APOCALIPSIS 21 - Chatino Tataltepec

Cua ndye ndya' chalyuu cucui

¹ Lo'o li' na'a̱ na' cha' cua ndyaca cucui tyucui ña'a̱ nde cua̱, cua ndye ndya' chaca ba'a chalyuu cucui. Nguliji yu'u lcaa na nu ntsu'u nde cua̱ tya tsubi' la; jua'a̱ chalyuu cusu' re, jua'a̱ tyucui ña'a̱ tyujo'o, nguliji yu'u bi', nga'aa ña'a̱ na' ji'i̱ tsiya' ti.

² La cui' Juan laca na', lo'o li' na'a̱ na' cha' cua nscua chaca quichi̱ Jerusalén cucui. Lubii tsa ña'a̱ quichi̱ bi' juani; nde su ntucua ycui' Ndyosi ngutu'u quichi̱ bi', ngua'ya nde lo yuu cucui. Tyucui ña'a̱ quichi̱ cua ngalya' tso'o; tso'o tsa ña'a̱ bi', ndubi tsa ña'a̱ bi'. Ñi'ya̱ ña'a̱ sca cuxi̱i̱ ji'i̱ ñati̱, nu tso'o tsa ña'a̱ ste', jua'a̱ tso'o tsa ña'a̱ quichi̱ cucui bi'.

³ Cui̱i̱ tsa nchcui' sca nu ndu̱ cacua ti su tlyu ca su ntucua ycui' Ndyosi li': ―Ca juani ntucua tyi ycui' Ndyosi la cui' ca su ndi'i̱ ñati̱ nu ngusñi cha' ji'i̱ Ni nde chalyuu. Tyi'i̱ ycui' Ni ca su ndi'i̱ ñati̱ ji'i̱ Ni li'; jua'a̱ caca ngu' bi' ñati̱ ji'i̱ ycui' Ni, caca ycui' Ni loo ji'i̱ ngu' bi' li'.

⁴ Lo'o li' cua'ni ycui' Ndyosi cha' nga'aa xi'ya ngu' nu ndyunaa tsa tya tsubi' la ―nacui̱ nu nchcui' bi'―. Nga'aa ntsu'u cha' cajaa ñati̱ li', nga'aa ntsu'u cha' ca xñi'i̱ ti' ngu', nga'aa xi'ya ngu', ni nga'aa tyacua cha' ti'í ji'i̱ ngu' li'; cua ndye lcaa cha' nu ngua ji'i̱ ngu' lo'o nguti'i̱ ngu' chalyuu cusu' ―nacui̱ nu nchcui' bi'.

⁵ Nchcui' ycui' nu ntucua lo yaca xlya tlyu bi' li': ―Ña'a̱ ma̱ ya'a̱ ñi'ya̱ nu caca juani. Xa' cuiñá cui na' lcaa na nu tyu'u nde chalyuu cucui ―nacui̱ Ni. Chaca cha' nchcui' Ni lo'o na' li': ―Scua clya nu'u̱ cha' nu nchcui' na' lo quityi; chañi tsa laca cha' bi', taca jlya ti' ma̱ ji'i̱.

⁶ Li' nchcui' Ni lo'o na' chaca quiya': ―Jua'a̱ caca lacua. Ñi'ya̱ nti' letra A ―nacui̱ Ni―, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ Ni―. Xlya'be ti ta na' na co'o ñati̱ nu jña tsa cha' bi' 'na; nu na co'o ngu' bi', tyu'u bi' ca su tyu'u lcaa cha' tso'o nu ta na' ji'i̱ ngu' cha' cua'ni cu'ú cresiya ji'i̱ ngu'.

⁷ Ndi'ya̱ caca ji'i̱ ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu; cua'ni tlyu ngu' bi' 'na cha' na' laca̱ ycui' Ndyosi cuentya ji'i̱ ngu', lo'o jua'a̱ caca ngu' bi' sñi' na'.

⁸ Pana lcaa ñati̱ nu ntsi̱i̱ tsa cha' tyu'u cha' ji'i̱ lo'o na', jua'a̱ ñati̱ nu ná ndaquiya' jna' tsiya' ti, jua'a̱ nu chiya'a̱ tsa ndu'ni, jua'a̱ nu ndujuii ji'i̱ tya'a ñati̱, jua'a̱ nu ndu'ni suba' lo'o nu cuna'a̱, jua'a̱ nu cucha'a̱, jua'a̱ ñati̱ nu jlya tsa ti' ji'i̱ cha' cucha'a̱, jua'a̱ ñati̱ nu ndu'ni tlyu ji'i̱ lcui̱ jo'ó, jua'a̱ nu cuiñi, lcaa ngu' bi' tyaa ngu' ca lo tayu' tlyu ca su ntsu'u quii' nu ndyaqui̱ lo'o yuu sufri. Lcaa ngu' nu cua ndyaa nde tayu' bi' ni, cua ndyaa ngu' nde chalyuu talya; cua ndye cha' ngujuii ngu' tsiya' ti li'.

