APOCALIPSIS 2 - Chatino Tataltepec

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Efeso

¹ Li' nacui̱ Jesús: ―Nde cha' nu scua nu'u̱ cha' tsaa slo nu ñati̱ nu ndu̱ cuentya jna' nde quichi̱ Efeso, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, la cui' na' nu ndacui nu cati tya'a cuii bi' ya' na', nu ndu̱ na' cla'be laja nu cati tya'a candyeru oro bi':

² Cua jlo ti' na' lcaa ña'a̱ nu ndu'ni ma̱, nacui̱ Jesús. Jlo ti' na' cha' ndalo tsa tyiquee ma̱, masi ndyiji tsa cha' ti'í ji'i̱ ma̱ cha' ndacu̱' ma̱ cha' ji'i̱ ngu' xña'a̱, nacui̱ Ni. Lo'o jua'a̱ jlo ti' na' cha' ná ndalo ma̱ tsiya' ti ji'i̱ ñati̱ cuxi. Cua ngua'ni cuayá' ma̱ ji'i̱ ñati̱ nu nacui̱ cha' cua nda na' ji'i̱ ycui' ngu' lijya̱ slo ma̱, masi ná nda na' ji'i̱ ngu' bi' lijya̱; cua nquijeloo cha' ji'i̱ ma̱ cha' cuiñi ngu' bi', nacui̱ Ni.

³ Lo'o jua'a̱ jlo ti' na' cha' ná nchca taja ti' ma̱; masi ndyiji tsa cha' ti'í ji'i̱ ma̱, ná ndya'a̱chu̱' ma̱ cha' jna'.

⁴ Pana nde qui'ya ntsu'u cha' sta na' hichu̱' ma̱, cha' ná ntsu'u tyiquee ma̱ ña'a̱ ma̱ 'na ñi'ya̱ nu ngua'ni ma̱ tya clyo la, nacui̱ Jesús.

⁵ Bi' cha' juani cua'ni clya ma̱ cha' tyi'u ti' ma̱ ñi'ya̱ nu tso'o tsa ntsu'u tyiquee ma̱ ña'a̱ ma̱ jna', nu lo'o ngusñi ma̱ cha' 'na tya clyo; lo'o juani ña'a̱ ti nga'a̱ cha' cua'ni ma̱ la cui' cha' tso'o bi' chaca quiya'. Si ná tyaja'a̱ ma̱ cua'ni ma̱ jua'a̱, li' ca̱a̱ na' ca̱qui'ya̱ ji'i̱ candyeru ji'i̱ ma̱ ca su ntucua bi', tyalo'o na' ji'i̱, nacui̱ Ni.

⁶ Pana nde cña ngua'ni ma̱ nu tso'o tsa nti' na' ña'a̱ na' ji'i̱, nacui̱ Ni, cha' stu'ba nti' ma̱ lo'o na' cuentya ji'i̱ ngu' nicolaítas; tso'o cha' ná ndiya ti' ma̱ tsiya' ti lcaa ña'a̱ nu ndyu'ni ngu' bi'.

⁷ Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caja chalyuu nu ná nga'a̱ cha' tye ji'i̱ ngu' bi', lo'o jua'a̱ ta na' chacuayá' cacu ngu' si'yu yaca tso'o nu ndu̱ ca cla'be yuu tso'o su ndi'i̱ ycui' Ni, nacui̱ Jesús.”

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Esmirna

⁸ ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Esmirna, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, na' nu ntucua̱ lo'o nguxana lcaa cha', la cui' na' nu tya tyucua̱ lo'o tye lcaa cha': Chañi cha' ngujuii na', pana cua ndyu'ú na' chaca quiya'.

⁹ Jlo ti' na' lcaa ña'a̱ nu ndu'ni cu'ma̱, nacui̱ Ni. Jlo ti' na' cha' lye tsa ndyu'ni lya' ti' ngu' ji'i̱ ma̱, cha' ti'i tsa ma̱ cuentya ji'i̱ ngu' bi', masi liñi la ñacui̱ na cha' ntsu'u tsa cha' tso'o ji'i̱ cu'ma̱ cuentya jna', nacui̱ Ni. Lo'o jua'a̱ jlo ti' na' cha' cuxi tsa nchcui' ngu' ji'i̱ ma̱. Nacui̱ ngu' cha' sñi' ycui' Ndyosi laca ycui' ngu'; pana sca cha' ndu'ni ti ngu' laca cha' bi', cha' stu'ba ntsu'u cha' ji'i̱ ngu' bi' lo'o Satanás, nacui̱ Ni.

¹⁰ Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

¹¹ Cua'a̱ jyaca̱ ma̱ ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱ xi: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; ná sca caca ji'i̱ ngu' bi' tsiya' ti tsa̱ bi', nu lo'o culo ycui' Ndyosi cña ji'i̱ ñati̱ cuxi nu ntsu'u ca bilyaa cha' tyaa ngu' nde chalyuu talya, nacui̱ Jesús.”

