APOCALIPSIS 17 - Chatino Tataltepec

Ndu'ni ñu'u̱ tsa ngu' quichi̱ tlyu ji'i̱ lcaa ñati̱ chalyuu

¹ Li' ya̱a̱ sca xca̱ ca slo na', sca ngu' tya'a nu cati tya'a xca̱ nu ntucua ca'ña oro ya' bi'. Nchcui' lo'o na' li': ―Cua̱a̱ nu'u̱ ca nde cha' culu'u na' jinu'u̱ ñi'ya̱ xcube' Ni ji'i̱ ngu' quichi̱ tlyu nu lye tsa ndyu'ni ñu'u̱ ji'i̱ ñati̱ chalyuu; la cui' quichi̱ tlyu laca su ntsu'u tyu̱u̱ tya'a sta'a̱ cacua ti to' quichi̱.

² Quiña'a̱ tsa cha' suba' ndyu'ni ngu' nu laca loo nde chalyuu, cha' tyu̱u̱ tsa tya'a jo'ó ntsu'u ji'i̱ ngu' xqui'ya ngu' quichi̱ tlyu bi'; jua'a̱ ngunu'u̱ tyiquee ñati̱ tyucui ña'a̱ chalyuu xqui'ya cha' suba' nu ndyu'ni ngu' bi'.

³ Li' ndyalo'o Xtyi'i ycui' Ndyosi 'na, ndyaa na' lo'o sca xca̱ ji'i̱ ycui' Ni ca ne' quixi̱' su ná ndi'i̱ ñati̱. Ca bi' na'a̱ na' su ntucua sca nu cuna'a̱ hichu̱' sca na'ni nga'a, nu chiya'a̱ tsa ña'a̱; hichu̱' ni' nscua quiña'a̱ tsa cha' cuxi, nu ti'í tsa nchcui' ji'i̱ ycui' Ndyosi. Ntucua cati tya'a hique ni', cuati ntucua tii tya'a sata ni'.

⁴ Late' cuaa ña'a̱, late' nga'a catsi ña'a̱ lacu' nu cuna'a̱ bi'; chu̱' late' bi' ndacui quiña'a̱ tsa chcua̱ tso'o lo'o quee ndubi lo'o xa' la quee nu quiña'a̱ tsa nga'a̱. Ntucua sca tasa oro ya' nu cuna'a̱ bi'; ne' bi' ntsu'u lcaa lo cha' cuxi, lcaa lo cha' suba' nu cua ngua'ni nu cuna'a̱ bi' ya̱a̱ nde chalyuu.

⁵ Nde tyaca̱a̱ nscua sca xtañi nu cuna'a̱ bi', pana ná ca cuayá' ti' na ji'i̱ si ná nslo na xtañi bi': “Babilonia tonu laca re, cha' nde laca quichi̱ tyi lcaa ñati̱ nu ndyu'ni cha' suba' tyucui ña'a̱ chalyuu”. Jua'a̱ nscua nde tyaca̱a̱ nu cuna'a̱ bi'.

⁶ Li' na'a̱ na' cha' lye tsa ndyu'ni nu cuna'a̱ bi'; ñi'ya̱ ndu'ni sca nu cu'bi, jua'a̱ ndyu'ni nu cuna'a̱ bi', xqui'ya cha' cua ndyujuii bi' ji'i̱ ñati̱ ji'i̱ ycui' Ndyosi, ndyujuii ji'i̱ ñati̱ nu ná ntsi̱i̱ nchcui' liñi cha' ji'i̱ Jesús nde chalyuu. Lo'o cua na'a̱ na' ji'i̱ nu cuna'a̱ bi', quiña'a̱ tsa cha' ngulacua ti' na' li'.

⁷ Lo'o li' ndacha' nu xca̱ ji'i̱ ycui' Ndyosi bi' 'na: ―¿Ni cha' laca ndube tsa ti' nu'u̱? ―nacui̱―. Culu'u na' jinu'u̱ cua ña'a̱ ca cha' tucui nu ntsu'u ji'i̱ nu cuna'a̱ nu ntucua chu̱' na'ni chiya'a̱ ña'a̱ jua, nu na'ni nu ntucua cati tya'a hique ni' lo'o tii tya'a sata ni'; culu'u na' jinu'u̱ sca cha' nu ná nchca cuayá' ti' ñati̱ ji'i̱ ―nacui̱―.

⁸ Na'ni nu cua na'a̱ nu'u̱ jua, ngutu'u bi' nu ngua tya sa'ni la, nga'aa lu'ú bi' juani; pana cua ngulala ti tyu'ú ni' chaca quiya', masi nscua nde tyuquee qui'ñi bi', cha' tyaa ni' ca chalyuu talya su tye ni' cati̱ ni' tsiya' ti ―nacui̱―. Cua ña'a̱ ca ñati̱ nu ná nscua xtañi lo quityi ji'i̱ ycui' Ndyosi, quiña'a̱ tsa cha' culacua ti' ngu' lo'o ña'a̱ ngu' ji'i̱ na'ni bi'; pana tya clyo lo'o tya lyiji xana chalyuu re, cua nscua xtañi ñati̱ nu cua nda ycui' Ndyosi chalyuu nu ná nga'a̱ cha' tye ji'i̱. Ngutu'ú na'ni bi' nu ngua tya sa'ni la, masi nga'aa lu'ú bi' juani; pana ña'a̱ ti tya tyu'ú bi', masi chaca tya quiya'.

