2 TIMOTEO 4 - Chatino Tataltepec

Cua ngulala ti tye chalyuu ji'i̱ Pablo

¹ Culo na' cña jinu'u̱ chacuayá' ji'i̱ ycui' Ndyosi, jua'a̱ chacuayá' ji'i̱ Jesucristo nu cua'ni cuayá' ji'i̱ lcaa ñati̱ lu'ú lo'o ji'i̱ lcaa ñati̱ nu cua ngujuii. Ca̱a̱ Jesucristo chaca quiya' cha' caca Ni loo ji'i̱ lcaa ñati̱.

² Culo na' cña jinu'u̱ cha' culu'u nu'u̱ cha' ji'i̱ ycui' Ndyosi ji'i̱ ñati̱; ña'a̱ ti tya culu'u nu'u̱ cha' bi' ji'i̱ lcaa ñati̱, masi nti' ngu' cuna ngu' cha' bi', masi ná nti' ngu' cuna ngu' cha' bi'. Tyucui tyiquee nu'u̱ culu'u nu'u̱ ji'i̱ ngu', cha' ta ngu' cuentya ji'i̱ lcaa cha' cuxi nu ntsu'u ne' cresiya ji'i̱ ngu'; jua'a̱ xtyucua nu'u̱ ji'i̱ ngu' cha' culochu̱' ngu' cha' cuxi bi'. Talo tyiquee nu'u̱ ji'i̱ ngu' cha' tso'o ti culu'u nu'u̱ cha' tso'o bi' ji'i̱ ngu',

³ cha' ca nde loo la nga'aa tyaja'a̱ ngu' cuna ngu' cha' tso'o bi' li'; culana ngu' ji'i̱ quiña'a̱ xa' la ñati̱ nu culu'u ji'i̱ ngu' lcua ti cha' cuxi nu ndiya la ti' ngu' bi' cuna ngu'.

⁴ Li' culochu̱' ngu' ji'i̱ lcaa cha' liñi nu cua ndyuna ngu' nquicha', cha' nga'aa nti' ngu' cuna ngu' cha' liñi bi'; pana xñi tso'o ngu' cua ña'a̱ ca cha' cuiñi, lcaa cuentyu li'.

⁵ Lo'o nu'u̱ ni, culacua xi ti' nu'u̱ na laca nu tso'o la cha' cua'ni nu'u̱, cha' talo tyiquee nu'u̱ lo'o lya' tsa ti' ngu' jinu'u̱, cha' ña'a̱ ti chcui' nu'u̱ cha' tso'o ji'i̱ ycui' Ndyosi lo'o ñati̱, cha' tya cua'ni la nu'u̱ lcaa cña nu ntsu'u cha' cua'ni nu'u̱ cuentya ji'i̱ ycui' Ndyosi.

⁶ Lo'o na' ni, cua tye ti cña jna' nde chalyuu cuentya ji'i̱ cha' tso'o ji'i̱ ycui' Ndyosi; cua ngulala ti cajaa na', nti' na'.

⁷ Cua ngusu̱u̱ tya'a na' lo'o nu cuxi; cua ndye nguta'a̱ na' tyucui̱i̱ ji'i̱ Jesucristo, bi' cha' cua tyalaa ti na' ca slo ycui' Ndyosi. Nu cha' tso'o nu cua ngusñi na' ni, cua ndyanu tso'o cha' bi' ne' cresiya 'na,

⁸ bi' cha' jlo ti' na' cha' ntsu'u sca cha' tso'o nu tyacua 'na; ta ycui' nu Xu'na na cha' tso'o bi' jna' nu lo'o tyalaa tsa̱ lo'o cua'ni cuayá' Ni ji'i̱ lcaa ñati̱, cha' liñi tsa ndu'ni cuayá' ycui' Ndyosi. Ta Ni cha' tso'o bi' ji'i̱ lcaa ñati̱ nu ntajatya tsa ji'i̱ Cristo ni jacua' ca̱a̱ Ni chaca quiya', xqui'ya cha' ntsu'u tsa tyiquee ngu' ña'a̱ ngu' ji'i̱ Ni; si'i jna' ti ta Ni cha' bi'.

Cha' nu nda Pablo lo'o ndye quityi

⁹ Quiñi clya tyucui̱i̱ jinu'u̱ cha' ca̱a̱ ca nde slo na' yala ti.