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Pérgamo

¹² ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Pérgamo, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, nacui̱ Jesús, na' nu ntsu'u xlyu cusu̱u̱ 'na nu cha tsa tyucuaa chu̱' xlyu bi'.

¹³ Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.

¹⁴ Pana tya ntsu'u xi qui'ya nu sta na' hichu̱' ma̱, nacui̱ Jesús, cha' tya ntsu'u xi ngu' tya'a ndyu'u ti'i̱ ma̱ ca quichi̱ Pérgamo bi', nu ná nti' xtyanu ji'i̱ cha' cuxi, la cui' cha' cuxi nu ngulu'u jyo'o Balaam ji'i̱ ñati̱ nu ngua sa'ni. Cua nchcui' jyo'o bi' lo'o jyo'o Balac nu ngua li', cha' culu'u yu cha' cuxi bi' ji'i̱ ngu' Israel, cha' cacu ngu' msta̱ nu nscua slo lcui̱ jo'ó ji'i̱ xa' ñati̱ nu ná ndaquiya' ji'i̱ ycui' Ndyosi tsiya' ti, lo'o jua'a̱ cha' cua'ni ngu' cha' suba' lo'o xa' nu cuna'a̱.

¹⁵ Lo'o jua'a̱ ntsu'u xi ngu' tya'a ndyu'u ti'i̱ ma̱ nu ná ntaja'a̱ ngu' xtyanu ngu' ji'i̱ xa' cha' cuxi nu ngulu'u ngu' nicolaítas bi'. Ná ndiya ti' na' cha' cuxi bi' tsiya' ti, nacui̱ Ni.

¹⁶ Bi' cha' juani culochu̱' ma̱ lcaa cha' cuxi bi', nacui̱ Ni. Si ná tyaja'a̱ ma̱ cua'ni ma̱ jua'a̱, yala ti ca̱a̱ na' ca su ndi'i̱ ma̱ cha' xu̱u̱ tya'a na' lo'o ma̱ lo'o xlyu cusu̱u̱ nu ntucua tu'ba na', nacui̱ Ni.

¹⁷ Cua'a̱ jyaca̱ ma̱ xi ji'i̱ ña'a̱ cha' nu nda Xtyi'i ycui' Ndyosi lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱: Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱ ña'a̱ cuayá' tye chalyuu ji'i̱ ngu'; caca tyaala' ti' tyiquee ngu' bi', cacu ngu' cha' tso'o nu cua nguxco'o na' cha' caja ji'i̱ ngu'. Lo'o jua'a̱ ta na' sca quee sube ti nu ngati̱ ña'a̱, nu nscua xtañi scaa ngu' chu̱', cha' ca cuayá' ti' ngu' bi', cha' tso'o ti nti' na' ña'a̱ na' ji'i̱ ngu'; chaca xtañi nu tso'o la laca nu nscua chu̱' quee bi'. Ná caja chacuayá' ji'i̱ xa' ñati̱ tyuloo xtañi bi'; cua laca ti ñati̱ nu caja xtañi bi' ji'i̱, bi' laca nu caja chacuayá' cha' tyuloo ji'i̱, nacui̱ Ni.”

Cha' nu nda Jesús lo'o taju ñati̱ nu ngusñi cha' ji'i̱ Ni nde quichi̱ Tiatira

¹⁸ ’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Tiatira, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui̱' lo'o ma̱, na' nu laca̱ nu sca ti Sñi' ycui' Ndyosi, na' nu ngulane tsa xee cloo na' ñi'ya̱ laca lo'o lye tsa ndyatu̱ quii' su talya ña'a̱, na' nu ndubi tsa ña'a̱ quiya' na' ñi'ya̱ laca sca chcua̱ ngatsi nu scui chu̱'.

¹⁹ Cua jlo ti' na' lcaa ña'a̱ nu ndu'ni ma̱, nacui̱ Ni. Ntsu'u tsa tyiquee ma̱ ña'a̱ ma̱ ji'i̱ tya'a ma̱ nu ntsu'u cha' ji'i̱ lo'o na', cha' tso'o tsa ngusñi ma̱ cha' 'na; nxtyucua ma̱ ji'i̱ ñati̱ nu lyiji tsa cha' tso'o ji'i̱, jua'a̱ ndalo tsa tyiquee ma̱ lo'o ndyu'ni lya' ti' ngu' ji'i̱ ma̱. Lo'o juani tso'o la xi ndyu'ni ma̱, nga'aa si'i ñi'ya̱ nu ngua'ni ma̱ tya sa'ni la, nacui̱ Jesús.

