APOCALIPSIS 19 - Chatino Tataltepec

¹ Tiya' la xi ndyuna na' nchcui' ñati̱ nu ndi'i̱ tsa tlyu ti ca su ntucua ycui' Ndyosi. Ndi'ya̱ nchcui' ngu' li': Cua'ni tlyu na ji'i̱ ycui' Ndyosi, cha' nchca ji'i̱ Ni cua'ni lyaá Ni ji'i̱ ñati̱. Cua'ni chi̱ na loo ycui' Ndyosi, cha' nchca ji'i̱ Ni cua'ni Ni lcaa lo cña tsiya' ti.

² Chañi tsa laca lcaa cha' nu nchcui' ycui' Ni lo'o ñati̱, liñi tsa ndyu'ni cuayá' Ni ji'i̱ ñati̱ chalyuu. Cua nchcube' Ni ji'i̱ ngu' quichi̱ tlyu nu lye tsa ngua'ni ñu'u̱ ji'i̱ chalyuu, xqui'ya cha' suba' nu ndyu'ni ngu' lo'o tya'a ngu'; jua'a̱ nchcube' Ni ji'i̱ ngu' bi', xqui'ya cha' cua ndyujuii ngu' ji'i̱ ñati̱ nu ndyu'ni cña ji'i̱ ycui' Ni.

³ Tya chaca quiya' cui̱i̱ nchcui' ngu' li': ―Cua'ni tlyu na ji'i̱ ycui' Ndyosi. Nga'aa tye cha' tyatu̱ sñii ca su ndyaqui̱ quichi̱ tlyu bi'.

⁴ Li' nguxana nu calaa ntucua jacua tya'a ngu' cusu' bi', la cui' jua'a̱ nguxana nu jacua tya'a na'ni tacati, ndyaa stii ngu' lo yuu nde loo su tlyu su ntucua ycui' Ndyosi; ngua'ni tlyu ngu' ji'i̱ ycui' Ni. Ndi'ya̱ nchcui' ngu' bi': ―Jua'a̱ caca cha' lacua. Cua'ni tlyu na ji'i̱ ycui' Ni ―nacui̱ ngu' lo'o tya'a ngu'.

⁵ Li' nguañi nchcui' sca ñati̱ ca su ntucua yaca xlya tlyu: Lcaa tya'a na nu ndu'ni na cña ji'i̱ ycui' Ni, cua'ni tlyu na ji'i̱ Ni juani; lcaa na lo'o tya'a na nu ndube tsa ti' na ji'i̱ Ni, masi cuañi' na, masi ngusu' na, cua'ni tlyu na ji'i̱ ycui' Ni.

Ta'a ngujui clyo'o ycui' yu nu ngujuii lo crusi xqui'ya na

⁶ Quiña'a̱ tsa ñati̱ nguañi nchcui' tsa tlyu ti li'. Ñi'ya̱ ndañi ndyalú sca sta'a̱ clyaa to' quee jaa' su cua̱ tsa ndyalú hitya, ñi'ya̱ ndañi lo'o cui̱i̱ tsa nchcui' tyi'yu, jua'a̱ nguañi lo'o nchcui' ñati̱ quiña'a̱ bi', ngua ti' na'. Ndi'ya̱ nchcui' ngu' li': Cua'ni tlyu na ji'i̱ ycui' Ndyosi nu Xu'na na, nu lcaa lo cña nchca ji'i̱ Ni ndu'ni Ni, nacui̱ ngu' ji'i̱ tya'a ngu'. Cua nguxana Ni, laca Ni loo ji'na juani;

⁷ bi' cha' tso'o tsa caca tyiquee na, ca chaa ti' na juani, cua'ni chi̱ na loo ycui' Ni. Cua ndyalaa tsa̱ cha' caja clyo'o ycui' yu nu ngujuii lo crusi cuentya ji'na. Lo'o lcaa na, ñati̱ nu ngusñi cha' ji'i̱ Ni nde chalyuu, laca na ñi'ya̱ si laca na cuxi̱i̱ ji'i̱ yu, masi tsa tlyu ti na sca tyempo ti. Cua ngua'ni cho'o na ñi'ya̱ si caja clyo'o na lo'o ycui' yu, nacui̱ ngu'.

