APOCALIPSIS 3 - Chatino Tataltepec

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Sardis

¹ ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Sardis, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱: Ndi'i̱ Xtyi'i ycui' Ndyosi lo'o na', bi' laca cati tya'a cui'i̱ lubii nu nda Ni ndyaa tyucui ña'a̱ chalyuu. La cui' jua'a̱ ya' na' ndacui nu cati tya'a cuii ndubi bi'. Cua nda na' cuentya ji'i̱ lcaa ña'a̱ nu ndu'ni ma̱, nacui̱ Ni. Jlo ti' na' cha' ngunu'u̱ cresiya ji'i̱ ma̱, masi nacui̱ ngu' quichi̱ cha' lubii tsa ndu'ni ma̱, nacui̱ Ni.

² Quee ti' ma̱ juani, cha' ndi'i̱ ma̱ ñi'ya̱ si laja' ti ma̱. Cua'ni clya ma̱ nu tya xi ca cha' tso'o nu tya jlo ti' ma̱ cha' cua'ni ma̱, cha' ná chcuna' cña bi' tsiya' ti; bilya ña'a̱ na' si cua ndu'u scua cña bi' ji'i̱ ma̱, nacui̱ Ni.

³ Tyi'u ti' ma̱ cha' tso'o tsa ngusñi ma̱ cha' 'na nu lo'o ngulu'u ngu' cha' ji'i̱ ma̱ tya clyo; taquiya' ma̱ ji'i̱ cha' bi' chaca quiya', pana culochu̱' ma̱ cha' cuxi nu ndyu'ni ma̱ juani, nacui̱ Jesús. Si ná tyaja'a̱ ma̱ taquiya' ma̱ cha' 'na, li' tsiya' ca tyu'u tucua na' ca̱a̱ na' slo cu'ma̱, ñi'ya̱ nti' lijya̱ sca nu cuaana; ca̱a̱ na' cha' xcube' na' ji'i̱ ma̱ lo'o ná ca tii ma̱ ni hora laca nu ca̱a̱ na', nacui̱ Ni.

⁴ Masi jua'a̱ jlo ti' na' cha' tya ntsu'u xi ñati̱ nu tso'o tsa ngusñi cha' jna' nde Sardis bi', nu lubii cresiya ji'i̱ ngu'. Nu xa' la ngu' tya'a ndyu'u ti'i̱ ma̱ ni, cua ngui'i̱ tsa ngu' ndyu'ni ngu' cha' cuxi; pana ngati̱ tsa late' caja ji'i̱ ñati̱ nu tya nxñi cha' jna', tya'a̱ ngu' bi' lo'o na', nacui̱ Ni. Ndacui cha' caca jua'a̱ ji'i̱ ngu' bi',

⁵ cha' xcui' ngati̱ tsa late' cacu' ñati̱ nu cua ntiji̱loo ji'i̱ nu xña'a̱, nacui̱ Ni. Nga'aa cuityi̱ na' xtañi ngu' bi' ji'i̱ quityi ca su nscua xtañi ñati̱ nu ngujui chalyuu cucui ji'i̱ jua'a̱. Lo'o tyalaa na' ca su ntucua ycui' Sti na' lo'o ngu' xca̱ ji'i̱ Ni, li' ñacui̱ na' ji'i̱ Ni cha' ñati̱ 'na laca ngu' bi', nacui̱ Ni.

⁶ Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱, nacui̱ Jesús.”

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Filadelfia

⁷ ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Filadelfia, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui̱' lo'o ma̱, na' nu laca̱ nu sca ti Sñi' ycui' Ndyosi: Xcui' lubii tsa cresiya 'na, xcui' cha' liñi ndu'ni na'. Juani laca na' loo ji'i̱ ñati̱ 'na ñi'ya̱ ngua jyo'o David loo ji'i̱ ngu' tya sa'ni la. Nu lo'o ta na' chacuayá' cha' cua'ni ñati̱ sca cña, ná tucui taca ji'i̱ tacu̱' cha' ji'i̱ ngu' bi' li'; nu lo'o tacu̱' na' cha' ji'i̱ ñati̱ cha' ná cua'ni ngu' sca cña, ná tucui taca ji'i̱ cua'ni cña bi' li'.

⁸ Nda na' cuentya ji'i̱ lcaa ña'a̱ nu ndu'ni ma̱, nacui̱ Ni. Cua nda na' sca cña tso'o cha' cua'ni ma̱, lo'o ná tucui taca tacu̱' cha' ji'i̱ ma̱ li', masi jlo ti' na' cha' ná caca ji'i̱ ma̱ chcui' lye ma̱ lo'o ñati̱ cuentya jna', cha' ná nguula ti' tyiquee ma̱ tsiya' ti; pana ña'a̱ ti tya ndaquiya' ma̱ ji'i̱ lcaa cha' nu nclyu'u na' ji'i̱ ma̱, bilya xtyanu ma̱ 'na.

⁹ Ntsu'u xi taju ñati̱ nu cuiñi ti nda cha' lo'o tya'a ngu' cha' ñati̱ jna' laca ngu'; liñi la ñacui̱ na cha' ntsu'u cha' ji'i̱ ngu' bi' lo'o Satanás. Ca tiya' la xi cuane na' ji'i̱ ngu' bi', cha' tya̱a̱ ngu' ca slo cu'ma̱, tyu̱ sti̱' ngu' slo ma̱ cha' cua'ni tlyu ngu' ji'i̱ ma̱ li'; caca cuayá' ti' ngu' jua'a̱ cha' tyaca'a tsa cu'ma̱ 'na.

¹⁰ Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.

