APOCALIPSIS 14 - Chatino Tataltepec

Sca siyento ntucua tu'ba ntucua jacua mil tya'a ñati̱ lubii

¹ Lo'o li' na'a̱ na' chaca quiya' ca ndacua su ndu̱ nu ñi'ya̱ ña'a̱ xlya' bi' lo xlya ca'ya Sión; stu'ba ti ndu̱ bi' lo'o sca siyento ntucua tu'ba ntucua jacua mil tya'a ñati̱. Nde tyaca̱a̱ ñati̱ bi', ndacua nscua xtañi nu ñi'ya̱ ña'a̱ xlya' bi', lo'o la cui' bi' nscua xtañi ycui' Ndyosi Sti Ni.

² Cui̱i̱ nguañi nde su ntucua ycui' Ndyosi li'; ñi'ya̱ ndañi ndyalú hitya sca sta'a̱ clyaa to' quee jaa' su cua̱ tsa ndyalú hitya, ñi'ya̱ ndañi lo'o lye tsa nchcui' tyi'yu, jua'a̱ nguañi bi', ngua ti' na'. Ndacua ndu̱ tyu̱u̱ tya'a ñati̱ nu tso'o tsa ntyiji'i̱ ya' ngu' lo sañi, ngua ti' na';

³ nde loo su ndu̱ yaca xlya tlyu su ntucua ycui' Ndyosi, ca su ndu̱ nu jacua tya'a na'ni tacati bi', ca su ndu̱ nu ngu' cusu' bi', ca bi' ndu̱ ñati̱ nu ndyula lo'o sañi bi'. Sca ti nu ñati̱ quiña'a̱ bi' ngua ji'i̱ cula tu'ba ji̱i̱ bi'; ná ngua ji'i̱ xa' ñati̱ chalyuu ca tsa'a̱ ngu' ji̱i̱ bi', cha' sca ji̱i̱ nu bilya cuna ñati̱ chalyuu laca bi'. Sca ti nu sca siyento ntucua tu'ba ntucua jacua mil tya'a ñati̱ nu ngua'ni lyaá Ni ji'i̱ nde chalyuu, bi' ñati̱ laca nu ngua ji'i̱ cula tu'ba ji̱i̱ bi'.

⁴ Ñati̱ lubii tsiya' ti laca nu ngu' quiña'a̱ bi'. Ná ngutu'u cha' ji'i̱ ngu' bi' lo'o xa' nu cuna'a̱ nu lo'o nguti'i̱ ngu' chalyuu, ná ngua'ni ngu' bi' cha' suba' tsiya' ti; nguta'a̱ ngu' lo'o nu ñi'ya̱ ña'a̱ xlya' bi' macala su ndya'a̱. Cua ngua'ni lyaá Ni ji'i̱ ngu' bi', cha' bi' laca ñati̱ nu tso'o nti' ycui' Ndyosi ña'a̱ Ni ji'i̱ tya lo'o nguxana cha' ji'i̱ nu ñi'ya̱ ña'a̱ xlya' bi'. Tya clyo ngusubi Ni ji'i̱ ngu' bi', cha' cua'ni ngu' cña ji'i̱ Ni.

⁵ Ná ntucua cha' cuiñi tu'ba ngu' bi' tsiya' ti, cha' ná ntsu'u cha' cuxi ji'i̱ ngu' bi' tsiya' ti.

Tya xna tya'a xca̱ ji'i̱ ycui' Ndyosi

⁶ Na'a̱ na' ndyaa chaca xca̱ ji'i̱ ycui' Ndyosi li', nu cua̱ tsa ndacui ndyaa; ndyalo'o bi' ji'i̱ sca cha' tso'o nu ngua ti' ycui' Ndyosi chcui' lo'o lcaa ñati̱ chalyuu, sca cha' nu ndulo tsa ji'i̱ ñati̱ cha' cuna ngu'. Lcaa tyempo ná tye chca cha' bi'. Slo lcaa lo ñati̱ chalyuu tyucui ña'a̱ chalyuu mala su ndi'i̱ ñati̱, cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ca bi' ndyaa xca̱ bi', cha' chcui' lo'o lcaa ñati̱.