²⁰ Pana nde qui'ya nu ntsu'u cha' sta na' hichu̱' ma̱, nacui̱ Ni, laca cha' tya nda ma̱ chacuayá' ji'i̱ nu cuna'a̱ Jezabel bi', cha' culu'u cha' cuxi ji'i̱ ngu' tya'a ma̱. Ycui' ma' nacui̱ ma' cha' laca ma' tu'ba ji'i̱ ycui' Ndyosi, pana ndatsaa tsa ma' bi' ji'i̱ ñati̱ nu ntsu'u cuentya jna'; nclu'u qui'i̱ ji'i̱ ngu' cha' cua'ni ngu' cha' suba' lo'o xa' cuna'a̱, jua'a̱ nclu'u ma' ji'i̱ ngu' cha' cacu ngu' msta̱ nu nscua slo lcui̱ jo'ó ji'i̱ ngu', nacui̱ Ni.

²¹ Cua ntajatya tsa na' ji'i̱ nu cuna'a̱ bi', ni jacua' culochu̱' ji'i̱ cha' cuxi nu ntsu'u ji'i̱; pana ná ntaja'a̱ ma' bi' xtyanu ma' cha' suba' nu ndu'ni ma'.

²² Bi' cha' juani ta na' cha' ti'í ji'i̱ ma' bi', nacui̱ Ni. Stu'ba ti caca quicha nu cuna'a̱ bi' lo'o nu ñati̱ nu suba' tsa ndyu'ni lo'o, lye tsa caca quicha ngu'. Jua'a̱ cua'ni na' lo'o ngu' bi', si ná ca tyuju'u ti' ngu' ji'i̱ cha' cuxi nu ndyu'ni ngu', cha' culochu̱' ngu' ji'i̱ cha' cuxi bi';

²³ hasta cujuii na' ji'i̱ ñati̱ nu ngusñi cha' ji'i̱ nu cuna'a̱ bi', nacui̱ Ni. Lo'o li' lcaa taju ñati̱ ji'i̱ Jesucristo lcua ti quichi̱, caja cha' ji'i̱ ngu' cha' cua ngua'ni tye na' ji'i̱ cha' cuxi bi'; li' taca jlya tso'o ti' ngu' cha' cua jlo ti' na' lcaa ña'a̱ cha' nu nclyacua ti' ñati̱ chalyuu. Lo'o li' ca cuayá' ti' lcaa ma̱ cha' la cui' ñi'ya̱ ngua'ni ma̱ cha' cuxi tya lo'o ya̱a̱ ma̱ chalyuu, jua'a̱ xcube' na' ji'i̱ ma̱, nacui̱ Jesús.

²⁴ Juani chcui' na' xi lo'o cu'ma̱ tya'a ngusñi ma̱ cha' jna', nu ndyanu ma̱ nde Tiatira, cu'ma̱ nu ná ngusñi ma̱ cha' cuxi nu nclyu'u nu cuna'a̱ cuxi bi': ná jlo ti' ma̱ cua'ni ma̱ cha' cuxi nu nacui̱ ngu' bi' cha' sca cha' nu tucui tsa nu ntsu'u ji'i̱ Satanás laca, lo'o jua'a̱ laca cha' cuxi bi'. Tso'o ndu'ni ma̱ lacua. Ná ta na' xa' cña nu cua'ni ma̱, nacui̱ Ni,

²⁵ masi sca ti cha' chcui' na' lo'o ma̱, cha' ña'a̱ ti tya tyanu tso'o cha' ne' cresiya ji'i̱ ma̱, lcaa cha' nu cua ndyuna ma̱ tya tsubi' la; tyanu cha' bi' ña'a̱ cuayá' nu ca̱a̱ na', nacui̱ Jesús.

²⁶ Tso'o ti cua'ni na' lo'o cua ña'a̱ ca ñati̱ nu tyiji̱loo ji'i̱ nu xña'a̱, ñati̱ nu ndalo, cha' ndu'ni ngu' cua ña'a̱ ca cña nu nti' na' cha' cua'ni ngu' ña'a̱ cuayá' tye chalyuu, nacui̱ Ni. Stu'ba ti tyucua ngu' bi' lo'o na', cha' caca ya loo ji'i̱ lcaa ñati̱ chalyuu ca li',

²⁷ cha' cua nda ycui' Ndyosi Sti na' chacuayá' cha' caca na' loo; jua'a̱ tlyu tsa chacuayá' ta ycui' Ndyosi ji'i̱ ngu' bi' lo'o caca ngu' loo ji'i̱ ñati̱. Li' xcube' tsa ngu' ji'i̱ ñati̱ nu ná tyaja'a̱ taquiya' ji'i̱ cha' ji'i̱ ycui' Ndyosi.

²⁸ Lo'o jua'a̱ ta na' sca xee nu tyu'ú ne' cresiya ji'i̱ ngu' ñi'ya̱ laca sca cuii tlyu nu ntyucua nde nguxee, nacui̱ Ni.

²⁹ Cua'a̱ jyaca̱ ma̱ xi ji'i̱ ña'a̱ cha' nu nda na' lo'o taju ñati̱ nu ngusñi cha' ji'i̱ Ni scaa quichi̱, si tyaja'a̱ ca ma̱ cuna ma̱, nacui̱ Jesús.”