APOCALIPSIS 22 - Chatino Tataltepec

¹ Lo'o li' ngulu'u xca̱ 'na mala nxna sta'a̱ ji'i̱ ycui' Ndyosi, sta'a̱ bi' laca nu nda chalyuu nu ná nga'a̱ cha' tye ji'na. Lubii tsa ña'a̱ su nxna hitya sta'a̱ bi'. Nde su tlyu su ntucua ycui' Ndyosi, nde su ntucua nu ñi'ya̱ ña'a̱ xlya' bi', ca bi' ntsu'u su̱u̱ sta'a̱ bi';

² nxna lijya̱ sta'a̱ nde calle tlyu nu nscua cla'be quichi̱ bi'. Tyucuaa tsu' sta'a̱ bi' ndu̱ sca yaca; lo'o si'yu nu nda yaca bi' ni, bi' laca nu ta chalyuu nu ná nga'a̱ cha' tye ji'na. Tii tyucuaa quiya' nda yaca bi' si'yu chu̱' sca yija̱, sca quiya' ndyu'u si'yu yaca bi' sca co'. Tso'o tsa jo'o ndu'ni laca' yaca si'yu bi', ná ca quicha na lo'o cacu na ji'i̱.

³ Pana lquichi̱ bi' nga'aa caja cha' ti'í ji'i̱ ngu' tsiya' ti, ñi'ya̱ nu ntsu'u nde chalyuu xqui'ya yabe' nu ntsu'u ji'i̱ ñati̱. Ca quichi̱ bi' stu'ba ti caca loo ycui' Ndyosi lo'o nu ñi'ya̱ ña'a̱ xlya' bi'; ndacua ntucua yaca xlya tlyu ji'i̱ Ni, cha' cua'ni tlyu lcaa ñati̱ nu ndyu'ni cña ji'i̱ Ni ji'i̱ ycui' Ni nu ntucua ca ndacua.

⁴ Tyuloo tso'o ngu' ji'i̱ ycui' Ndyosi li', cha' ca bi' tyalaa lcaa ngu' nu nscua xtañi Ni nde tyaca̱a̱ ngu'.

⁵ Nga'aa caca talya su ndi'i̱ ngu' ca bi'; bi' cha' nga'aa cua'nijo'o xee cuichaa ji'i̱ ngu', nga'aa nti' cha' cua'a̱ ngu' xee nde ni'i̱. Ycui' Ndyosi nu Xu'na na, bi' laca nu ta xee ji'i̱ ngu', ni ná tye tyempo cha' stu'ba ti caca ngu' loo lo'o ycui' Ni.

Yala ti tya̱a̱ Jesús chaca quiya'

⁶ Lo'o li' xa' nchcui' nu xca̱ ji'i̱ ycui' Ndyosi bi' lo'o na': ―Liñi tsa cha' nu nda na' lo'o nu'u̱ juani, taca jlya tso'o ti' nu'u̱ cha' bi'; na' ndacha̱' ji'i̱ ñati̱ cuentya ji'i̱ ycui' Ni lcaa ña'a̱ cha' nu cua lijya̱ cha' caca nde lo yuu chalyuu. Laca na' sca xca̱ ji'i̱ Ni, bi' cha' cua nda ycui' nu Xu'na na Xtyi'i ycui' Ni jna'; la cui' jua'a̱ cua nda Ni Xtyi'i ycui' Ni ji'i̱ lcaa ñati̱ nu laca tu'ba ji'i̱ Ni nde chalyuu.

⁷ ―Yala ti tya̱a̱ na' chaca quiya' ―nacui̱ Jesús. Tso'o tsa caca tyiquee lcaa ñati̱ nu taquiya' ji'i̱ cha' nu cua nda Ni lo'o na', nu cua nscua na' lo quityi re; cha' bi' laca nu ndacha' ji'na ñi'ya̱ caca chalyuu nde loo la.

