APOCALIPSIS 6 - Chatino Tataltepec

Nu lo'o ndyaala quityi ji'i̱ ycui' Ndyosi

¹ Li' na'a̱ na' cha' ngusuu nu ñi'ya̱ ña'a̱ xlya' bi' sca nguiña' nu nga'a̱ tu'ba quityi bi'. Ndyuna na' nchcui' sca na'ni tacati bi' li'. Lye tsa nguañi nchcui' ni' ñi'ya̱ lo'o ndañi nchcui' tyi'yu: ―Cua̱a̱ clya nu'u̱ ca nde ―nacui̱.

² Li' nguxña'a̱ na' ji'i̱ nu ñati̱ nu nchcui' na'ni tacati bi' lo'o, na'a̱ na' ndu̱ sca cuayu ngati̱; yu nu ntucua hichu̱' cuayu bi' ni, na'a̱ na' ntucua sca cuatyi ya' yu, lo'o jua'a̱ cua nda ngu' sca sne' chcua̱ cha' tyucua hique yu. Li' ngutu'u yu ndyaa yu cusu̱u̱; ntiji̱loo yu li', lo'o ña'a̱ ti tya tyiji̱loo la yu xi ji'i̱ tya'a cusu̱u̱ yu.

³ Lo'o li' ngusuu nu ñi'ya̱ ña'a̱ xlya' bi' chaca nguiña' nu nga'a̱ to' quityi bi'. Ndyuna na' nchcui' na'ni tacati nu nchca tyucuaa li': ―Cua̱a̱ clya nu'u̱ ca nde ―nacui̱.

⁴ Li' ngutu'u tucua chaca cuayu nu nga'a ña'a̱ color ji'i̱. Yu nu ntucua hichu̱' ni' bi' ntsu'u chacuayá' ji'i̱ cua'ni cha' cusu̱u̱ lo yuu chalyuu, cha' jua'a̱ cujuii ñati̱ chalyuu ji'i̱ tya'a ñati̱ ngu'. Tonu tsa xlyu cusu̱u̱ ngujui ji'i̱ yu bi'.

⁵ Lo'o li' nu nchca tyuna quiya' ngusuu nu ñi'ya̱ ña'a̱ xlya' bi' nguiña' nu nga'a̱ to' quityi. Ndyuna na' cha' nu nchcui' na'ni tacati nu nchca tyuna li': ―Cua̱a̱ clya nu'u̱ ca nde ―nacui̱. Li' na'a̱ na' ndu̱ sca cuayú nu ngata ña'a̱; sca' cuayá' ndacui ya' ñati̱ nu ntucua hichu̱' cuayu bi'.

⁶ Li' ngua ti' na' cha' nguañi nchcui' sca ñati̱ nu nda xtyi'i laja su ndu̱ nu jacua tya'a na'ni tacati bi': ―Sa sca' ti nscua' caja ji'i̱ ngu' cua'ni ngu' cña sca tsa̱ ―nacui̱―, lo'o jua'a̱ sca milya ti si'yu nscua' jo'o caja ji'i̱ ngu' sca tsa̱; pana ña'a̱ ti quiña'a̱ nga'a̱ caca setye, lo'o jua'a̱ quiña'a̱ caca vino nu ndyi'yu ngu' ―nacui̱ yu bi'.

⁷ Lo'o li' nu nchca jacua quiya' ngusuu nu ñi'ya̱ ña'a̱ xlya' bi' nguiña' nu nga'a̱ tu'ba quityi bi'. Ndyuna na' nchcui' na'ni tacati nu nchca jacua li': ―Cua̱a̱ clya nu'u̱ ca nde ―nacui̱ ni'.

⁸ Li' na'a̱ na' cha' ndu̱ sca cuayu nu ngatsi ña'a̱. La Muerte naa nu ntucua hichu̱' cuayu bi', cha' bi' laca nu ndyaa ndyujuii ji'i̱ ñati̱; nde chu̱' bi' ngutu'u lca'a̱ tsa tlyu ti cresiya ji'i̱ ngu' jyo'o. Ntsu'u chacuayá' ji'i̱ yu bi', cha' cujuii yu ji'i̱ ña'a̱ tsaca yu'be ñati̱ nu ndi'i̱ chalyuu; lcaa ni'i̱ su ndi'i̱ jacua tya'a ñati̱ ni, cujuii yu ji'i̱ tsaca tya'a ngu' li', masi lo'o caca cha' cusu̱u̱ ji'i̱ ngu', masi lo'o caca jbi'ña ji'i̱ ngu', masi lo'o quicha ngu', masi lo'o cua'ni xña'a̱ na'ni tyaala lo'o ngu'.