¹¹ Cua tya̱a̱ ti na'. Ná ta ma̱ chacuayá' cha' culiji yu'u jua'a̱ ti cha' tso'o nu ntsu'u ne' cresiya ji'i̱ ma̱, tya cua'ni ma̱ ñi'ya̱ nu ngua'ni ma̱ tya sa'ni la. Tii ti ti' tyi'i̱ ma̱ cha' caja chalyuu tso'o nu ta ycui' Ndyosi ji'i̱ ma̱ lo'o tye chalyuu re.

¹² Cua ña'a̱ ca ñati̱ nu tyiji̱loo ji'i̱ nu xña'a̱ ni, tlyu tsa caca ñati̱ bi' laja ñati̱ 'na lo'o cua ndyee chalyuu; tso'o tsa tyi'i̱ ngu' bi' ca su ndi'i̱ na'. Scua na' xtañi ycui' Ndyosi Sti na' loo ngu' bi', lo'o jua'a̱ scua na' ni naa quichi̱ tlyu nu ca ji'i̱ ycui' Ni; Jerusalén cucui naa quichi̱ bi'. Tyu'u bi' nde su ntucua ycui' Ndyosi, ca̱a̱ ca'ya bi' lo yuu. Jua'a̱ scua na' xtañi ycui' na' loo ngu' bi', cha' laca ngu' ñati̱ 'na.

¹³ Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱, nacui̱ Jesús.”

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Laodicea

¹⁴ ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Laodicea, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱: Chañi cha' ndyu'u tucua cha', lcaa cha' nu nda na' lo'o ñati̱; liñi tsa nchcui' na' cha' ji'i̱ ycui' Ndyosi Sti na' lo'o ñati̱, cha' tyucui tyiquee na' ndu'ni na' cña ji'i̱ ycui' Ni. Nu lo'o nguxana ndya' lcaa na nu ntsu'u chalyuu, stu'ba ti ndu̱ na' lo'o ycui' Ni nu ngua li', nacui̱ Jesús.

¹⁵ Cua jlo ti' na' lcaa ña'a̱ nu ndu'ni cu'ma̱; jlo ti' na' cha' ni si'i na ngusñi tso'o ma̱ cha' 'na, lo'o jua'a̱ ni si'i na ndya'a̱chu̱' ma̱ cha' 'na. Tso'o la masi tyucui tyiquee ma̱ xñi ma̱ cha' 'na, masi xtyanu ma̱ cha' 'na tsiya' ti.

¹⁶ Ñi'ya̱ laca si co'o na hitya nu conu' ti chcatsu̱, ni si'i na tyique', ni si'i na tyacala', na conu' ti chcatsu̱ bi'; ná tso'o ndyi'yu bi', salú na ji'i̱ nde lo yuu, nga'aa co'o na ji'i̱. Jua'a̱ laca cu'ma̱ cuentya jna', cha' sa cla'be ti ná ngusñi ma̱ cha' 'na.

¹⁷ Quiña'a̱ tsa cha' ntsu'u ji'i̱ ya, nacui̱ ma̱. Cua ngujui sca chalyuu tso'o ji'i̱ ya, bi' cha' nga'aa ntsu'u cha' nu lyiji ji'i̱ ya, nacui̱ ma̱. Pana ná nda ma̱ cuentya cha' tya'na tsa ma̱ nti' na' ña'a̱ na' ji'i̱ ma̱. Tso'o la si ca tyuju'u ti' ma̱, nti' na', cha' nga'aa ntsu'u cha' ji'i̱ ma̱ tsiya' ti; ntsu'u tsa cha' nu lyiji ji'i̱ ma̱ nti' na' ña'a̱ na' ji'i̱ ma̱, bi' cha' ná nchca culacua tso'o ti' ma̱ tsiya' ti.

¹⁸ Ta na' sca cui̱i̱ lo'o ma̱ lacua, bi' cha' cua'a̱ jyaca̱ ma̱ ji'i̱ cha' nu chcui' na' lo'o ma̱, cha' chañi taca culu'u cha' bi' ji'i̱ ma̱ ñi'ya̱ caca xutacui cha' cuxi nu ntsu'u ji'i̱ ma̱: Nga'a̱ cha' cua'ni ma̱ cha' caja sca chalyuu cucui ji'i̱ ma̱ su nga'aa cua'ni ma̱ cha' cuxi, cha' nga'aa ntsu'u cha' ca tyuju'u la ti' ma̱ li'. Cua'ni ma̱ cha' culacua tso'o xi ti' ma̱ lacua, cha' ca cuayá' ti' ma̱ scaa cha'.

¹⁹ Lcaa ñati̱ nu tyaca'a tsa 'na, ndaca'a na' xi ji'i̱ ngu', nchcube' na' xi ji'i̱ ngu'. Cua'ni clya ma̱ lacua, cha' culochu̱' ma̱ cha' cuxi nu ndyu'ni ma̱.

²⁰ Cua'a̱ jyaca̱ ma̱: Cua ndyalaa na' nde slo cu'ma̱; ndu̱ ti na' nchcui' na' lo'o ma̱ juani, cha' cua ña'a̱ ca ñati̱ nu tucuá cha' 'na, tyanu na' slo ngu' bi' li'; tyi'i̱ na' slo ngu' bi', tso'o tsa tyu'u cha' jna' lo'o ngu' bi' li'.

²¹ Cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu, ta na' su tyucua ñati̱ bi' ca su ntucua na' cha' laca na loo; cha' jua'a̱ na', cua ntiji̱loo na' ji'i̱ nu xña'a̱ bi', lo'o juani nga'a̱ na' slo ycui' Sti na' su laca Ni loo.

²² Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱.” Cua ndye cha' nu nda Jesús ndyaa slo taju ñati̱ ji'i̱ Ni scaa quichi̱.