APOCALIPSIS 10 - Chatino Tataltepec

Nu xca̱ ji'i̱ ycui' Ndyosi nu ndyi'ya sca quityi piti

¹ Li' laja coo ti na'a̱ na' chaca xca̱ nu ngutu'u ca slo ycui' Ndyosi, nu ya̱a̱ nde cua̱ ngua'ya nde lo yuu li'; lcaa cña nchca ji'i̱ xca̱ bi'. Ndu̱ cuaña taa lo xlya hique xca̱ bi', jua'a̱ ndubi tsa ña'a̱ cloo xca̱ bi' ñi'ya̱ ndubi ña'a̱ loo cuichaa; lo'o jua'a̱ tyijya̱ quiya' yu, jua'a̱ tyijya̱ nda̱ yu, lye ndyu'u xee ñi'ya̱ laca lo'o ndyatu̱ quii'.

² Ya' yu ntucua sca quityi piti ti nu cua nchcana. Li' quiya' yu tsu' cui̱ ngusta yu nde lo tyujo'o, quiya' yu tsu' coca ngusta yu nde lo yuu btyi.

³ Lo'o li' cui̱i̱ ngusi'ya xca̱ bi', ñi'ya̱ nti' nxi'ya cuichi; lo'o ngusi'ya nu xca̱ bi', lye nguañi nchcui' tyi'yu li', cha' stu'ba ti nchcui' nu cati tya'a tyi'yu nu ntsu'u chalyuu.

⁴ Lo'o ndye nchcui' tyi'yu bi', li' cua scua ti na' cha' nu nda tyi'yu bi', pana ndyuna na' nchcui' sca nu ntucua ca slo ycui' Ndyosi li': ―Xu'ba cuatsi' nu'u̱ cha' nu nda nu cati tya'a tyi'yu bi' ―nacui̱ Ni jna'―. Nga'aa scua nu'u̱ cha' bi' lo quityi.

⁵ Li' ngusicua̱ xca̱ bi' ya' tsu' cui̱ nde cua̱, la cui' xca̱ nu cua na'a̱ na' ndu̱ lo tyujo'o, nu ndu̱ lo yuu btyi.

⁶ Li' nchcui' xca̱ bi': ―Chacuayá' ji'i̱ ycui' Ndyosi nu ná tye tsiya' ti yija̱ ji'i̱ Ni, bi' laca cha' nu nchcui' na' re ―nacui̱ xca̱ bi'―. Ycui' Ni laca nu ngüiñá lcaa na nu ntsu'u nde cua̱, jua'a̱ ngüiñá Ni lcaa na nu ntsu'u nde lo yuu chalyuu, jua'a̱ ngüiñá Ni lcaa na nu ntsu'u lo tyujo'o. Ndi'ya̱ nchcui' cha' nu nda Ni: Nga'aa tiya' tsa nacui̱ ycui' Ndyosi cha' ca̱a̱ Ni cha' cua'ni cuayá' Ni ji'i̱ ñati̱ chalyuu;

⁷ lo'o xana cula'á xca̱ nu nchca cati lo'o cui'chcua̱ ji'i̱, li' xana cua'ni Ni cña nu cua ndacha' Ni ji'i̱ jyo'o cusu' nu nda cha' ji'i̱ Ni lo'o ñati̱ tya sa'ni la. Ntsu'u yacu̱' ti cha' bi' cua sa'ni, pana juani cua ndañi liñi cha' bi'.

⁸ Li' chaca quiya' nguañi nchcui' nu ntucua ca slo ycui' Ndyosi bi', nchcui' lo'o na': ―Yaa xñi nu'u̱ quityi piti ti nu cua nchcana ntucua ya' xca̱ nu ndu̱ lo tyujo'o nu ndu̱ lo yuu chalyuu bi'.

⁹ Ndya'a̱ na' su ndu̱ xca̱ bi' li', ni na' ji'i̱ cha' ta quityi piti ti bi' 'na. ―Yalo'o nu'u̱ ji'i̱ quityi re ―nacui̱―. Chcui' lyiji nu'u̱ lo quityi re, cha' ca cuayá' tso'o ti' nu'u̱ ji'i̱; caca xñi'i̱ ti' nu'u̱ li', masi tso'o ti ngua ti' nu'u̱ lo'o na'a̱ nu'u̱ ji'i̱ tya clyo.

¹⁰ Li' ngusñi na' quityi piti ti nu ntucua ya' yu, nchcui' na' lo quityi bi'. Lo'o na'a̱ na' ji'i̱, li' tso'o tsa ngua ti' na', ñi'ya̱ laca lo'o ndyacu na cuiñaa' cuityu̱ cha' tyixi tsa; pana nu lo'o cua ngua cuayá' ti' na' ni cha' nda, xñi'i̱ tsa ngua ti' na'.

¹¹ Li' nchcui' Ni lo'o na': ―Tya chaca quiya' ntsu'u cha' chcui' nu'u̱ cha' lo'o ñati̱, lcaa cha' nu cua nti' ycui' Ndyosi ta Ni lo'o lcaa lo ñati̱ chalyuu, masi lo'o ngu' nu laca loo, masi lo'o ñati̱ tyucui ña'a̱ chalyuu mala su ndi'i̱ ñati̱; masi lo'o ñati̱ nu nchcui' cua ña'a̱ ca lo cha'cña nu nchcui' ñati̱ chalyuu chcui' nu'u̱.