APOCALIPSIS 15 - Chatino Tataltepec

Ya̱lo'o xca̱ ji'i̱ quicha nu cua'ni tye ji'i̱ chalyuu

¹ Ngutu'u tucua chaca cuayá' tlyu nde cua̱ li'. Ndube tsa ti' na' lo'o na'a̱ na' ji'i̱, cha' ndu̱ cati tya'a xca̱ ji'i̱ ycui' Ndyosi nu ndu̱ lo'o cati tya'a quicha nu caca su cua tye ti chalyuu. Lo'o cua ndye ngua quicha bi' chalyuu, li' cati̱ cha' ñasi̱' ycui' Ni.

² Li' na'a̱ na' sca tayu' nu ñi'ya̱ ndubi caatya̱, jua'a̱ ndubi ña'a̱ lo tayu' bi'; ñi'ya̱ ndyatu̱ sca quii' ndyaqui̱, jua'a̱ ña'a̱ tayu' bi', ngua ti' na'. To' tayu' caatya̱ bi' na'a̱ na' ndu̱ lcaa ñati̱ nu cua ntiji̱loo ji'i̱ nu na'ni chiya'a̱ ña'a̱ bi'; masi cua ngujuii ngu' bi' xqui'ya cha' bi', ná ntaja'a̱ ngu' cua'ni tlyu ngu' ji'i̱ lcui̱ ji'i̱ na'ni bi', ni ná ntaja'a̱ ngu' chca'a̱ cuayá' ji'i̱ ni' hichu̱' ya' ngu' lo'o número nu cuentya ji'i̱ xtañi ni'. Ndu̱ ngu' bi' ndyula ngu' lo'o sañi nu cua nda ycui' Ndyosi ji'i̱ ngu'.

³ Ndyula tu'ba ngu' sca ji̱i̱ nu cua ndyula tu'ba jyo'o Moisés nu ngua sa'ni, la cui' Moisés nu ngua'ni cña ji'i̱ ycui' Ndyosi; lo'o nu ñi'ya̱ ña'a̱ xlya' bi' ndyula tu'ba la cui' ji̱i̱ bi'. Ndi'ya̱ nchcui' ji̱i̱ bi': Ndyosi Xu'na ya, lcaa cña nchca jinu'u̱; tlyu tsa cña ndu'ni nu'u̱, hasta ndube tsa ti' lcaa ñati̱ ji'i̱ cña bi'. Xcui' ndu'ni liñi nu'u̱ lo'o ñati̱ chalyuu, chañi tsa laca lcaa cha' nu nchcui' nu'u̱ lo'o ñati̱. Sca ti nu'u̱ laca Xu'na lcaa ñati̱ tyucui ña'a̱ chalyuu.

⁴ ¿Ha ná ntsi̱i̱ ngu' jinu'u̱? ¿Ha ná tyaja'a̱ ngu' ñacui̱ ngu' cha' tlyu tsa cña nu ndu'ni nu'u̱? Sca ti ycui' nu'u̱ nu lubii tsa cresiya jinu'u̱. Cua na'a̱ ngu' lcaa su ndyu'ni cuayá' nu'u̱ ji'i̱ ñati̱ cha' liñi tsa ndyu'u cha'; bi' cha' tya̱a̱ lcaa ñati̱ tyucui ña'a̱ chalyuu ca su ntucua nu'u̱, cha' cua'ni tlyu ngu' jinu'u̱. Ndye ji̱i̱ nu ndyula tu'ba ngu' li'.

⁵ Tiya' la li' na'a̱ na' ne' laa tlyu ji'i̱ ycui' Ndyosi nu ntucua nde cua̱. Ca cla'be bi' ndu̱ ni'i̱ nu tacati tsa su ntsu'u co'o quee cuaja' nu nscua cha' lo; la cui' cha' nu cua nda ycui' Ndyosi lo'o ñati̱ tya clyo la laca bi'.

⁶ Li' ngutu'u nu cati tya'a xca̱ bi' ne' laa, ndyalo'o ngu' ji'i̱ ca ta'a cati quicha nu caca lo'o cua tye ti chalyuu. Xcui' late' ngati̱ lacu' xca̱ bi', late' nu lubii tsa ña'a̱; jua'a̱ cua ndyaaca̱' sintya oro tyiquee ngu'.

⁷ Lo'o li' ndatu̱ sca na'ni tacati bi', lo'o jua'a̱ cati tya'a ca'ña oro ntucua ya' ni'; ne' ca'ña bi' ntsu'u cha' ti'í nu ta ycui' Ndyosi ji'i̱ ñati̱ chalyuu, cha' ñasi̱' tsa Ni ji'i̱ ngu', ycui' Ndyosi nu ná nga'a̱ cha' tye yija̱ ji'i̱ Ni. Nda ni' ca'ña bi' ji'i̱ nu cati tya'a xca̱ bi' li'.

⁸ Ngutsa'á̱ ne' laa ntsu'u sñii cha' xcutsi̱i̱ ji'na, cha' tacati tsa cha' bi', cha' tlyu tsa cha' nu ntsu'u ji'i̱ ycui' Ndyosi. Ná tucui ngua ji'i̱ tsaa ne' laa bi' ña'a̱ cuayá' tye ca ta'a cati quicha nu ta nu cati tya'a xca̱ bi' lijya̱ nde chalyuu.