APOCALIPSIS 7 - Chatino Tataltepec

Ni tsa lo tya'a ngu' Israel nu cua nga'a̱ cuayá' ji'i̱ ycui' Ndyosi nde tyaca̱a̱ ngu'

¹ Tiya' la li' na'a̱ na' ji'i̱ jacua tya'a xca̱ ji'i̱ ycui' Ndyosi; na'a̱ na' nde quiya' chalyuu, nde jacua se'i̱ su ndu̱ nu jacua tya'a ngu' xca̱ bi'. Ndaca'a xca̱ bi' ji'i̱ ca ta'a jacua cui'i̱ nu nclyatu'u lo chalyuu; nga'aa nda ngu' xca̱ bi' chacuayá' culatu'u cui'i̱ bi', masi nde lo yuu, masi nde tyujo'o, ni sca chu̱' yaca ná culatu'u cui'i̱.

² Li' na'a̱ na' ndu'u tucua chaca yu xca̱, nu ndu'u tucua lijya̱ nde su ntyucua cuichaa. Ndyi'ya yu cuayá' nu cua nda ycui' Ndyosi ji'i̱ yu, cha' cua'a̱ yu hichu̱' ñati̱ ji'i̱ ycui' Ndyosi; la cui' Ni nu nda chalyuu ji'na laca bi'. Cui̱i̱ nchcui' yu lo'o nu jacua tya'a xca̱ nu ntsu'u chacuayá' ji'i̱ cha' cua'ni ñu'u̱ ji'i̱ chalyuu lo'o ji'i̱ tyujo'o.

³ Ndi'ya̱ nchcui' yu lo'o ngu' xca̱ bi' li': ―Ná cala' ma̱ chalyuu, ná cala' ma̱ tyujo'o, ná cala' ma̱ yaca; tya lyiji cua'a̱ ycui' Ndyosi cuayá' nde tyaca̱a̱ ñati̱ nu ndyu'ni cña ji'i̱ ycui' Ni.

⁴ Li' ngulu'u ngu' 'na ni tsa lo tya'a ñati̱ nu cua ngua'a̱ ycui' Ndyosi cuayá' nde tyaca̱a̱ ngu'; sca siyento ntucua tu'ba ntucua jacua mil tya'a ñati̱ laca bi'. Tyu'u ngu' bi' ji'i̱ nu tii tyucuaa tya'a taju ngu' Israel, nu sca xtañi laca ji'i̱ sca taju ngu':

⁵ Tyu'u tii tyucuaa mil tya'a ñati̱ ji'i̱ ngu' tya'a xtañi Judá nu ngua'a̱ ycui' Ndyosi cuayá' ji'i̱, cuati tyu'u chaca tii tyucuaa mil tya'a ñati̱ ji'i̱ ngu' tya'a xtañi Rubén, cuati tyu'u tii tyucuaa mil tya'a ñati̱ ji'i̱ ngu' tya'a xtañi Gad,

⁶ cuati tyu'u tii tyucuaa mil tya'a ñati̱ ji'i̱ ngu' tya'a xtañi Aser, cuati tyu'u tii tyucuaa mil tya'a ñati̱ ji'i̱ ngu' tya'a xtañi Neftalí, cuati tyu'u tii tyucuaa mil tya'a ñati̱ ji'i̱ ngu' tya'a xtañi Manasés;

⁷ la cui' jua'a̱ tyu'u tii tyucuaa mil tya'a ñati̱ ji'i̱ ngu' tya'a xtañi Simeón, cuati tyu'u tii tyucuaa mil tya'a ñati̱ ji'i̱ ngu' tya'a xtañi Leví, cuati tyu'u tii tyucuaa mil tya'a ñati̱ ji'i̱ ngu' tya'a xtañi Isacar,

⁸ cuati tyu'u tii tyucuaa mil tya'a ñati̱ ji'i̱ ngu' tya'a xtañi Zabulón, cuati tyu'u tii tyucuaa mil tya'a ñati̱ ji'i̱ ngu' tya'a xtañi José, cuati tyu'u tii tyucuaa mil tya'a ñati̱ ji'i̱ ngu' tya'a xtañi Benjamín. Tsa lo cua ti tya'a ngu' Israel ngua'a̱ ycui' Ndyosi cuayá' ji'i̱.

Nu xa' la ñati̱ tyucui ña'a̱ chalyuu nu ta ycui' Ndyosi late' ngati̱ ji'i̱

⁹ Tiya' la li' na'a̱ na' ndu̱ tsa tlyu ti ñati̱ nu cua ngua'ni lyaá Jesús ji'i̱; quiña'a̱ tsa ñati̱ nga'a̱, bi' cha' ná tucui ngua ji'i̱ culacua ji'i̱ ñati̱ bi'. Tyucui ña'a̱ chalyuu mala su ndi'i̱ ñati̱ ngutu'u ngu' ya̱a̱ ngu'; lcaa lo ñati̱ chalyuu ya̱a̱, cha' cua ña'a̱ ca quichi̱ tyi ngu' ngutu'u ngu', cua ña'a̱ ca lo cha'cña nu nchcui' ñati̱ chalyuu nchcui' ngu' bi'. Ndyatu̱ ngu' nde loo su ntucua yaca xlya tlyu, nde loo su ndu̱ nu ñi'ya̱ ña'a̱ xlya' bi'. Late' ngati̱ lacu' ngu', ntucua laca' nguiña ya' ngu' ndu̱ ngu'.

