APOCALIPSIS 11 - Chatino Tataltepec

Tucua tya'a ñati̱ nu ndu̱ nde chalyuu nchcui' cuentya ji'i̱ ycui' Ndyosi

¹ Li' nda ycui' Ndyosi sca yaca cualyaa 'na; lyaa tsa yaca bi', cha' tyu'u cuayá' lo'o. Nchcui' Ni lo'o na' li': ―Su'ba cuayá' clya nu'u̱ nde ni'i̱ tlyu ji'i̱ ycui' Ndyosi, cha' caca ni'i̱ bi' cuentya jna' cha' ña'a̱si̱i̱ na' ji'i̱; jua'a̱ su'ba cuayá' nu'u̱ loo mesa su ntucua msta̱ nu nsta ngu cuentya jna'. Clyacua nu'u̱ ni lcua tya'a ñati̱ nu ndi'i̱ ca bi' nu ndyu'ni tlyu jna' nu laca̱ ycui' Ndyosi li'.

² Nga'aa su'ba cuayá' nu'u̱ nde liya' toni'i̱ tlyu bi', cha' cuentya ji'i̱ xa' ñati̱ nu ná ndaquiya' jna' nu laca̱ ycui' Ndyosi tsiya' ti laca bi'. Chiya'a̱ tsa cua'ni ngu' bi' lo'o tyi'i̱ ngu' quichi̱ bi', la cui' quichi̱ tlyu nu laca quichi̱ nu cuentya jna' laca bi'. Tu'ba ntucua tucua co' tyi'i̱ ngu' bi',

³ li' ta na' tucua tya'a ñati̱ nu ca̱a̱ chalyuu cha' chcui' ngu' lcaa cha' nu nti' na' ta na' lo'o ñati̱. Tyucuaa ngu' bi' tsatu̱ ngu' cla'be quichi̱ bi' tyempo li' ―nacui̱ Ni 'na―, ña'a̱ cuayá' tya'a tii tyucuaa siyento ntucua snayala tsa̱ tyu̱ ngu' bi'. Tyucui tyempo cacu' ngu' bi' late' ngata, cha' tonu tsa cha' nu ta ngu' lo'o ñati̱, ñi'ya̱ nu cua'ni na' nde loo la.

⁴ Lo'o ndu̱ tyucuaa ñati̱ bi' chalyuu, ndu̱ ngu' cuentya ji'i̱ ycui' Ndyosi nu laca loo tyucui ña'a̱ chalyuu; nxtyucua tsa ycui' Ndyosi ji'i̱ ngu' bi', cha' chcui' ngu' lcaa cha' nu nti' ycui' Ni ta Ni lo'o ñati̱. Caca ngu' ñi'ya̱ laca tucua tya'a yaca si'yu olivo, lo'o jua'a̱ caca ngu' ñi'ya̱ laca tucua tya'a candyeru. (Tso'o tsa setye ndyu'u ji'i̱ si'yu olivo bi', cha' tyaqui̱ ne' candyeru.)

⁵ Lo'o cua nti' ñati̱ chalyuu cua'ni lya' ti' ji'i̱ ngu' bi', li' tyalú quii' tu'ba ngu' nu ndu̱ bi', cha' tsumi̱' ji'i̱ ñati̱ cuxi; tye cua'ni ñu'u̱ ji'i̱ ñati̱ bi' li'. Jua'a̱ cajaa lcaa ñati̱ nu cua'ni lya' ti' ji'i̱ ngu' bi'.

⁶ Cua ntsu'u chacuayá' ji'i̱ ngu' nu ndu̱ bi', cha' cua'a ngu' ji'i̱ coo, cha' ná ca'ya tyo tsiya' ti tyucui tyempo lo'o ta ngu' cha' ji'i̱ ycui' Ndyosi lo'o ñati̱; jua'a̱ ntsu'u chacuayá' ji'i̱ ngu' cha' cua'ni ñu'u̱ ngu' ji'i̱ lcaa su̱u̱ hitya cha' caca tañi; jua'a̱ taca ji'i̱ ngu' ta ngu' lcaa lo quicha cha' quiji̱' ji'i̱ ñati̱ chalyuu, ni jacua' nti' ngu' cha' caca quicha ñati̱.

