APOCALIPSIS 5 - Chatino Tataltepec

Nu ñati̱ nu taca ji'i̱ chcui' lo quityi nu ntsu'u ya' ycui' Ndyosi

¹ Li' na'a̱ na' cha' ntsu'u quityi ya' tsu' cui̱ nu cusu' laca loo nu ntucua lo yaca xlya bi'. Sca quityi nchcu̱', nu ngutu ti ña'a̱ laca bi'; jua'a̱ tyucuaa chu̱' quityi bi' cua nscua cha'. Cati se'i̱ nga'a̱ nguiña' tu'ba quityi su ndyacu̱' bi'.

² Li' na'a̱ na' cha' ndu̱ sca ñati̱ nguula, sca xca̱ ji'i̱ ycui' Ndyosi. Cui̱i̱ tsa ngusi'ya xca̱ bi': ―¿Tilaca laca nu ntsu'u chacuayá' ji'i̱ cha' suu nguiña' nu nga'a̱ tu'ba quityi nchcu̱' bi', cha' chcana quityi bi'? ―nacui̱.

³ Li' masi tyucui ña'a̱ su ntucua ycui' Ndyosi bi', masi tyucui ña'a̱ lo yuu chalyuu, masi tyucui ña'a̱ chaca ba'a chalyuu su ndyaa ñati̱ nu cua ngujuii, ná ngujui nu scana ji'i̱ quityi cha' chcui' ngu' lo.

⁴ Ti'i tsa ngusi'ya na' li', cha' nga'aa ngujui nu scana ji'i̱ quityi cha' chcui' ngu' lo.

⁵ Li' nguxana nchcui' sca nu cusu' lo'o na': ―Nga'aa xi'ya nu'u̱ juani ―nacui̱―. Cua ngujui nu scana ji'i̱ quityi bi', nu taca ji'i̱ suu nguiña' bi', masi nu cati tya'a nguiña' nu nga'a̱ tu'ba quityi bi'. Ycui' yu bi' laca loo ji'i̱ ngu' Judá, cha' la cui' tya'a ñati̱ ji'i̱ jyo'o David laca yu bi'. Cua ntiji̱loo yu ji'i̱ nu xña'a̱, bi' cha' juani taca ji'i̱ yu scana yu quityi bi'.

⁶ Li' na'a̱ na' ndu̱ sca ñati̱; ñi'ya̱ ña'a̱ sca xlya' cuañi', jua'a̱ ña'a̱ ñati̱ bi'. Ndu̱ yu bi' nde loo su tlyu su ntucua ycui' Ndyosi, laja su ndu̱ nu ngu' cusu' bi', laja nu na'ni tacati bi'. Tya tyaca̱' nscua cuayá' hichu̱' yu tya lo'o ndyujuii ngu' ji'i̱ yu tsaca quiya', jua'a̱ ña'a̱ yu bi'. Cati tya'a sata ntucua hique nu ñi'ya̱ ña'a̱ xlya' nu ndu̱ cuentya ji'i̱ Jesús. La cui' jua'a̱ ntucua cati tya'a cloo Ni; nu cloo Ni ni, bi' laca cati tya'a cui'i̱ lubii nu laca Xtyi'i ycui' Ndyosi nu ndu'u ndyaa tyucui ña'a̱ chalyuu.

⁷ Li' ndyaa nu ñi'ya̱ ña'a̱ xlya' bi' ndyiqui'ya Ni ji'i̱ quityi nchcu̱' nu ntsu'u ya' tsu' cui̱ nu cusu' laca loo nu ntucua su tlyu bi'.

⁸ Lo'o ngusñi Ni quityi bi', li' ngutu̱ sti̱' ca ta'a jacua na'ni tacati bi'; lo'o jua'a̱ nu calaa ntucua jacua tya'a ngu' cusu' bi', ndu̱ sti̱' ngu' nde loo nu ñi'ya̱ ña'a̱ xlya' bi'. Ntsu'u sañi ya' ngu' cusu' bi', lo'o jua'a̱ ntucua cuu oro ya' lcaa ngu' cusu' bi'; ntsu'u yana jo'ó nu ndyaqui̱ ne' cuu bi'. Ñi'ya̱ lo'o ntyucua xtyi'i yana jo'ó ndyaqui̱ bi', jua'a̱ ndyaa cha' nu nchcui' ngu' ca slo ycui' Ni lo'o nchcui' ñati̱ ji'i̱ ycui' Ndyosi lo'o Ni.

