APOCALIPSIS 20 - Chatino Tataltepec

Ndi'i̱ nu xña'a̱ ndyaaca̱' preso sca mil yija̱

¹ Lo'o li' na'a̱ na' cha' lijya̱ ca'ya chaca xca̱ nu ngutu'u ya̱a̱ nde cua̱ ca su ntucua ycui' Ndyosi. Ya' xca̱ ndacui ya' ji'i̱ to' tyuquee ca su ndi'i̱ nu cuiñaja, jua'a̱ ndyi'ya yu sca carena tyucui̱ cu' lijya̱ yu.

² Li' ndaya' xca̱ bi' ji'i̱ nu cuaña tlyu, la cui' cuaña laca nu ndi'i̱ chalyuu tya sa'ni, la cui' nu xña'a̱ nu naa Satanás laca bi'. Tachaa ngusca̱' xca̱ bi' ji'i̱ nu xña'a̱ bi' lo'o carena ña'a̱ cuayá' talo sca mil yija̱ ndyaaca̱'.

³ Ntucua ya' xca̱ bi' ji'i̱ nu cuaña bi' ndyaa nde ne' tyuquee; li' ngua'a̱ xca̱ ya' to' tyuquee, cuati ngua'a̱ sello nguiña' to' tyuu, cha' nga'aa tyu'u nu cuaña bi', cha' ná taca ñilo'o bi' ji'i̱ ñati̱ chalyuu ña'a̱ cuayá' tye tyu'u scua sca mil yija̱. Pana lo'o cua ndye yija̱ bi', li' nscua cha' tyu'u bi' tya xi tya tyempo cha' tya cua'ni la cha' cuxi.

⁴ Lo'o li' na'a̱ na' su ntucua tyu̱u̱ tya'a yaca xlya tlyu. Ndyuloo na' ji'i̱ ngu' nu ntucua lo yaca xlya bi', cha' laca ngu' nu ntsu'u chacuayá' ji'i̱ cua'ni cuayá' ji'i̱ ñati̱ chalyuu. Laja ngu' nu ntucua bi' na'a̱ na' ji'i̱ ñati̱ chalyuu nu cua ndyujuii tya'a ñati̱ ji'i̱, xqui'ya cha' ná ntsi̱i̱ ngu' cacha' liñi ngu' cha' tso'o ji'i̱ tya'a ñati̱, cha' nu cua nda Jesús lo'o na cuentya ji'i̱ ycui' Ndyosi Sti yu. Ná ngua'ni tlyu jyo'o bi' ji'i̱ na'ni chiya'a̱ ña'a̱ bi', la cui' ti ná ngua'ni tlyu ngu' ji'i̱ lcui̱ ji'i̱ na'ni bi', jua'a̱ ná ngua'a̱ cuayá' na'ni bi' nde tyaca̱a̱ ngu', nde chu̱' ya' ngu'; cua ndyu'ú ngu' bi' chaca quiya', lo'o juani laca ngu' cña lo'o Cristo ca su ntucua ycui' Ndyosi ña'a̱ cuayá' tyu'u scua sca mil yija̱.

⁵ Jyo'o nu cua na'a̱ na' ni, bi' jyo'o laca nu cua ndyu'ú chaca quiya' yala la, cha' xa' la jyo'o ñati̱ chalyuu, tya lyiji tyu'ú ngu'; ña'a̱ cuayá' tya'a sca mil yija̱, ca li' tyu'ú nu xa' la ngu' bi' chaca quiya'.

⁶ Tso'o tsa caca tyiquee ñati̱ nu yala la tyu'ú chaca quiya', cha' ñati̱ ji'i̱ ycui' Ndyosi laca ngu' bi'; ná ntsu'u cha' chcube' ngu' bi' tsiya' ti lo'o tyaa lcaa ñati̱ cuxi nde chalyuu talya, nu lo'o cua ndye lcaa cha'. Cua'ni ngu' bi' cña ji'i̱ ycui' Ndyosi; la cui' jua'a̱ cua'ni ngu' cña ji'i̱ Cristo, cha' stu'ba ti caca ngu' loo lo'o Cristo ña'a̱ cuayá' tyu'u scua sca mil yija̱.

⁷ Lo'o tye nu sca mil yija̱ bi', li' tyu'u Satanás ne' chcua̱ su ngutu'ú yu nchcube' yu,

⁸ tsaa laja ti nu Satanás bi' xi cha' cñilo'o yu xi ji'i̱ lcaa ñati̱ tyucui ña'a̱ chalyuu, lcaa tya'a cusu̱u̱ ycui' Ndyosi; ngu' Gog lo'o ngu' Magog laca ñati̱ bi'. Ñi'ya̱ nu ná caca ji'na culacua na ni lcua tya'a satya yusi̱ ndi'i̱ to' tyujo'o, jua'a̱ ná caca culacua na ni tsa lo cua tya'a ñati̱ nu xuti'i̱ Satanás ji'i̱ cha' xu̱u̱ tya'a ngu' lo'o ycui' Ndyosi.

