsa ngusñi ma̱ cha' ji'i̱ Cristo. Lo'o jua'a̱ tso'o tsa nti' na' cha' tso'o ti ndi'i̱ ma̱ lo'o xa' la ngu' tya'a ngusñi ma̱ cha' ji'i̱ ycui' Ndyosi.

⁶ Na cua ngüiñi ti' ma̱ lo'o Jesucristo cha' caca Ni nu Xu'na ma̱, bi' cha' cui'ya ma̱ cuentya cha' stu'ba ti caca tyiquee ma̱ lo'o Ni lcaa tsa̱ lo'o tyi'i̱ ma̱ chalyuu.

⁷ Jua'a̱ xñi tso'o ma̱ cha' ji'i̱ Jesús, cha' ca cuayá' ti' ma̱ lcaa cha' nu laca su̱u̱ cha' bi'; cha' nu Jesús ni, bi' laca su̱u̱ lcaa cha' nu cua ngusñi na, la cui' ti cha' nu cua ngulu'u ngu' ji'i̱ ma̱ tya tsubi' la. Lo'o jua'a̱ lcaa tsa̱ tya ma̱ xlya'be ji'i̱ nu Cristo bi' li'.

Xqui'ya Cristo cua ngulacua̱ ngu'

⁸ Cui'ya tso'o ma̱ cuentya lacua, cha' ná tucui taca cñilo'o ji'i̱ ma̱ lo'o cua ña'a̱ ca cha' cuiñi nu chcui' ngu' lo'o ma̱, masi tajua' tsa chcui' ngu' bi'. Si'i ycui' Cristo nu ntucua quiya' cha' ji'i̱ ngu' lo'o nchcui' ngu' jua'a̱; bi' laca cña cua̱ ti, bi' laca cha' cuiñi nu nchcui' ñati̱ chalyuu ti, masi nchcui' ngu' cha' ji'i̱ sca jo'ó, masi nchcui' ngu' cha' ji'i̱ sca cui'i̱ nu ntsu'u nde chalyuu ti.

⁹ Pana nu Cristo bi' ni, ñi'ya̱ laca tyucui ña'a̱ ycui' Ndyosi, jua'a̱ laca yu lo'o ya̱a̱ yu nde chalyuu.

¹⁰ Ycui' Cristo laca loo ji'i̱ lcaa nu laca xu'na na, jua'a̱ ji'i̱ lcaa cui'i̱ nu laca loo; lo'o cu'ma̱ ni, xqui'ya cha' cua ntsu'u cha' ji'i̱ ma̱ lo'o Cristo, bi' cha' cua ngua tyucui ti' tyiquee ma̱, cua ngujui tyucui chalyuu ji'i̱ ma̱.

¹¹ La cui' jua'a̱ xqui'ya Cristo cua ngulacua̱ Ni ji'i̱ ma̱; ni si'i na ngusi'yu lo quiji̱ ma̱ lo'o ngulacua̱ ma̱ ñi'ya̱ nu ndu'ni ngu' judío lo'o sñi' ngu', ycui' Cristo ngulacua̱ ji'i̱ ma̱ lo'o cua ngua'ni lyaá Ni ji'i̱ ma̱ ji'i̱ qui'ya nu ntsu'u ji'i̱ ma̱ nde chalyuu.

¹² Lo'o cua ntyucuatya ma̱ ni, ñi'ya̱ laca si cua nguatsi' ma̱ ne' cuaá lo'o Cristo, jua'a̱ laca ma̱ lo'o Cristo; lo'o li' ñi'ya̱ si cua ndyu'ú ma̱ stu'ba ti lo'o Cristo chaca quiya', jua'a̱ laca cha' bi' li'. Ycui' Ndyosi laca nu ndu'ni cha' tyu'ú ma̱, xqui'ya cha' ntsu'u cha' ji'i̱ ma̱ lo'o Ni.

¹³ Ñi'ya̱ laca si cua ngujuii ma̱, jua'a̱ ngua cu'ma̱, xqui'ya cha' cua ntsu'u tsa qui'ya ji'i̱ ma̱ lo'o ycui' Ndyosi. Lo'o jua'a̱ ná ngujui ñi'ya̱ nu culacua̱ ycui' Ndyosi ji'i̱ ma̱ li', xqui'ya cha' ná ntsu'u cha' ji'i̱ ma̱ tsiya' ti lo'o Ni nu ngua tyempo bi'. Pana juani cua ngua'ni Ni cha' tyu'ú ma̱ chaca quiya' ñi'ya̱ nu ndyu'ú ycui' Cristo. Cua ngüi'ya Ni cha' clyu ti' ji'na ji'i̱ lcaa qui'ya nu ntsu'u ji'na lo'o Ni.

¹⁴ Cua ngua'ni tye Ni cha' ji'i̱ quityi bi' su nscua lcaa cña nu nga'a̱ cha' cua'ni na cuentya ji'i̱ ycui' Ndyosi. Na cua ndyanu yabe' chu̱' na xqui'ya quityi bi'; pana tya lo'o ngujui'i̱ ca'a̱ ngu' ji'i̱ Cristo lo crusi, tya li' cua ngüityi̱ Ni qui'ya bi' ji'na tsiya' ti.