⁹ Li' ndyula tu'ba ngu' bi' sca ji̱i̱ cha' cua'ni chi̱ ngu' loo nu ñi'ya̱ ña'a̱ xlya' bi'. Bilya cuna na' ji̱i̱ nu ndyula tu'ba ngu' bi': Cua nda ycui' Ni chacuayá' jinu'u̱ cha' xñi nu'u̱ quityi nchcu̱' bi', nacui̱ ngu', cha' suu nu'u̱ nguiña' nu nga'a̱ tu'ba quityi bi'. Na cua ndyujuii ñati̱ jinu'u̱ tsaca quiya'; pana lo'o ngujuii nu'u̱ ni, li' ngua'ni nu'u̱ cña cuentya ji'i̱ ya cha' caca ya ñati̱ ji'i̱ ycui' Ndyosi. Ñati̱ nu cua ndyu'u cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ñati̱ nu ndyu'u tyucui ña'a̱ chalyuu mala su ndi'i̱ ñati̱, bi' ñati̱ nu ngusubi nu'u̱ ji'i̱.

¹⁰ Cua ngua'ni nu'u̱ cha' caca ngu' bi' sca lo ñati̱ nu ndulo tsa cuentya ji'i̱ ycui' nu'u̱, cha' taca cua'ni ngu' cña nu nti' ycui' Ndyosi Sti na. Lo'o jua'a̱ caca ngu' bi' loo nde chalyuu.

¹¹ Lo'o ndye ndañi ji̱i̱ bi', chaca quiya' na'a̱ na' ca bi'. Li' ndyuna na' ndyula tu'ba tyu̱u̱ tsa mil tya'a xca̱ ji'i̱ ycui' Ndyosi; nde chu̱' su ntucua yaca xlya, nde chu̱' su ndu̱ na'ni tacati bi', nde chu̱' su ndu̱ ngu' cusu' bi', ca bi' ndu̱ quiña'a̱ tsa ngu' xca̱ bi' li'.

¹² Cui̱i̱ tsa ndyula tu'ba ngu' li': Cua ndyujuii ngu' ji'i̱ nu ñi'ya̱ ña'a̱ xlya' bi' tsaca quiya', nacui̱ ngu'. Xqui'ya ñati̱ chalyuu, bi' cha' ngujuii Ni. Lo'o juani nga'a̱ cha' chcui' na ji'i̱ Ni, cha' lcaa lo cña tsiya' ti nchca ji'i̱ Ni cua'ni Ni; jua'a̱ na ji'i̱ Ni laca lcaa lo na tsiya' ti. Lcaa cha' jlo ti' Ni, lcaa cña nchca ji'i̱ Ni; bi' cha' ndyu'ni chi̱ na loo Ni, ndyu'ni tlyu na ji'i̱ Ni, lo'o jua'a̱ tso'o tsa chcui' na ji'i̱ Ni lo'o ñati̱. Jua'a̱ nacui̱ xca̱ ji'i̱ ycui' Ndyosi lo'o ndyula tu'ba ngu'.

¹³ Li' nguañi ndyula tu'ba lcaa ñati̱ tyucui ña'a̱ chalyuu, lcaa ngu' nu cua nda ycui' Ndyosi ji'i̱ lijya̱ nde chalyuu; masi nde cua̱ su ntucua ycui' Ni, masi nde lo yuu chalyuu, masi chaca ba'a chalyuu su ndyaa ñati̱ nu ngujuii, masi lo tyujo'o, lcaa ñati̱ bi' ndyu'ni tlyu ngu' ji'i̱ ycui' Ndyosi. Ndi'ya̱ nchcui' ngu': Cua'ni tlyu na ji'i̱ ycui' nu Cusu' nu ntucua ca su tlyu, nacui̱ ngu', cua'ni chi̱ na loo Ni. Jua'a̱ nu ñi'ya̱ ña'a̱ xlya' bi', cua'ni tlyu na ji'i̱ Ni. Sca ti ycui' Ndyosi ntsu'u chacuayá' ji'i̱ Ni cha' cua'ni Ni lcaa lo cña tsiya' ti; lo'o jua'a̱ ná nga'a̱ cha' tye cha' ji'i̱ ycui' Ni tsiya' ti, nacui̱ ngu'.

¹⁴ Nu ca ta'a jacua na'ni tacati bi' ni, nguxacui̱ ni' cha' ji'i̱ ngu' li': ―Jua'a̱ caca cha' lacua ―nacui̱ ni'. Li' ndu̱ sti̱' nu calaa ntucua jacua tya'a ngu' cusu' bi', ngua'ni tlyu ngu' ji'i̱ ycui' Ndyosi, cha' ná nga'a̱ cha' tye yija̱ ji'i̱ Ni.