APOCALIPSIS 18 - Chatino Tataltepec

Nguti̱ quichi̱ Babilonia

¹ Tiya' la li' na'a̱ na' ji'i̱ chaca xca̱ ji'i̱ ycui' Ndyosi lijya̱ ca'ya nde lo yuu chalyuu; tlyu tsa chacuayá' ntsu'u ji'i̱ xca̱ bi', lo'o jua'a̱ ndubi tsa ña'a̱ tyucui ña'a̱ yu, ña'a̱ cuayá' nda yu xee tyucui ña'a̱ chalyuu.

² Cui̱i̱ tsa nchcui' xca̱ bi': ―Cua ndye cha' ji'i̱ quichi̱ Babilonia bi' ―nacui̱―, ndye quichi̱ tlyu bi' nguti̱. Ca su nguti'i̱ quichi̱ bi' cua tsubi' la, ca bi' laca to' tyi cuxee juani, masi tyi cuiñaja laca bi' juani. Ca bi' ntucua to' tyi lcaa lo cui'i̱ cuxi, lcaa lo na'ni cuityi nu ntucua lu'be nu chiya'a̱ ña'a̱.

³ Tya sa'ni ngulu'u ngu' quichi̱ bi' ji'i̱ lcaa ñati̱ chalyuu cha' cua'ni ngu' cha' suba', cha' cua'ni tlyu ngu' ji'i̱ xa' jo'ó; lye ndatsaa ngu' bi' ji'i̱ ñati̱, cha' lo'o ngu' cua'ni ngu' cha' cuxi lo'o tya'a ñati̱. Suba' tsa ngua'ni lcaa nu laca loo chalyuu lo'o nguta'a̱ ngu' nde quichi̱ bi'. Ná tye chca cha' cuxi nu ngua'ni ngu' ca quichi̱ bi', bi' cha' ngua ji'i̱ ngu' culiya' ngua'ni tsa ngu' ngana.

⁴ Li' xa' nguañi nchcui' sca ñati̱ ca su ntucua ycui' Ndyosi, nchcui' lo'o ñati̱ ji'i̱ ycui' Ni: ―Tyu'u clya cu'ma̱ ñati̱ 'na juani, tyu'utsu' ma̱ nde quichi̱ tlyu bi' ―nacui̱ Ni―. Ná ntsu'u cha' cua'ni stu'ba ma̱ cha' lo'o ngu' bi', nu lo'o ndyu'ni ngu' cha' cuxi, cha' ná xcube' ycui' Ndyosi ji'i̱ ma̱ stu'ba ti lo'o nu ngu' cuxi bi'.

⁵ Quiña'a̱ tsa cha' cuxi ndyu'ni ngu' quichi̱ bi'; hasta cua jlo ti' ycui' Ndyosi cha' ntsu'u tsa qui'ya ji'i̱ ngu', lo'o jua'a̱ ndyi'u ti' Ni ji'i̱ cha' cuxi nu ndu'ni ngu'.

⁶ Xcube' Ni ji'i̱ ngu' bi' li'; la cui' ñi'ya̱ lo'o cua nguxcube' ngu' ji'i̱ ma̱, jua'a̱ xcube' Ni ji'i̱ ngu' bi', masi tucua quiya' ta Ni cha' ti'í ji'i̱ ngu' quichi̱ bi'. Lye tsa ndyu'ni lya' ti' ngu' bi' ji'i̱ xa' ñati̱, bi' cha' cua'ni yala Ni cha' tucua quiya' xcube' Ni ji'i̱ ngu'.

⁷ Tso'o si chcube' ñati̱ bi', tso'o si caca xñi'i̱ ti' ngu', cha' lye tsa ndu'ni tyucuaa ti' ngu' lo'o tya'a ngu' xqui'ya cha' culiya' nu ntsu'u ji'i̱ ngu'. Xcui' ndi'ya̱ ntsu'u tyiquee ngu' bi': “Ñi'ya̱ nti' ntucua rey, jua'a̱ ntucua na”, nacui̱ ngu' ji'i̱ tya'a ngu'. “Si'i ngu' ti'i laca na, ná nga'a̱ cha' caca xñi'i̱ ti' na”, nacui̱ ngu'.

