APOCALIPSIS 4 - Chatino Tataltepec

Ndyu'ni tlyu ngu' ji'i̱ ycui' Ndyosi ca su ntucua Ni

¹ Li' nguxña'a̱ na' nde cua̱, na'a̱ na' cha' ntucua yaala sca toni'i̱ ca bi'. Li' xa' nguañi nchcui' nu ñati̱ nu cua nchcui' lo'o na' tsaca quiya' nu ngua tya tsa̱ la; ñi'ya̱ ndañi nclya'á cui'chcua̱, jua'a̱ nxi'ya nu bi' nchcui' lo'o na'. Ndi'ya̱ nchcui' nu bi' lo'o na' li': ―Tyacuí̱ clya nu'u̱ ca nde, culu'u na' jinu'u̱ lcaa cha' nu nga'a̱ cha' caca tyempo nde loo la.

² Hora ti ngua'ya Xtyi'i ycui' Ndyosi lo na' li'. Cla'be nde cua̱ bi' na'a̱ na' cha' ntucua sca yaca xlya tlyu nu tso'o tsa ña'a̱. Nde bi' ntucua sca ñati̱.

³ Ndubi tsa ña'a̱ loo ycui' nu Cusu' nu ntucua ca bi', lo'o tyu̱u̱ tya'a color ntsu'u loo Ni, ñi'ya̱ laca quee ndubi nu ngatsi ña'a̱, ñi'ya̱ laca quee nu nga'a tsa ña'a̱. Tyi'i̱ ca chu̱' su ntucua bi' ndu̱ cuaña taa nu nga'aa ña'a̱ nclyu'u xee.

⁴ Nde chu̱' la ntucua xa' la yaca xlya; lo yaca bi' ntyucua calaa ntucua jacua tya'a ngu' cusu', tsa lo scuii ti ntucua ngu' tyi'i̱ ca chu̱' su ntucua Ni. Lacu' ngu' bi' late' ngati̱, jua'a̱ ntucua sne' oro hique scaa ngu'.

⁵ Lye tsa nguañi nchcui' tyi'yu li', lye tsa ndyubii ca su ntucua ycui' Ndyosi li'. Nde loo su tlyu su ntucua Ni ndu̱ cati tya'a quityee ya' ndyaqui̱, bi' laca nu cati tya'a cui'i̱ lubii nu laca Xtyi'i ycui' Ndyosi nu ndu'u ndyaa tyucui ña'a̱ chalyuu.

⁶ Nde cla'be su ntucua ñati̱ bi', ngua ti' na' cha' na'a̱ na' sca tayu'; ñi'ya̱ ndubi ña'a̱ sca caatya̱, jua'a̱ ndubi ña'a̱ bi'. Tyi'i̱ ca chu̱' su ndu̱ yaca xlya tlyu bi', ca bi' ndu̱ jacua tya'a na lu'ú nu ñi'ya̱ ña'a̱ na'ni, jua'a̱ ña'a̱; ndu̱ ni' cua̱. Tyucui ña'a̱ ni' ntucua cloo ni'; masi nde sii' ni', masi nde chu̱' ni' ntucua cloo ni'.

⁷ Na'ni nu nchca clyo bi', ñi'ya̱ ña'a̱ cuichi ña'a̱ ni'; na'ni nu nchca tyucuaa bi', ñi'ya̱ ña'a̱ toro cuañi' ña'a̱ ni'; na'ni nu nchca tyuna bi', ñi'ya̱ ña'a̱ saca' ñati̱, jua'a̱ ña'a̱ saca' ni'; na'ni nu nchca jacua bi', ñi'ya̱ ña'a̱ cua'ya ndyacui, jua'a̱ ña'a̱ ni'.

⁸ Scuá tya'a lu'be ntsu'u ji'i̱ scaa na'ni bi', pana ntucua cloo ni' tyucui ña'a̱ hichu̱' lu'be ni'; lo'o nde ne' lu'be ni', la cui' jua'a̱ ntucua cloo ni'. Nga'aa nchca ti̱ cha' ndula tu'ba ni' tsa̱ lo'o talya: Xcui' na lubii tsa cresiya ji'i̱ ycui' Ndyosi nu nchca ji'i̱ ndu'ni lcaa cña, nacui̱ ni' lo'o ndyula tu'ba ni'. Nu ngua tya clyo lu'ú ycui' Ni, la cui' jua'a̱ na lu'ú Ni juani, lo'o ña'a̱ ti tya lu'ú Ni tyempo nde loo la. Jua'a̱ nacui̱ ni' lo'o ndyula tu'ba ni'.

⁹ Lu'ba ti ndyula tu'ba nu ca ta'a jacua na'ni tacati bi' li'. Ndu'ni tlyu ni' ji'i̱ Ni, ndu'ni chi̱ ni' loo ycui' Ni; ndya tsa ni' xlya'be ji'i̱ ycui' Ni nu ntucua lo yaca xlya tlyu bi', cha' lcaa yija̱ lu'ú ycui' Ndyosi.

¹⁰ Lcaa quiya' lo'o ndyula tu'ba na'ni bi', li' ndyatu̱ sti̱' nu ngu' cusu' bi' nde loo su ntucua ycui' Ni lo yaca xlya tlyu bi'; ndu'ni tlyu ngu' cusu' bi' ji'i̱ ycui' Ni cha' lcaa yija̱ lu'ú Ni. Li' nda'ya ngu' sne' oro nu ntucua hique ngu', nsta ngu' ji'i̱ nde loo su tlyu su ntucua ycui' Ni. Ndi'ya̱ nchcui' ngu' lo'o Ni li':

¹¹ Ndyosi Xu'na ya, nga'a̱ cha' cua'ni tlyu ya jinu'u̱, cha' cua'ni chi̱ ya loo nu'u̱, nacui̱ ngu'. Nchca jinu'u̱ cua'ni nu'u̱ lcaa lo cña tsiya' ti nu nti' nu'u̱ cua'ni nde chalyuu. Na cua ngüiñá nu'u̱ lcaa lo na nu ntsu'u nde chalyuu; chacuayá' jinu'u̱ lu'ú lcaa na, cha' nda nu'u̱ chacuayá' cha' ndya'a̱ lcaa na lu'ú. Jua'a̱ nacui̱ ngu' lo'o ndyula tu'ba ngu' li'.