Quichi̱ Jerusalén cucui

⁹ Ndyalaa sca xca̱ ji'i̱ ycui' Ndyosi ca slo na' li'; la cui' tya'a yu laca lo'o nu tya tyacati tya'a xca̱ bi', ngu' nu ntucua ca'ña oro ya', nu ntsu'u cati tya'a quicha bi'. Bi' quicha caca lo'o cua tye ti chalyuu. Nchcui' xca̱ bi' lo'o na' li': ―Cua̱a̱ clya nu'u̱ ca nde cha' culu'u̱ hi̱ ñi'ya̱ ña'a̱ quichi̱ tlyu ca su tyaa ma̱, lcaa cu'ma̱ nu ntsu'u cha' ji'i̱ ma̱ lo'o nu ñi'ya̱ ña'a̱ xlya' bi'. Tso'o tsa ña'a̱ quichi̱ bi'.

¹⁰ Li' ngua tii na' cha' ngua'ya Xtyi'i ycui' Ndyosi tyucui ña'a̱ loo na'. Ndyalo'o xca̱ bi' 'na ca lo sca ca'ya nu cua̱ tsa, ca lo xlya ca'ya tsiya' ti; ca bi' ngulu'u yu 'na ñi'ya̱ ña'a̱ quichi̱ Jerusalén cucui. Lubii tsa ña'a̱ quichi̱ bi', cha' nde su ntucua ycui' Ndyosi ngutu'u quichi̱ bi', ngua'ya nde lo yuu.

¹¹ Tso'o tsa ña'a̱ xee nu ntucua lo quichi̱ bi', cha' xee ji'i̱ ycui' Ndyosi laca bi'. Ndubi tsa ña'a̱ tyucui ña'a̱ quichi̱ bi'; ñi'ya̱ ña'a̱ sca quee ndubi, ñi'ya̱ laca quee jaspe, jua'a̱ ña'a̱ xee nu ntucua lo quichi̱ bi'.

¹² Cua̱ tsa lo'o nu ntsu'u ca to' quichi̱ bi', pana cua laca ntucua yaala ti tii tyucuaa tya'a tolo'o; sca xca̱ ji'i̱ ycui' Ndyosi ndu̱ cua̱ scaa tolo'o bi'. Chu̱' quee nu ntucua nde que tolo'o bi' nscua xtañi nu tii tyucuaa tya'a taju ñati̱ ngu' Israel, cha' bi' ñati̱ laca nu cua ngusubi ycui' Ndyosi ji'i̱ tya clyo lo'o nguxana cha' ji'i̱ ycui' Ni; scaa xtañi ngu' nscua nde que scaa tolo'o.

¹³ Sna tya'a tolo'o ntucua sca la'a to' quichi̱: nde la'a su ntyucua cuichaa ntucua sna tya'a tolo'o bi', nde la'a su ndyaa cuichaa ntucua tya xna tya'a tolo'o, chaca la'a ntucua chaca tya xna tya'a tolo'o, chaca la'a nde sii', la cui' jua'a̱ ntucua tya xna tya'a tolo'o.

¹⁴ Tii tyucuaa tya'a quee tonu ntsiya quiya' lo'o; jua'a̱ hichu̱' quee bi' cua nscua xtañi nu tii tyucuaa tya'a ngu' nu ngua'a̱loo nu ñi'ya̱ ña'a̱ xlya' bi' cña ji'i̱ ngu', nu cua'ni ngu' cuentya ji'i̱ ycui' Ni.

¹⁵ Ya' xca̱ nu cua nchcui' lo'o na' ntucua sca chcua̱ oro, cha' xñi yu cuayá' ji'i̱ quichi̱ tlyu bi', jua'a̱ ji'i̱ tolo'o bi', jua'a̱ ji'i̱ lo'o nu ntsu'u to' quichi̱.

¹⁶ Stu'ba tsa ña'a̱ quichi̱ bi'; jacua jyaca̱ ntsu'u ji'i̱ tsiya' ti, jua'a̱ stu'ba cuayá' cu' lo'o cuayá' loo. Li' ngusñi xca̱ cuayá' ji'i̱ ycui' quichi̱ tlyu bi' lo'o cuayá' oro ji'i̱; tucua mil ntucua tucua siyento kilómetro cuayá' tyucui̱ sca la'a, la cui' jua'a̱ cuayá' loo, la cui' jua'a̱ cuayá' cua̱ quichi̱ tlyu bi'.

¹⁷ Li' ngusñi xca̱ bi' cuayá' ji'i̱ lo'o ji'i̱ quichi̱, cha' snayala ntucua jacua metro cuayá' cua̱ bi'. Ñi'ya̱ laca cuayá' chcua̱ nu cua'nijo'o ji'na nde chalyuu, la cui' jua'a̱ ña'a̱ cuayá' chcua̱ nu ngua'nijo'o ji'i̱ xca̱ bi', nu lo'o ngusñi yu cuayá' ji'i̱ quichi̱.

¹⁸ Cua ndya' lo'o ji'i̱ quichi̱ bi' lo'o quee jaspe, sca quee nga'a nu ndubi tsa ña'a̱, pana lo'o xcui' oro tsiya' ti ndya' ycui' quichi̱ bi', nu ndubi ña'a̱ ñi'ya̱ ndubi caatya̱.

