APOCALIPSIS 9 - Chatino Tataltepec

¹ Li' ngula'á xca̱ nu nchca ca'yu lo'o cui'chcua̱ ji'i̱; hora ti na'a̱ na' ngua'ya sca nu cuxi nde chalyuu. Masi cua ngua yu sca nu laca loo nde cua̱ nquicha', pana ndyú yu lo yuu li', ñi'ya̱ ndyú sca cuii. Cua ngujui ya' ji'i̱ yu cha' saala yu to' tyuquee su ndi'i̱ lcaa nu cuiñaja.

² Ngusaala yu to' tyuu, quiña'a̱ tsa sñii ntyucua li'; ñi'ya̱ nti' sca horno tonu, jua'a̱ ntyucua sñii bi'. Ngua talya xee cua̱ li', ndacu̱' ji'i̱ xee xqui'ya sñii nu ntyucua to' tyuu bi'.

³ Laja sñii bi' ntyucua sca taju tlyu tscu', ngua'ya ni' lo yuu. Ntsu'u chacuayá' ji'i̱ ni' caca ni' tyaala, ñi'ya̱ laca chuni'i̱ tyaala.

⁴ Nga'aa ngujui chacuayá' ji'i̱ ni' cua'ni ñu'u̱ ji'i̱ su quii, ji'i̱ yaca ndu̱. Ni sca na nu ndyataa ngu', ná ca cua'ni ñu'u̱ ni' ji'i̱; sca ti chacuayá' ngujui ji'i̱ ni' cha' ta xi nu ti'í ji'i̱ nu ngu' cuxi bi', ñati̱ nu ná nscua cuayá' ji'i̱ ycui' Ndyosi nde tyaca̱a̱ ngu'.

⁵ Ná ngua ji'i̱ ni' cujuii ni' ji'i̱ ñati̱, sca ti cha' ti'í tsa xcube' ni' ji'i̱ ngu' sa ca'yu co' ti; ñi'ya̱ lo'o ndacu chuni'i̱ ji'na, jua'a̱ ti'í tsa xcube' tscu' bi' ji'i̱ ngu'.

⁶ Cuayá' ca'yu co', li' culana ngu' ñi'ya̱ caca cha' cajaa ngu', pana ná nquijeloo cha' bi' ji'i̱ ngu'; ca ti' ngu' cajaa ngu', pana tya lyiji tsa cha' cajaa ngu'.

⁷ Nu tscu' bi' ni, cua laca ngua'ni cho'o ni' ji'i̱ ni' cha' xu̱u̱ tya'a ni' lo'o ñati̱, ñi'ya̱ laca cuayu nu ndu̱ tajua' ti cha' cusu̱u̱. Sca sne' ntucua scua' que ni' nu ñi'ya̱ sne' oro ña'a̱; pana cloo ni' ni, ñi'ya̱ ña'a̱ cloo ñati̱ ña'a̱ cloo ni' bi'.

⁸ Ñi'ya̱ ña'a̱ quicha̱' hique sca nu cuna'a̱, jua'a̱ ña'a̱ quicha̱' hique ni'; ñi'ya̱ ña'a̱ la'ya cuichi, jua'a̱ ña'a̱ la'ya ni'.

⁹ Lo'o jua'a̱ cua ndyacu̱' tyiquee ni' ñi'ya̱ si lo'o sca lata chcua̱. Lye ndañi lu'be ni' ndacui ni', ñi'ya̱ lo'o ndañi cuayu nu ntojolaqui carreta ndya'a̱ cusu̱u̱.

¹⁰ Lo'o jua'a̱ ntucua xtyi'i̱ ni' ñi'ya̱ ntucua xtyi'i̱ chuni'i̱; la cui' jua'a̱ ntucua ltsu' xtyi'i̱ ni', cha' lo'o xtyi'i̱ ni' xcube' ni' ji'i̱ ñati̱ chalyuu ña'a̱ cuayá' tye ca'yu co'.

¹¹ Ntsu'u nu laca loo ji'i̱ ni', la cui' nu ntucua tlyu ca ne' tyuquee bi'; Abadón naa nu bi' cha'cña ji'i̱ ngu' judío, lo'o jua'a̱ Apolión naa nu bi' cha'cña ji'i̱ ngu' griego, nu nti' ñacui̱ cha'cña ji'na: ycui' nu ndu'ni ñu'u̱ ji'i̱ chalyuu.

¹² Cua ndye tsaca cha' nu chiya'a̱ tsa ndañi. Tya lyiji tyu'u tucua tya tyucuaa tya'a cha' nu chiya'a̱ tsa ndañi.

