APOCALIPSIS 13 - Chatino Tataltepec

Nu tucua tya'a na'ni nu chiya'a̱ ña'a̱

¹ Ndyaa na' ndyatu̱ na' to' tyujo'o li'. Na'a̱ na' nde to' hitya tyujo'o lijya̱ ndu'u tucua sca na'ni nu chiya'a̱ tsa ña'a̱; ntucua tii tya'a sata ni', cuati ntsu'u cati tya'a hique ni'. Ca ta'a sata ni' bi' cua ntucua sne' nu ndubi tsa ña'a̱, cha' laca ni' loo nde chalyuu. Ca ta'a scua' que ni' cua nscua xtañi cuiñaja, xtañi bi' nchcui' cha' ti'í ji'i̱ ycui' Ndyosi.

² Ñi'ya̱ cuichi jo'ó, jua'a̱ ña'a̱ ni', ngua ti' na'; pana tyaala ña'a̱ quiya' ni', tyucui̱ tsa xcatya̱' ni' ñi'ya̱ ña'a̱ xcatya̱' oso. Lo'o tu'ba ni' ni, ñi'ya̱ ña'a̱ tu'ba cuichi sa'a cuiña', jua'a̱ ña'a̱ tu'ba ni'. Nda nu cuaña bi' cña loo ji'i̱ nu na'ni chiya'a̱ ña'a̱ bi', cha' caca ni' loo ji'i̱ ñati̱ chalyuu, ñi'ya̱ laca ycui' loo. Lo'o jua'a̱ nu cuaña bi' ni, nda ni' chacuayá' ji'i̱ na'ni chiya'a̱ ña'a̱ bi', cha' caca cua'ni ni' cña, cha' tyanu tlyu ni' macala su nti' ycui' ni'.

³ Cua ndyanu cuayá' lo sca scua' que ni' su ngua quicha ni'; cua cajaa ti ni' tyempo bi', ngua ti' na', pana ngua tso'o su lye tsa quicha ni'. Ndube tsa ti' ñati̱ chalyuu ña'a̱ ji'i̱ ni'; ngusñi ngu' cha' ji'i̱ ni' li', xqui'ya cha' ngua tso'o chaca quiya' su lye quicha ni'.

⁴ Ngua'ni tlyu lcaa ñati̱ ji'i̱ nu cuaña bi' li', cha' cua nda bi' chacuayá' cha' caca tlyu nu na'ni chiya'a̱ ña'a̱ bi'; jua'a̱ ngua'ni tlyu ngu' ji'i̱ ycui' na'ni chiya'a̱ ña'a̱. Nchcui' ngu' lo'o tya'a ngu' li': ―Ná tucui ndi'i̱ chalyuu nu stu'ba lo'o nu na'ni jua. Nga'aa nchca ji'i̱ ñati̱ xu̱u̱ tya'a lo'o ni'.

⁵ Cua ngujui chacuayá' ji'i̱ nu na'ni chiya'a̱ ña'a̱ bi', cha' chcui' cua ña'a̱ ca ti cha', masi lye tsa cua'ni tyucuaa ti' ni', masi chcui' cuxi ni' ji'i̱ ycui' Ndyosi. Tu'ba ntucua tucua co' ntsu'u chacuayá' ji'i̱ ni' cha' caca ni' loo nde chalyuu.

⁶ Li' nguxana na'ni chiya'a̱ ña'a̱ bi' nda ni' qui'ya ji'i̱ ycui' Ndyosi: nchcui' cuxi na'ni bi' ji'i̱ lcaa cña nu ndu'ni Ni; jua'a̱ nchcui' cuxi ni' ji'i̱ su tlyu nde cua̱ ca su ntucua ycui' Ni; jua'a̱ cuxi tsa nchcui' ni' ji'i̱ lcaa ñati̱ ji'i̱ ycui' Ni.

⁷ Ngujui chacuayá' ji'i̱ ni' cha' xu̱u̱ tya'a ni' lo'o ñati̱ nu ntsu'u cha' ji'i̱ lo'o ycui' Ndyosi, cha' tyiji̱loo ni' ji'i̱ ngu' bi'. Lo'o li' ngujui chacuayá' ji'i̱ ni' cha' caca ni' loo ji'i̱ tyucui ña'a̱ chalyuu mala su ndi'i̱ ñati̱, masi lcaa lo ñati̱ chalyuu nu ngutu'u cua ña'a̱ ca quichi̱ tyi ngu', nu nchcui' cua ña'a̱ ca lo cha'cña nu nchcui' ñati̱ chalyuu;

⁸ lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.

⁹ Bi' cha' cua'a̱ jyaca̱ ma̱ juani, si tyaja'a̱ ma̱ cuna ma̱ xi.