⁸ Cua na'a̱ na' cha' bi', cua ndyuna na' lcaa cha' nu nscua lo quityi re. Juan laca na'. Lo'o cua ndye na'a̱ na' cha' bi', li' ndyaa stii na' lo yuu nde loo su ndu̱ xca̱ nu ngulu'u cha' bi' 'na, cha' ngua ti' na' cua'ni tlyu na' ji'i̱ xca̱ bi'.

⁹ Hora ti nchcui' yu lo'o na' li': ―Ná cua'ni nu'u̱ jua'a̱. Lo'o na', tya'a ndyu'ni na cña ji'i̱ ycui' Ni laca na'; stu'ba ntsu'u cha' 'na lo'o jyo'o ñati̱ tya'a ma̱ nu ngua tu'ba ji'i̱ ycui' Ni nde chalyuu, jua'a̱ tya'a na' lo'o cua ña'a̱ ca ñati̱ nu taquiya' ji'i̱ cha' nu nscua lo quityi re. Sca ti ycui' Ndyosi laca nu nga'a̱ cha' cua'ni tlyu na ji'i̱.

¹⁰ Li' nchcui' xca̱ lo'o na' chaca quiya': ―Cua nchcui' Ni ñi'ya̱ caca cha' nde loo la, bi' cha' ná xco'o nu'u̱ quityi re; nga'a̱ cha' cuna ñati̱ chalyuu lcaa cha' bi', xqui'ya cha' cua ngulala ti caca lcaa cha' nu nscua lo quityi re.

¹¹ Nu lo'o bilya tye chalyuu tya cua'ni cuxi lcaa ñati̱ nu nti' cua'ni cha' cuxi, lo'o jua'a̱ nga'aa caja tyempo ji'i̱ ngu' cha' xtyanu ngu' ji'i̱ cha' cuxi bi' li'; lcaa nu ndu'ni suba' juani, nga'aa caja tyempo cha' xtyanu ngu' ji'i̱ cha' cuxi bi' li'. Lcaa ñati̱ nu tso'o ndu'ni juani, tya ntsu'u cha' cua'ni la ngu' cña tso'o ña'a̱ cuayá' nu tye chalyuu; lcaa ngu' nu lubii ndi'i̱ chalyuu, tya ntsu'u cha' cua'ni la ngu' cha' tso'o ―nacui̱ xca̱ bi'.

¹² ―Cua'a̱ jyaca̱ ma̱ ji'i̱ cha' nu chcui' na' re ―nacui̱ ycui' Jesús li'―. Yala ti ca̱a̱ na' chaca quiya'. Lo'o ca̱a̱ na', li' tyi'u ti' na' cha' cua'ni na' lo'o lcaa ñati̱ ñi'ya̱ nu ngua'ni ngu' lo'o ya̱a̱ ngu' chalyuu; tso'o tsa caca ji'i̱ ngu' nu ngua'ni cha' tso'o, lo'o jua'a̱ cha' ti'í caja ji'i̱ ngu' nu ngua'ni cha' cuxi.

¹³ Ñi'ya̱ nti' letra A nti' na', cha' na' ntucua̱ su nguxana lcaa cha'; ñi'ya̱ nti' letra Z, jua'a̱ nti' na', cha' la cui' na' ntucua̱ ca su tye lcaa cha'.

¹⁴ Tso'o tsa caca tyiquee ñati̱ nu cua ngua lubii cresiya ji'i̱, cha' bi' ñati̱ laca nu ntsu'u chacuayá' cacu si'yu yaca nu caja ji'na nde chalyuu cucui. Jua'a̱ li' taca tyatí̱ ngu' tolo'o ji'i̱ quichi̱ tlyu bi'.