¹³ Li' ngula'á xca̱ nu nchca scuá lo'o cui'chcua̱ ji'i̱ yu. Lo'o ndyuna na', li' nchcui' ñati̱ ca su ndu̱ mesa tlyu oro nu nscua nde loo su ntucua ycui' Ndyosi. Ca ta'a jacua jyaca̱ mesa nguañi nchcui' ñati̱ bi',

¹⁴ nchcui' bi' lo'o xca̱ nu nchca scuá nu ntsu'u cui'chcua̱ ya' yu: ―Clyaá ma̱ ji'i̱ nu jacua tya'a xca̱ nu ndi'i̱ ndyaaca̱' ca to' sta'a̱ tlyu, sta'a̱ Eufrates bi'.

¹⁵ Lo'o jua'a̱ ngua li'. Nu lo'o ngulaá nu jacua tya'a ngu' xca̱ bi', hora ti ngutu'u ndyaa xca̱ bi', cha' cujuii ji'i̱ sa cla'be ñati̱ tyucui ña'a̱ chalyuu. Cua laca ndu̱ yala xca̱ bi' cha' cujuii ji'i̱ ngu' lo'o caca la cui' hora, masi la cui' tsa̱, masi la cui' co', masi la cui' yija̱ cha' cua'ni Ni cña bi'.

¹⁶ Lo'o jua'a̱ cua laca ngujui cha' 'na, ni tsa lo tya'a sendaru nu ntyucua hichu̱' cuayu ndya'a̱ cusu̱u̱ tya'a lo'o nu jacua tya'a xca̱ bi'; tucua siyento miyon tya'a sendaru caca bi'.

¹⁷ La cui' laja lo'o nchcui' xcalá na', li' na'a̱ na' nu tyu̱u̱ tya'a cuayu bi', lo'o jua'a̱ na'a̱ na' ji'i̱ ñati̱ nu ntucua hichu̱' ni'. Ñi'ya̱ ña'a̱ quii', cha' ngatsi nga'a ti ña'a̱, jua'a̱ ña'a̱ chcua̱ ndyacu̱' lo tyiquee ngu'; jua'a̱ lo'o chcua̱ cuaa ña'a̱ nga'a̱ tyiquee ngu' bi'. Ñi'ya̱ scua' que cuichi, jua'a̱ ña'a̱ scua' que cuayu bi'. Lo'o jua'a̱ nde tyuu tu'ba ni' ndyu'u quii' lo'o sñii jua'a̱ ti, lo'o sñii ngatsi nu chiya'a̱ tsa xtyi'i ndyu'u.

¹⁸ Sa cla'be ti ñati̱ chalyuu ngujuii xqui'ya quicha nu nguxtyanu quii' bi', nu nguxtyanu sñii bi', nu nguxtyanu sñii ngatsi nu chiya'a̱ tsa xtyi'i bi'; la cui' quicha nu ndu'u tyuu tu'ba cuayu laca bi'.

¹⁹ Nde tyuu tu'ba ni', lo'o jua'a̱ nde lo xtyi'i̱ ni', ndacua ndyiji juersa ji'i̱ ni' cha' cua'ni ni' cha' cuxi; taca ji'i̱ ni' ta cha' ti'í ji'i̱ ñati̱ lo'o xtyi'i̱ ti ni' cha' ntucua ltsu' lo xtyi'i̱ ni', ñi'ya̱ nu ntsu'u ji'i̱ cuaña.

²⁰ Pana ña'a̱ ti tya ngua'ni ngu' cha' cuxi, nu ñati̱ nu ná ngujuii lo'o quicha bi'; ná nguxtyanu ngu' cha' cuxi nu ndu'ni ngu'. Ña'a̱ ti tya ndyu'ni tlyu ngu' ji'i̱ cui'i̱ cuxi, jua'a̱ ji'i̱ lcui̱ jo'ó nu ndya' lo'o oro, masi jo'ó ndya' lo'o plata, masi jo'ó ndya' lo'o chcua̱ ngatsi, masi jo'ó ndya' lo'o quee, masi jo'ó ndya' lo'o yaca ti; ña'a̱ ti ndyu'ni tlyu ngu' ji'i̱ jo'ó nu ná nchca ji'i̱ ña'a̱ ji'na, ni ná nduna cha' nu nchcui' na, ni ná nchca ji'i̱ jo'ó bi' tya'a̱.

²¹ Lo'o jua'a̱ ná ntaja'a̱ ngu' cua'ni tye ngu' cha' ndujuii ngu' ji'i̱ tya'a ñati̱ ngu', ni ná ndye cha' ndu'ni cucha'a̱ ngu', ni ná ndye cha' ndu'ni suba' ngu' lo'o xa' nu cuna'a̱, ni ná ndye cha' ntyucuaana ngu'.