¹⁰ Si lo'o nscua cha' tsalo'o ngu' ji'i̱ tsaca ma̱ ne' chcua̱, jua'a̱ caca lacua. Ná cutsi̱i̱ ma̱ li'. Si lo'o nscua cha' cujuii ñati̱ ji'i̱ tsaca ma̱, masi lo'o maxtyi, jua'a̱ caca lacua. Ná cutsi̱i̱ ma̱ li'. Ndu'ni cha' talo tsaa tyiquee na ji'i̱ cha' cuxi; ndu'ni cha' lcaa tsa̱ taquiya' na ji'i̱ ycui' Ndyosi si ntsu'u cha' ji'na lo'o Ni nde chalyuu.

¹¹ Li' na'a̱ na' chaca na'ni chiya'a̱ ña'a̱ lijya̱ ndyu'u tucua nde lo yuu chalyuu. Ntucua tucua tya'a sata ni'; ñi'ya̱ ña'a̱ sata xlya' cuañi', jua'a̱ ña'a̱ sata ni', pana nchcui' ni' ñi'ya̱ nu nchcui' nu cuaña tonu bi'.

¹² Ñi'ya̱ nchca ji'i̱ na'ni chiya'a̱ ña'a̱ nu ya̱a̱ tya clyo la nclyo ni' cña, la cui' jua'a̱ nchca ji'i̱ nu chaca na'ni bi' culo ni' cña ji'i̱ ñati̱; cha' juersa ndatsaa ni' ji'i̱ lcaa ñati̱ chalyuu cha' cua'ni tlyu ngu' ji'i̱ na'ni nu ya̱a̱ clyo, nu ngua tso'o su ti'í tsa ngula'a hique ni'.

¹³ Lo'o nu chaca na'ni chiya'a̱ ña'a̱ bi', lo'o bi' ngua'ni quiña'a̱ cha' tlyu; ngua'ni bi' cha' ndyalú quii' nu ntsu'u nde cua̱ nde lo yuu cha' ña'a̱ lcaa ñati̱ ji'i̱.

¹⁴ Lo'o jua'a̱ nguñilo'o ni' ji'i̱ lcaa ñati̱ tyucui ña'a̱ chalyuu xqui'ya cha' tlyu nu ndyu'ni ni' lo'o ndi'i̱ ni' slo nu na'ni nu ya̱a̱ tya clyo bi'. Li' nchcui' ni' lo'o lcaa ñati̱ chalyuu cha' cuiñá ngu' sca lcui̱ tyu̱, cha' cua'ni tlyu ngu' ji'i̱ lcui̱ bi'; ngüiñá ngu' lcui̱ ji'i̱ nu na'ni nu ya̱a̱ tya clyo bi' li', na'ni nu ngua tso'o masi ti'í tsa ngula'a hique ni'.

¹⁵ Lo'o li' ngujui chacuayá' ji'i̱ nu chaca na'ni bi', cha' culatu'u cui'i̱ cha' tya̱a̱ xtyi'i lo lcui̱ ji'i̱ na'ni nu ya̱a̱ clyo bi'; ngua ji'i̱ lcui̱ chcui' lo'o ñati̱ li', ngua ji'i̱ cujuii ji'i̱ lcaa ñati̱ nu ná ntaja'a̱ cua'ni tlyu ji'i̱.

¹⁶ Ngulo ni' cña ji'i̱ lcaa ñati̱ cha' chca'a̱ cuayá' ya' ngu' la'a tsu' cui̱, masi chca'a̱ cuayá' nde tyaca̱a̱ ngu'; masi ñati̱ tlyu, masi ñati̱ jua'a̱ ti, masi culiya' ngu', masi ti'i ngu', masi msu nu cua ngüi'ya ñati̱ ji'i̱, masi msu nu ndi'i̱ tso'o ti, chca'a̱ cuayá' ji'i̱ lcaa ñati̱ cuentya ji'i̱ nu xña'a̱.

¹⁷ Ni sca ñati̱ nga'aa ntsu'u chacuayá' ji'i̱ cha' cui'ya yu'ba, ni cha' cujui' yu'ba, si ná ngua'a̱ cuayá' ji'i̱ ni' loo ngu'. Lo'o nu cuayá' bi' ni, xtañi na'ni nu chiya'a̱ ña'a̱ bi' laca, cha' número nu ca ji'i̱ xtañi ni' laca cuayá' bi'.

¹⁸ Cui'ya na cuentya ni cha' ndyaca re. Si culacua tso'o ti' na, quije cha' ji'na ñi'ya̱ ndyu'u cha' ji'i̱ número ji'i̱ na'ni bi'; número ji'i̱ ni' ni, ñi'ya̱ laca xtañi ñati̱, jua'a̱ laca bi'. Nde laca número bi': scuá siyento ntucua snayala ntucua scuá.