⁸ Cua nda Ni late' lubii nu ngati̱ tsa ña'a̱, nu tso'o tsa ña'a̱ cha' cacu' na. Lcaa cña tso'o nu ngua'ni ngu' bi' nde chalyuu xqui'ya cha' ngusñi ngu' cha' ji'i̱ ycui' Ni, bi' laca ñi'ya̱ ña'a̱ ste' ngu' nu tso'o tsa ña'a̱ bi'.

⁹ Nchcui' nu xca̱ ji'i̱ ycui' Ndyosi bi' lo'o na' li': ―Scua clya nu'u̱ cha' re lo quityi ―nacui̱―: “Tso'o ntsu'u tyiquee ñati̱ nu nguane na' ji'i̱ cha' tsaa su caja clyo'o lo'o yu nu ngujuii lo crusi cuentya ji'i̱ ngu'”, nacui̱ Ni. La cui' cha' liñi nu nda ycui' Ndyosi lo'o ñati̱ laca cha' bi' ―nacui̱ xca̱ bi' jna'.

¹⁰ Li' ngutu̱ sti̱' na' ngustii na' nde loo su ndu̱ xca̱ bi', cha' cua'ni tlyu na' ji'i̱ ngua ti' na', pana nga'aa nda bi' chacuayá' 'na: ―Nga'aa cua'ni nu'u̱ jua'a̱ lo'o na' ―nacui̱ nu xca̱ bi' 'na―. La cui' tya'a ndyu'ni na cña ji'i̱ ycui' Ni laca na. La cui' tya'a na' laca lcaa cu'ma̱ nu ngusñi tso'o ma̱ cha' tso'o nu cua nda Jesús lo'o ma̱. Ji'i̱ ycui' Ndyosi cua'ni tlyu nu'u̱ tso'o la ―nacui̱ xca̱ jna'. Nu cha' tso'o nu nda Jesús lo'o ñati̱, la cui' cha' laca nu nda ycui' Ndyosi lo'o ñati̱ nu laca tu'ba ji'i̱ Ni.

Nu ntucua chu̱' sca cuayu ngati̱

¹¹ Lo'o li' na'a̱ na' cha' ntucua yaala to' tyuu ni'i̱ ca su ntucua ycui' Ndyosi; ca bi' ndu̱ sca cuayu ngati̱, jua'a̱ ntucua sca ñati̱ hichu̱' ni'. Nacui̱ lcaa ngu' ca su ntucua ycui' Ndyosi cha' ñati̱ tso'o laca nu bi', cha' chañi tsa laca cha' nu nchcui' Ni lo'o ñati̱. Liñi tsa cha' nu nda Ni lo'o ndyu'ni cuayá' Ni ji'i̱ ñati̱. Liñi tsa ndu'ni Ni lo'o ñati̱ lo'o ndya'a̱ Ni cusu̱u̱.

¹² Nu xee cloo Ni ni, tso'o tsa ngulane xee ñi'ya̱ laca lo'o cua̱ tsa ndyatu̱ quii'. Lo'o jua'a̱ tyu̱u̱ tya'a sne' oro ntucua lo xlya hique Ni. Cua nscua sca xtañi Ni hichu̱' Ni nu ndacha' ñi'ya̱ laca cña nu ndu'ni Ni. Ná taca ji'i̱ xa' ñati̱ ñacui̱ ngu' ñi'ya̱ ndyu'u cha' ji'i̱ xtañi bi', cha' sca ti ycui' Ni nslo Ni ñi'ya̱ ndyu'u xtañi bi'.

¹³ Ndi'ya̱ nchcui' ngu' ji'i̱ Ni: “La cui' nde laca cha' nu cua nda Ni lo'o ñati̱”. Tyucui ña'a̱ lo ste' Ni ndu'u tañi.

¹⁴ Lo'o lcaa ñati̱ nu ndi'i̱ ca su ntucua ycui' Ndyosi, tsa tlyu ti ndya'a̱ ngu' lo'o Ni macala su tsaa Ni cha' cusu̱u̱; ntucua ngu' hichu̱' cuayu ngati̱, jua'a̱ lacu' ngu' late' ngati̱ nu lubii tsa ña'a̱.

¹⁵ Liñi tsa cha' nu ndyu'u tu'ba Ni lo'o nda Ni cha' lo'o ñati̱ chalyuu. Lo'o jua'a̱ tatsaa Ni ji'i̱ ñati̱ tyucui ña'a̱ chalyuu cha' taquiya' ngu' cha' ji'i̱ Ni. Lye tsa culo Ni cña ji'i̱ ngu', jua'a̱ xcube' Ni ji'i̱ ñati̱ cuxi; ñi'ya̱ laca lo'o satá ngu' si'yu losu' tyixi ne' sca pilya quee nu tlyu xi cha' tyu'u hitya si'yu bi', la cui' jua'a̱ xcube' Ni ji'i̱ ñati̱ bi', xqui'ya cha' ñasi̱' tsa ycui' Ndyosi ji'i̱ ngu', ycui' Ni nu nchca ji'i̱ ndu'ni Ni lcaa lo cña.