⁹ ’Ndi'ya̱ ndyu'u cha' bi' si ca cuayá' ti' ma̱ ji'i̱ ―nacui̱ xca̱ 'na―. Nu cati tya'a hique na'ni bi' ni, bi' laca cati tya'a lo cuati̱i̱ su nscua quichi̱ tlyu nu lye tsa ndyu'ni ñu'u̱ ji'i̱ chalyuu. Lo'o jua'a̱ ndi'i̱ cati tya'a rey nu laca loo chalyuu.

¹⁰ Cua ndye cha' ji'i̱ ca'yu tya'a rey nu laca loo bi', jua'a̱ ña'a̱ ti tya ntucua chaca rey tya'a nu laca loo bi', lo'o jua'a̱ tya lyiji tyu'u tucua chaca tya'a rey nu caca loo bi' nde loo la; pana xti ti tyempo tyi'i̱ bi' lo'o tya̱a̱ bi' chalyuu.

¹¹ Lo'o nu na'ni nu ngutu'ú nu ngua sa'ni bi', pana nga'aa lu'ú bi' juani, bi' laca tya chaca tya'a rey nu laca loo; ñi'ya̱ laca loo nu cati tya'a rey bi' nde chalyuu, jua'a̱ caca loo nu chaca rey bi' nde lo yuu chalyuu, cha' la cui' bi' laca nu cua tyaa ti ca bilyaa ―nacui̱ xca̱ jna'―.

¹² ’Lo'o na'a̱ nu'u̱ na'ni bi', cha' tii tya'a sata ni' ntucua hique ni', bi' laca tya tii tya'a rey nu tya lyiji caca loo chalyuu. Cua ntsu'u chacuayá' ji'i̱ ngu' bi', cha' caca ngu' loo masi chaca hora tya; stu'ba ti caca tlyu ngu' bi' lo'o nu na'ni chiya'a̱ ña'a̱ bi' li'.

¹³ Sca ti cha' nda'ya hique nu tii tya'a rey bi', cha' xtyucua ngu' ji'i̱ na'ni bi', cha' ta ngu' chacuayá' ji'i̱ ni'.

¹⁴ Xcui' xu̱u̱ tya'a ngu' lo'o ycui' Ni, nu ñi'ya̱ ña'a̱ xlya' bi'; pana tyiji̱loo nu ñi'ya̱ ña'a̱ xlya' bi' ji'i̱ na'ni bi', lo'o jua'a̱ tyiji̱loo ñati̱ nu ndya'a̱ lo'o Ni ji'i̱ ni', xqui'ya cha' laca ycui' Ni Xu'na lcaa ñati̱ chalyuu, laca ycui' Ni loo la ji'i̱ lcaa ngu' nu laca loo nde chalyuu. Lo'o jua'a̱ nu ñati̱ ji'i̱ ycui' Ni ni, cua ngusubi Ni ji'i̱ ngu' bi'; na cua nguane Ni ji'i̱ ngu' bi', lo'o jua'a̱ tso'o tsa ngusñi ngu' cha' ji'i̱ ycui' Ni ―nacui̱ xca̱ 'na.

¹⁵ Tya nchcui' la nu xca̱ ji'i̱ ycui' Ndyosi bi' lo'o na' li': ―Ñi'ya̱ laca sta'a̱ nu nscua cacua ti to' quichi̱ tlyu bi', jua'a̱ laca ñati̱ chalyuu, cha' tsa tlyu ti lijya̱ lcaa lo ñati̱ chalyuu ca quichi̱ bi'; ngutu'u ngu' tyucui ña'a̱ chalyuu mala su ndi'i̱ ñati̱, nchcui' ngu' lcaa lo cha'cña nu nchcui' ñati̱ chalyuu.

¹⁶ Lo'o lcaa rey nu laca nu tii tya'a sata na'ni chiya'a̱ ña'a̱ nu na'a̱ ca ti nu'u̱, lo'o jua'a̱ ycui' na'ni bi', lo'o ngu' bi' ca ti'í ti' ngu' ña'a̱ ngu' ji'i̱ quichi̱ tlyu bi'; xlyaá ngu' lcaa cha' tso'o nu ntsu'u ji'i̱ ngu' quichi̱ bi', tyanu ngu' quichi̱ jua'a̱ ti li'. Taqui̱ rey quichi̱ bi' li', cua'ni tye ngu' ji'i̱ ngu' quichi̱ bi'.

¹⁷ Cua ngua'ni ycui' Ndyosi cha' ca'ya cha' hique rey, bi' cha' cua'ni ngu' jua'a̱, cha' ta ngu' chacuayá' caca nu na'ni chiya'a̱ ña'a̱ loo, ña'a̱ cuayá' tyu'u scua lcaa cha' nu nacui̱ Ni cha' caca.

¹⁸ Nu cuna'a̱ nu na'a̱ nu'u̱ ni, ñi'ya̱ nti' nu quichi̱ tlyu nu laca loo bi', jua'a̱ laca nu cuna'a̱ bi'; nclyo bi' cña ji'i̱ lcaa ngu' nu laca loo chalyuu.