APOCALIPSIS 16 - Chatino Tataltepec

Ca'ña nu ntsu'u cha' ti'í nu ta ycui' Ndyosi ji'i̱ ñati̱

¹ Lo'o li' ndyuna na' cha' nchcui' sca ñati̱ ne' laa tlyu bi', cui̱i̱ nchcui' lo'o nu cati tya'a xca̱ ji'i̱ ycui' Ndyosi bi': ―Yaa clya ma̱ salú ma̱ na nu ntsu'u ne' ca'ña bi' nde lo yuu chalyuu, nu cati tya'a ca'ña nu ntsu'u cha' ti'í ne', nu ta Ni ji'i̱ ñati̱.

² Li' ndyaa xca̱ nu nchca clyo, ndyaa ngusalú na nu ntsu'u ne' ca'ña ji'i̱ nde lo yuu chalyuu. Li' tonu tsa quichu' ntyucua tyucui ña'a̱ hichu̱' ñati̱; ti'í tsa nti' ngu' li', lcaa ñati̱ nu cua nga'a̱ cuayá' ji'i̱ na'ni nu chiya'a̱ ña'a̱ bi', lcaa ñati̱ nu cua ndyu'ni tlyu ji'i̱ ni'.

³ Lo'o li' ndyaa xca̱ nu nchca tyucuaa, ndyaa ngusalú na nu ntsu'u ne' ca'ña ji'i̱ ca lo tyujo'o; ngutsa'a̱ hitya li', ngua tyucu̱ ñi'ya̱ nti' tañi sca jyo'o. Ngujuii lcaa na lu'ú nu ntsu'u lo tyujo'o li'.

⁴ Lo'o li' ndyaa xca̱ nu nchca tyuna, ndyaa ngusalú na nu ntsu'u ne' ca'ña ji'i̱ tyucui ña'a̱ to' sta'a̱, lcaa su ntyucua hitya tyucui ña'a̱ chalyuu; ngutsa'a̱ hitya bi' li', ngua tañi.

⁵ Li' ndyuna na' nchcui' xca̱ nu laca loo ji'i̱ hitya: ―Liñi tsa cña ndyu'ni nu'u̱ cha' nchcube' nu'u̱ ji'i̱ ñati̱ cuxi bi', Xu'na ―nacui̱ ji'i̱ ycui' Ndyosi―, cha' lubii tsa cresiya ji'i̱ ycui' nu'u̱. Lu'ú nu'u̱ juani, jua'a̱ nu ngua tya clyo lu'ú nu'u̱.

⁶ Tya ndyi'u ti' nu'u̱ ñi'ya̱ ngua lo yuu tya sa'ni la, nu lo'o cua ndyujuii ngu' ji'i̱ ñati̱ jinu'u̱; cua ndyujuii ngu' bi' ji'i̱ tyu̱u̱ tya'a ñati̱ nu ngua tu'ba jinu'u̱ cha' nchcui' nu'u̱ lo'o ñati̱. Lo'o juani la cui' ñi'ya̱ nu ngua'ni ngu' tya li', la cui' jua'a̱ nda nu'u̱ cha' ti'í ji'i̱ ngu', cha' tyi'u ti' ngu' ji'i̱ jyo'o nu cua ndyujuii ngu' ji'i̱ tya sa'ni la.

⁷ Li' ndyuna na' cha' nu nchcui' ñati̱ nde su ntucua mesa su ndyaqui̱ msta̱: ―Ndyosi Xu'na ya ―nacui̱ ngu'―, ycui' nu'u̱ ni, lcaa cña nchca jinu'u̱ ―nacui̱ ngu'―. Liñi tsa ndyu'ni nu'u̱ lo'o nchcube' nu'u̱ ji'i̱ ñati̱ bi' jua'a̱; chañi tsa cha' nu nchcui' nu'u̱ ji'i̱ ñati̱ bi', cha' cuxi tsa cña ndu'ni ngu' bi'.

⁸ Lo'o li' ndyaa xca̱ nu nchca jacua, ndyaa ngusalú na nu ntsu'u ne' ca'ña ji'i̱ lo cuichaa; tyique' tsa ndyaca li', cha' cua nda ycui' Ndyosi chacuayá' ji'i̱ cuichaa cha' chumi̱' hichu̱' ñati̱.

⁹ Tyu̱u̱ tya'a ñati̱ ngua quicha li', cha' nguula tsa tyique' nda bi'. Li' nguxana ngu', lye tsa nxlyú ngu' cha' hichu̱' ycui' Ndyosi, cha' ycui' Ni laca nu ngulo cña cha' ya̱a̱ quicha bi'; pana ná ntaja'a̱ ngu' tsiya' ti culochu̱' ngu' ji'i̱ cha' cuxi nu ntsu'u ji'i̱ ngu', cha' li' cua'ni tlyu ngu' ji'i̱ ycui' Ndyosi.

¹⁰ Lo'o li' ndyaa xca̱ nu nchca ca'yu, ndyaa ngusalú na nu ntsu'u ne' ca'ña ji'i̱ nde loo su ntucua tlyu na'ni nu chiya'a̱ ña'a̱ bi'; ngua talya yata tyucui ña'a̱ su laca ni' loo li'. Ti'í tsa nti' ñati̱ chalyuu, cua laca ñi'ya̱ si na cua nguliji ti' ngu'.