⁹ Lo'o li' nu nchca ca'yu quiya' ngusuu nu ñi'ya̱ ña'a̱ xlya' bi' nguiña' nu nga'a̱ tu'ba quityi bi'. Li' na'a̱ na' sca mesa tlyu nde loo su ntucua ycui' Ndyosi, mesa bi' laca nu tyucua msta̱ lo. Nde ne' mesa bi' ntsiya tyu̱u̱ tya'a ngu' nu ngujuii; cua ndyujuii ñati̱ ji'i̱ ngu' bi' xqui'ya cha' nu nda ycui' Ndyosi lo'o ngu' bi', cha' ná ntsi̱i̱ ngu' bi' nchcui' ngu' cha' bi' lo'o tya'a ñati̱ ngu' li'.

¹⁰ Cui̱i̱ ngusi'ya jyo'o bi': ―Ndyosi Xu'na ya ―nacui̱ ngu'―, xcui' lubii tsa cresiya jinu'u̱; xcui' cha' liñi ndu'ni nu'u̱ ―nacui̱ jyo'o bi'―. ¿Ha tya tiya' tsa cua'ni cuayá' nu'u̱ ji'i̱ ñati̱ chalyuu? ¿Ha tya tiya' tsa xcube' nu'u̱ ji'i̱ ngu' xqui'ya cha' cua ndyujuii ngu' ji'i̱ ya? ―nacui̱ jyo'o bi'.

¹¹ Lo'o ti ngujui late' ngati̱ cacu' lcaa jyo'o bi', li' nchcui' ycui' Ndyosi lo'o ngu' bi': ―Xa' xtyii cña' ma̱ tya xi ca, ña'a̱ cuayá' tyalaa tyu̱u̱ tya'a jyo'o ngu' tya'a ma̱, tya'a ngusñi ma̱ cha' ji'i̱ Jesús, tya'a ndyu'ni ma̱ cña ji'i̱ Ni; tya cujuii ñati̱ chalyuu ji'i̱ ngu' bi' ñi'ya̱ lo'o cua ndyujuii ngu' ji'i̱ cu'ma̱ ―nacui̱ Ni.

¹² Lo'o li' na'a̱ na' ji'i̱ nu ñi'ya̱ ña'a̱ xlya' bi', cha' nu nchca scuá quiya' ngusuu Ni nguiña' nu nga'a̱ to' quityi bi'; lye tsa ngulacui̱ chalyuu li'. Li' ndyacu cuichaa, ngua talya xee; ñi'ya̱ laca sca late' ngata nu nchcu' ñati̱ su nscua jyo'o, jua'a̱ ña'a̱ ngua bi'. Lo'o jua'a̱ co' ni, ngua nga'a ña'a̱ bi'; ñi'ya̱ ña'a̱ tañi, jua'a̱ ña'a̱ bi'.

¹³ Li' ndyalú cuii nu ntsu'u nde cua̱; ñi'ya̱ nti' ndyalú mancu̱ ye'e lo'o lye tsa nchca cui'i̱ nchquiña ji'i̱ sta̱' yaca, jua'a̱ ndyalú cuii nde lo yuu li'.

¹⁴ Nga'aa chcana ña'a̱ ngu' nde cua̱ li'; cua nguliji yu'u bi', cha' ngulatsu' ycui' Ndyosi ji'i̱. La cui' jua'a̱ ngulatsu' Ni ji'i̱ lcaa ca'ya cua̱; jua'a̱ lcaa yuu cla'be nu nscua cla'be hitya, ngulatsu' Ni ji'i̱.

¹⁵ Li' ngutu'u cuatsi' ti lcaa ñati̱, masi tyuquee, masi quiya' cua'a̱, masi sii' ca'ya; lcaa ngu' nu laca loo, cuati nu laca loo ji'i̱ ñati̱ cusu̱u̱, masi culiya' ngu', masi tlyu tsa ñati̱ laca ngu', masi msu nu ngüi'ya ti ñati̱, masi msu nu ndi'i̱ tso'o ti laca ngu' bi', lcaa ngu' lo'o tya'a ngu' ngutu'u cuatsi' ngu'.

¹⁶ Li' ngusi'ya ngu' ji'i̱ ca'ya lo'o ji'i̱ quee tlyu: ―Cua̱a̱ clya ma̱ xasu ma̱ hichu̱' ya, cha' ná ña'a̱ ycui' nu Cusu' nu ntucua su tlyu ji'i̱ ya; ñasi̱' tsa nu ñi'ya̱ ña'a̱ xlya' bi' ña'a̱ Ni ji'i̱ ya ―nacui̱ ngu'.

¹⁷ Cua ndyalaa tsa̱ cha' xcube' Ni ji'i̱ ñati̱, lo'o ná ndalo ngu' tsiya' ti ji'i̱ cha' bi'.