⁷ Cui̱i̱ nchcui' xca̱ bi' lo'o ngu' li': ―Cutsi̱i̱ cu'ma̱ ji'i̱ ycui' Ndyosi, cube ti' ma̱ ji'i̱ Ni cha' tlyu tsa cña ndu'ni Ni chalyuu ―nacui̱ xca̱ bi'―. Cua ndyalaa tyempo cha' cua'ni cuayá' Ni ji'i̱ lcaa ñati̱ chalyuu. Cua'ni tlyu ma̱ ji'i̱ ycui' Ndyosi cha' cua ngüiñá Ni nde cua̱, jua'a̱ ngüiñá Ni chalyuu, jua'a̱ ngüiñá Ni tyujo'o, jua'a̱ ngüiñá Ni lcaa su ntyucua hitya ―nacui̱ xca̱.

⁸ Lo'o ndyaa xca̱ bi', li' ndyalaa chaca xca̱ cha' chcui' lo'o ñati̱: ―Cua nguti̱ quichi̱ ―nacui̱ nu chaca xca̱ bi'―. Cua nguti̱ quichi̱ tlyu nu naa Babilonia, xqui'ya cha' ngua'ni ñu'u̱ ngu' quichi̱ bi' ji'i̱ lcaa ñati̱ chalyuu. Cuxi tsa cña nu ngua'ni ngu' quichi̱ bi', xqui'ya cha' ndu'ni tlyu ngu' ji'i̱ lcui̱ jo'ó; jua'a̱ ngulu'u qui'i̱ ngu' ji'i̱ xa' ñati̱ cha' cua'ni ngu' la cui' ti cha' cuxi slo jo'ó ―nacui̱ xca̱ nu nchca tyucuaa bi'.

⁹ Nchca sna quiya' juani ya̱a̱ chaca xca̱. Cui̱i̱ nchcui' lo'o ñati̱ li': ―Xcube' ycui' Ndyosi ji'i̱ cua ña'a̱ ca ñati̱ nu ndyu'ni tlyu ji'i̱ nu na'ni chiya'a̱ ña'a̱ bi', masi ji'i̱ ycui' ni', masi ji'i̱ lcui̱ ji'i̱ ni'. Lo'o jua'a̱ xcube' Ni ji'i̱ lcaa ñati̱ nu nga'a̱ cuayá' ji'i̱ ni' nde tyaca̱a̱ ngu', jua'a̱ si nga'a̱ cuayá' ji'i̱ ni' chu̱' ya' ngu';

¹⁰ xcube' Ni ji'i̱ ngu' bi', cha' lye tsa ngunasi̱' Ni. Tyaqui̱ ngu' bi' lo'o sca quii' tlyu nu nguxa' lo'o yuu sufri su ña'a̱ nu ñi'ya̱ ña'a̱ xlya' bi' ji'i̱ ngu'; jua'a̱ lcaa xca̱ nu cuentya ji'i̱ Ni ña'a̱ ji'i̱ ngu' bi' li'.

¹¹ Tyucui tyempo ná tye cha' tyatu̱ sñii quii' su nchcube' ñati̱ bi'; ná caja ñi'ya̱ clyaá ngu' bi' ji'i̱ ycui' Ndyosi, lcaa ñati̱ nu cua ngua'ni tlyu ji'i̱ na'ni bi', masi ji'i̱ lcui̱ ti ngua'ni tlyu ngu'; masi nga'a̱ cuayá' ti ji'i̱ ni' nde tyaca̱a̱ ngu' lo'o chu̱' ya' ngu', nga'aa clyaá ngu' bi'.

¹² Lo'o nu na ni, talo na ji'i̱ cha' cuxi sca ti si ntsu'u cha' ji'na lo'o ycui' Ndyosi, sca ti si taquiya' na cña nu ngulo Ni ji'na, sca ti si xñi tso'o na cha' ji'i̱ Jesús; sca ti jua'a̱ taca ji'na talo na ji'i̱ nu cha' cuxi bi'.

