APOCALIPSIS 12 - Chatino Tataltepec

Ndyu'ni tyaala cuaña tonu ji'i̱ sca nu cuna'a̱

¹ Li' nde cua̱ ndyu'u tucua sca cuayá' nu nda ycui' Ndyosi cha' culu'u Ni ji'na, sca cha' nu ndyaca chalyuu laca bi'; bi' laca sca nu cuna'a̱ nu ntsu'u ste' ndubi ña'a̱. Ñi'ya̱ ndubi ña'a̱ xee cuichaa, jua'a̱ ña'a̱ late' lacu' nu cuna'a̱ bi'. Li' ngusta quiya' nu cuna'a̱ chu̱' co'. Tii tyucuaa tya'a cuii nscua lo xlya hique nu cuna'a̱ bi'; ñi'ya̱ nscua sca sne' ti, jua'a̱ nscua bi'.

² Cua ntsu'u sñi' nu cuna'a̱ bi'; nchcube' tsa nu cuna'a̱, ngusi'ya tsa cha' cua ngulala ti cala sñi'.

³ Yala ti ndyu'u tucua chaca cuayá' nde cua̱ li'; sca cuaña tlyu nu nga'a ña'a̱ laca bi', nu cati tya'a scua' que ni' ntucua. Jua'a̱ sca sne' oro ntucua ca ta'a scua' que ni' bi', lo'o jua'a̱ ntucua tii tya'a sata ni'.

⁴ Ngujui'i̱ xtyi'i̱ ni' cuii nu ntsu'u nde cua̱; ngusalú ni' ña'a̱ tsaca cla'be lcaa cuii bi', ndyalú cuii nde lo yuu chalyuu. Li' ndatu̱ nu cuaña bi' nde loo su ndu̱ nu cuna'a̱ nu cua cala ti sñi'; lo'o cala bi', hora ti cacu cuaña ji'i̱, ngua ti' ni'.

⁵ Ngula sca sñi' qui'yu ji'i̱ nu cuna'a̱ bi' li'. Cua lijya̱ bi' chalyuu, cha' liñi ti culo bi' cña ji'i̱ lcaa ñati̱ chalyuu; pana hora ti ngüi'ya ycui' Ndyosi ji'i̱ sñi' nu cuna'a̱ bi', ndyalo'o Ni ji'i̱ yu nde su tlyu su ntucua ycui' Ni.

⁶ Li' ngusna nu cuna'a̱ ndyaa ne' quixi̱' ca su tyi'i̱ ycui' ti ma'; cua laca ngua'ni cho'o ycui' Ndyosi sca su tyi'i̱ ma', su ña'a̱si̱i̱ Ni ji'i̱ ma', ca bi' tyanu ma' tii tyucuaa siyento ntucua snayala tsa̱ li'.

⁷ Li' nguxana cha' cusu̱u̱ ca su ntucua ycui' Ndyosi. Ndu̱ Miguel nu laca xu'na xca̱ ji'i̱ ycui' Ndyosi, ndu̱ lo'o xca̱ nu cuentya ji'i̱ Ni; jua'a̱ cua ndu̱ nu cuaña tonu lo'o xca̱ ji'i̱. Ti'í tsa ngusu̱u̱ tya'a ngu' li'.

⁸ Pana cua ntiji̱loo Miguel ji'i̱ nu cuaña bi', nga'aa ngua ji'i̱ nu cuaña bi' tyanu ca slo ycui' Ndyosi lo'o xca̱ ji'i̱ Ni li';

⁹ cua ngulo'o Ni ji'i̱ ngu' nu ndu̱ cuentya ji'i̱ nu cuaña bi' li'. Sa'ni ndya'a̱ nu cuaña bi', ycui' nu xña'a̱ naa bi'; la cui' bi' laca nu naa Satanás. Xcui' na ñilo'o bi' ji'i̱ ñati̱ tyucui ña'a̱ chalyuu. Pana cua ngulo'o ycui' Ni ji'i̱ nu xña'a̱ lo'o xca̱ ji'i̱, ndyaa ngu' nde lo yuu chalyuu li'.