¹¹ Ña'a̱ ti tya nda ngu' qui'ya ji'i̱ ycui' Ndyosi nu laca loo nde cua̱, cha' nda Ni cha' ti'í bi' ji'i̱ ngu', nda Ni quichu' bi' ntyucua hichu̱' ngu'; pana ná ntaja'a̱ ngu' xtyanu ngu' ji'i̱ cha' cuxi nu ndu'ni ngu'.

¹² Lo'o li' ndyaa xca̱ nu nchca scuá, ndyaa ngusalú na nu ntsu'u ne' ca'ña ji'i̱ nde to' sta'a̱ tlyu nu naa Eufrates; ndye sta'a̱ bi' ngüityi li', ndyanu sca tyucui̱i̱ nu cua laca ngua tso'o ti cha' ca̱a̱ tyu̱u̱ tya'a nu laca loo cha' cusu̱u̱. Tyijyu' tsa tyu'u ngu' ca̱a̱ ngu', ca su ntyucua cuichaa tyu'u ngu' bi'.

¹³ Li' na'a̱ na' cha' ngutu'u tucua sna tya'a cuiñaja; ñi'ya̱ ña'a̱ cuityi', jua'a̱ ña'a̱ cuiñaja bi'. Ngutu'u bi' nde tyuu tu'ba cuaña tonu bi', cuati nde tyuu tu'ba na'ni chiya'a̱ ña'a̱ bi', cuati nde tyuu tu'ba nu ñati̱ nu cuiñi ti nchcui' cha' ji'i̱ ycui' Ndyosi; ca bi' ngutu'u cuiñaja bi' lijya̱.

¹⁴ Msu ji'i̱ nu xña'a̱ laca cuiñaja bi'; nchcutsi̱i̱ bi' ji'i̱ ñati̱, cha' nchca ji'i̱ cua'ni cha' tlyu. Ndya'a̱ cuiñaja bi' nxuti'i̱ ji'i̱ lcaa nu laca loo chalyuu, cha' tya̱a̱ ngu' cha' cusu̱u̱ tsa̱ tlyu lo'o cua tye ti chalyuu. Cua ntsu'u cña nu cua'ni ycui' Ndyosi nu Xu'na na lo'o ndyaca cha' cusu̱u̱ bi'.

¹⁵ “Cua'a̱ jyaca̱ ma̱”, nacui̱ Jesús, “tsiya' ca tyu'u tucua na' tya̱a̱ na' ñi'ya̱ nti' sca nu cuaana. Tso'o caca tyiquee ñati̱ nu tii ti ti' tyi'i̱ chalyuu, xqui'ya cha' ngusñi ngu' cha' jna'; nga'aa ca tyuju'u ti' ngu' bi' slo ñati̱ lo'o tyalaa hora nu tya̱a̱ na' li'.” Jua'a̱ nacui̱ Jesús ji'i̱ ñati̱ ji'i̱ Ni.

¹⁶ Li' nxuti'i̱ cuiñaja bi' ji'i̱ ngu' laca loo, cha' tya̱a̱ ngu' nde sca nati̱', su naa Armagedón cha'cña ji'i̱ ngu' judío.

¹⁷ Lo'o li' ndyaa xca̱ nu nchca cati, ndyaa ngusalú na nu ntsu'u ne' ca'ña ji'i̱ lo cui'i̱ ti. Li' cui̱i̱ nchcui' nu ntucua lo yaca xlya tlyu nde ne' laa tlyu ji'i̱ ycui' Ndyosi nde cua̱: ―Cua ngua bi' juani ―nacui̱ Ni.

¹⁸ Li' lye tsa ndyubi, lye tsa nguañi tyucui ña'a̱ lo tyujo'o, lye tsa nchcui' tyi'yu, lye tsa ngulacui̱ chalyuu; bilya clyacui̱ chalyuu jua'a̱ tya lo'o ngüiñá Ni ji'i̱ ñati̱ chalyuu. Tlyu tsa cha' ngua.

¹⁹ Ti'í tsa ngutsu yuu su nscua quichi̱ tlyu, nu quichi̱ Babilonia bi'; sna yu'be ngua quichi̱ bi' li'. Lo'o jua'a̱ nguti̱ lcaa quichi̱ tonu nu ndi'i̱ xa' chalyuu, cha' ndyi'u ti' Ni nchcube' Ni ji'i̱ ngu' quichi̱ tlyu bi'; tlyu tsa cha' ti'í ngua'ni ycui' Ndyosi lo'o ngu' bi', cha' ñasi̱' tsa Ni ji'i̱ ngu'.

²⁰ Ndye nguliji yu'u lcaa yuu nu ntsu'u cla'be hitya, nguliji yu'u lcaa ca'ya cua̱ jua'a̱ ti; nga'aa na'a̱ ngu' ji'i̱ li'.

²¹ Cuati nde cua̱ ndyalú tyo quee tonu ngua'ya lo yuu. Ti'i̱ tsa bi'; ña'a̱ cuayá' tu'ba kilo, tsa lo cua cuayá' ti'i̱ ntsu'u sca ti yu'be tyo quee nu ndyalú hique ñati̱ chalyuu li'. Lo'o jua'a̱ tlyu tsa cha' cuxi nchcui' ngu' ji'i̱ ycui' Ndyosi li'; lye tsa nguxlyú ngu' cha' hichu̱' Ni xqui'ya tyo quee bi', cha' tlyu tsa cña ndyu'ni Ni nde chalyuu.