¹⁰ Cui̱i̱ nchcui' ngu' li': Cua'ni tlyu na ji'i̱ ycui' Ndyosi nu Xu'na na nu ntucua lo yaca xlya tlyu, la cui' bi' laca nu ndu'ni lyaá ji'na, nacui̱ ngu' ji'i̱ tya'a ngu'; jua'a̱ nu ñi'ya̱ ña'a̱ xlya' bi' ndu'ni lyaá ji'na, nacui̱ ngu'.

¹¹ Lo'o jua'a̱ lcaa xca̱ ji'i̱ ycui' Ndyosi, lo'o ngu' bi' ndu̱ ngu' nde chu̱' su ntucua yaca xlya bi'; nde chu̱' su ndu̱ na'ni tacati bi', nde chu̱' su ndu̱ ngu' cusu', ca bi' ndi'i̱ ngu'. Ndyaa stii ngu' nde loo ngu' lo yuu li', cha' cua'ni tlyu ngu' ji'i̱ ycui' Ndyosi.

¹² Li' nacui̱ nu ngu' xca̱ bi': Jua'a̱ caca cha' lacua; cua'ni tlyu na ji'i̱ Ni, cua'ni chi̱ na loo Ni, tya na xlya'be ji'i̱ ycui' Ni. Chcui' na cha' lcaa cha' jlo ti' Ni, na ji'i̱ Ni laca lcaa lo na nu ntsu'u chalyuu; lcaa lo cña tsiya' ti nchca ji'i̱ Ni cua'ni Ni, sca ti ycui' Ni ntsu'u chacuayá' ji'i̱ Ni cua'ni Ni lcaa cña. Lcaa yija̱ ná nga'a̱ cha' tye cha' jua'a̱ caca ji'i̱ ycui' Ndyosi Sti na. Chañi cha' jua'a̱ caca. Jua'a̱ nacui̱ ngu' xca̱ ji'i̱ tya'a ngu'.

¹³ Li' nchcuane sca ngu' cusu' jna': ―¿Tilaca laca ñati̱ nu nchcu' late' ngati̱, nti' nu'u̱? ―nacui̱―. ¿Macala ndu'u ñati̱ bi' lijya̱?

¹⁴ ―Ná jlo ti' na', Cusu'. Culu'u nu'u̱ xi jna' ―ni na' ji'i̱. Nchcui' nu cusu' lo'o na' li': ―Cua nteje tacui ca ti cha' lye tsa nchcube' ñati̱ bi', xqui'ya cha' ngusñi ngu' cha' ji'i̱ Jesús ―nacui̱ nu cusu' jna'―. Cua laca lacu' ngu' late' ngati̱; cua ngua lubii ne' cresiya ji'i̱ ngu' laca cha' bi', xqui'ya cha' cua ngujuii nu ñi'ya̱ ña'a̱ xlya' bi' lo crusi cuentya ji'i̱ ngu'.

¹⁵ Bi' cha' ndu̱ ngu' nde loo su tlyu su ntucua ycui' Ndyosi juani ―nacui̱ nu cusu' bi'―, cha' tsa̱ lo'o talya ndyu'ni ngu' bi' cña ji'i̱ Ni ca su ndi'i̱ Ni. Ycui' Ni nu ntucua lo yaca xlya tlyu bi' tyanu cacua ti su ndi'i̱ ngu', cha' cua'a ji'i̱ ngu' cha' ná tyacua cha' cuxi ji'i̱ ngu'.

¹⁶ Nga'aa tyucua cha' ntyute' ngu' bi' chaca quiya', ni nga'aa tyucua cha' nguityi ngu' hitya; nga'aa tsumi̱' xee cua̱ ji'i̱ ngu', ni nga'aa ca chiya'a̱ ti' ngu' lo'o tyique' cua̱.

¹⁷ Ña'a̱si̱i̱ nu ñi'ya̱ ña'a̱ xlya' bi' ji'i̱ ngu', cha' ndi'i̱ Ni la cui' ca su ntucua ycui' Ndyosi loo; bi' laca nu tsalo'o ji'i̱ ngu' su caja hitya co'o ngu' cha' caja chalyuu cucui ji'i̱ ngu' li'. Lo'o jua'a̱ xquityi Ni hitya cloo ngu' cha' nga'aa cunaa ngu' li'.