⁸ Xqui'ya cha' jua'a̱ ntsu'u tyiquee ngu', bi' cha' cua'ni Ni cha' sca ti tsa̱ xñi lcaa quicha ji'i̱ ngu', lcaa quicha nu nga'a̱ cha' tyacua ji'i̱ ngu' bi'. Cajaa ngu' xqui'ya quicha tlyu, xi'ya tsa ngu' cha' xñi'i̱ ti' ngu', caca jbi'ña ji'i̱ ngu', cuati jua'a̱ tye quichi̱ tyi ngu' tyaqui̱. Tlyu tsa cña nu ndu'ni ycui' Ndyosi nu Xu'na na, bi' laca Ni nu ndyu'ni cuayá' ji'i̱ ngu' quichi̱ tlyu bi'.

⁹ Cunaa tsa lcaa ngu' nu laca loo chalyuu; xi'ya tsa ngu' lo'o ña'a̱ ngu' tyatu̱ sñii cha' ndyaqui̱ quichi̱ tlyu bi', cha' stu'ba ntsu'u cha' ji'i̱ ngu' lo'o ngu' quichi̱ bi'. Ndu'ni lya' ti' ngu' ji'i̱ tya'a ñati̱ ngu', lo'o jua'a̱ suba' tsa ndu'ni ngu' lo'o ngu'.

¹⁰ Tyijyu' ti tsatu̱ ngu' cha' tyutsi̱i̱ tsa ngu' lo'o ña'a̱ ngu' cha' cati̱ quichi̱ bi': ―Ti'i tsa cu'ma̱ juani, ngu' quichi̱ Babilonia ―nacui̱ ngu' li'―. Tlyu tsa quichi̱ tyi ma̱ nquicha', si̱i̱ tsa loo chalyuu su ngua loo quichi̱ tyi ma̱; pana juani ni, sca hora ti ndye nchcube' ma̱.

¹¹ Lo'o jua'a̱ lcaa ngu' culiya' nu ndi'i̱ chalyuu, tya'na tsa cua'ni ngu'; xñi'i̱ tsa caca tyiquee ngu' cha' nga'aa caja ñati̱ nu cui'ya yu'ba ji'i̱ ngu':

¹² nga'aa cui'ya ngu' oro ji'i̱ ngu', masi plata, masi quee ndubi, masi tyaaca̱' quee ngati̱; nga'aa cui'ya ngu' late' ngati̱ ji'i̱ ngu', nu quiña'a̱ tsa nga'a̱, masi late' cuaa ña'a̱, masi late' sera, masi late' nu ntsu'u tyu̱u̱ tya'a color ji'i̱; jua'a̱ lcaa lo yaca nu ñaa tyijyu', lcaa na ndya' lo'o tyijya̱ sata ngati̱, masi na ndya' lo'o yaca nu quiña'a̱ nga'a̱, masi na ndya' lo'o chcua̱ ngatsi, masi na ndya' lo'o chcua̱ ti, masi na ndya' lo'o quee tacalya ti, nga'aa cui'ya ngu' ji'i̱ tsiya' ti;

¹³ jua'a̱ canelya, lo'o lcaa lo xtyi'i nu tyu'u lo na cacu na, masi yana jo'ó nguxa' ti, masi yana jo'ó ycui' nu ngati̱ ti, masi taná ji'i̱ yaca mirra nu tyixi xtyi'i, nga'aa cui'ya ngu' ji'i̱; lo'o jua'a̱ lcaa lo xa' la yu'ba nu ndujui' ñati̱, masi vino, masi setye nu tyu'u lo na cacu na, masi catyá xlyá, masi nscua', masi bata, masi xlya', masi cuayu, jua'a̱ carreta nu ntyojolaqui cuayu, masi msu nu ndyi'ya ñati̱, masi tyucui ña'a̱ tsaca ñati̱ chalyuu na, nga'aa caca caya' bi'.