¹⁵ To' lo'o nde liya' tyanu lcaa ñati̱ nu chiya'a̱ tsa ndu'ni, lo'o jua'a̱ ñati̱ nu jlya tsa ti' ji'i̱ cha' cucha'a̱, lo'o ñati̱ nu ndu'ni suba' lo'o nu cuna'a̱, lo'o nu ndujuii ji'i̱ ñati̱; la cui' jua'a̱ lcaa ñati̱ nu ndu'ni tlyu ji'i̱ lcui̱ jo'ó ti, lo'o ñati̱ nu ndiya ti' ndu'ni ngu' cha' cuiñi, lcaa ñati̱ bi' tyanu nde chu̱' lo'o ji'i̱ quichi̱ bi'. Ni sca ñati̱ bi' ná ntsu'u chacuayá' tyatí̱ ngu' ne' lo'o quichi̱ bi'.

¹⁶ Xa' nchcui' Jesús li': ―Cua nda na' xca̱ 'na cha' ca̱a̱ ca su ndi'i̱ taju ñati̱ cu'ma̱ macala laca su ntsu'u quichi̱ tyi ma̱. Na' laca̱ nu tya'a ñati̱ ji'i̱ jyo'o David, nu ñati̱ tlyu nu cua ya̱a̱ chalyuu nu ngua sa'ni. Ñi'ya̱ laca xee nu nda cuii tlyu nu ntyucua nde cuxee, jua'a̱ laca xee nu ta na' cha' tyu'u ne' cresiya ji'i̱ ñati̱ ―nacui̱ Jesús.

¹⁷ ―Tya̱a̱ ma̱ ca nde ―nacui̱ nu laca Xtyi'i ycui' Ni. La cui' jua'a̱ laca cha' nu nda lcaa na nu ngusñi na cha' ji'i̱ ycui' Ndyosi, tyucui ña'a̱ taju ñati̱ tya'a na nu ntsu'u cha' ji'na lo'o nu ñi'ya̱ ña'a̱ xlya' bi'. Lo'o li' la cui' jua'a̱ nga'a̱ cha' chcui' lcaa na nu ndyuna na cha' re: ―Tya̱a̱ cu'ma̱ lo'o cua ―ñacui̱ na li'. Lcaa ñati̱ nu lyiji tsa cha' ji'i̱, tya̱a̱ ngu' cha' co'o ngu' hitya nu ta ycui' Ndyosi ji'i̱ ngu' xlya'be ti; caja chalyuu cucui nu ta ycui' Ndyosi ji'i̱ ngu' li', lcaa ñati̱ nu nti' tsa cha' caja cha' bi' ji'i̱.

^18-19 Tsa lo cua ti cha' nda ycui' Ndyosi cha' scua na' lo quityi re, bi' cha' nga'aa scua ma̱ xi xa' la cha' lo quityi re. Si tya scua la ngu' xi xa' la cha', li' ta Ni cha' ti'í ji'i̱ ngu' bi', la cui' ña'a̱ cha' ti'í nu nscua lo quityi re. La cui' jua'a̱, ná cuityi̱ ma̱ ni tsaca cha' nu nscua re; nu lo'o cuityi̱ ngu' sca cha', li' xlyaá Ni chalyuu nu nga'a̱ cha' caja ji'i̱ ngu' bi'. Li' nga'aa caja chacuayá' cacu ngu' bi' si'yu nu ntsu'u lo yaca bi', nga'aa tyalaa ngu' bi' ca quichi̱ tlyu nu lubii tsa ña'a̱, ñi'ya̱ nu nchcui' quityi re. Jua'a̱ nchcui' na' lo'o lcaa ñati̱ nu ndyuna cha' nu nscua lo quityi re, la cui' cha' nu caca nde loo la laca bi'.

²⁰ Ycui' Jesús nchcui' cha' liñi tsa nscua lcaa cha' re: ―Chañi cha' bi'. Yala ti ca̱a̱ na' chaca quiya' ―nacui̱ Ni. Jua'a̱ caca tu'ni. Ca̱a̱ nu'u̱ lacua, La Jesús.

²¹ Ña'a̱ ti cua'ni Jesús nu Xu'na na cha' tso'o lo'o lcaa cu'ma̱ lacua. Tsa lo cua ti cha' chcui' na.