¹⁰ Lo'o li' cui̱i̱ tsa nguañi nchcui' sca ñati̱ nde cua̱: ―Juani taca ña'a̱ na ñi'ya̱ ngua'ni lyaá ycui' Ndyosi ji'i̱ ñati̱ chalyuu ya' nu xña'a̱ ―nacui̱ ngu'―. Nguula tsa cña ndu'ni Ni chalyuu, bi' cha' laca Ni loo juani, lo'o jua'a̱ cua ndyalaa tyempo cha' caca Cristo loo tyucui ña'a̱ chalyuu. Nu ngua tya tsubi' la ndu̱ nu xña'a̱ bi' ca slo ycui' Ndyosi, cha' tsa̱ lo'o talya ngusta bi' qui'ya hichu̱' ñati̱ tya'a ngusñi na cha' ji'i̱ Jesús; pana juani cua ngulo'o Ni ji'i̱ ca su ntucua ycui' Ni, cua ndyu'u laja ngu' bi' li'.

¹¹ Nu ngu' tya'a ngusñi na cha' ji'i̱ Jesús ni, cua ntiji̱loo ngu' ji'i̱ nu xña'a̱ bi', xqui'ya cha' ngujuii Jesús nu ñi'ya̱ ña'a̱ xlya' bi'. Ná ntsi̱i̱ ngu' bi' ta ngu' cha' tso'o ji'i̱ Jesús lo'o xa' ñati̱; ntaja'a̱ ngu' bi' chcui' ngu' cha' bi', masi cujuii ñati̱ ji'i̱ ngu' bi' xqui'ya cha' ñasi̱' tsa ñati̱ ji'i̱ Jesús.

¹² Bi' cha' juani ―nacui̱ nu ntucua nde cua̱ bi'―, ca chaa ti' cu'ma̱ nu ndi'i̱ ma̱ nde su ntucua ycui' Ndyosi; pana tya'na tsa caca cu'ma̱ nu ndi'i̱ ma̱ nde chalyuu, nu ndi'i̱ ma̱ nde lo tyujo'o. Cua ngua'ya ycui' nu xña'a̱ nde su ndi'i̱ ma̱, lo'o juani ñasi̱' tsa bi' ndya'a̱; cua jlo ti' bi' cha' tya xi tya tsa̱ ndyanu ji'i̱ cha' cua'ni lya' ti' ji'i̱ ñati̱ chalyuu.

¹³ Nu lo'o ngua cuayá' ti' nu cuaña tonu bi' cha' cua ngulo'o ycui' Ndyosi ji'i̱ lijya̱ nde lo yuu chalyuu, li' ngutu'u lca'a̱ ni' ji'i̱ nu cuna'a̱ nu ntsu'u sñi' qui'yu bi', cha' lye tsa cua'ni lya' ti' ji'i̱ ma' ngua ti' ni'.

¹⁴ Li' nda ycui' Ndyosi sca latya lu'be ji'i̱ nu cuna'a̱ bi', ñi'ya̱ ña'a̱ lu'be sca cua'ya tlyu, cha' taca ji'i̱ ma' tyacui ma' tsaa ma' ca su tyanu tso'o ti ma' ne' quixi̱', su tyijyu' tsa ji'i̱ ca su ndya'a̱ cuaña bi'. Ca bi' ña'a̱si̱i̱ Ni ji'i̱ ma', ña'a̱ cuayá' nu tyu'u scua sna yija̱ cla'be.

¹⁵ Li' ngusalú nu cuaña bi' hitya tu'ba ni' ndyaa chu̱' nu cuna'a̱ bi'; ñi'ya̱ sca sta'a̱ clyaa, jua'a̱ ndyalú hitya tu'ba ni' cha' clya'ba lyiji cho' ngua ti' ni'.

¹⁶ Li' nguxtyucua yuu ji'i̱ nu cuna'a̱ bi', bi' cha' si̱i̱ nchcana tu'ba yuu, ndye hitya ngutu'u tu'ba cuaña ndyo'o yuu li'.

¹⁷ Ngunasi̱' tsa nu cuaña bi' ji'i̱ nu cuna'a̱ bi' li', ndyaa ndyaana ni' cha' cusu̱u̱ lo'o lcaa ñati̱ nu tyu'u ji'i̱ nu cuna'a̱ ca tiya' la; nxu̱u̱ tya'a ni' lo'o lcaa ñati̱ nu taquiya' ji'i̱ cña nu ngulo ycui' Ndyosi ji'na, nu ña'a̱ ti ná ntsi̱i̱ ngu' cha' cacha' liñi ngu' cha' ji'i̱ Jesús ji'i̱ xa' ñati̱.