¹⁴ Chcui' ngu' nu ndujui' yu'ba bi' lo'o ngu' quichi̱ bi' li': ―Cua ndye nguliji lcaa cha' tso'o nu ndacui tsa ti' ma̱ ji'i̱; jua'a̱ cua ndye cha' culiya' ji'na, cua ndye lcaa lo na nu tso'o ña'a̱ ji'na ―ñacui̱ ngu'―. Nga'aa quije cha' tso'o bi' ji'na juani.

¹⁵ Lo'o jua'a̱ nu ngu' culiya' bi' ni, ngu' nu ngujui cha' culiya' ji'i̱ lo'o ndyu'ni ngu' ngana nde lquichi̱ bi', tyijyu' ti tsatu̱ ngu', cha' tyutsi̱i̱ tsa ngu' ña'a̱ ngu' lo'o cati̱ quichi̱ bi'; tya'na tsa cua'ni ngu', cha' xñi'i̱ tsa ti' ngu' caca.

¹⁶ Lo'o li' ndi'ya̱ chcui' ngu' bi': ―Ti'i tsa ma̱, cu'ma̱ ngu' quichi̱ re juani; tlyu tsa quichi̱ tyi ma̱ nquicha' ―ñacui̱ ngu' culiya' li'―. Tya sa'ni la xcui' late' ngati̱ ña'a̱, lo'o late' cuaa ña'a̱, lo'o late' nu ntsu'u tyu̱u̱ tya'a color nchcu' ngu' quichi̱ tyi ma̱; xcui' chcua̱ oro, lo'o quee ndubi, lo'o tyaaca̱' quee ngati̱ ndacui yane ngu', yane ya' ngu'.

¹⁷ Juani ni, sca hora ti nguna' lcaa cha' culiya' bi' ji'na ―ñacui̱ ngu'. Lo'o jua'a̱ tyu̱ lcaa nu nclya' yaca ni'i̱, lo'o ngu' nu ndyu'ni cña ne' yaca ni'i̱, lo'o ngu' nu nda caya' cha' tsaa tyijyu' lo'o yaca ni'i̱ bi', lo'o jua'a̱ xa' ñati̱ nu ndyiji ngana ji'i̱ tyijyu' lo'o yaca ni'i̱ bi'; tyijyu' ti tsatu̱ ngu' bi',

¹⁸ xi'ya tsa ngu' lo'o ña'a̱ ngu' tyatu̱ sñii cha' ndyaqui̱ quichi̱ tlyu bi': ―Bilya ña'a̱ na chaca quichi̱ nu culiya' la, ñi'ya̱ ngua culiya' tsa quichi̱ re ―ñacui̱ ngu' ji'i̱ tya'a ngu'.

¹⁹ Li' cu̱ ngu' sñii yuu nde hique ngu', ñi'ya̱ nu ndu'ni ngu' bi' lo'o xñi'i̱ tsa ti' ngu'. Xi'ya tsa ngu' li': ―Ti'i tsa ma̱, cu'ma̱ ngu' tya'a quichi̱ tyi na juani, cha' tlyu tsa quichi̱ tyi na nquicha' ―ñacui̱ ngu' bi'―. Tya sa'ni la culiya' tsa ngua lcaa na nu laca na xu'na yaca ni'i̱, nu ndya'a̱ na lo'o yu'ba ji'i̱ quichi̱ bi' tyijyu'. ¿Ma caja cha' bi' juani? Sca hora ti nguna' lcaa cha' tso'o ji'na ―ñacui̱ nu ndya'a̱ lo'o yaca ni'i̱ bi'.