¹⁵ La cui' ti lo crusi bi' cua ntiji̱loo Cristo ji'i̱ lcaa nu laca xu'na na, jua'a̱ ji'i̱ lcaa cui'i̱ nu laca loo ji'na. Lo'o ngua'ni chi̱ Ni loo Cristo xqui'ya cha' cua ntiji̱loo yu ji'i̱ lcaa xu'na na bi', li' ndyalo'o Cristo ji'i̱ xu'na bi' laja ñati̱ nu lijya̱ qui'i ti, cha' ña'a̱ cui'ya lcaa ñati̱ cha' cua ntiji̱loo Cristo ji'i̱ lcaa xu'na bi'.

Tso'o tsa laca cua ña'a̱ ca cha' tso'o nu ndyu'u ca slo ycui' Ndyosi

¹⁶ Nga'aa ta ma̱ chacuayá' cha' culo xa' ñati̱ cña ji'i̱ ma̱ lacua, na laca nu cacu ma̱, na laca nu co'o ma̱ cha' cua'ni tacati ma̱ lo'o ycui' Ndyosi. La cui' jua'a̱ ná tso'o laca si ñacui̱ ngu' ji'i̱ ma̱ ni tsa̱ laca nu cua'ni ma̱ ta'a; masi ta'a lo'o ndi'i̱ cña' na nu ndacui snu' tsa̱ ti, masi ta'a lo'o cuañi' co', masi chaca ta'a nu ndu'ni ngu' nu ndacui yija̱ ti, ná ntsu'u cha' cua'a̱ jyaca̱ ma̱ ji'i̱ ngu' bi' tsiya' ti, nti' na'.

¹⁷ Sa'ni la xcui' ntsu'u ta'a bi' nde chalyuu, cha' taca ca cuayá' ti' ngu' scaa cha' nu ngua ti' ycui' Ndyosi chcui' lo'o ngu' nu ngua tya li'; pana juani ni, cua ñaa ycui' Cristo chalyuu, bi' cha' nga'aa nti' na cha' cusu' bi'. Cua na'a̱ na ji'i̱ ycui' Cristo, bi' laca nu chañi ca.

¹⁸ Ná cube ti' ma̱ ji'i̱ cua ña'a̱ ca ñati̱ nu cua'ni tyucuaa ti' lo'o ma̱, ngu' nu tacati la ndu'ni ycui' ngu', nti' ngu', cha' ndyu'ni tlyu ngu' ji'i̱ sca xca̱ nu ntsu'u ji'i̱ ycui' Ndyosi ca nde cua̱; si'i ji'i̱ ycui' Ndyosi ndyu'ni tlyu ngu' bi'. Ñati̱ nu ndu'ni jua'a̱ ni, nti' ngu' cha' xa' la cha' ji'i̱ ycui' Ndyosi cua ngulu'uloo ji'i̱ ngu'. Lye tsa ndu'ni tyucuaa ti' ngu' bi' lo'o tya'a ngu', masi ná ntsu'u cha' cua'ni ngu' bi' jua'a̱, cha' ña'a̱ ti tya ntsu'u cha' cuxi ne' cresiya ji'i̱ ngu' bi';

¹⁹ nga'aa ndaquiya' ngu' bi' ji'i̱ Cristo nu laca loo la ji'na. Cristo laca loo ji'i̱ lcaa taju ñati̱ nu ndu'ni tlyu ji'i̱ ycui' Ndyosi tsa tlyu ti; bi' cha' tso'o tsa stu'ba cha' ji'na lo'o xa' la tya'a ñati̱ na, bi' cha' tso'o la ndyanu tachaa cha' ji'na lo'o Ni, cha' quiña'a̱ la cña ndyu'ni Cristo ne' cresiya ji'i̱ ñati̱ ji'i̱ Ni, tsa ña'a̱ nu nti' ycui' Ndyosi cha' caca.

²⁰ Pana cu'ma̱ ni, cua nguxtyanu ma̱ ji'i̱ xa' la jo'ó nu ngua xu'na ma̱ cua tsubi' la, cua nguxtyanu ma̱ ji'i̱ lcaa cha' nu jlya tsa ti' ñati̱ chalyuu ji'i̱. Tya lo'o ngujuii Cristo lo crusi cha' cua'ni tye ji'i̱ cha' bi', tya li' cua nguxtyanu ma̱ ji'i̱ cha' bi'. Nga'aa nti' cha' tya cua'ni ma̱ ñi'ya̱ nu ndu'ni xa' la ñati̱ chalyuu; nga'aa nti' cha' taquiya' ma̱ ji'i̱ lcaa xa' la cña nu nclyo ngu' ji'i̱ ma̱,

²¹ nu lo'o ñacui̱ ngu' ndi'ya̱: “Tacati tsa nu cua. Ná cala' ma̱ ji'i̱, ná cacu ma̱ ji'i̱”, nacui̱ ngu'.

²² Lcaa na bi' ni, na culiji ti laca na bi'; ya' nu cua nguliji bi', nga'aa ña'a̱ na ji'i̱ li'. Nu lo'o nchcui' ngu' jua'a̱, sca cña nu ndyu'ni ñati̱ chalyuu ti laca bi'.

²³ Chañi laca cha' tso'o tsa ndyu'u cha' bi' ngua ti' na nquicha', ndatsaa tsa cha' bi' ji'na cha' cua'ni tlyu na ji'i̱ jo'ó bi'; lo'o jua'a̱ bi' laca nu ndu'ni tsa cha' caca tacati na, cha' xcube' na ji'i̱ tyucui ña'a̱ na. Jua'a̱ ndu'ni cha' bi' tu'ni; pana si'i jua'a̱ nga'a̱ cha' caca, nu cati̱ cha' cua'ni na cha' cuxi nu tiji̱' tsa ti' na ji'i̱.