APOCALIPSIS 8 - Chatino Tataltepec

Nu cuu oro nu nguxcua̱a̱ chaca xca̱ ji'i̱ ycui' Ndyosi lo yuu

¹ Lo'o li' nu nchca cati quiya' ngusuu nu ñi'ya̱ ña'a̱ xlya' bi' nguiña' nu nga'a̱ to' quityi ngutu bi'. Lo'o ngua jua'a̱, ti̱ ti ndi'i̱ lcaa na su ntucua ycui' Ndyosi li'.

² Cuati na'a̱ na' ji'i̱ tya tyacati tya'a xca̱ nu ndu̱ cña nde loo ycui' Ndyosi; cua nda ngu' cati tya'a cui'chcua̱ ji'i̱ ngu' xca̱ bi' cha' cula'á ngu'.

³ Li' ya̱a̱ chaca yu xca̱ nu ndyi'ya cuu oro lijya̱. Ya̱a̱ bi' ngutu̱ to' mesa su ntucua msta̱, la cui' mesa nu ndu̱ nde loo su ntucua yaca xlya tlyu. Cua ngujui quiña'a̱ yana jo'ó ji'i̱ yu cha' taqui̱ yu lo mesa su ntucua msta̱ bi'. La cui' tyempo nu lo'o nchcui' ngu' lo'o ycui' Ndyosi, lcaa ñati̱ nu ntsu'u cha' ji'i̱ lo'o ycui' Ndyosi ni, bi' tyempo laca nu ndyaqui̱ yana jo'ó bi'.

⁴ Lo ya' xca̱ nu ndu̱ slo ycui' Ndyosi, ca bi' ndatu̱ sñii yana jo'ó nu ndyaqui̱ ne' cuu bi'; stu'ba ti ndyatu̱ sñii bi' ndyalo'o cha' nu nchcui' ñati̱ bi' lo'o Ni. Jua'a̱ ndyu'ni tlyu ngu' bi' ji'i̱ ycui' Ndyosi.

⁵ Li' ndyalo'o xca̱ ji'i̱ cuu bi', ngusu'ba yu quii' nchcubi' ne', ngu̱ yu ji'i̱ cuu ndyaa cha' tyú nde lo yuu chalyuu. Li' lye tsa nguañi nde chalyuu, lye tsa nguañi nchcui' tyi'yu, lye tsa ndyubii, lye tsa ngulacui̱ chalyuu.

Nu cati tya'a cui'chcua̱

⁶ Nu cati tya'a xca̱ nu cua na'a̱ na' tsa̱ ni, nguxana ngula'á ngu' lo'o cui'chcua̱ nu ntsu'u ya' ngu' li'.

⁷ Li' ngula'á xca̱ nu nchca clyo lo'o cui'chcua̱ ji'i̱ yu; hora ti ndyalú tyo quee lo'o quii' nde lo yuu li'. Lo'o ndyalú bi' hichu̱' ñati̱, li' ndyalú tañi ngu'. Sa cla'be chalyuu ndye ndyaqui̱ li', jua'a̱ ndyaqui̱ sa cla'be yaca ndu̱, ndye ndyaqui̱ sa cla'be su quii ji'i̱ ngu'.

⁸ Li' ngula'á xca̱ nu nchca tyucuaa lo'o cui'chcua̱ ji'i̱; hora ti ndyacua̱ sca ca'ya cua̱, ña'a̱ tsaca chu̱' ca'ya ndyaqui̱ ngua'ya nde lo tyujo'o. Li' sa cla'be ti hitya tyujo'o ngua tañi,

⁹ sa cla'be ti na lu'ú nu ntsu'u lo hitya tyujo'o ngujuii, sa cla'be lcaa yaca ni'i̱ nu ntsu'u chalyuu ndye nguti̱ li'.

¹⁰ Li' ngula'á xca̱ nu nchca tyuna lo'o cui'chcua̱ ji'i̱; hora ti ndyalú sca cuii tlyu nu ntsu'u nde cua̱, nu ndyaqui̱ ñi'ya̱ ndyaqui̱ quityee. Ndyú cuii bi' ngua'ya nde lo hitya sta'a̱, nde su ntyucua hitya tyucui ña'a̱ chalyuu. Li' ngunu'u̱ sa cla'be hitya tso'o nu ntsu'u chalyuu.

¹¹ Cuii Quixi̱' Clyaa' naa cuii tlyu bi', cha' nda clyaa' nu ngua'ya sa cla'be ti hitya nu ndyi'yu ngu'. Quiña'a̱ ñati̱ ngujuii xqui'ya cha' cua ndyi'o ngu' hitya bi', cha' clyaa' tsa hitya bi'.

¹² Li' ngula'á xca̱ nu nchca jacua lo'o cui'chcua̱ ji'i̱. Li' ngunu'u̱ lcaa xee tlyu nu ntsu'u nde cua̱, cha' sa cla'be ti xee ndyubi' li'; lo'o xee cuichaa, lo'o xee co', lo'o xee cuii, sa cla'be ti xee ndyubi'. Sa cla'be ti nde cua̱, sa cla'be ti nde talya, nga'aa nda bi' xee.

¹³ Li' na'a̱ na' su ndacui sca xca̱ cla'be cua̱ nu ñi'ya̱ ña'a̱ cua'ya ña'a̱ bi'. Ndyuna na' cha' cui̱i̱ tsa ngusi'ya yu: ―Tya'na tsa cu'ma̱ lo'o cula'á tya xna tya'a xca̱ bi' lo'o cui'chcua̱ ji'i̱ ngu' ca tiya' la xi; tya'na tsa caca lcaa ñati̱ nu tya ndyanu chalyuu lo'o cañi bi' li'.