¹⁹ Cua ngalya' lcaa lo quee ndubi nu ntsu'u chalyuu chu̱' quee tonu nu ntsu'u quiya' lo'o ji'i̱ quichi̱: cua ngalya' quee nu ntucua clyo nu ntsu'u quiya' lo'o, lo'o quee jaspe; cuati ngalya' quee nu nchca tyucuaa nu ntsu'u quiya' lo'o, lo'o quee zafiro, sca quee azul ña'a̱; cuati ngalya' quee nu nchca tyuna nu ntsu'u quiya' lo'o, lo'o quee ágata; cuati ngalya' quee nu nchca jacua nu ntsu'u quiya' lo'o, lo'o quee esmeralda, sca quee nga'á ña'a̱;

²⁰ cuati ngalya' quee nu nchca ca'yu nu ntsu'u quiya' lo'o, lo'o quee ónice; cuati ngalya' quee nu nchca scuá nu ntsu'u quiya' lo'o, lo'o quee cornalina, sca quee nga'a ña'a̱; cuati ngalya' quee nu nchca cati nu ntsu'u quiya' lo'o, lo'o quee crisólito, sca quee ngatsi ña'a̱; cuati ngalya' quee nu nchca snu' nu ntsu'u quiya' lo'o, lo'o quee berilo, sca quee nga'á tsa ña'a̱; cuati ngalya' quee nu nchca caa nu ntsu'u quiya' lo'o, lo'o quee topacio, sca quee ngatsi tsa ña'a̱; cuati ngalya' quee nu nchca tii nu ntsu'u quiya' lo'o, lo'o quee crisoprasa; cuati ngalya' quee nu nchca tii chaca nu ntsu'u quiya' lo'o, lo'o quee jacinto, chaca nu azul ña'a̱; cuati ngalya' quee nu nchca tii tyucuaa nu ntsu'u quiya' lo'o, lo'o quee amatista. Bi' laca lcaa quee ndubi nu cua ngalya' quiya' lo'o ji'i̱ quichi̱.

²¹ Cua ndya' ca ta'a tii tyucuaa tolo'o ji'i̱ quichi̱ lo'o quee ndubi nu ngati̱ ña'a̱, nu naa quee perla; tii tyucuaa tya'a quee ngati̱ laca bi', sca ti quee ngati̱ bi' ngua'nijo'o ndya' sca tolo'o. Xcui' oro tsiya' ti nscua laja calle quichi̱ bi'; ñi'ya̱ ña'a̱ ndubi caatya̱, jua'a̱ ña'a̱ ndubi calle bi'.

²² Ná ntucua laa ca quichi̱ bi', ná na'a̱ na' cha' ntucua bi' tsiya' ti. Tso'o cha' ntucua ycui' Ndyosi nu Xu'na na quichi̱ bi', ycui' Ni nu nchca ji'i̱ ndu'ni Ni lcaa lo cña; la cui' jua'a̱ ntucua nu ñi'ya̱ ña'a̱ xlya' bi'. Bi' cha' ni sca laa nga'aa nti' quichi̱ bi'.

²³ Nga'aa cua'nijo'o xee cuichaa cuentya ji'i̱ quichi̱ bi', la cui' jua'a̱ nga'aa nti' cha' quiji'i̱ xee co' lo. Tso'o tsa ña'a̱ xee quichi̱ bi', xqui'ya cha' lubii tsa xee nu nda ycui' Ndyosi, jua'a̱ lubii tsa xee su ntucua nu ñi'ya̱ ña'a̱ xlya' bi';

²⁴ bi' laca nu ta xee su tya'a̱ ñati̱ tyucui ña'a̱ chalyuu cucui. Lo'o jua'a̱ ntsu'u xi ngu' nu laca loo chalyuu nu tyalaa ca quichi̱ tlyu bi', tya̱lo'o ngu' ji'i̱ lcaa cha' tso'o nu ntsu'u ji'i̱ ngu' ca bi'.

²⁵ Lcaa tsa̱ tsiya' ti tyucua yaala tolo'o ji'i̱ quichi̱ bi'; ná tyacu̱' chca bi', cha' ná caca talya ca bi'.

²⁶ Lcaa cha' culiya', lcaa cha' tso'o nu ntsu'u ne' cresiya ji'i̱ ñati̱, tya̱a̱ cha' bi' nde quichi̱ tlyu bi';

²⁷ pana ni sca cha' cuxi ná taca tyatí̱ quichi̱ bi'. Lcaa ñati̱ nu ndu'ni suba' lo'o nu cuna'a̱, jua'a̱ ngu' cuiñi, ná caja chacuayá' tyatí̱ ngu' ca quichi̱ bi'; ñati̱ nu ntsu'u xtañi lo quityi nu ntucua ya' nu ñi'ya̱ ña'a̱ xlya' bi', nu ndacha' tilaca laca nu ná nga'a̱ cha' tye chalyuu ji'i̱, bi' ti ñati̱ laca nu caja chacuayá' ji'i̱ tyalaa ca quichi̱ bi'.