¹⁶ Tsaca xtañi Ni nscua lo late' lo tyiquee Ni, lo'o jua'a̱ la cui' ti cha' nscua lo late' nde chu̱' Ni: “Nu nde laca Rey nu chañi ca, nu nde laca Xu'na ñati̱ nu chañi ca”. Jua'a̱ nchcui' cha' nu cua nscua lo late' ji'i̱ Ni.

¹⁷ Lo'o li' na'a̱ na' su ndu̱ sca xca̱ ji'i̱ ycui' Ndyosi nde cua̱, nu cui̱i̱ tsa nxi'ya ji'i̱ lcaa na'ni lu'be nu ndyacui cla'be nde cua̱ jua: ―Cua̱a̱ clya ma̱ cha' tyu'u ti'i̱ ma̱ ca su ndyu'ni ycui' Ndyosi sca ta'a nu tlyu tsa.

¹⁸ Cua̱a̱ clya ma̱ cha' cacu ma̱ cuaña' lcaa jyo'o ñati̱, masi rey, masi capitán, masi sendaru, masi cuaña' cuayu, masi cuaña' ñati̱ nu cua ntyucua hichu̱' ni' bi'; lo'o jua'a̱ cuaña' lcaa lo ñati̱, masi msu nu ngüi'ya ñati̱ ti, masi msu nu nguti'i̱ tso'o ti, masi ngu' cusu', masi ngu' cuañi', cua̱a̱ clya ma̱ cha' cacu ma̱ ji'i̱.

¹⁹ Lo'o li' na'a̱ na' cha' ndyu'u ti'i̱ nu na'ni chiya'a̱ ña'a̱ bi' lo'o lcaa ngu' nu laca loo nde chalyuu, lo'o jua'a̱ taju ñati̱ cusu̱u̱ ji'i̱ ngu'; cua ndyu'u ti'i̱ ngu' lo'o tya'a ngu' cha' cua'ni ngu' cusu̱u̱ lo'o nu ntucua hichu̱' cuayu ngati̱ bi', jua'a̱ lo'o taju ñati̱ ji'i̱ Ni.

²⁰ Nxu̱u̱ tya'a ngu', lo'o li' ngua nu na'ni chiya'a̱ ña'a̱ bi' preso; lo'o jua'a̱ nu cuiñi nu ndu'ni cha' tu'ba ji'i̱ ycui' Ndyosi laca, lo'o bi' ngua preso. La cui' nu cuiñi bi' ngua'ni cha' tlyu ca slo na'ni bi' tya tsubi' la, cha' xcutsi̱i̱ ji'i̱ ñati̱; cua ngüiñilo'o bi' ji'i̱ lcaa ñati̱, bi' cha' nda ngu' chacuayá' chca'a̱ cuayá' ji'i̱ na'ni chiya'a̱ ña'a̱ bi' nde tyaca̱a̱ ngu', jua'a̱ ngua'ni tlyu ngu' ji'i̱ lcui̱ ji'i̱ ni' li'. Lo'o li' nchcua̱a̱ ycui' Ndyosi ji'i̱ nu na'ni chiya'a̱ ña'a̱ bi' lo'o nu cuiñi bi', ndyaa ngu' ña'a̱ lu'ú ti ngu' nde lo tayu' su ntsu'u quii' tlyu nu ti'í tsa ndyumi̱' ngu' cha' lo'o yuu sufri ndyaqui̱.

²¹ Nu ntucua hichu̱' cuayu ngati̱ bi' ni, ndyujuii Ni ji'i̱ lcaa taju ñati̱ cusu̱u̱ ji'i̱ nu xña'a̱ bi'; jua'a̱ ndyujuii Ni ji'i̱ ngu' nu ngua'ni cusu̱u̱ lo'o lcaa cha' nu ndyu'u tu'ba Ni. Nguaala' tsa ti' na'ni nu ndyacui nde cua̱ bi', cha' cua ndyacu ni' cuaña' ñati̱ ngujuii bi' li'.