²⁰ Pana cacha' na' ji'i̱ ma̱ juani, cu'ma̱ nu ndi'i̱ ca su ntucua ycui' Ndyosi nde cua̱, cua'ni ma̱ cha' ca chaa tsa ti' ma̱ lo'o tyalaa hora cati̱ quichi̱ bi'; lo'o jua'a̱ cu'ma̱ ñati̱ chalyuu nu ntsu'u cha' ji'i̱ ma̱ lo'o ycui' Ndyosi, lo'o cu'ma̱ ñati̱ nu ngua'a̱loo Ni ji'i̱ ma̱ cha' cua'ni ma̱ cña ji'i̱ Ni, lo'o cu'ma̱ nu laca ma̱ tu'ba ji'i̱ ycui' Ndyosi cha' nchcui' Ni lo'o ñati̱, cua'ni ma̱ cha' ca chaa tsa ti' ma̱ cha' liñi tsa ndu'ni Ni lo'o xcube' Ni ji'i̱ ngu' quichi̱ bi', xqui'ya cha' xña'a̱ tsa ngua'ni ngu' bi' lo'o ma̱.

²¹ Lo'o li' ya̱a̱ sca xca̱ ji'i̱ ycui' Ndyosi nu tlyu tsa cña ngua ji'i̱ cua'ni. Ngusicua̱ xca̱ bi' sca quee tonu nu lo scuii ti ña'a̱; ñi'ya̱ ña'a̱ sca quee ji'i̱ molino, jua'a̱ ña'a̱ quee bi'. Ngu̱ ji'i̱ ndyaa nde lo hitya tyujo'o li'. ―La cui' jua'a̱ caca ji'i̱ quichi̱ Babilonia, quichi̱ tlyu bi' ―nacui̱ xca̱ bi'―, cha' xlyú ngu' ji'i̱ quichi̱ bi' ca lo yuu tsiya' ti; nga'aa ña'a̱ ngu' ji'i̱ quichi̱ bi' chaca quiya' li'.

²² Nga'aa cañi cula'á ngu' musca lquichi̱ bi' li'; masi sañi, masi yaca quii, masi cui'chcua̱, nga'aa cañi tsiya' ti cula'á ngu' ji'i̱ chaca quiya'. Nga'aa caja tsiya' ti ngu' cuityi nu cuiñá ni'i̱ ji'i̱ ma̱, nu cuiñá yaca ji'i̱ ma̱, ni nga'aa cañi tsiya' ti coo molino ca su nguti'i̱ ma̱;

²³ nga'aa tyaca̱' tsiya' ti tyu'u xee toni'i̱ ji'i̱ ngu' quichi̱, nga'aa cañi chcui' ngu' cuañi' lo'o tya'a ngujui clyo'o ca ti ngu'. Tya sa'ni la ná ntsu'u ngu' culiya' tyucui ña'a̱ chalyuu ñi'ya̱ nu culiya' cu'ma̱ quichi̱ bi'; pana cua nñilo'o ma̱ ji'i̱ quiña'a̱ tya'a ñati̱ chalyuu, xqui'ya cha' tlyu tsa cha' cucha'a̱ nchca ji'i̱ ma̱.

²⁴ Bi' cha' cua nchcube' ycui' Ndyosi ji'i̱ ngu' quichi̱ Babilonia bi', xqui'ya cha' cua nquijeloo ji'i̱ Ni qui'ya nu ntsu'u ji'i̱ ngu' bi'; tyucui ña'a̱ chalyuu cua ndyujuii ngu' bi' ji'i̱ jyo'o cusu' nu ngua tu'ba ji'i̱ ycui' Ndyosi, lo'o jua'a̱ cua ndyujuii ngu' bi' ji'i̱ xa' la ñati̱ chalyuu nu ntsu'u cha' ji'i̱ lo'o Ni.