⁹ Li' tyu'u ñati̱ ji'i̱ Satanás tyaa ngu' tyucui ña'a̱ lo yuu chalyuu. Tyanu ngu' tyi'i̱ ca chu̱' su ndi'i̱ taju ñati̱ ji'i̱ ycui' Ndyosi li'; lo'o jua'a̱ quixi̱i̱ ngu' tyi'i̱ ca to' quichi̱ tlyu nu tyaca'a tsa ji'i̱ ycui' Ni, cha' cua'ni tye ngu' ji'i̱ ñati̱ ji'i̱ ycui' Ndyosi, nti' ngu'. Li' tyalú slu quii' nu ngutu'u ca nde cua̱, tyalú su ndi'i̱ ngu' bi', tye ngu' tyaqui̱ ngu'.

¹⁰ Lo'o li' tyucua ya' Ni ji'i̱ nu xña'a̱ nu ngüiñilo'o ji'i̱ ngu' tya clyo, tyalo'o Ni ji'i̱ lo tayu' su ntsu'u quii' ndyaqui̱ lo'o yuu sufri; la cui' se'i̱ laca su cua nchcua̱a̱ Ni ji'i̱ nu na'ni chiya'a̱ ña'a̱ bi', su cua nchcua̱a̱ Ni ji'i̱ nu cuiñi nu nacui̱ cha' tu'ba ji'i̱ ycui' Ndyosi laca. Tsa̱ lo'o talya ná tye cha' ti'í tsa chcube' ngu' ca bi'.

Nu lo'o ndyu'ni cuayá' Ni ji'i̱ ñati̱ lo'o cua ndye chalyuu

¹¹ Lo'o li' na'a̱ na' cha' ntucua sca ñati̱ tlyu lo sca yaca xlya tlyu nu ndubi tsa ña'a̱. Li' nguti̱ lcaa chalyuu, jua'a̱ nguti̱ lcaa ca na nu ntsu'u nde cua̱, nu lo'o ndu'u tucua ycui' Ni; nga'aa tyaca̱' tsiya' ti ma nde su nguliji yu'u chalyuu bi'.

¹² Lo'o li' na'a̱ na' cha' ca bi' ndi'i̱ lcaa ñati̱ nu cua ngujuii, masi ngu' cusu', masi ngu' cuañi', ndi'i̱ ngu' nde loo yaca xlya su ntucua tlyu ycui' Ni. Cua nchcana quityi li', lo'o jua'a̱ cua nchcana nu chaca quityi bi'; lo quityi bi' cua nscua xtañi ñati̱, lcaa ñati̱ nu cua ngujui chalyuu nu ná nga'a̱ cha' tye ji'i̱, cha' cua ndyu'ú ngu' chaca quiya'. Li' cuentya ji'i̱ quityi nu nguscua ycui' Ni, ngua'ni cuayá' Ni ji'i̱ lcaa ñati̱ nu cua ngujuii bi', cha' lo quityi bi' cua laca nscua lcaa cña nu ngua'ni ngu' lo'o ya̱a̱ ngu' chalyuu.

¹³ Li' chaca quiya' ndyu'ú ñati̱ nu cua ngujuii lo hitya tyujo'o, jua'a̱ chaca quiya' ndyu'ú ñati̱ nu ndyalo'o La Muerte ji'i̱, jua'a̱ chaca quiya' ndyu'u xa' la jyo'o ca su nga'a̱ cha' tsaa ngu' lo'o ndyijii ngu'; lcaa ngu' bi' ndu'u ngu' lijya̱ ngu'. Li' ngua cuayá' ji'i̱ lcaa ngu' cuentya ji'i̱ lcaa cña nu ngua'ni ngu' lo'o ya̱a̱ ngu' chalyuu.

¹⁴ Li' nguxcua̱a̱ Ni ji'i̱ La Muerte, lo'o jua'a̱ nguxcua̱a̱ Ni chalyuu su nguti'i̱ jyo'o bi', ndyaa bi' nde lo tayu' su ntsu'u quii' tlyu ndyaqui̱. Lcaa nu ndyaa ca lo tayu' bi' ni, cua ndyaa ngu' chalyuu talya, cua ndye cha' ngujuii ngu' bi'; nga'aa tyu'ú ngu' bi' tsiya' ti.

¹⁵ Lo'o li' xcua̱a̱ Ni ji'i̱ cua ña'a̱ ca ñati̱ nu ná nscua xtañi lo quityi ji'i̱ ycui' Ni, tyaa ngu' nde lo tayu' ca su ntsu'u quii' bi', cha' ndacha' quityi bi' tilaca laca ñati̱ nu ná nga'a̱ cha' tye chalyuu ji'i̱.