2 TIMOTEO 3 - Chatino Tataltepec

Tyempo cuxi nu caca lo'o cua tye ti chalyuu

¹ Culacua tso'o xi ti' nu'u̱, Timoteo; nu lo'o cua tye ti chalyuu, li' lye tsa caca cha' ji'i̱ ngu' xqui'ya quiña'a̱ tsa cha' cuxi.

² Tyempo nde loo la, li' tyi'i̱ tsa ngu' cuxi: masi ngu' nu sca ti cña ji'i̱ ycui' ca ngu' cube ti', masi ngu' nu tyaca'a tsa cñi ji'i̱, masi ngu' nu tyixi tsa cua'ni lo'o tya'a ngu', masi ngu' nu nti' cha' tlyu tsa ycui' ca ngu', masi ngu' nu suba' tsa chcui' ji'i̱ ycui' Ndyosi, masi ngu' nu ná taquiya' ji'i̱ sti ngu', ni ji'i̱ xtya'a̱ ngu', masi ngu' nu ná tya xlya'be ji'i̱ ycui' Ndyosi, ni ji'i̱ tya'a ñati̱ ngu', masi ngu' nu ná tyaja'a̱ cua'ni chi̱ ngu' loo ycui' Ndyosi tsiya' ti,

³ masi ngu' nu ná ntsu'u tyiquee ña'a̱ ngu' ji'i̱ tya'a ngu', masi ngu' nu ná cui'ya cha' clyu ti' ji'i̱ tya'a ngu', masi ngu' nu lye tsa chcui' cuentyu ji'i̱ tya'a ngu' lo'o xa' ñati̱, masi ngu' nu ná tyaja'a̱ cua'a ji'i̱ ycui' ca ngu' cha' nti' ngu' cua'ni ngu' lcaa cha' cuxi nu ndiya ti' ngu' cua'ni ngu', masi ngu' nu tyaala tsa cua'ni, masi ngu' nu ná ndiya ti' tsiya' ti ni sca cha' tso'o,

⁴ masi ngu' nu nñilo'o ji'i̱ tya'a tso'o ti ngu', masi ngu' nu ná cube ti' tsiya' ti' si lye tsa ndyu'ni tyucuaa ti' ji'i̱ tya'a ngu'; cua'ni ngu' cua ña'a̱ ca cha' cuxi nu jña cresiya ji'i̱ ycui' ca ngu', cha' nga'aa nti' ngu' bi' taquiya' ngu' ji'i̱ ycui' Ndyosi.

⁵ Na cuiñi ti lcaa ngu' bi' lo'o cua'ni tlyu ngu' ji'i̱ ycui' Ndyosi, cha' ná ndaquiya' ngu' bi' ji'i̱ cha' ji'i̱ Ni tsiya' ti. Xtyanu nu'u̱ ji'i̱ lcaa ngu' bi'.

⁶ Lo'o jua'a̱ ntsu'u xi ngu' cuxi bi' nu nñilo'o ji'i̱ ñati̱, nu ndya'a̱ ne' ni'i̱ ji'i̱ ñati̱ cha' culu'u ngu' cha' cuiñi ti ji'i̱ ngu' cuna'a̱ nu ná nclyacua tso'o ti'. Na tonto tsa ngu' cuna'a̱ bi', cha' ntsu'u tsa qui'ya ji'i̱ ngu', cha' nti' tsa ngu' xñi ngu' ji'i̱ cua ña'a̱ ca cha' cuxi.

⁷ Nti' tsa nu ngu' cuna'a̱ bi' ca tsa'a̱ ngu' sca cha', pana ná nchca ca cuayá' ti' ngu' ni sca cha' liñi.

⁸ Ñi'ya̱ ngua ti' jyo'o Janes lo'o jyo'o Jambres, nu ngu' cucha'a̱ nu ngusu̱u̱ tya'a lo'o jyo'o Moisés nu ngua sa'ni, jua'a̱ nti' nu ngu' cuxi bi'; bi' cha' nxu̱u̱ tya'a ngu' lo'o lcaa cha' liñi. Nga'aa nchca culacua tso'o ti' ngu', cha' ná jlya ti' ngu' bi' ji'i̱ Jesús tsiya' ti.