⁷ Lo'o tye cña nu cua'ni tyucuaa ñati̱ bi' nde chalyuu, li' xana nu na'ni xña'a̱ nu ntsu'u ca tyuquee bi', xu̱u̱ tya'a ni' lo'o tyucuaa ñati̱ nu ndu̱ bi' li'; tyiji̱loo nu bi' ji'i̱ ngu' bi' li', cuati cujuii ji'i̱ ngu'.

⁸ Li' tyanu tyucuaa jyo'o bi' ca su ntsiya ngujuii to' calle quichi̱ tlyu bi', la cui' quichi̱ su ngujui'i̱ ca'a̱ ngu' ji'i̱ ycui' nu Xu'na na lo crusi. Xña'a̱ tsa ngu' quichi̱ bi', bi' cha' ntsu'u sca cha' nu nchcui' ñati̱ ji'i̱, cha' ñi'ya̱ ngua ngu' quichi̱ Sodoma cua sa'ni, la cui' ñi'ya̱ ngua ngu' quichi̱ Egipto cua sa'ni, jua'a̱ laca ngu' quichi̱ tlyu bi' juani.

⁹ Lo'o li' tya̱a̱ ñati̱ tyucui ña'a̱ chalyuu mala su ndi'i̱ ñati̱, lcaa lo ñati̱ chalyuu, masi ñati̱ nu ngutu'u cua ña'a̱ ca quichi̱ tyi ngu', masi ñati̱ nu nchcui' cua ña'a̱ ca lo cha'cña nu nchcui' ñati̱ chalyuu; tyu'u scua sna tsa̱ cla'be nu tya̱a̱ ngu' tya̱a̱ na'a̱ ngu' ji'i̱ jyo'o bi' ca su nscua ngu'. Ná ta ngu' chacuayá' cha' tyatsi' jyo'o bi'.

¹⁰ Chaa tsa ti' caca ñati̱ chalyuu cha' cua ngujuii tyucuaa ñati̱ nu ngutu̱ bi', bi' cha' cua'ni ngu' ta'a; lu'ba ti ta ngu' xlya'be tyaa su ndi'i̱ tya'a ngu', cha' chaa tsa ti' ngu'. Xqui'ya tyucuaa jyo'o bi' quiña'a̱ tsa cha' nchcube' ngujui ji'i̱ ñati̱ chalyuu, nacui̱ ngu'.

¹¹ Pana nu lo'o cua ndu'u scua sna tsa̱ cla'be bi', li' chaca quiya' nda ycui' Ndyosi xtyi'i ndyalaa ne' cresiya ji'i̱ tyucuaa ngu' jyo'o bi'; xa' ndatu̱ ngu' li'. Ndyutsi̱i̱ tsa lcaa ñati̱ nu na'a̱ ji'i̱ ngu' bi', cha' cua ndyu'ú ngu' chaca quiya'.

¹² Li' ndyuna tyucuaa ñati̱ bi' lo'o ngusi'ya ycui' Ndyosi ji'i̱ ngu' ca su ntucua Ni nde cua̱: ―Tyacuí̱ clya ma̱ ca nde cua̱ re ―nacui̱ Ni. Laja lo'o ña'a̱ tya'a cusu̱u̱ ngu' ji'i̱ ngu', li' ngutu'u ngu' ndyaa ngu' nde cua̱; laja coo ti ndyaa ngu'.