¹³ Li' ndañi xtyi'i ca su ntucua ycui' Ndyosi, nchcui' sca ñati̱ lo'o na': ―Scua clya nu'u̱ cha' re: “Tso'o tsa caca tyiquee ñati̱ nu ndyijii laja lo'o ndyu'ni ngu' cña ji'i̱ ycui' Ndyosi nu Xu'na na tyempo nde loo la”. La cui' jua'a̱ laca cha' nu nda Xtyi'i ycui' Ndyosi lo'o ma̱. Nacui̱ cha' ca bi' tyi'i̱ cña' ñati̱ bi' li', cha' tso'o tsa cña nu ngua'ni ngu' lo'o ya̱a̱ ngu' chalyuu; ndiya ti' Ni cña nu ngua'ni ngu', bi' cha' tyi'u ti' ycui' Ndyosi ji'i̱ cña nu cua ngua'ni ngu' bi' li' ―nacui̱ Ni jna'.

Nchca clacua nde chalyuu

¹⁴ Li' na'a̱ na' su ndacui sca coo ngati̱, chu̱' coo bi' ntucua sca nu ñi'ya̱ ña'a̱ ñati̱ ña'a̱; ntucua sca sne' oro hique Ni, lo'o ya' Ni ndacui sca maxtyi cha tu'ba.

¹⁵ Li' ngutu'u sca xca̱ ne' laa ji'i̱ ycui' Ndyosi nde cua̱, nu cui̱i̱ ngusi'ya ji'i̱ ñati̱ nu ntucua chu̱' coo bi': ―Xu'ba clya nu'u̱ maxtyi jinu'u̱, xuti'i̱ nu'u̱ ji'i̱ quixi̱' trigo, cha' bi' laca ñati̱ ji'i̱ ycui' Ni nu ndi'i̱ chalyuu. Cua ndyalaa la cui' hora cha' caca clacua chalyuu, cua laca nguscua se'i̱ cha' caca bi'.

¹⁶ Ngua'ya nu ntucua chu̱' coo bi' nde lo yuu li', nguscui̱ maxtyi ji'i̱ cha' si'yu quixi̱' li'; jua'a̱ ngua clacua nde chalyuu.

¹⁷ Li' na'a̱ na' chaca xca̱ nu ngutu'u ne' laa ji'i̱ ycui' Ndyosi nde cua̱, nu ndacui maxtyi cha tu'ba ya' yu.

¹⁸ Jua'a̱ ngutu'u tya chaca xca̱ nu ndu̱ to' mesa su ndyaqui̱ msta̱, ya̱a̱ li'; bi' laca nu laca loo ji'i̱ quii' bi'. Li' cui̱i̱ ngusi'ya bi' lo'o xca̱ nu ndacui maxtyi cha tu'ba ya': ―Xu'ba clya nu'u̱ maxtyi jinu'u̱, xi'yu jyacua' si'yu losu' tyixi nu ntsu'u chalyuu, cha' ngumi̱ tsa ña'a̱ si'yu bi'.

¹⁹ Ngua'ya xca̱ bi' li', nguscui̱ yu maxtyi ji'i̱ yu nde lo yuu chalyuu, ngusi'yu yu ji'i̱ jyacua' si'yu losu' bi', ngu̱ ji'i̱ ndyaa ne' sca pilya quee nu tlyu xi cha' satá ngu' ji'i̱; la cui' jua'a̱ xcube' tsa ycui' Ndyosi ji'i̱ ñati̱ chalyuu, xqui'ya cha' ñasi̱' tsa Ni ji'i̱ ngu'.

²⁰ To' quichi̱ nscua su ngusi̱ si'yu bi', la cui' su ngujuii ñati̱ cha' nchcube' Ni ji'i̱ ngu'. Clyaa tsa tañi ndyalú lijya̱ lo yuu li'; tsa ña'a̱ cuayá' nu ndyalaa tu'ba cuayu, tsa lo cua clyaa tañi ndyalú bi'. Sna siyento kilómetro cuayá' tyijyu' ngusna tañi bi' ndyaa.