¹⁰ Cua nguxtyanu Demas 'na xqui'ya cha' ndiya la ti' yu ji'i̱ cha' cuxi nu ntsu'u chalyuu, ndyaa yu ca quichi̱ Tesalónica. Nda na' ji'i̱ Crescente ndyaa ca Galacia, jua'a̱ nda na' ji'i̱ Tito ndyaa ca Dalmacia;

¹¹ sca ti Lucas tya ndi'i̱ ca nde lo'o na'. Tsaana nu'u̱ ji'i̱ Marcos cha' ca̱lo'o ji'i̱ yu ca nde, cha' nchca ji'i̱ yu xtyucua yu xi 'na lo'o cña re.

¹² Ngulo na' cña ji'i̱ Tíquico cha' tsaa yu ca quichi̱ Efeso.

¹³ Nu lo'o ca̱a̱ nu'u̱ ca nde, ca̱lo'o ji'i̱ capa jna' nu nguxtyanu na' to' tyi Carpo ca quichi̱ Troas, lo'o jua'a̱ lcaa quityi 'na ca̱lo'o nu'u̱ ji'i̱, cha' tiji̱' tsa ti' na' ji'i̱ quityi nu nguscua na' lo.

¹⁴ Alejandro, nu cuityi chcua̱ bi' ni, lye tsa ngua'ni lya' ti' yu 'na; cuxi tsa cña ngua'ni yu lo'o na'. Cua jlo ti' ycui' nu Xu'na na lcaa cha' bi', jua'a̱ tya ta Ni cha' cuxi ji'i̱ yu bi'.

¹⁵ Pana tii ti' nu'u̱ cha' ná tacu̱' nu Alejandro bi' cha' jinu'u̱, nu lo'o ta nu'u̱ cha' tso'o ji'i̱ ycui' Ndyosi lo'o ñati̱.

¹⁶ Lo'o nguta'a̱ na' slo ngu' tisiya clyo, ni sca ñati̱ ná nguxtyucua ngu' 'na li', cha' ngusna ngu'; bi' cha' ndijña na' ji'i̱ ycui' Ndyosi cha' cui'ya Ni cha' clyu ti' ji'i̱ ngu' bi'.

¹⁷ Nguxtyucua ycui' nu Xu'na na jna' li', cua nda Ni juersa 'na cha' tya ngulu'u la na' cha' tso'o ji'i̱ Jesucristo ña'a̱ cuayá' ndyuna lcaa ñati̱ xa' tsu' nu ndi'i̱ ca nde. Cua ngua'a ycui' Ni 'na ji'i̱ cuichi tyaala bi'.

¹⁸ Lo'o jua'a̱ tya cua'a Ni jna' ji'i̱ lcaa lo cha' cuxi nu tyacua na' ji'i̱; jlo ti' na' cha' ña'a̱ ti tya ña'a̱si̱i̱ Ni jna', cha' tso'o ti tyalaa na' su nclyo ycui' Ndyosi cña. Nga'aa tye tsa̱ cha' cua'ni tlyu na ji'i̱ ycui' Ndyosi ca bi'. Jua'a̱ caca cha' tu'ni.

Ngusalya' Pablo lo'o ngu'

¹⁹ Ta nu'u̱ xlyo ni'i̱ ji'i̱ Prisca, lo'o ji'i̱ Aquila, lo'o ji'i̱ lcaa ngu' ca to' tyi Onesíforo cuentya jna'.

²⁰ Ndyanu Erasto ca quichi̱ Corinto, lo'o jua'a̱ cua nguxtyanu na' ji'i̱ Trófimo ca quichi̱ Mileto cha' quicha ti' yu.

²¹ Quiñi clya tyucui̱i̱ jinu'u̱ cha' tyalaa nu'u̱ ca nde lo'o bilya xana tyempo tlya'. Lcaa ngu' re nda ngu' xlyo ni'i̱ jinu'u̱, lo'o Eubulo, lo'o Pudente, lo'o Lino, lo'o Claudia, lo'o lcaa tya'a ñati̱ ji'i̱ Jesucristo quichi̱ re.

²² Tyanu Xtyi'i ycui' Jesucristo lo'o nu'u̱, cha' taca caca nguula la ti' tyiquee nu'u̱. Ña'a̱ ti cua'ni ycui' Ndyosi cha' tso'o lo'o lcaa cu'ma̱. Jua'a̱ caca cha' lacua.