⁹ Pana ná talo tyiquee ñati̱ tyu̱u̱ tsa̱ ji'i̱ cha' cuxi nu ndyu'ni nu ngu' cuxi bi'. Ñi'ya̱ lo'o ngua cuayá' ti' ngu' sa'ni cha' cuiñi tsa jyo'o Janes lo'o jyo'o Jambres nu ngua li', la cui' jua'a̱ ca cuayá' ti' lcaa ñati̱ cha' xcui' na nñilo'o ti ngu' cuxi bi' ji'i̱ ñati̱ chalyuu juani.

Chaca quiya' nclyo Pablo cña ji'i̱ Timoteo

¹⁰ Lo'o nu'u̱ ni, Timoteo, jlo ti' na' cha' ná ndu'ni nu'u̱ ñi'ya̱ nu ndu'ni nu ngu' cuxi bi'. Stu'ba ti nti' nu'u̱ lo'o na', bi' cha' ndu'ni nu'u̱ ñi'ya̱ nu ngulu'u na' jinu'u̱; ndyu'ni nu'u̱ cña ñi'ya̱ nu ndyu'ni na' cña, cha' jlya ti' nu'u̱ cha' ji'i̱ Jesús ñi'ya̱ jlya ti' na' ji'i̱. Cua na'a̱ nu'u̱ cha' ndalo tyiquee na' ji'i̱ ñati̱, cha' ntsu'u tyiquee na' ña'a̱ na' ji'i̱ ñati̱, cha' ndalo na',

¹¹ masi lye tsa ndyu'ni lya' ti' ngu' 'na, masi quicha ti' na'. Cua jlo ti' nu'u̱ ñi'ya̱ ndalo na' ca quichi̱ Antioquía, ca quichi̱ Iconio, ca quichi̱ Listra, nu lo'o ngua'ni lya' ti' ngu' 'na ca bi'; pana cua ngulo ycui' nu Xu'na na 'na ji'i̱ lcaa cha' cuxi bi'.

¹² Chañi cha' xcube' ñati̱ ji'i̱ lcaa tya'a na nu nti' na cha' caca lubii cresiya ji'na cuentya ji'i̱ Jesucristo.

¹³ Pana ngu' nu ndu'ni cha' cuxi ni, cua nscua cha' tya cuxi la cua'ni ngu' bi'; ngu' cuiñi ni, cua nscua cha' tya cuiñi la cua'ni ngu', jua'a̱ ña'a̱ ti tya jlya la ti' ycui' ca ngu' cha' cuiñi li'.

¹⁴ Pana nu'u̱ ni, ña'a̱ ti xñi tso'o nu'u̱ lcaa cha' nu ngua tsa'a̱ nu'u̱; na cua ngua cuayá' ti' nu'u̱ ji'i̱ cha' bi', cha' liñi laca bi'. Cua jlo ti' nu'u̱ tilaca laca nu ngulu'u cha' bi' jinu'u̱ tya clyo.

¹⁵ Tya cuañi' tsa nu'u̱ lo'o nguxana nu'u̱ ndyaca tsa'a̱ nu'u̱ lo quityi ji'i̱ ycui' Ndyosi; quityi bi' laca nu culu'u liñi ji'na ñi'ya̱ taca clyaá na ji'i̱ nu cuxi, si xñi tso'o na cha' ji'i̱ Jesucristo.

¹⁶ Ycui' Ndyosi ngua'ni cha' ngua'ya cha' hique ñati̱ chalyuu, cha' xcua ngu' tyucui cha' ji'i̱ Ni lo quityi bi', bi' cha' tso'o tsa si tya culu'u la na cha' nu nscua lo quityi bi' ji'i̱ ñati̱, cha' ca cuayá' ti' ngu' tyucui cha' ji'i̱ ycui' Ndyosi, cha' cua'a ji'i̱ ngu' lo'o ndyu'ni ngu' cha' cuxi. Culu'u quityi bi' ji'na ñi'ya̱ caca xñi tso'o na cha' ji'i̱ Ni chaca quiya', ñi'ya̱ caca ca tsa'a̱ na cha' cua'ni na xcui' cha' tso'o.

¹⁷ La cui' quityi bi' laca nu culu'u ji'i̱ lcaa tya'a na nu laca na ñati̱ ji'i̱ ycui' Ndyosi, ñi'ya̱ taca cua'ni tso'o na lcaa cña nu nda Ni ji'na cha' cua'ni na nde chalyuu.