¹³ La cui' hora bi' lye tsa ngulacui̱ chalyuu; su nchca tii tya'a bariyu quichi̱ bi', tyucui ña'a̱ sca bariyu ndye nguti̱ li'. Cati mil tya'a ñati̱ ngujuii li', xqui'ya cha' ngulacui̱ chalyuu. Lye tsa ndyutsi̱i̱ nu xa' la ñati̱ nu ndyanu li', ndyutsi̱i̱ tsa ngu' ji'i̱ ycui' Ndyosi nu ndi'i̱ nde cua̱ cha' nchca ji'i̱ Ni cua'ni Ni cña nu jua'a̱ tonu tsa; ndube tsa ti' ngu' cha' ngua'ni Ni jua'a̱.

¹⁴ Cua tucua quiya' ndye cha' cuxi nu ya̱a̱ lo chalyuu, pana cua lijya̱ ti cha' caca chaca cha' cuxi nde chalyuu.

Chaca tya quiya' ngula'á cui'chcua̱

¹⁵ Li' cua ndya'a cati quiya' nguañi ngula'á xca̱ lo'o cui'chcua̱ ji'i̱. Nguañi nda xtyi'i tyu̱u̱ tya'a ñati̱ nde cua̱ li', nu ndi'ya̱ nchcui': Ca juani ndyanu tachaa cha' ji'i̱ ycui' nu Xu'na na, jua'a̱ ji'i̱ Cristo, cha' caca Ni loo ji'i̱ tyucui ña'a̱ chalyuu, nacui̱ ngu'. Lo'o juani ná nga'a̱ cha' tye cha' culo Ni cña chalyuu.

¹⁶ Li' ngua'ni tlyu nu ngu' cusu' bi' ji'i̱ ycui' Ndyosi, nu calaa ntucua jacua tya'a ngu' cusu' nu ntyucua lo yaca xlya ca su ntucua ycui' Ndyosi; ndyaa stii ngu' nde loo ngu' lo yuu cha' cua'ni tlyu ngu' ji'i̱ Ni.

¹⁷ Ndi'ya̱ nchcui' ngu' li': Ndyosi Xu'na ya, nacui̱ ngu', cua nchca jinu'u̱ cua'ni lcaa cña. Na lu'ú nu'u̱ juani, lo'o la cui' ti lu'ú nu'u̱ nu ngua tya clyo la, jua'a̱ tya lu'ú nu'u̱ nde loo la. Tsa xlya'be jinu'u̱ cha' cua nguxana nu'u̱ ndyu'ni nu'u̱ quiña'a̱ tsa cña tlyu nde chalyuu. Ndube tsa ti' ya cha' cua nguxana nu'u̱ laca nu'u̱ loo,

¹⁸ masi ti'í tsa nchca ñasi̱' xa' la ñati̱ nu ná ndaquiya' jinu'u̱. Cua ngulala ti tyempo cha' ta nu'u̱ cha' ti'í ji'i̱ ngu' bi', cha' cua'ni cuayá' nu'u̱ ji'i̱ lcaa jyo'o. La cui' tyempo tya nu'u̱ xlya'be ji'i̱ ñati̱ nu ngua'ni cña jinu'u̱, cha' cua ngua'a̱loo nu'u̱ cña ji'i̱ ngu' cha' chcui' ngu' cha' jinu'u̱ nde chalyuu; jua'a̱ tya nu'u̱ xlya'be ji'i̱ ñati̱ nu ndaquiya' jinu'u̱, masi ñati̱ cuañi', masi ñati̱ cusu'. Cua ndyalaa tyempo cha' cua'ni ñu'u̱ nu'u̱ ji'i̱ ñati̱ nu ngua'ni ñu'u̱ ji'i̱ ñati̱ chalyuu.

¹⁹ Li' na'a̱ na' su ntucua laa tlyu ji'i̱ ycui' Ndyosi nde cua̱, na'a̱ na' ca ne' laa su nscua cñá' tacati, su ngutucua ycui' Ndyosi laja ñati̱ ji'i̱ Ni nu ngua tya sa'ni la. Lo'o li' lye tsa nguañi nde chalyuu, lye tsa ndyubii, cuati lye tsa ndañi nchcui' tyi'yu; li' ngulacui̱ chalyuu, jua'a̱ clyaa tsa tyo quee ngua'ya.